Ba ve mbia kéza minenga akira

É daghe a tele a wunu ya palacio nge ki palais ya Jezreel, kéza Acab a yen afup viñedo nge ki vigne môr ézing a too éyôla naa Naboth. Acab a mbe é yi afup té, éde a nga dzeng naa a kus de ébe Naboth. Ve Naboth éé nga kumu ki de kuan amu atsing Jehôva é nga dzô naa béé se ki kuane mefup be va ñong ane éligha da so ébe bésaa. Ye wa tem naa, Acab a nga kang nkighane Naboth ? Kaa. Acab a nga bira wokh abé. A nga wokh ôlun ya ke kuiñ éé nga kumu ki fe kuiñ édzina deñ a tan, a nga tep fe naa a dzi.

Mbimbia kéza minenga Jezabel, a nga dzô ñi naa : “Wa ô ne kéza ya Israel. Ô ne bele é dzôm sese wa kumu. Mamién ma ye wa ñong afup té ; ma ye tsié adzô té.” Éyong té éde a nga tsili beñabôrô be ya kisoan. Bekalare beté été, a nga dzô be naa be bôre Naboth naa a nga bong Nzame, akal té éde ba yiène ñe wiñ, bé lum ñe mekoa. Beñabôrô be nga bo é dzam sese Jezabel a nga lôm bo, éyong té a nga dzô Acab naa : “Naboth a wuang. Afup é ntoo éduè.”

Se Naboth étam éñe Jezabel a nga wiñ kaa étom. A nga wiñ abuiñ bôr befe be mbe bé dzing Jehôva. A mbe é kang biyema, ye bo abuiñ mbia be-mam mefe. Ve Jehôva a nga yen abé sese Jezabel a nga bo. Za dzam Jehôva a nga ye ñe bo ?

Niène Acab a nga wu, ane ndôma dzéñ Jehoram a nga tobe kéza. Éyong té éde Jehôva a nga lôm Jehu naa a ke ve Jezabel ya é mvong dzèñ akira.

Jehu a nga bet metua aluman wéñ été naa a ke a Jezreel, é vôm Jezabel a mbe a too. Jehoram ñ’a a nga ke fe ya metua aluman wéñ naa a ke tubane Jehu, ye sili ñe naa : “Ye mvoa é ne ézizang wa ya ma ?” Jehu a nga yalane naa : “Mvoa daa ye ki bo nté sese ñua, Jezabel, a tsin naa a bo é mam me na abé.” Éyong té Jehoram a nga dzeng naa a vut ye metua aluman wèñ nfa ye naa a tup. Jehu a nga lum Jehoram akong ya mbana wèñ. Johoram a nga wu.

Jehu a nga ke a palacio nge ki palais Jezabel. Éyong Jezabel a nga wokh naa a zu, ane a nga mana du asu, a mane kôm ési, ye yane ñe a tele a wunu nfeng. Éyong Jehu a nga siane, Jezabel a nga ve ñi mbôlô ya abian. Jehu a nga yônan be-bo bisèñ bèñ naa : “Wuaghane ñi a si !” Ane be nga wua Jezabel a wunu, éde a nga ku a si ye wu.

Niène dzam té é nga bo, Jehu a nga wiñ é boan 70 Acab, ye ve naa ékang Baal é man . Za ayeghle ô ne ñong ? Jehôva a yem mam meses. A ve fe é bôr ba bo mbia be-mam akira é tam da yiène.