Esdras a nga yeghle ayong Atsing Nzame

A kuane é lôrang mimbu 70 a téé ya éyong abuiñ Bisraelitas é nga dughan a Jerusalén, amben bevoo bézing a kuè be ngen be too abuiñ mevôm me ye édjié Persa été. Moan Israelita ézing ye été, a mbe éyôla naa Esdras, a mbe fara a nga yeghle Atsing Jehôva. Esdras a nga wokh naa ayong é mbe a Jerusalén déé nga bo ki Atsing mewokh. Ya dzam té, éde a nga kumu ke ô wéñ naa a ke be vole. Artajerjes kéza ya Persia a nga dzô ñe naa : “Nzame a nga ve wa fakh nfa ye naa ô yeghle Atsing dèñ. Ya dzam té, kele, ô ne fe ke ya é môr ase a kumu ke mina ñe.” Esdras a nga mane kôane é bôr besese be nga kumu bulan a Jerusalén. Éde, be nga yaghlane Jehôva naa nge a mbe be kale, éde fe be nga sum môra ayap ékena té.

Niène mengoan menii me nga lôt, be nga kuiñ a Jerusalén. Bitong bikéza bi ya kisoan be nga dzô Esdras naa : “Bisraelitas be va bo Jehôva melo, be va lughane fe ya é binenga ba sèhane bezame be ne bivus.” Za dzam Esdras a nga bo ? A nga kur mebong asu ayong, éde Esdras a nga yeghlane naa : “A Jehôva, ô va bo édedaa mbemba be-mam akal daa, ve bia, bi va bivus ya wa.” Éde ayong é nga dzôban, vedaa é nga tsini naa da bo é mam méé mbe ki mbeng. Ya dzam té, éde Esdras a nga top bemvene ya bekikh-minsang be mbe fas medzô meté. Mengoan melal me nga zu ôsu, be nga mane tsirane é bôr besese béé nga kumu ki lughu Jehôva.

Mimbu awôm-ya-mibèñ mi nga lôt. Tam té daa-daa ,éde fe be nga bera mane long ôngôô ya Jerusalén. Esdras a nga kôane ayong, é vôm bôr be nga bo bé kôane naa a lang ayong Atsing Nzame. Éyong a nga kuu abakh Atsing, ayong é nga tebe. Ane Esdras a nga lughu Jehôva, Bisraelitas ba fe, be nga bere mo ôyôp naa be lere naa ba, ba yebe fe do. Éyong té, Esdras a nga lang ya ve ayilgha Atsing, ayong é nga tugha yem bèè. Be nga mem naa be nga bera ke Jehôva ôyap, éde fe, be nga yi. É môs ô mbe ôsu vaa, Esdras a nga tsini naa a lang be Atsing. Be nga ñu tang naa, avitsang tam, be nga yiane dzemle fet bibem. Ya dzam té, be nga sum naa ba kôman akal fet té.

Ébe melu zangbwa fet té é nga tobe, ayong é mbe édedaa mevakh, é nga ve fe Jehôva akiba akal é mbemba bidzi be nga fa. A kuane naa, béé ndaghe ki dzemle aval fet bibem té, a téé ya é tam Josué a mbe a tèè. Niène fet é nga man, ane ayong é nga kôane, ya yaghlane fe, dé dzô naa : “Jehôva, ô va kôre bia minkôm, ô ven bia bidzi éyang été, ya fe é mbemba si ñi. Ve, bia, bi nga bo wa melo abuiñ biyong. Amben ô nga lôm abuiñ bekulu-medzô naa be bame bia, biaa dzi ki bèè. Amben édo, ô va bo édzip. Tam ézing, wéé dzi ki vuène é ngiagh ô nga bo Abrahán. Bia kiagh wô naa, bia ye bo mewokh.” Ayong é nga mane tsili Atsing té, bitong bikéza, belevitas, ya befara baa fe, be nga san de.