Gabriel a ke fep María

Elisabet a mbe a bele avumane ya étong ngoan Judía ézing, é too éyôla naa María. A mbe a too a kisoan Nazaret ya Galilea. María a mbe naa a ye lughan ya José, éñi a mbe kapina. Éyong abum Elisabet a kuane é mbele mengoan mesaman, angele Gabriel a nga lereban ébe María. A nga dzô ñe naa : “Mbemba kiri, a María. Jehôva a va borane wa abuiñ.” María éé dzi ki wokh é dzam Gabriel a nga dzô ñe. Éde ñil té a nga kane ñe naa : “Wa ye ñong abum, wa ye fe byèñ moan fam, wa yiane ñe luè naa Yésu. A ye bo Kéza. Édjié dèñ da ye fe tobe mbembèè.”

María a nga dzô ñe naa : “Ve, me ne édun. Aval avé ma ye bele moan ?” Gabriel a nga yalane ñe naa : “Ébe Jehôva, dzam ézing déé se ki voar boban. Nfufup nsisim wa ye so ébe wa, wa ye fe bele moan. Évuvuman duè, Elisabet, ñe a ntoo fe abum.” Éyong té, éde María a nga yalane ñe naa : “Me ne ôloo Jehôva. É boghe ébe ma, aval ô va dzô.”

María a nga ke fep Elisabet é kisoan é mbe minkôô été. Niène a nga kuiñ, éde a nga barane ñe. Ane Elisabet a nga wôrane ane é moan a mbe ñe abum a yôô. Ane a nga tobe ndzalane ya nfufup nsisim, éde a nga dzô ñe naa : “María, Jehôva a va borane wa. É ne môra dzam naa é ñia Nti wom a zu ma fep, é nda dzam.” María a nga yalane naa : “Ma ve Jehôva duma ya n’nem ôse wom.” Éyong té, María a nga lighi mengoan melal ba Elisabet, ane a nga bulan é nda dzèñ a Nazaret.

Éyong José a nga wokh naa María a ntoo abum, aa nga kumu ki fe lughane ya ñe. Ve, angele a nga lereban ébe ñe ôyô, éde a nga dzô ñe naa : “Ô taa ko wong naa ô lughane ya ñe. Aa dzi ki bo é dzam é ne abé.” Éde José a nga lughan a María, a ken fe a ñe é nda dzèñ.