Yésu a bulan a dzôp été

Yésu a nga kôane ya betông béñ a Galilea. A nga ve be é môra nlôman wi : “Kenghan ya bo beyeghe, bôr be ye meyong mese. Yeghlane bo é mam mese me nga yeghle mina, ye du fe bo.” Éde a nga kiagh be naa : “Siman é dzam di, ma ye tobe ya mina.”

Niène Yésu a nga wômô, a nga lôt melu 40 é lereban ébe beyeghe béñ a Galilea ya Jérusalem. A nga ve be bura meyeghle ye bo fe abuiñ mekengha. Éyong té, Yésu a nga sughlane ke tobe nsama ya mintôô miéñ Nkôô bolivos nge ki bolivier. A nga dzô be naa : “Mii taa kôrô a Jérusalem. Tsinighane naa mia yane é dzôm Ésaa wom a nga kiagh.”

Mintôô miéñ mii dzi ki tugha wokh é dzam a nga kumu dzô. Éde be nga sili ñe naa : “Ye éyong wa tobe kéza ya Israel é kuihang ?” Yésu a nga yalane be naa : “Jehôva aa yi ki naa me tobe kéza éndagha. Ve, ébe avitsang tam, mia ye ñong nfufup nsisim wa ye mina ve ngu’u, ya bo bengañiè bam. Édeeng, kelane kanghle a Jérusalem, a Judea, a Samaria, ya minfa mi ya si mia dang ôyap.”

Éyong té éde Yésu a nga bere a dzôp, ye naa nkut ô nga dzip ñe. Beyeghe béñ be nga tsini naa ba daghe ô yôp, ve baa dzi ki fe ñe bera yen.

Éde beyeghe béñ be nga kôrô Nkôô bolivos ye bulan a Jérusalem. Ô wéñ, be mbe be bele fulu ya kôane nsama, ya yaghlan a mura édzina ya nda ézing ô yôp. Be mbe bé yane naa Yésu a dzô be é mam mefe ba yiène bo.