AYEGHLE 20
ZA 67 « Bômeghe adzô »
Édzing é tsinighe mia naa mi ke ôsu ye kanghle !
« Mbemba fuèñ a yiène tare tobe nkanghlan, ébe meyong mesese » (MARC 13:10).
É DZAM BIA YE YEN
Aval édzing da tsini bia naa bi kanghle mbemba fuèñ ye ayông ya n’nem ôsese.
1. Za dzam bi nga yeghe ésulan ye mbu 2023 ?
ÉSULAN ye mbu 2023a, bi nga bele nféféñ nwoghane mam ébe mam mézing ye bia bunu ye wokh mbemba mefuèñ nfa minkanghle miè. Éfônan, bi nga yeghe naa, niène ba ye mane tsam Babilonia nge ki Babylone n’nen, ôsu vèè, bôr bézing be ne bele maa ya tebe é ngam ayong Jehôva. Bi nga yeghe fe naa, atéé ye Ngoan awôm-a-mboo ye mbu 2023, baa ye ki fe sili bekare fuèñ be ye Édjié Nzame naa be mane kat é mam mesese be va bo minkanghle. Ye mintsenan mité mia ve naa ésèñ dèè é taa bera bo éban, nge ki naa, bi taa de bera bo ye avôô ? Momo !
2. Amu dzé ésèñ minkanghle dèè é ntoo édedèè éban kada môs ? (Marc 13:10)
2 É kada môs a lôt, ésèñ minkanghle dèè da bera bo édedèè éban. Amu dzé ? Amu naa, é tam é ligheyang kaa naa amanegha é so éé ntoo avitsang. Fasghan é dzam Yésu a nga dzô nfa éséñ minkanghle melu me y’asughlan (A lang Marc 13:10). Aval ane Matthieu ñe a nga kanghle fe de, Yésu a nga dzô naa mbemba fuèñ a ye tobe nkanghlan si se ngura kaa naa « amanegha » é so (Mat. 24:14). Bifiè bité bia tsinan amanegha ye mbia émo Satan di. Jehôva a topang « é môs ye awala » akal é mam me nkune boban (Mat. 24:36 ; 25:13 ; Bisè mintôl 1:7). É môs ôsese wa lôt, wa ve naa bi yir môs té bébéñ (Bero. 13:11). Nté té, bia yiène ke ôsu ya kanghle yakekuiñ amanegha da so.
3. Dzé da tsini bia naa bi kanghle ?
3 Bia besese bi bele nsili bia yiène fas wa daghe ésèñ minkanghle dèè. Nsili té ô ne naa : Amu dzé bia kanghle mbemba fuèñ ? Éyalan é ne ébubu. Bia kanghle amu édzing. Abim bia bo ésèñ minkanghle dèè, da lere édzing dèè ; édzing dèè akal mbemba fuèñ, édzing dèè akal é bôr bia kanghle, a dang-dang édzing dèè akal Jehôva ye éyôla déñ. Nyeneghane kada dzam ye été.
BIA KANGHLE AMU BIA DZING MBEMBA FUÈÑ
4. Aval avé bia ñong mam éyong bia wokh mbemba fuèñ ?
4 Tamane siman é dzam mi nga wôran éyong mi nga wokh mbemba fuèñ. A ne bo é moan a byale é nda-bôr dzenan, nge ki môr a va ve mia ésèñ mia bira yi. Kaa bisô naa, mi nga kômô dzigha kap mbemba fuèñ té ye é nda-bôr dzenan ye fe memvuiñ menan. Ye aval dzam té éde mi nga wôran éyong mi nga wokh é fuèñ da dang mbeng ye mefuèñ mesese ; mbemba fuèñ ye Édjié Nzame ?
5. Za dzam ô nga wôran éyong ô nga tare wokh é mbemba fuèñ a so a Bible été ? (A daghe fe bivaghle).
5 Simeghan é dzam ô nga wôran éyong ô nga tare wokh é mbemba fuèñ a so a Bible été. Ô nga yem naa, Ésaa wiè a ne a dzôp été a dzing wa, a kômô naa ô bo môr mboo ye bebo bisèñ béñ, a nga kiagh naa a ye mane ye mintèñ ye fe mindzukh, naa ô bele ôyane ya bera yen é bôr be wuhang wa, nféféñ éning ye abuiñ mam mefe (Marc 10:29, 30 ; Jean 5:28, 29 ; Bero. 8:38, 39 ; Mel. 21:3, 4). Be bebela beté be nga vole wa n’nem (Luc 24:32). Ô nga dzing é mam ô nga yeghe, éde ya dzam té, wéé mbe ki baghlé mbemba be bebela beté akal wamièn étam ! (A vaghane ye Jérémie 20:9).
Éyong bi nga tare wokh mbemba fuèñ, bii mbe ki baghle mbemba be bebela beté akal bia bebién étam ! (A daghe abong 5)
6. Za ayeghle mia ñong ya éfônane Ernest ba Rose ?
6 Fasghan éfônan di. Moadzang ézing a too éyôla Ernestb a nga dzimle ésaa éyong a mbe a bele awôm mimbu. Ernest a dzô naa : « Me mbe méé sili naa : ‘Ye a ke-hang a dzôp été ? Nge ki naa, ye a wu-hang mbèmbèè ?’ Me mbe méé kômô é boan be ngen be bele ésaa. » Abuiñ biyong, Ernest a mbe é ke é song ésaa, a kur mebong ye yaghlan é dzô naa : « Éngôngoo a Nzame, ma kômô yem é vôm tare a ne. » Mimbu 17 a kuane naa ésaa Ernest a wu-hang, be nga sili ñe nge a kômô bo ayeghe Bible, ane a nga yebe dzam té avôô. A nga bira wokh n’nem mesan éyong a nga yem naa, bewu baa yem ki fe dzam ézing, fave ane be bôô ôyô n’nen, ye naa, Bible a kiagh awômô bewu akal melu ma zu (Eccl. 9:5, 10 ; Bisè mintôl 24:15). Asughlan, a nga biñ biyalane bi ye minsili mi nga zu mia ndaghle ñe aayap ! Ernest a nga bira san amu be bebela be ya Bible a mbe é yeghe. Rose, ngal, ñe a nga sum fe naa a yeghe Bible ye ñe, éde, ñ’a fe a nga dzing a wokh mbemba fuèñ ye Édjié Nzame. Mbu 1978 éwô be nga duban. Be nga dzigha kap é mam be nga yeghe ya menda mebôr meba, memvuiñ, ye é bôr besese be mbe béé kômô be bèè. Asughlan, Ernest ba Rosa be nga vole bôr a lôr 70 a vem yakekuiñ nduban.
7. Za dzam da boban éyong bia dzing é mam bia yeghe a Bible été ? (Luc 6:45)
7 Bebela, éyong bia dzing é dzam bia yeghe a Bible été, bia wôrane naa, bia yiène de kanghle môr asese (A lang Luc 6:45). Bia wôran é dzam beyeghe Christ be ye ntet mimbu ôsua be nga wôran, éyong be nga dzô naa : « Bii se bo kaa kobe é mam bi nga yen ye wokh » (Bisè mintôl 4:20). Bia bira dzing é mam bia yeghe a Bible été, éde bia kômô de kap ye abim bôr ésese bi ne de bo.
BIA KANGHLE AMU BIA DZING BÔT
8. Dzé da tsini bia naa bi kanghle é bôr bevoo mbemba fuèñ ? (A daghe nkaalé « A dzing é bôt bevoo—Da ye wô vole a bo beyeghe ») (A daghe fe évaghle).
8 Bia dzing bôr ane Jehôva ba é Moan wéñ (Mink. 8:31 ; Jean 3:16). Bia kué fe é bôr be ne « kaa Nzame » ye é bôr be ne « kaa ôyane » éngôngoo (Beéph. 2:12). Be ne ndzalane ye mindzukh mi ye éning, éde, bia bi bele é dzôm é ne be kôre ; mbemba fuèñ ye Édjié Nzame. Amu bia dzing be ye kué be éngôngoo, éde bia kômô bo é dzam ésese bi ne bo, naa bi kanghle be mbemba fuèñ. Fuèñ té, é ne dzale min’nem miaba ye ôyane, a vole be naa be bele éning da dang mbeng éndagha, ye ve be maa ya bele « ña éning », da yili naa, éning é ne mbèmbèè a Paradis Nzame a kiagh bia (1 Tim. 6:19).
Édzing dèè ye n’nem éngôngoo bi bele akal bôt, bia tsini bia naa bi ve mengu’u mesese bi ne ve, naa bi kanghle be mbemba fuèñ (A daghe abong 8)
9. Za mbame bia ve bôr nfa melu ma zu, amu dzé ki ? (Ézéchiel 33:7, 8)
9 Édzing bi bele akal bôt, da tsini fe bia naa bi bame bo, nfa amanegha ye mbia émo é ntoo bébéñ (A lang Ézéchiel 33:7, 8). Bia wôrane n’nem éngôngoo akal bôr besese, amben bôr be ye menda mebôr mèè baa sèhane ki Jehôva. Abuiñ bôr ba wulu bining biaba kaa yem é dzam da zu ; « bitsible binen aval daa be ki tare boban atéé ye éyong éning é nga tare, yazukuiñ éndagha, kaa, daa ye ki fe bera boban » (Mat. 24:21). Bia kômô naa be yem é dzam da ye boban é tam nkighane nsang ; naa évus n’yebe da ye tobe ntsaman, ye naa, mbia émo Satan di, daa fe da ye tobe nstaman a Armagedón (Mel. 16:14, 16 ; 17:16, 17 ; 19:11, 19, 20). Bia yaghlane naa, abim bôr ésese é ne de bo, é yebe mbame bia ve be, ye zu kuane bia nfufup ékang été éndagha. Ve, dzé da ye lôran ye é bôr baa yebe ki mbame bia ve bo éndagha, a lang été bôr be ye é nda-bôr dzèè ?
10. Amu dzé é ne édedèè éban naa bi ke ôsu ye bame bôr nfa é mam ma zu ?
10 Ane bi va yen de ayeghle ô mvus, éyong ézing nkômane Jehôva ô ne a kôre é bôr ba ye ve mebun ébe ñe, éyong ba ye yen ane Babilonia nge ki Babylone n’nen a tobe ntsaman. Nge éñe é ne nèè, é ne éban naa bi ke ôsu ye bame bôr nfa é dzam da zu. Fasghan é dzam di : É mam bia dzô be éndagha, me ne be ve dzam ya siman éyong tam té da ye kuiñ (A vaghane ye Ézéchiel 33:33). Éyong ézing ba ye siman, mbame be nga wokh ye bia, ye bele nkômane ya sèhane Jehôva kaa naa tam é mane lôt. Ane é nga boban, éyong é môr a mbe éé baghle Philippe a mbokh, a nga tsen ôsimane wéñ fave éyong« môra nfonghane si, ô nga boban », éyong ézing, bôr bézing ye éba baa yebe ki mbame bia ve be éndagha, ba ye tsen ôsimane wôba, niène Babilonia nge ki Babylone n’nen a ye tobe ntsaman (Bisè mintôl 16:25-34).
BIA KANGHLE AMU BIA DZING JEHÔVA YE ÉYÔLA DÉÑ
11. Aval avé bia ve Jehôva duma, ngang, ya ngu’u ? (Melere 4:11) (A daghe fe bivaghle).
11 Akalgha da dang éban bia kanghle de mbemba fuèñ é ne amu bia dzing Jehôva Nzame ye nfufup éyôla déñ. Bia yen ésèñ minkanghle dèè ane aval bia lughu é Nzame bia dzing (A lang Melere 4:11). Bia yebe ye n’nem ôsese naa besôsôe bebo bisèñ Jehôva Nzame, ba yiène ñe ve duma, ngang ye fe ngu’u. Bia ve ñe duma ye ngang éyong bia kap ye é bôr bevoo, mendem ma ban naa, éñe a « nga vele mam mesese » ye naa, amben éning dèè, da so ébe ñe. Bia ve ñe ngu’u ; é ngu’u dzèè, éyong bia belane é tam, ngu’u ye é biôm bia, naa bi bo ésèñ minkanghle abim asese bi ne de bo, aval étéñ dèè da likh bia de (Mat. 6:33 ; Luc 13:24 ; Becol. 3:23). Naa é bo bia ébubu a wokh, bia dzing bia kobe adzô é Nzame bia dzing. Bia wôrane fe naa, bia yiène kobe ye é bôr bevoo adzô éyôla déñ, ye aval Nzame a ne. Amu dzé ?
Bia ve Jehôva é ngu’u dzèè éyong bia belan é tam, ngu’u, ye é biôm bia naa bia kanghle abim bi ne de bo, aval étéñ dèè da likh bia de (A daghe abong 1)
12. Aval avé bia fubu éyôla Jehôva ye minkanghle mia ?
12 Édzing dèè akal Jehôva, da tsini bia naa bi fubu éyôla déñ (Mat. 6:9). Bia kômô bele é ngap dèè ébe ésèñ ya fubu éyôla déñ, ébe é mvîn Satan a nga wua de, ya mbimbia minèè miéñ (Atar. 3:1-5 ; Job 2:4 ; Jean 8:44). Éyong bia kanghle, bi bele nkômane ô ne ngu’u naa bia tebe nfa Jehôva, ye dzô é bôr ba kômô bia bèè, é bebela a tsinane ñe, ye aval môr a ne. Bia kômô naa bôr besese be yem naa, é fulu é tele ôsu ébe mefulu mesese méñ é ne édzing, naa aval a djié é ne sôsôe ya tetele, ye naa, Édjié déñ é nkuna zu man ye mindzukh misese, ye ve naa mvoa ye mvom be bo si se ngura (Bya 37:10, 11, 29 ; 1 Jean 4:8). Éyong bia dzô bôr mam mesese meté nfa Jehôva, bia fubu éyôla déñ. Bi ne fe mesan amu bia bo é dzam Bengaa Jehôva ba yiène bo. Aval avé bia bo de ?
13. Amu dzé da ve bia mesan naa bi baghe éyôla Jehôva ? (Esaïe 43:10-12)
13 Jehôva a nga luè bia naa bi bo « bengaa » béñ (A lang Esaïe 43:10-12). É ntoo ayôm mimbu, é kalare a nga so ébe Tsîn Ékôan a nga dzô naa : « É ngang da dang bi ne vakh de, é ne naa, be luè bia naa Bengaa Jehôvac. » Amu dzé é ne aval té ? Nñonghan éfônan. Tamane simane naa, ba bôre mia adzô naa mi bohang é dzam é ne abé. Éndagha, mia yi naa môr ézing a zu dzô é bôr bevoo naa, ébôra té é ne minèè, ye naa, mi ne mbemba môr éé se ki vaghle bo aval dzam té. Mia ye top za ? Bebela a ne naa, mia ye top é môr mia tugha yem, éñi mia tobe ñe mebun, ye éñi a bele mbemba éwogha, nfa ye naa é bôr bevoo be bune ñe. Éyong Jehôva a nga top bia naa bi bo Bengaa béñ, a nga lere naa a tugha bia yem, ye naa, a tobe bia mebun nfa ya bo ngañiè naa, éñe étam a ne ña Nzame. Da ve bia mesan naa bi ne Bengaa béñ, aval da ve naa, bia biñ biyong bisese bi ne bele nfa ya ve naa bôr be yem éyôla déñ, ye lere naa, mbia bemam mesese be nga kanghle nfa wéñ méé se ki bebela. Éyong bia bo de, bia lere naa, da yiène bia naa bi baghe éyôla Bengaa Jehôva, ye naa, da bere bia meban ôyô naa bi baghe éyôla té ! (Bya 83:18 ; Bero. 10:13-15).
BIA YE KE ÔSU YA KANGHLE YAKEKUIÑ AMANEGHA
14. Za mbemba bemam me ne boban melu ma zu ?
14 Bi nga kômôyang bira yen é mam me ne boban melu ma zu ! Ye éborane Jehôva, bi bele ôyane naa, abuiñ bôr befe ba ye yebe bebela kaa naa bitsible binen bi sum. Ya fe naa, bi ne mevakh naa, amben bitsible binen été, da yili naa é tam da dang ndzukh nlang ye éning moan môt, abuiñ bôr be ne kôre mbia émo Satan été ye zu lughu Jehôva ya bia ! (Bisè mintôl 13:48)
15-16. Za dzam bia yiène tsini naa bia bo, ye naa, yakekuiñ ôden ?
15 Nté té, bi bele ésèñ é ne édedèè éban ya bo. Aval ésèñ biaa ye ki fe bera bo tam éfe. A kanghle mbemba fuèñ ye Édjié Nzame si se ngura é ne bia môra ngang. Tam dzaa-dzaa té, bia yiène tsini naa bia bame bôr nfa é dzam é nga zuang bo. Bôr ba yiène yem naa amanegha ye mbia émo di é nga zuang mbii. Ya dzam té, éyong é môs nkighane nsang wa ye so, bôr ba ye yem naa, é fuèñ da so ébe Jehôva Nzame éde bi mbe bi kanghle (Ézéch. 38:23).
16 Éde, za dzam bia yiène bo ? Amu édzing bi bele ; édzing akal mbemba fuèñ, édzing akal bôt, édi da dang, édzing akal Jehôva ye éyôla déñ, bia ye tsini naa bia kanghle ye n’nem ôsese, avôô, ya fe ayông, yakekuiñ Jehôva a ye dzô naa : « A manang ! »
ZA 54 « Zen éde nyi »
a Ésulan ye mbu, é nga boban é Ngoan awôm é too melu 7 ye mbu 2023, a Nda ésesang Bengaa Jehôva ye Newburgh,a Nueva York, Estados Unidos nge ki New York, États-Unis. Be nga lere ésesang té ngura a JW Éwala bingengeng. Étun 1 é nga lôt é Ngoan awôm-a-bèè ye mbu 2023, étun 2 é Ngoan ôsua ye mbu 2024.
b A daghe nlô adzô « La Biblia les cambió la vida : Me impresionaron las respuestas claras y lógicas de la Biblia nge ki La Bible transforme des vies : J’étais impressionné par les réponses claires et logiques de la Bible », é nga kuiñ a La Atalaya, 1 de febrero de 2015 nge ki La Tour de Garde, 1er février 2015.