A yeghe aval ô ne ve é bôr bevoo mbemba melepgha

1. Beza ba yiène ve melepgha ? Vakh ayilgha.

YE WA dzing wa ve é bôr bevoo melepgha ? Bôr bézing ba wôrane mevakh éyong ba lep. Éba bevoo, é ne be ayèñ a ve melepgha, ya naa, dzam té déé se ki be ébubu. Aval ése é ne bo, bia bese bia yiène ve melepgha biyong bizing. Amu dzé ? Amu Yésu a nga dzô naa, ba ye yem beña bekristen bèñ amu édzing, ba leran bevoo ya éba bevoo (Jean 13:35). Ngura aval bi ne leran édzing bevoo ya éba bevoo, a ne éyong bia ve é bôr bevoo melepgha éyong ba yi mo. Éfiè Nzame da dzô naa, « mbemba angom » da so ya « melepgha me ne bebela » (Mink. 27:9).

2. Za dzam bemvene ba yiène tobe nkoghane naa ba bo, amu dzé ki ? (A daghe fe nkaale « Melepgha akal ésulan ye ézizang sono »).

² Bemvene ébe ba yiène dang tobe nkoghane naa ba ve é bôr bevoo mbemba melepgha. Ngalane Yésu, Jehôva a tele befam beté nfa ye naa be wulu ékôan (1 Pierre 5:2, 3). Aval évoo ba bo do, a ne éyong ba belane melepgha me ne tsîn a Biblia été, ngalane mintun ba ve ékôan. Ba yiène fe ve ntôma ôsese ye été melepgha, ya ke kuiñ mintôma mi ne naa, mi kehang abeng ôyap. Za aval bemvene, ya bia bese bi ne ve mbemba melepgha ?

3. (a) Aval avé bi ne yeghe naa bi ve é bôr bevoo mbemba melepgha ? (Esaïe 9:6 ; a daghe fe nkaale « Vughe éfônane Yésu éyong wa ve melepgha »). (b) Za dzam bia ye yen ayeghle di été ?

³ Bi ne yeghe abuiñ mam nfa ya ve mbemba melepgha éyong bia yeghe bifônane Biblia a tu, a dang-dang édi Yésu. Aval évoo Biblia a luè ñe é ne « Mbemba n’ve melepgha » (a lang Esaïe 9:6). Ayeghle di, bia ye fas é dzam bi ne bo éyong ba dzaa bia naa bi ve melepgha, ya é dzam bi ne bo éyong bia yiène ve melepgha kaa naa be dzaa bia do. Bia ye fe yen éban é ne naa bi ve melepgha é tam da yiène ya aval da yiène.

ÉYONG BA DZAA BIA NAA BI VE MELEPGHA

4-5. Éyong ba dzaa bia melepgha, za nsili bia yiène tare bo bia bebién ? Vakh éfônan.

⁴ Éyong môr a dzaa bia melepgha, za dzam bia yiène tare bo ? Bi ne wôrane mevakh ya kômô vole étéñ té ébién. Ve, bia yiène tare sili bia bebién naa, ‘Ye me ne faa nkoghane naa ma ve melepgha ébe adzô di ?’ Biyong bizing, aval bi ne dang vole môr té, é ne a bo kaa ñe ve melepgha, vedaa, bi lere ñe é môr a ne nkoghane naa a ne ñe vole étéñ a tele.

⁵ N’tamane fas éfônane di. Tame simane naa, é ñu-mvuiñ mina ñe mia bira woghan a bili mbia ôkoan. Éyong té a kare wô naa, a sum-yang naa a dzeng aval a ye sèban, éde a sili wô naa, ô kare ñe ôsimane wiè ébe é biang wa wôrane naa, é ne bo mbeng akal dèñ. Amben wamièn wa yen naa ngura biang ézing éde da dang mvèñ, vedaa, waa bele ki n’yemane bedokira naa ô ne sèñ ôkoan té. Ya dzam té, é dzam ô ne bo nfa ye naa, ô vole ñu-mvuiñ, é ne naa, ô vole ñe naa a yen é môr a ne nkoghane naa a ne sèñ ôkoan té.

6. Za dzam é ne mbeng naa bi bo, kaa naa bi ve melepgha ?

⁶ Amben bia wôrane naa bi ne nkoghane naa bia ve melepgha ébe ngura adzô ézing, bi ne top naa bia yane ôyôm tam kaa ne bi yalan é môr a va zu bia dzaa melepgha. Amu dzé ? Minkana 15:28 a dzô naa : « É môr a ne sôsôe a binan kaa naa a yalan ». Za dzam bi ne bo nge bia tem naa bia yem éyalan ? Bi ne ñong tam naa bia ke bo mindzeng, a yaghlan, ye a binan. Éyong té, bia ye dang bele ndzi-n’nem naa, éyalane daa da vaghan ya aval Jehôva a wôran ébe adzô té. N’tamane yen éfônane nkulu medzô Natán.

7. Za ayeghle ô ne ñong ébe éfônane nkulu medzô Natán ?

⁷ É kobe ya nkulu medzô Natán, kéza David a nga dzô ñe naa a kômô long Jehôva templo. Étéñ té ébién, Natán a nga lep ñe naa a bo de. Ve, Natán a nga yiène ñong tam naa a tare ke sili Jehôva. Amu dzé ? Amu naa, Jehôva éé nga kômô ki naa David a long templo (1 Mila. 17:1-4). Aval ane dzam té da lere do, éyong ba dzaa bia melepgha, é ne mbeng naa bi bo « ôtong a kobe » (Jacq. 1:19).

8. Za akalgha afe bia yiène bera bo de nkee éyong bia ve melepgha ?

⁸ Akalgha afe bia yiène bo de nkee éyong bia ve melepgha, é ne naa, nge bi ven môr melepgha maa yiène ki, bi ne bele abim bidzô ya mindzukh môr té a ne ke bele ôsu, amu nkighan a va ñong. É ne bebela naa, é ne éban naa bi tugha yem tem kaa naa bi ve melepgha.

AVAL Ô NE VE MELEPGHA KAA NAA BE DZAA WÔ DO

9. Za dzam bemvene ba yiène tobe de ndzi-n’nem kaa naa be lep môt ? (Begalates 6:1).

⁹ Abuiñ biyong, bemvene ba yiène ve moadzang nge ki kal dzaa ézing melepgha, éyong a va ñong « abo-dulu é ne abé » (a lang Begalates 6:1). Atoan akal ayeghle ye éfus té da dzô naa, aval môr té « da ñong mbia zen, amben aa be ki ku a nsem n’nen été ». Nsonghane ba kômô wun ô ne naa bemvene be vole môr té, naa a tsini naa a wulu é zen ye éning é ne mbèmbèè (Jacq. 5:19, 20). Vedaa, nfa ye naa melepgha meba me bo mbeng, ba yiène tare tobe ndzi-n’nem naa môr té a va ñong faa abo-dulu é ne abé. Jehôva a likh naa, ñil môr ye ébe bia a ñong minkighane mi bele tsîn ébe ôbuale wèñ été (Bero. 14:1-4). Ve, nge bemvene be yen naa, moadzang a va bo é dzam é ne ndaman élar dèñ ya Jehôva, za aval be ne ñe ve melepgha ?

10-12. Za dzam bemvene ba yiène bo éyong ba ve melepgha baa dzi ba sili ? Vakh éfônan. (A daghe fe bivaghle).

¹⁰ Bemvene ba yiène ve melepgha kaa naa be dzaa be mo, ba tuban aval ndzukh ézing. Amu dzé ? Ntôô Pablo a nga dzô naa, môr a ne ñong mbia abo-dulu kaa naa émièn a yem do. Éde bemvene ba yiène tare kômane môr té nfa ye naa a ñong melepgha.

¹¹ A ve melepgha kaa naa be dzaa wô do, a ne fe ane wa béñ sam é si é ne alet. Kaa naa, mbéñ-bidzi a sum naa a béñ, a wôla tare kômane si. Dzam té da ve naa, si é bo ntaghan ye naa, é tobe nkoghan akal mvong. Tam té a ntoo béñ mvong. Asulghan, a ve mendzim a mvong ayôp naa a vole de naa é vem. Aval té daa-daa, kaa naa mvene a ve melepgha baa dzi ñe sili, é ne mbeng naa a tare kômane si, nfa ye naa a kobe. Éfônan, éyong a kobe ya moadzang é tam da yiène, mvene a ban ñe naa, a kômô ñe vole. Nge é môr a ve melepgha a bele éwôgha naa a ne édzing ya mbemba n’nem, da ye bo ébubu naa, é bôr bevoo be yebe melepgha a ve bo.

¹² Éyong ba lèè minlang mité, mvene a ne fe ve naa é bo é môr a ve melepgha ébubu naa a yebe mo, éyong a simane ñe naa bia besese bia bo bivus ye naa, bia yi naa be ve bia melepgha biyong bizing (Bero. 3:23). Ya é king é ne évuvuéñ ya fe édoa ngang, mvene a belane Mintsili mi ya Biblia naa a tugha ñe lere aval a va ñong abo-dulu é ne évus. Niène moadzang a mem naa a va ñong mbia abo-dulu, mvene a « béñ mvong » é lere ñe ya bifiè bi ne ébubu a wokh, é dzam a yiène bo nfa ye naa a kôm adzô té. Asughlan, mvene a « shuii mendzim » é saghe moadzang ya bebela, é yaghlane fe ba ñe (Jacq. 5:15).

13. Za aval bemvene be ne tugha yem nge é môr ba lep a wokh melepgha ?

¹³ Biyong bizing é dzam é môr a ve melepgha a dzô ya édi é môr a ñong melepgha a wokh, bi ne bo mam mebèñ ma selan. Za dzam bemvene be ne bo nfa ye naa, dzam té é taa boban ? Ya mbemba n’nem, bemvene be ne bo é môr ba lep minsili nfa ye naa be yen nge a tugha wokh melepgha be va ve ñe, ye naa, nge a yem é dzam a yiène bo nfa ye naa a dzale melepgha meté (Eccl. 12:11).

A VE MELEPGHA É TAM DA YIÈNE YE AVAL DA YIÈNE

14. Ye bia yiène ve melepgha éyong bia wokh ôlun ? Vakh ayilgha.

¹⁴ Bia besese bi ne bebo-bikop, ya dzam té biyong bizing bia besese bia dzô nge ki a bo é mam ma dzughu é bôr bevoo (Becol. 3:13). Éfiè Nzame da mem naa, abuiñ biyong, bi ne bo é mam ma likh naa é bôr bevoo be wokh abé (Beéph. 4:26). Ve, biaa yiène ki ve melepgha éyong bia wokh abé. Amu dzé ? Amu naa « meyèè moan môr maa so ki é sôsôe Nzame » (Jacq. 1:20). Nge bi ven melepgha éyong bia wokh ôlun, é ne ébubu naa, bi vane ve naa, mam me dang wu ntukh é zang bia, ya é môr a va likh naa bi wokh abé. Dzam té daa yili ki naa, biaa yiène ki dzô é môr a va ve naa bi wokh ôlun, é mam bia tem ye éma bia wôran. Vedaa, bi ne dang yem kobe ya môr té, éyong bia yane ya ke kuiñ n’nem wa silbane bia ôsi. Bi ne ñong ayeghle ébe éfônan Elihú, éñi a nga ve Job mbemba melepgha.

15. Za ayeghle bia ñong ébe éfônan Elihú ? (A daghe fe évaghle).

¹⁵ Ébe abuiñ melu, Job a nga dzeng naa a songhane bibôra memvuiñ mèñ be nga bo ñe. Elihú a mbe é bèè é dzam Job a mbe é dzô. Elihú a nga kuè Job éngôngoo. Ve, éyong Job a nga dzeng naa a lere naa éé mbe ki a bele bidzô, a nga dzô mam mézing nfa Jehôva méé mbe ki bebela. Dzam té a nga likh naa Elihú a bira wokh ôlun. Vedaa, Elihú a nga yane kaa naa a kobe, ye naa, éde a nga sili n’nem ôsi é lere édedaa ngang éyong a nga zu ve Job melepgha (Job 32:2 ; 33:1-7). Éfônan Elihú da lere bia é bebela ézing a ne bia abuiñ éban : Melepgha ma dang mbeng éyong ba ve me aval da yiène ya éyong da yiène, ya ngang ya édzing (Eccl. 3:1, 7).

TSINIGHE NAA WA VE YA YEBE MELEPGHA

16. Za ayeghle bia ñong ébe nten Bya 32:8 ?

¹⁶ Jehôva a dzô naa : « Ma ye wa ve melepgha ya é mis mam ébe wa » (a lang Bya 32:8). Dzam té da yili naa, a ye tsini naa a sukh bia asi. A se fave naa a ve bia melepgha, a vole fe bia naa bi dzale melepgha meté. A baalé mbemba éfônan akal daa ! Éyong bi bele maa ye a lep é bôr bevoo, bi ne vu Jehôva, bi bem é mis maa ébe bo, bi sukh fe be asi aval ésese bi ne de bo, naa mam me wulu be mbeng.

17. Aval avé bemvene ba ve naa bi wôran, éyong ba ve bia melepgha ma so a Biblia été ? Vakh ayilgha. (Esaïe 32:1, 2).

¹⁷ Ému a lôr melu ô mvus, é ne éban naa bi ve ya ñong mbemba melepgha (2 Tim. 3:1). Bemvene, ba ve melepgha me ne tetele ma so a Biblia été, be ne « ane atôtong mendzim é si é ne nkôt » (a lang Esaïe 32:1, 2). Memvuiñ ma yem é mam bia kômô wokh ve ba dzô bia é dzam bia yiène wokh, ba ve bia é das é ne ane bemanzanas nge ki bepomme be kông, bifela bi ne mboane ya miang » (Mink. 25:11). Bia besese, n’tsinighane naa bia yeghe aval bi ne ve ya ñong mbemba melepgha.