AYEGHLE 43
DZIA 41 A Nzame, bèèghe meyaghlan mam
A simane naa ô yaghlan akal é bôr bevoo
« A yaghlan akal bevoo ya éba bevoo [.. .] Meyaghlan me ndzaaghan sôsôe a môr, me bele édedaa ngu’u » (JACQ. 5:16).
É DZAM BIA YE YEN
Bia ye yen amu dzé é ne éban naa bi yaghlan akal bevoo ya éba bevoo ya é mam me ne bia vole naa bi bo do.
1. Aval avé bia yem naa meyaghlane maa me ne éban ébe Jehôva ?
MEYAGHLAN me ne édedaa mbemba das. Tame siman é dzam di : Jehôva a nga ve bangele bisèñ bizing (Bya 91:11). A nga kee fe é Ndôma dzèñ bura meyem (Mat. 28:18). Ve, nfa da daghe a bèè meyaghlan, ye a nga ve môr ézing ésèñ té ? Jehôva émién étam éñe a bèè meyaghlan. Jehôva, « Éñi a bèè meyaghlan », émién éñe a bèè meyaghlane maa (Bya 65:2).
2. Za éfônan ntôô Pablo a nga likh nfa a yaghlan akal é bôr bevoo ?
2 Amben bi ne kare Jehôva é mam me ne bia éban meyaghlan été, bia yiène fe yaghlan akal é bôr bevoo. Ntôô Pablo nge ki Paul a nga bo de. Éfônan, a nga tsili ékôan ya Efeso naa : « Ma tsini naa ma tu mina meyaghlane mam été » (Beéph. 1:16). Pablo a nga yaghlane fe akal bôr bézing. Éfônan, a nga dzô Timoteo naa : « Ma ve Nzame akiba, [.. .] kaa wa vuène tam ézing meyaghlane mam me ndzaaghane ma bo alu ya ômôs » (2Tim. 1:3). Pablo a mbe yaghlan akal mindzukh a mbe é tubane mio (2 Becor. 11:23 ; 12:7,8). Ve, a nga ñong tam naa a yaghlan akal é bôr bevoo.
3. Amu dzé bi ne bo bi vuène naa bi yaghlan akal é bôr bevoo ?
3 Biyong bizing bi ne vuène naa bi yaghlan akal é bôr bevoo. Amu dzé ? Kal dzaa ézing é too éyôla naa Sabrinaa a ve akalgha évoo. A dzô naa : « Bi bele édedaa abuiñ mam ye a bo éning bia ning ému. Bi ne fe bira bembe ébe mindzukh mia, dé vane likh naa bi yaghlane fave akal é mam bia bebién bia yi. » Ye dzam té da lôrane wa ? Nge éñe é ne naa, ayeghle di da ye wô vole. Da ye (1)lere amu dzé é ne éban naa bi yaghlan akal é bôr bevoo, ye (2)ve fe melepgha nfa aval bi ne de bo.
AMU DZÉ BIA YIÈNE YAGHLAN AKAL É BÔR BEVOO ?
4-5. Aval avé meyaghlane maa akal é bôr bevoo me bele « abuiñ ngu’u » ? (Jacques 5:16).
4 A yaghlan akal é bôr bevoo é « bele abuiñ ngu’u » (a lang Jacques 5:16). Ye a yaghlan akal é bôr bevoo é ne faa tsen dzam ézing nfa étéñ be tele ? Ôwé, é ne tsen dzam ézing. É yem naa avitsang tam ôsu, ntôô Pedro a nga ye ñe kat, Yésu a nga dzô naa : « Me va dzaa akal duè, nfa ye naa mebun muè me taa sibi » (Luc 22:32). Pablo ñe fe a mbe é yem naa meyaghlane me ne tsen mam. Ya ékoar-koat, éyong a mbe mbokh a Roma, a nga tsili Filemón naa : « Ma yane naa ngalane meyaghlane muè, ba ye me bera dughan ébe wa » (Philm. 22). Dzam té faa é nga boban. Pablo a nga dzigha kôrô mbokh, ane a nga tsini fe ya ésèñ minkanghle dèñ.
5 Ôwé, dzam té daa yili ki naa éyong bia yaghlane Jehôva, a ne naa, bia djié ñe naa a bo dzam té avôô. A ñu tang ébe é mam ma ve naa, bebo-bisèñ bèñ be yep. Biyong bizing a ñong fe nkighane naa a dzale é mam ba dzaa ñe. A yem dzam té é ne bia vole naa bi tsini naa bia yaghlane Jehôva mban ébe adzô ézing, bi likh fe do é mo mèñ (Bya 37:5 ; a daghe 2 Becorinthien 1:11 ya notas de estudio nge ki notes d’étude).
6. Aval avé a yaghlan akal é bôr bevoo é ne name é dzam bia wôran akal deba ? (1 Pierre 3:8).
6 A yaghlan akal é bôr bevoo da vole bia naa bi veme fulu ye a bele « n’nem éngôngoo » (a lang 1 Pierre 3:8). Fulu n’nem éngôngoo é ne a yem ndzukh é môr mboo a bele ye bele nkôman ye a vole ñe (Marc 1:40,41). Mvene ézing a too éyôla naa Michael a dzô naa : « Éyong ma yaghlan akal é bôr bevoo ya é mam ba yi, da likh naa édzing me bele akal deba é bera bo ngu’u. Ma wôrane naa, me ne be bébéñ amben bébién, baa yem ki de. » Mvene nfe a too éyôla naa Richard a bera lere abuan éfe. A dzô naa : « Éyong bia yaghlan akal môt, da veme nkôman bi bele naa bi vole môr té ».A koghle naa : « Éyong bia ve é môr bi va yaghlan akal dèñ avole a yi, ébe ngura nfa, bia vole naa meyaghlane maa akal dèñ me bele éyalan ».
7. Aval avé a yaghlan akal é bôr bevoo da vole bia naa bi yen mindzukh miaa, aval da yiène ? (Bephilippien 2:3,4). (A daghe fe bivaghle).
7 A yaghlan akal é bôr bevoo da vole bia naa bi yen mindzukh miaa aval da yiène (a lang Bephilippien 2:3,4). Éñil môr ye ébe bia, a bele mindzukh a tubane mio amu ye naa a too émo Satan éñe a djié (1 Jean 5:19 ; Mel. 12:12). Éyong bia vebane naa bia yaghlan akal é bôr bevoo, da simane bia naa, « ékôan bobedzang [baa] bese, daa da tubane fe mindzukh mivoo-mivoo » (1 Pierre 5:9). Mpwaghe mefan ézing a too éyôla naa Katherine a dzô naa : « A yaghlan akal é bôr bevoo da simane fe me naa, baa ba tubane fe mindzukh mivoo-mivoo ane ma. Dzam té da vole me naa me taa dang bembe ébe mindzukh miam mamién. »
A yaghlan akal é bôr bevoo da vole bia naa bi taa bembe fave ébe mindzukh bia bebién bia tubane mio (A daghe éfaghle 7)d
BA YI MEYAGHLANE MAA
8. Va éfônan é bôr bi ne furu meyaghlane maa été.
8 Beza bi ne furu meyaghlane maa été ? Bi ne yaghlan akal minsama mi-bôr. Éfônan, é bôr ba kôan, bitong éba bevoo lere ôsama a sikôlô nge ki ba yemle be naa be bo mbia be-mam, nge ki faa akal é bôr ba dzukh amu naa be ntoo min’nôm. Abuiñ bobedzang be ye Ékôan, ba zômô medzirane ma so bo ébe bôr be ye menda me-bôr meba, nge ki ébe bidjié bi ya si (Mat. 10:18,36 ; Bisè mintôl 12:5). Bobedzang bézing be va kôrô menda meba amu mintsiè mi poletik. Éba bevoo baa ba dzukh amu bibubua bi-mam. É ne bo naa, bia bebién biaa yem ki bobedzang ya bekal baa beté. Vedaa, éyong bia yaghlan akal deba, bia lere naa bia béé é mvena Yésu a nga ve naa, bi « dzinghane bevoo ya éba bevoo » (Jean 13:34).
9. Amu dzé bia yiène yaghlan akal é bobedzang be tele Ékôan Jehôva ôsu ya beyaa beba ?
9 Bi ne fe yaghlan akal é bôr be tele ôsu Ékôan Jehôva. Été, bia lang bobedzang be ye Tsîn Ékôan ya bevole beba, betebe ôsu be ye Mintem bikôan, é bobedzang be ne beresponsables Mintem bikôan, bedeghe bikôan, bemvene, ya bamvene. Abuiñ bobedzang be ye été, be bele meyep nté ba sèñ akal daa (2 Becor. 12:15). Éfônan, ndeghe bikôan ézing a too éyôla naa Mark a dzô naa : « Dzam daa ye éma ma dang me ndzukh, é ne a tobe bebyèñ bam be ntoo min’nôm ôyap. Bebèñ besese ba koan fe. Amben kal dzam baa n’nôm ba kale bo mbeng, ma tobe éwiñ amu ye naa méé se ki tobe ô wéñ nfa ye naa me bera be vole. » Amben biaa mane ki yem é mam mesese ma ve naa é bobedzang ba sèñ ngu’u beté be yep, ve é ne mbeng naa bi tsini naa bia yaghlan akal deba (1 Beth. 5:12,13). Bi ne fe yaghlan akal beyaa beba, amu ye naa ba tsini naa ba sukh beyôm beba, aval da ve naa be tsini ôsu ya meyem meba.
10-11. Ye Jehôva a dzing meyaghlan bia bo akal bobedzang ya bekal baa ? Va ayilgha.
10 Aval ane bi va yen do, bi ne sia yaghlan akal angôs bobedzang ya bekal baa. Éfônan, nge a ne naa biaa simane ki ngura môt, bi ne dzaa Jehôva naa a vole é bobedzang be ne mimbokh, nge ki naa a fong éba be va dzimle é môr ba dzing. Mvene ézing a too éyôla naa Donald a dzô naa : « Bi bele abuiñ bobedzang ya bekal baa ba lôr mindzukh aval da likh naa, biyong bizing bi bo meyaghlan me ne ane “ôtan” nfa ye naa bi mane tu é bôr besese ba dzukh ».
11 Ye Jehôva a dzing aval meyaghlane meté ? Ôwé ! Aval ése é ne bo, biaa mane ki yem mindzukh misese é bobedzang baa be ye Ékôan ba tubane mio. Éde, amu bi ne kaa mane yem é mam é bobedzang baa ba yi, ya dzam té bi ne dzaa Jehôva mam akal deba meyaghlan été (Jean 17:20 ; Beéph. 6:18). Aval meyaghlane meté ma tugha lere naa bi « bele édzing akal Ékôan bobedzang » (1 Pierre 2:17).
ÉYONG BIA YAGHLAN AKAL BÔR BÉZING
12. Aval avé é ne bia vole a tugha yem daghe naa bi tu mingura mi-mam meyaghlane maa ?
12 Tugha yem daghe. Se fave naa wa yaghlan akal minsama mi bobeñong ya bekal buè, é ne fe mbeng naa ô yaghlan akal bôr bézing ya biyôla bieba. Ye môr ézing ye ékôan duè a luman ôkoan ô ne kaa biang ? Ye étong mong ézing da wôran atekh amu naa é bong ba be-be ba wulu a sikôlô ba yemle ñe naa, a bo é mam me ne abé ? Ye mbyèñ ézing a ne mpwèñ, da bo ñe ndzukh naa a yale é moan wèñ « nsonghan ya melepgha Jehôva » été ? (Beéph. 6:4). Éyong wa tugha yem daghe, édzing duè ya n’nem éngôngoo wa wôran akal é bôr bevoo, ba ye dang bera bo ngu’u, ye wônô nkômane wiè naa ô yaghlan akal debab (Bero. 12:15).
13. Aval avé bi ne yaghlan akal é bôr bia bebién biaa be ki tare yen ?
13 A yaghlan akal é bôr bevoo ya biyôla bieba. Bi ne da bo amben akal é bôr biaa be ki tare tubane môs ézing. Éfônan, bi ne tem é bobedzang ya bekal baa be ne mimbokh mesi ane Crimea, Eritrea, Rusia, ya Singapur. A nden jw.org, ô ne kuane biyôla é bobedzang be ne mimbokhc. Ndeghe bikôan ézing a too éyôla naa Brian a dzô naa : « Me yene-yang naa éyong ma tsili éyôla é moadzang ézing a ne mbokh, me tu fe do ôyap ôyôp, da vole me naa me simane môr té ye naa, me tu ñe meyaghlane mam mamién. »
14-15. Za dzam bi ne bo nfa ye naa bi dzaa mingura mi-mam meyaghlane maa été ?
14 Dzaghe mingura mi-mam. Michael, éñi bi va tare tu ôyô a ve melepgha ma : « Éyong ma lang minlang bobedzang be ne mimbokh, ma dzeng naa me siman aval me ne wôran nge ma me mbaa me tele étéñ deba. Ma yem naa me ne bira yep akal ngal wom, me ne fe dzing ma bele ébanegha naa ba kale ñe mbeng. Dzam té da vole me naa, me bele mingura mi-mam me ne tu meyaghlane mam été akal é bobedzang be ne mimbokh be too minlughan. » (Behéb. 13:3, atoan).
15 Éyong bia siman aval éning ye kada môs é ne akal é bobedzang baa be ne mimbokh, é ne fe bia vole naa bi bele mingura mi-mam bi ne tu meyaghlane maa été. Éfônan, bi ne yaghlane naa bezima be baghle mimbokh be belane be ya añep, ya naa é bôr be bele édjié be likh naa bobedzang be ve Jehôva ékang a fili été (1Tim. 2:1,2). Bi ne fe yaghlane nfa ye naa ékôan é ne vôm té, é bele ngu’u ngalan é sôsôe éfônan é moadzang a ne mbokh, ya fe naa é bôr béé se ki bebunu be yen é mbemba fulu dèñ ye naa be wokh é fuèñ dzaa (1 Pierre 2:12). Ôwé, bebebela té bevoo-bevoo ba ye fe bia vole meyaghlane bia bo akal é bobedzang ya bekal baa ba tubane meboblan mefe. Éyong bia tugha yem daghe ye yaghlan akal é bôr bevoo bi tu biyôla bieba, bi dzaa fe mingura mi-mam meyaghlane maa été, bia lere naa bi ne « ndzalan ya édzing akal bevoo ya éba bevoo » (1 Beth. 3:12).
N’YENGHANE MEYAGHLANE MAA AVAL DA YIÈNE
16. Aval avé bi ne yen meyaghlane maa aval da yiène ? (Matthieu 6:8).
16 Aval ane bi yene-yang do, éyong bia yaghlan akal môr ézing, bi ne vole naa étéñ dèñ é tsen. Vedaa, bia yiène yen meyaghlane maa aval da yiène. Bia yiène simane naa éyong bia yaghlan, biaa kare ki Jehôva é dzam a ne kaa yem ; nge ki naa bia kare ñe aval a yiène bo mam. Jehôva a yem é mam bebo-bisèñ bèñ ba yi, kaa naa bébién nge ki bia, bii ñu de tang (a lang Matthieu 6:8). Éde, amu dzé bia yiène yaghlan akal é bôr bevoo ? Kaa lang mekalgha bi va yen ayeghle di été, bia bo fe do naa bi lere abim avé bia bis é bôr bevoo. Édzing da tsini bia naa bi yaghlan bevoo akal éba bevoo. Ye naa, dzam té da ve Jehôva n’nem mevakh a yen ane bebo-bisèñ bèñ ba vu édzing dèñ.
17-18. Bi ne fônane meyaghlane bia bo akal é bobedzang baa ya dzé ?
17 Amben meyaghlane maa ma yene naa maa vole ki nfa aval étéñ ézing da ke sughlan, ve ma lere édzing daa akal bobedzang ya bekal baa, ye naa Jehôva a yen fe do. Bi ne da vaghane ya éfônane di : Tame siman é mvong bôr ézing é bele boan bebèñ, moan fam ya momina. Éñi a ne moan fam a koan énong ayôp. Éyong té éñi a ne momina a dzaa ésaa wôba naa : « Éngôngoo, boghe dzam akal é ndôm dzam. A bira koan ! » Ésaa a yem é dzam a yiène bo ; a dzing é ndôma dzèñ, a kale fe ñe mbeng. Vedaa, abaalé mevakh ésaa té a wôran éyong a yen naa ômômoan wèñ, wa bira bis ndôm ya ke kuiñ a dzaa ésaa naa a vole ñe.
18 Dzam té éde Jehôva a saghe bia naa bi bo ; naa bi bis é bobedzang baa ye yaghlan akal bevoo ya éba bevoo. Éyong bia bo do, meyaghlane maa ma ye lere abim édoa évé bia bis é bôr bevoo. Jehôva a ñu fe dzam té tang (2 Beth. 1:3 ; Behéb. 6:10). Aval ane bi va yen do, biyong bizing, meyaghlane maa me ne tsen aval dzam é mbaa naa da ye sughlan. Ôwé, aval ése é ne, ntsinighane naa bia yaghlan akal bevoo ya éba bevoo.
DZIA 101 A sèhane Nzame élat été
a Be va tsen biyôla bizing.
b A daghe a jw.org éngengeng, Takeshi Shimizu: Jehôva a ne “é Môr aa bèè meyeghlan”
c Nfa ye naa ô yem biyôla Bengaa Jehôva bézing be ne mimbokh, kenghe dzeng a nden jw.org nfa “Testigos de Jehová presos por sus creencias (por países)”, nge ki « Témoins de Jéhovah emprisonnés en raison de leur foi (par pays) ».
d AYILGHA FÔRÔ : É bobedzang ya bekal baa ba tubane mindzukh ba simane naa be yaghlan akal é bôr bevoo.