Ôdzibi

É dzam Yésu a nga bo

ÉNGENGENG : Yésu a vole moanñang ya ôdzibi

1. Daghe ÉNGENGENG, nge ki a lang Jean 7:3-5 ya 1 Becorinthien 15:3, 4, 7. Éyong té wa fas minsili mi :

1. Aval avé é bobeñang Yésu be nga tare ñong é fuèñ a nga kare bo ?

2. Dzé da lere naa Yésu a nga tsini naa a vole moanñang Santiago nge ki Jacques ?

Za dzam bia yeghe ébe Yésu ?

2. Bia yiène bo ôdzibi amu naa ébe bôt b’ézing da sili bo abuiñ tam naa be yebe mbemba fuèñ.

Vughe Yésu

3. Tseneghe mboane wiè. Nge ôsusua môt ézing aa yebe ki naa a bo ayeghle Bible ya wa, ô taa ñe yemlé. Nge é ne boban, boghe wéé belane bingengeng nge ki minlô-medzô mi ne ñe vole naa a yem ane ba bo ayeghle Bible, ye aval a ne buane do.

4. Ô taa vaghane beyeghe Bible buè. Bôt besese béé se ki aval dèè. Nge môt ézing ya é nda-bôt duè nge ki é môt wa ke fep aa yebe ki ayeghle Bible, nge ki aa yebe ki bebela ézing, silighe wamièn amu dzé aa yebe ki do. Ye ayeghle ézing ya n’yebe wèñ é ne ñe édedèè éban ? Ye bôt b’ézing be ye é nda-bôt dzèñ nge ki bôt befe ba tsible ñe naa a taa tsini nlang ôsu ? Lighe ñe tam naa a fas é dzam ô va dzô ñe, ya yen éban Bible a bele.

5. Yaghlan akal é môt wa ke fep. Silighe Jehôva naa a vole wa naa ô bele mbemba mesiman ye belane mbemba bifiè. Silighe fe Jehôva naa a vole wa naa ô yen é tam môt té aa kômô ki tsini nlang ôsu, ya é tam wa yiène sim naa wa fep ñe.—1 Becor. 9:26.