AYEGHLE 23
DZIA 2 Éyôla duè é ne Jehôva
Éyôla Jehôva é ne édedèè éban akal dèè
« “Mi ne Bengaa bam,” éde Jehôva a dzô » (ESAÏE 43:10).
É DZAM BIA YE YEN
Bia ye yen é dzam bi ne bo nfa ya lere naa, Jehôva a ne nfufup, ye naa, é mam mesese Satan a dzô nfa wèñ me ne minèè.
1-2. Aval avé bia yem naa, éyôla Jehôva é mbe éban akal Yésu ?
ÉYÔLA Jehôva é mbe édedèè éban akal Yésu. Éñe a tele ôsu nfa ya kame éyôla Ésaa. Aval ane ayeghle ye ô mvus é nga lere de, Yésu a mbe nkoghane naa a wu akal éyôla Ésaa, ye akal é dzam ésese da tsinane ya éyôla té (Marc 14:36 ; Behéb. 10:7-9). Ye naa, niène Édjié toyini a mimbu dèñ da ye man, Yésu a ye tobe nkoghane naa a likh édjié ésese té, akal a fubu éyôla Jehôva (1 Becor. 15:26-28). É dzam ésese Yésu a nga bo akal Jehôva da lere naa a bira dzing Ésaa.
2 Yésu a nga zu a si va, naa a zu kar bôr é mam mesese Jehôva a nga kômô naa be yem (Jean 5:43 ; 12:13). A nga ve naa beyeghe bèñ be yem éyôla Ésaa (Jean 17:6, 26). Éyong a nga yeghle bôr, ye bo mekengha, a mbe é tugha lere naa, Jehôva éñe a nga ve ñe fakh ya ngu’u ya bo mam meté (Jean 10:25). Ye naa, éyong a nga yaghlane a Jehôva naa a kale beyeghe bèñ, a nga dzaa Jehôva naa a bo de « akal éyôla [dèñ] émièn » (Jean 17:11). Da tugha yene naa, éyôla Jehôva é mbe édedèè éban akal Yésu a lôr mam mesese. Éde, môr a ne yem dzô ya naa, a ne kristen nge aa yem ki nge ki naa, aa belane ki éyôla Jehôva ?
3. Za mam bia ye yen ayeghle di été ?
3 Amu bi ne beña bekristen, bia vu Yésu bi lere édzing ya ngang akal éyôla Jehôva (1 Pierre 2:21). Ayeghle di été, bia ye yen ane éyôla Jehôva da tugha lere beza ba kanghle « mbemba fuèñ ye Édjié Nzame » (Mat. 24:14). Bia ye fe yen é dzam éyôla Jehôva da yiène yili akal kada môr ye ébe bia.
« AYONG AKAL ÉYÔLA DÈÑ »
4. (a) Za ésèñ Yésu a nga kee beyeghe bèñ kaa naa a bere a dzôp été ? (b) Za nsili wa so nfa ésèñ té ?
4 Ôyôm tam kaa naa a bulan a dzôp été, Yésu a nga dzô beyeghe bèñ naa : « Mia ye bele ngu’u éyong nfufup nsisim wa ye so ébe mina, éde mia ye bo beyeghe bam a Jerusalén, Judea ngura ya Samaria, ya fe é vôm wa dang ôyap si ése ngura » (Bisè mintôl 1:8). Aval té, beyeghe bèñ be nga ye kanghle mbemba fuèñ se ki fave a Israel étam, ve mevôm mese. Asughlan, bôr be ye si ése ngura be nga ye bele maa naa ba bo beyeghe Yésu (Mat. 28:19, 20). Ve, Yésu a nga dzô naa : « Mia ye bo beyeghe bam ». Ye é nga ye bo éban naa minféféñ beyeghe beté be yem éyôla Jehôva nge ki, ye be nga ye bo fave bengañiè Yésu ? É mam bia yen abong 15 ye é kalare Bisè mintôl ma vole bia a yalane nsili té.
5. Aval avé mintôô ye bemvene be ya Jerusalén be nga lere naa môr asese a yiène yem éyôla Jehôva ? (A daghe fe évaghle).
5 Mbu 49 ye metam mèè, mintôô ye bemvene be ya Jerusalén be nga kôane naa ba tsiè é dzam é bôr baa sèhane ki Nzame be nga yiène bo nfa ye naa be yebe be ane bekristen. Éyong ékôane té é nga ke amanegha, Santiago nge ki Jacques moanñang Yésu, a nga dzô é dzam di : « [Pedro] a nga tugha kanghle aval Nzame, a nga daghe ébe meyong naa a duru ézizang deba, ayong akal éyôla dèñ ». Éyôla za Jacques a mbe a bele ôtemgha ? É tu bifiè nkulu medzô Amos, a nga koghle naa : « Nfa ye naa, befam ba lighi, be dzeng Jehôva ya n’nem ôsese, ye bôr be ye meyong mese, é bôr ba luè ya éyôla dam, éde Jehôva a dzô » (Bisè mintôl 15:14-18). Minféféñ bekristen beté béé nga ye ki sughu fave naa ba yem éyôla Jehôva, be nga ye fe be ‘luè ye éyôla dèñ’. Dzam té é nga yili naa, be nga ye baghe éyôla Nzame ye ve naa bôr be yem é môr a baghe éyôla té.
É tam ésulan Tsîn ékôan ye ntet mimbu ôsua, besôsôe befam be nga tugha wokh naa bekristen ba yiène bo ayong akal éyôla Nzame (A daghe éfaghle 5)
6-7. (a) Amu dzé Yésu a nga zu a si va ? (b) Akalgha évé da dang éban é nga ve naa Yésu a zu a si va ?
6 Éyôla Yésu émièn da yili naa : « Jehôva a ne akôrgha ». A nga bo é môr Jehôva a belane ñe naa, a kôre é bôr ba lere mebun ébe ñe. Yésu a nga zu a si va naa a ve émièn akal boan be-bôr (Mat. 20:28). Éyong a nga yaane ntang, a nga likh naa boan be-bôr be tobe nkôran ye bele éning é ne mbèmbèè (Jean 3:16).
7 Ve, amu dzé é mbe éban naa be kôre boan be-bôt ? A ne amu é dzam é nga boban afup Éden. Aval ane bi va yen de ayeghle é ne ô mvus, bebyèñ baa, Adán ba Eva, be nga bo Jehôva melo, éde be nga dzimle maa ya ning mbèmbèè (Atar. 3:6, 24). Ve, Yésu a nga zu fe a si va, naa a zu bo dzam afe da dang éban a lôr akôrgha moan môt. Satan a nga kobe mbimbia minaa mi daghe Jehôva (Atar. 3:4, 5). Akôrgha é boan Adán ba Eva é mbe dé tsii ye é dzam da dang éban : a fubu éyôla Jehôva. Amu Yésu a mbe é môr a kobe akal Jehôva ye naa, a baghe éyôla dzèñ, éde a nga sèñ ngu’u nfa ya fubu éyôla Jehôva.
Môr a ne yem dzô yè naa a ne kristen nge aa yem ki, nge ki aa belane ki éyôla Jehôva ?
8. Za dzam é bôr besese be nga bunu Yésu be nga yiène yebe ?
8 É bôr besese be nga ye kômô lere mebun ébe Yésu, a bo naa be mbe Bejudíos nge ki kaa, be nga yiène yebe naa tsîn ye akôrgha deba a ne Jehôva, Ésaa Yésu (Jean 17:3). Ya fe naa, ane Yésu, be nga ye be yem ya éyôla Jehôva. Be nga yiène fe yebe nté mbé é ne éban naa be fubu éyôla Jehôva. Be nga yiène de bo nfa ye naa, be tobe nkôran (Bisè mintôl 2:21, 22). Akal dzam té, éde besôsôe beyeghe Yésu besese, ba yiène yeghe a yem Jehôva ya fe Yésu. Éde biaa yaghane ki naa, Yésu a nga man meyaghlane mèñ bia yen nten Jean 17 ye bifiè bi : « Me nga bo naa be yem éyôla duè, ye naa, ma ye ve naa be yem de, nfa ye naa, édzing ô nga dzing ma é bo ébe be, ye naa, me bo élat ya be » (Jean 17:26).
« MI NE BEYEGHE BAM »
9. Aval avé bi ne lere naa éyôla Jehôva é ne éban akal dèè ?
9 Ye abim mam bi yenang, da tugha yene naa, nfa ye naa bi béé Yésu, bia yiène fubu éyôla Jehôva (Mat. 6:9, 10). Bia yiène ñong naa éyôla Jehôva éde é ne éyôla da dang éban a lôr mam mese. Bia yiène lere naa, éde bia wôran. Ve, aval avé bi ne fubu éyôla Jehôva ye lere naa, é mam mese Satan a nga dzô nfa Jehôva me ne minaa ?
10. Za dzam bia lang mebong 42-44 ye abakh Esaïe ? (Esaïe 43:9 ; 44:7-9). (A daghe fe évaghle).
10 Nten Esaïe abong 42 ya ke kuiñ abong 44, bia yeghe é dzam bi ne bo naa bi fubu éyôla Jehôva. Mebong meté été, Jehôva a dzô é bôr baa kang ki ñe naa be lere mendem ma lere naa benzame beba ba ning. Aval ane da boban éyong ba kikh adzô ézing, a luè bengañiè be ne ban é mam benzame beté ba dzô. Ve, ngañiè ézing éé se ki de bo ! (a lang Esaïe 43:9 ; 44:7-9).
Bia lere ya é mam mese bia dzô ye bo naa Nzame nfe éé se ki nge se Jehôva (A daghe bifaghle 10-11)
11. Za dzam Jehôva a dzô ayong dèñ, bia yen nten Esaïe 43:10-12 ?
11 (A lang Esaïe 43:10-12). Jehôva a kobe ayong dèñ é dzô naa : « Mi ne bengaa bam, [. . .] ye naa, ma me ne Nzame ». Jehôva a sili be naa be yalane nsili wi : « Ye Nzame nfe a ne, nge se ma ? » (Esaïe 44:8). Bi bele fe maa naa bia yalane nsili té. Bia lere naa Jehôva éñe étam a ne ña Nzame ngalane bifiè ya mimboane miè. Éyôla dèñ da dang ôyap yôp ya biyôla bise. Ye aval bia ning, bi ne lere naa bia dzing Jehôva, ye naa, bi ne sôsôe ya ñe, amben mengu’u mese Satan a ve naa tsini bia naa bi bo abé. Aval té éde, bi bele maa ya vole a fubu éyôla dèñ.
12. Aval avé nkulane adzô bia yen nten Esaïe 40:3, 5 ô nga dzalban ?
12 Éyong bia sukh éyôla nge ki éwôgha Jehôva, bia vu Yésu Krist. Esaïe a nga kulane fe naa, môr ézing a ye « pwaa [nge ki « a kômane, » atoan] zen akal Jehôva » (Esaïe 40:3). Aval avé dzam té é nga dzalban ? Juan ndu bôt a nga kômane zen akal Yésu, ve, a mbe « é zen Jehôva », amu Yésu a mbe é kobe akal Jehôva (Mat. 3:3 ; Marc 1:2-4 ; Luc 3:3-6). Nkulan adzô ôvoo-ôvoo té, ô nga dzô naa : « É duma Jehôva da ye lereban » (Esaïe 40:5). Dzam té é nga bobane ya ? Éyong Yésu a nga zu a si va, a nga kobe akal Nzame kaa kop, aval é nga ve naa, é mbe ane Jehôva émièn éñe a nga zu a si va (Jean 12:45).
13. Aval avé bi ne vu Yésu ?
13 Ane Yésu, bi ne Bengaa Jehôva. Bi baghe éyôla Jehôva ye kanghle é bôr besese bia tubane be, é mbemba mimboane mièñ. Ve, naa bi tugha de yem bo, bia yiène fe dzô bôr é mam mesese Yésu a nga bo naa a fubu éyôla Jehôva (Bisè mintôl 1:8). Yésu éñe a ne é ngañiè ôsua Jehôva, éde bia vu éfônane dèñ (Mel. 1:5). Ve, aval avé bi ne lere naa éyôla Jehôva é ne édedèè éban akal dèè ?
MEVAL MEFE BI NE LERE NAA ÉYÔLA JEHÔVA É NE ÉBAN AKAL DÈÈ
14. Ane bia yen de nten Bya 105:3, za dzam bia wôrane nfa éyôla Jehôva ?
14 Bia yen de môra dzam naa bi baghe éyôla Jehôva (a lang Bya 105:3). Jehôva a ne mevakh amu bia ve éyôla dzèñ duma (Jér. 9:23, 24 ; 1 Becor. 1:31 ; 2 Becor. 10:17). A « bere meban ébe Jehôva » da yili naa, bia bere meban amu naa Jehôva a ne é Nzame wèè. Bia ñong ane mura dzam, é maa bi bele naa bia lughu éyôla dzèñ ye sukh éwôgha dèñ así. Biaa yiène ki vaghle wokh ôsoan naa bia dzô é bôr bia be-be bia sèñ, é bong besikôlô bevoo, é bôr be too bia minfeng ye bôr befe naa, bi ne Bengaa Jehôva ! Debele a kômô naa bi tele naa bia kobe é bôr bevoo adzô éyôla Jehôva (Jér. 11:21 ; Mel. 12:17). Bebela a ne naa, Satan ye bivus bekulu medzô bèñ, ba kômô naa bôr be vuèn éyôla Jehôva (Jér. 23:26, 27). Ve, édzing dèè akal éyôla Jehôva, da ve naa bi vakh « ngura nté môs » (Bya 5:11 ; 89:16).
15. A luè éyôla Jehôva, da yili za dzam ?
15 Bia tsini naa bia luè éyôla Jehôva (Joël 2:32 ; Bero. 10:13, 14). A luè éyôla Jehôva daa sughu ki fave a yem ye belan éyôla Nzame. Bia yeghe a yem Nzame ane é môr a wôrane mam, a tobe ñe mebun, a daghe ébe ñe naa bi bele avole ye melepgha (Bya 20:7 ; 99:6 ; 116:4 ; 145:18). Bia kanghle fe é bôr bevoo éyôla ye mefulu mèñ, bi saghe be naa be dzôbane minsem mieba ye bo dzam naa be bele ayebe Jehôva (Esaïe 12:4 ; Bisè mintôl 2:21, 38).
16. Aval avé bi ne lere naa Satan a ne minaa ?
16 Bi ne nkoghane naa bia dzukh akal éyôla Jehôva (Jacq. 5:10, 11). Éyong bia tobe sôsôe ya Jehôva é tam bi ne mindzukh été, bia lere naa Satan a ne minaa. Metam Job, Satan a nga bôre é bôr ba sèhane Jehôva naa : « Môr a ye ve é dzôm asese a bele akal éning dèñ » (Job 2:4). Satan a ban naa bôr ba ye sèhane Jehôva fave metam mam ma wulu bo mbeng. Ye naa, ba ye lame Jehôva nge be tubane mindzukh. Sôsôe Job a nga lere naa ébôra té é ne minaa. Aval daa fe, bi bele maa ya lere naa, amben é mam mesese Satan a bôre bia, biaa ye ki vaghle lum Jehôva mvus môs ézing. Bi ne tobe ndzi-n’nem naa, Jehôva a ye bia kale amu éyôla dèñ (Jean 17:11).
17. Za aval éfe bi ne ve éyôla Jehôva duma, ane bia yen de nten 1 Pierre 2:12 ?
17 Bi lereghane ngang akal éyôla Jehôva (Mink. 30:9 ; Jér. 7:8-11). Amu bôr ba yem bia ane Bengaa Jehôva, é mam bia bo me ne lughu nge ki a ve éyôla Jehôva mvin (a lang 1 Pierre 2:12). Amu dzam té, éde bia kômô bo é dzam ésese bi ne bo naa, bi lughu Jehôva ye aval bia kobe ye fe abo dulu dèè. Éyong bia bo de, afang faa bo naa bi ne bebo minsem, bi ne mban a ve éyôla Jehôva duma.
18. Za aval éfe bia lere naa éyôla Jehôva da dang éban akal dèè ? (A daghe fe atoan).
18 Bia tem naa, éyôla Jehôva éde da dang éban a lôr éwôgha dèè (Bya 138:2). Amu dzé éde da dang éban ? Amu naa, édzing dèè akal éyôla Jehôva é ne ndaman éwôgha dèè asu é bôr be ne bia minfenga. Éyong Yésu a nga wu, bôr be mbe bé ñong ñe ane mbia môr, ye biane fe ñe. Ve, Yésu a mbe nkoghane naa a wu aval té, akal é duma Jehôva. A nga « bian ôsoan » da yili naa, éé dzi ki yaghane nge ki a bira yep a n’nem akal é mam bôr be mbe bé tem nfa wéñ (Behéb. 12:2-4). A nga bembe ébe a bo nkômane Nzame (Mat. 26:39).
19. Za dzam mia wôrane nfa éyôla Jehôva, amu dzé ki ?
19 Bia yen de môra dzam naa bia sèhane Jehôva, éde bia bere meban ôyô naa ba luè bia naa Bengaa Jehôva. Amu éyôla Jehôva é ne édedèè éban akal dèè, éde bi ne nkoghane naa bia tsini naa bia lughu éyôla dèñ amben é bôr bevoo ba yen bia aval ézing. Éyôla Jehôva éde da dang éban a lôr éwôgha dèè bia bebién. Éde, ntsinighane naa bia bele nkôman ô ne ngu’u naa bia lughu éyôla Jehôva, amben Satan a dzeng naa a sim bia. Aval té, éde bia ye lere naa, éyôla Jehôva éde da dang éban akal dèè, aval ane dé mbe éban akal Yésu Krist.
DZIA 10 Lughane Jehôva é Nzame waa !
a Amben sôsôe Job a nga sum naa a bira tem nfa aval bôr be mbe bé yen ñe éyong befam belal be nga dzô naa a nga yiène bo é dzam é ne abé. Ôsusua, éyong a nga dzimle é boan bèñ ye é biôm bièñ, « Job éé dzi ki bo nsem, ye naa, éé dzi ki bôre Nzame naa a va bo dzam ézing é too abé » (Job 1:22 ; 2:10). Ve, éyong be nga bôre Job naa a nga bo mbia be-mam, éde a nga kulu « zeze bifiè ». A nga dzeng naa a tare fubu éyôla nge ki éwôgha dèñ ndaane naa a fubu éyôla nge ki éwôgha Jehôva (Job 6:3 ; 13:4, 5 ; 32:2 ; 34:5).