Luke Asɛmpa

3 Tiberius Caesar bedzii adze no, n’afe a otsia duenum mu no, nna Pontius Pilate na ɔyɛ ambrado wɔ Judea. Nna Herod* na odzi Galilee mantɔw no do,* na nna no nua Philip so dzi Ituraea na Trachonitis mantɔw no do. Afei so, nna Lysanias dzi Abilene mantɔw no do. 2 Nna Annas na Caiaphas so yɛ asɔfompanyimfo, na dɛm aber no mu na Nyankopɔn n’asɛm baa John a ɔyɛ Zechariah ne ba no hɔ wɔ sar no do.

3 Ntsi ɔkɔr nkurow a woetwa Jordan Esutsen no ho ehyia no nyina mu, na ɔpaa mu kaa kyerɛɛ nkorɔfo dɛ ɔsɛ dɛ wonuma* dze kyerɛ dɛ woenu hɔnho, ama wɔdze hɔn bɔn aakyɛ hɔn, 4 dɛ mbrɛ wɔakyerɛw wɔ nkɔnhyɛnyi Isaiah no nwoma no mu no. Wɔakyerɛw dɛ: “Obi retsea mu wɔ sar no do dɛ: ‘Hom nsiesie Jehovah* no kwan! Hom mma akwan a ɔda n’enyim no ntsen. 5 Wɔnhyɛ mbɔnsa nyina ma, na wondwuruw mbepɔw na nkokwaa nyina ngu famu; wɔntsentsen akwan a wɔakyeakyea nyina, na wɔmma akwan a wɔasɛɛsɛɛ nyina nyɛ tromtrom; 6 na nyimpa nyina* bohu Nyankopɔn no nkwagye.’”*

7 Na ɔhyɛɛ ase kaa kyerɛɛ nyimpadɔm a wɔreba ne nkyɛn ebonuma no dɛ: “Nhurutsia mba, woana na ɔkaa kyerɛɛ hom dɛ hom nguan mfi ebufuhyew a ɔreba no ho? 8 Ɔnodze hom nsow aba a ɔkyerɛ dɛ hom enu homho. Mma hom nnkeka nnkyerɛ homho dɛ, ‘Hɛn dze, hɛn egya nye Abraham.’ Na mereka akyerɛ hom dɛ Nyankopɔn botum ama Abraham enya mba efi mbobaa yi mu. 9 Dza ɔwɔ mu nye dɛ, ekuma no da ndua no ase dada. Ntsi dua biara a ɔnnsow aba pa no, wobotwa na wɔaatow akyen gya mu.”

10 Nna nyimpadɔm no bisaa no dɛ: “Ntsi ebɛnadze na ɔwɔ dɛ yɛyɛ?” 11 Ɔkaa kyerɛɛ hɔn dɛ: “Obi a ɔwɔ ntar ebien no, ɔmma obi a onnyi bi no bi, na obi a ɔwɔ biribi dzi no, ɔno so nyɛ dɛmara.” 12 Na hɔn a wɔgyegye tow mpo bae ma wonumaa hɔn, na wobisaa no dɛ: “Kyerɛkyerɛnyi, ebɛnadze na ɔwɔ dɛ yɛyɛ?” 13 Nna ɔkaa kyerɛɛ hɔn dɛ: “Tow a woetwa ato hɔ dɛ hom ngye no, mma hom nngye ma ɔmmbor do.” 14 Na asogyafo bi so bebisaa no dɛ: “Ebɛnadze na ɔwɔ dɛ yɛyɛ?” Na ɔkaa kyerɛɛ hɔn dɛ: “Mma hom nnyɛ obiara basabasa,* na mma hom nntwa asɛm nnto obiara so do, mbom hom mma hom enyi nsɔ dza wɔdze ma hom no ara.”*

15 Dɛm aber no, nna nkorɔfo rohwɛ Messiah no kwan, ntsi nna hɔn nyina rususu John ho wɔ hɔn akoma mu dɛ, “Ɔno nye Christ no anaa?” 16 John yii hɔn nyina ano dɛ: “Emi dze, nsu na medze numa hom, naaso obi a ɔwɔ tum kyɛn me reba, na ne mpaboa n’ahoma mpo, memmfata dɛ mebɛsan. Ɔdze sunsum krɔnkrɔn na gya bonuma hom. 17 Okitsa no sofi a ɔdze huw hwiit do, na ɔbɛprapra beebi a ɔporow hwiit no kofekofe, na ɔaaboaboa hwiit no ano egu n’adzekoradan mu. Na ntsɛw no dze ɔdze gya a onndum da bɛhyew no.”

18 Na John maa hɔn afotu ahorow pii so kaa ho, na ɔkɔr do kaa asɛmpa kyerɛɛ nkorɔfo no. 19 Naaso ɔkaa Herod a odzi ɔmantɔw no do no n’enyim wɔ no nuabanyin* ne yer Herodias ho nye ndzɛmba bɔn a Herod ayɛ no nyina ho. 20 Iyi nyina ekyir no, Herod sanee yɛɛ bɔn kɛse bi so: Ɔdze John kɔtoo efiadze.

21 Aber a nna John runuma nyimpa nyina no, onumaa Jesus so. Na aber a Jesus robɔ mpaa no, ɔsor buei, 22 na sunsum krɔnkrɔn no yɛɛ dɛ ebubur sianee baa no do, na ndze bi fi sor kaa dɛ: “Ɔwo nye me Ba a modɔ wo; Magye wo ato mu.”