Sɛ biribi ma ebɔ hu a, ɔyɛ a dwendwen dza Jehovah bɛyɛ no daakye aber a woeyi Satan fi hɔ no ho. Afe 2014 ɔmantɔw ehyiadzi ase no, yɛhwɛɛ ɔyɛkyerɛ bi a nna ɔfa egya bi a ɔnye n’ebusua rususu 2 Timothy 3:​1-5 ho. Ɔkaa dɛ sɛ dɛm kyerɛwsɛm yi reka mbrɛ asetsena bɛyɛ wɔ Paradise ho asɛm a, nkyɛ ɔbɛka no wɔ dɛm kwan yi do: “Na hu iyidɛ wiadze fofor no mu no, enyigye kɛse bɛba. Osiandɛ nyimpa bɔdɔ ne nyɛnko nyimpa, hɔn enyi bɛgye Nyankopɔn n’Asɛm ho, wɔbɛbrɛ hɔnho adze, wobeyi Nyankopɔn ayɛw, wobetsie hɔn awofo asɛm, wɔbɛkyerɛ ndzɛmba ho enyisɔ, wobedzi nokwar, wɔbɛyɛ hɔn a wɔwɔ tsema kɛse ma hɔn ebusuafo, wobotum nye hɔn ayɛ apam, wɔbɔbɔ nyimpa dzin pa aber nyina, wobotum ahyɛ hɔnho do, wɔbɔdwe, wɔbɛyɛ ndzɛmba pa, worinnyi nkorɔfo mma, wɔbɛtse asɛm ase, wɔremmema hɔnho do, wɔbɔdɔ Nyankopɔn asen enyigyedze, wobefi hɔn akoma mu dze nyamesompa abɔ hɔn bra; dɛm nyimpa yi na fa woho bɔ hɔn ho pampee.” Mbrɛ asetsena bɛyɛ wɔ wiadze fofor no mu no, ɔyɛ a enye w’ebusuafo nye enuanom bɔ ho nkɔmbɔ anaa? w24.01 6 ¶13-14

Yenyim dɛ Jehovah gye n’asomfo nyina to mu, na iyi ma hɛn enyi gye paa! Bible no ka dɛ: ‘Jehovah n’enyi gye ne man ho.’ (Ndw. 149:4) Naaso, ɔtɔfabi a Jehovah n’asomfo binom hɔn abaw mu bu araa ma wobisa hɔnho dɛ, ‘Ntsi, Jehovah gye me to mu anaa?’ Jehovah n’asomfo anokwafo a wɔtsenaa ase wɔ tsetse mber mu no, nna ɔtɔ da a hɔn mu binom so tse nka dɛmara. (1 Sam. 1:​6-10; Job 29:​2, 4; Ndw. 51:11) Bible no ma yehu no pefee dɛ nyimpa a bɔn wɔ hɔnho mpo, Jehovah botum agye hɔn ato mu anaa wobotum enya n’enyim adom. Ebɛn kwan do? Ɔno nye dɛ yɛbɛgye Jesus Christ edzi na yaama woenuma hɛn. (John 3:16) Sɛ yɛyɛ dɛm a, yɛma nkorɔfo hu dɛ yeenu hɛnho wɔ hɛn bɔn ho, na yɛahyɛ Nyankopɔn bɔ dɛ yɛbɛyɛ dza ɔpɛ. (Andw. 2:38; 3:19) Sɛ yɛyɛ dɛm ndzɛmba yi dze kyerɛ dɛ yɛpɛ dɛ yɛnye Jehovah nya ebusuabɔ a, ɔma n’enyi gye paa. Sɛ yɛkɔ do yɛ dza yebotum biara dɛ yebedzi bɔ a yɛahyɛ Jehovah dɛ yɛbɔsom no no do a, ɔbɛgye hɛn ato mu na ɔnye hɛn benya anyɛnkofa a no mu yɛ dzen.—Ndw. 25:14. w24.03 26 ¶1-2

Hɛn so, sɛ aban mpanyimfo hyɛ hɛn dɛ yengyaa asɛnka edwuma no a, ɔsɛ dɛ yesuasua dza esuafo no yɛe no na yɛkɔ do ka asɛm no. Ɔsɛ dɛ yenya awerɛhyɛmu dɛ Jehovah bɔboa hɛn ma yaayɛ asɛnka edwuma no. Ntsi, bɔ Jehovah mpaa dɛ ɔmma wo akokodur na nyansa. Afei so, ɔyɛ a serɛ no dɛ ɔmboa wo ma gyina ɔhaw a irihyia no ano. Hɛn mu pii rihyia ɔhaw ahorow. Ɔhaw no bi nye yarba, adwendwen, hɛn dɔfo bi a oewu, ebusua mu nsɛnsɛm, ɔsoɛrtsia na pii a ɔkeka ho. Ndzɛmba bi tse dɛ, yarba a ɔtserɛw ntsɛntsɛm nye akodzi ahorow a ɔkɔ do no ama asɛm no asɛɛ koraa. Sɛ irihyia ɔhaw a ɔtse dɛm a, fi w’akoma nyina mu ka dza erefa mu no ho asɛm kyerɛ Jehovah. Ka ho asɛm kyerɛ no tse dɛ mbrɛ ereka akyerɛ wo nyɛnko berɛbo bi. Nya awerɛhyɛmu dɛ, sɛ ebɔ mpaa a ɔtse dɛm a, Jehovah bɔboa wo ma eetum egyina ano. (Ndw. 37:​3, 5) Sɛ ‘yɛkɔ ahohia mu,’ na yɛkɔ do bɔ mpaa a, ɔno bɔboa hɛn ma yeetum egyina ano. (Rom. 12:12) Jehovah nyim dza n’asomfo refa mu no, na ‘otsie hɔn sufrɛ.’—Ndw. 145:​18, 19. w23.05 5-6 ¶12-15