Asomafo Ndwuma

3 Da kor bi, nna Peter na John rokɔ asɔrfie hɔ.* Nna ɔyɛ dɔn a otsia akron;* dɔn a wɔdze bɔ mpaa no. 2 Nna nkorɔfo bi soa ɔbarimba bi a wɔwoo no no nna ɔyɛ apakye. Da biara, nna wɔdze no bɔto asɔrfie no n’abow a wɔfrɛ no Abow Fɛɛfɛw no ano. Nna wɔyɛ dɛm mbrɛ ɔbɛyɛ a obotum aserɛserɛ adze efi hɔn a wɔrokɔ asɔrfie no mu no hɔ. 3 Aber a ohun dɛ Peter na John rekɛhɛn asɔrfie hɔ no, ɔhyɛɛ ase serɛɛ hɔn dɛ wɔnkyɛ no adze. 4 Naaso Peter na John nyina hwɛɛ no dzinn na wɔkaa kyerɛɛ no dɛ: “Hwɛ hɛn.” 5 Ntsi ɔhwɛɛ hɔn dzinn, na nna ɔrohwɛ kwan dɛ wɔbɛma* no biribi. 6 Naaso Peter kaa kyerɛɛ no dɛ: “Dwetɛ na sika kɔkɔɔ dze, minnyi bi, mbom dza mowɔ na medze rebɛma wo yi. Meka no wɔ Nazarethnyi Jesus Christ ne dzin mu dɛ, nantsew!” 7 Na Peter suoo ne nsa nyimfa mu maa no do gyinaa hɔ. Na amonmu hɔ ara na n’anansa na n’anankɔn mu yɛɛ dzen. 8 Afei ohuruwii gyinaa ne nan do, na ɔhyɛɛ ase dɛ ɔrenantsew na ɔnye hɔn kɔr asɔrfie hɔ. Aber a wɔrokɔ nyina nna oruhuruhuruw na oriyi Nyankopɔn ayɛw. 9 Na nkorɔfo no nyina hun dɛ ɔrenantsew na oriyi Nyankopɔn ayɛw. 10 Na wohun dɛ, ɔno nye ɔbarimba a nna ɔtsena Abow Fɛɛfɛw no ano wɔ asɔrfie hɔ serɛserɛ adze no. Ayarsa a nna oenya no yɛɛ hɔn nwanwa dodow na hɔn enyi gyee papaapa.

11 Aber a nna ɔbarimba no da ho ara dze Peter na John hɔn mu no, nkorɔfo no nyina dze mbirika kɔr hɔn nkyɛn wɔ beebi a wɔfrɛ hɔ Solomon Abrandaa no, na nna hɔnho nyina abow hɔn. 12 Aber a Peter hun iyi no, obisaa nkorɔfo no dɛ: “Israel mbarimba, ebɛnadze ntsi na iyi ayɛ hom nwanwa dɛm yi, na ebɛnadze ntsi na hom rohwɛ hɛn hoo tse dɛ gyama hɛnankasa hɛn tum anaa hɛn nyamesompa bi ntsi na yɛnam do ama ɔbarimba yi anantsew yi? 13 Abraham nye Isaac nye Jacob hɔn Nyankopɔn no, hɛn egyanom Nyankopɔn no na ɔahyɛ n’Akowaa Jesus enyimnyam. Ɔyɛ dɛm Jesus yi na hom yii no mae na hom poow no wɔ Pilate n’enyim, aber mpo a ɔyɛɛ n’adwen dɛ obegyaa no no. 14 Nyew, hom poow ɔbarimba ɔtseneneenyi a ɔyɛ krɔnkrɔn no, na hom serɛɛ dɛ wɔmfa ɔbarimba wudzifo bi mbom mma hom, 15 nna hom kum nkwa Sahen no. Naaso Nyankopɔn nyaan no fii ewufo mu, na yɛyɛ dɛm nokwasɛm yi ho adasefo. 16 Ɔnam ne dzin do, nye gyedzi a yɛwɔ wɔ ne dzin mu no do na ɔbarimba a hom hu no na hom nyim no yi enya ahoɔdzen. Na no mu gyedzi na wɔama ɔbarimba yi enya apɔwmudzen korakora wɔ hom nyina enyim yi. 17 Na enuanom, minyim paa dɛ nna hom nnyim, ntsi na hom yɛɛ dɛm no, dɛ mbrɛ hom etumfo no so yɛe no. 18 Naaso Nyankopɔn nam dɛm kwan yi do ama dza ɔnam nkɔnhyɛfo no nyina do kae too hɔ no aba mu.* Ɔno nye dɛ nna Christ no bohu amandze.

19 “Dɛm ntsi hom nnu homho na hom ndan homho, ama wɔaapepa hom bɔn. Sɛ hom yɛ dɛm a, ɔbɛma ahotɔ mber efi Jehovah nankasa no hɔ aba,* 20 na ɔbɔsoma Christ a woeyi no esi hɔ ama hom no, mekyerɛ, Jesus. 21 Na ɔbɔtweɔn wɔ sor ekesi mber a wobesiesie ndzɛmba nyina, dɛ mbrɛ Nyankopɔn nam ne tsetse nkɔnhyɛfo akrɔnkrɔmfo no do kae no.* 22 Nokwasɛm nye dɛ Moses kaa dɛ: ‘Jehovah* hom Nyankopɔn beyi nkɔnhyɛnyi bi a ɔtse dɛ emi efi hom nuanom mu ama hom. Ɔsɛ dɛ hom tsie dza ɔbɛka akyerɛ hom biara. 23 Dza ɔwɔ mu nye dɛ, obiara* a oenntsie dɛm nkɔnhyɛnyi no, wɔbɛsɛɛ no koraa efi ɔman no mu.’ 24 Na nkɔnhyɛfo no nyina, ofitsi Samuel do araa dze besi hɔn a wodzii n’ekyir bae no do nyina, hɔn mu biara a ɔkasae no, ɔkaa ber* a yɛwɔ mu yi ho asɛm pefee. 25 Hom yɛ nkɔnhyɛfo no nye apam a Nyankopɔn nye hom egyanom yɛe no hɔn mba. Nyankopɔn kaa kyerɛɛ Abraham dɛ: ‘Ɔnam w’asenyi* do na mbusua a wɔwɔ asaase do nyina benya nhyira.’ 26 Aber a Nyankopɔn yii n’Akowaa no, odzii kan somaa no baa hom nkyɛn dɛ ɔmbɛdan hom mu biara mfi ne ndzeyɛbɔn ho mfa nhyira hom.”