John Asɛmpa

5 Iyi ekyir no, nna Jewfo no ribedzi hɔn afahyɛ bi, ntsi Jesus fowee kɔr Jerusalem. 2 Nna nsutaae bi wɔ Nguantsen Kurowpon a ɔwɔ Jerusalem no ho. Hebrew mu no wɔfrɛ no Bethzatha. Nna abrandaa enum na ɔwɔ nsutaae no ho. 3 Nna ayarfo, enyifurafo, mpakye, nye hɔn a hɔn nsa anaa hɔn anan adwedwe* pii deda abrandaa yi mu. 4* —— 5 Nna ɔbarimba bi wɔ hɔ a ɔayar mfe 38. 6 Jesus hun dɛ ɔbarimba yi da hɔ, na nna onyim dɛ ɔayar ber tsentsen, ntsi obisaa no dɛ: “Epɛ dɛ woho tɔ wo a?” 7 Ɔbarimba a ɔyar no yii no ano dɛ: “Owura, minnyi obiara a ɔdze me bɔkɔ akɔto nsutaae no mu aber a nsu no afon no. Na sɛ meyɛ dɛ morokɔtɔ mu so a, mobɔhwɛ ara nye dɛ obi edzi m’enyim kan.” 8 Nna Jesus kaa kyerɛɛ no dɛ: “Soɛr! Fa wo kɛtɛ* na nantsew.” 9 Na amonmu hɔ ara na ɔbarimba no noho tɔɔ no, na ɔfaa ne kɛtɛ* no na ɔhyɛɛ ase dɛ ɔrenantsew.

Nna dɛm da no yɛ Ahomgyeda. 10 Dɛm ntsi Jewfo no kaa kyerɛɛ ɔbarimba a wɔasa no yarba no dɛ: “Ndɛ yɛ Ahomgyeda, na mbra mma kwan dɛ ebɔsoa kɛtɛ* no.” 11 Nna ɔkaa kyerɛɛ hɔn dɛ: “Obi a ɔsaa me yarba no, ɔnoara na ɔkaa kyerɛɛ me dɛ, ‘Fa wo kɛtɛ* na nantsew.’” 12 Nna wobisaa no dɛ: “Ebɛn nyimpa na ɔno ɔkaa kyerɛɛ wo dɛ, ‘Fa wo kɛtɛ na nantsew’ no?” 13 Naaso nna ɔbarimba a ɔatse apɔw no nnyim obi a ɔsaa no yarba no, osiandɛ nna Jesus afora nyimpadɔm a wɔwɔ hɔ no mu.

14 Ekyir yi, Jesus hun no wɔ asɔrfie hɔ na ɔkaa kyerɛɛ no dɛ: “Hwɛ, woho atɔ wo. Mma nnyɛ bɔn bio, amma biribi a ɔsen iyi aannto wo.” 15 Ntsi ɔbarimba no kɔree kɛkaa kyerɛɛ Jewfo no dɛ ɔyɛ Jesus na ɔsaa no yarba no. 16 Iyi ntsi, Jewfo no taan Jesus n’enyi, osiandɛ nna ɔreyɛ dɛm ndzɛmba yi wɔ Ahomgyeda. 17 Naaso ɔkaa kyerɛɛ hɔn dɛ: “M’Egya akɔ do ayɛ edwuma araa ebodu dɛm aber yi, na mara so mugu do ara reyɛ edwuma.” 18 Iyi koraa na ɔmaa Jewfo no enyi beer dɛ wɔbɔhwehwɛ no eku no no, osiandɛ ɔnnyɛ Ahomgyeda mbra no nkotsee na obuu do, mbom ɔfrɛɛ Nyankopɔn dɛ nankasa n’Egya dze yɛɛ noho dɛ ɔnye Nyankopɔn yɛ pɛ.

19 Dɛm ntsi Jesus kaa kyerɛɛ hɔn dɛ: “Nokwar, nokwar mese hom dɛ, Ɔba no runntum nnhyɛ noho nnyɛ hwee gyedɛ dza oehu dɛ Egya no reyɛ no. Osiandɛ biribiara a Egya no yɛ no, ɔno ara na Ɔba no so yɛ. 20 Na Egya no pɛ Ɔba no n’asɛm, na ɔkyerɛ no ndzɛmba a nankasa yɛ nyina. Na ndwuma a ɔsoso kyɛn iyi mpo na ɔdze bɛkyerɛ no, ama homho eedwuruw hom. 21 Na dɛ mbrɛ Egya no nyan ewufo na ɔma hɔn nkwa no, dɛmara so na obiara a Ɔba no pɛ no, ɔma no nkwa. 22 Egya no mmbu obiara atsɛn, mbom ɔdze atsɛmbu no nyina ahyɛ Ɔba no ne nsa, 23 mbrɛ ɔbɛyɛ a obiara bedzi Ɔba no nyi dɛ mbrɛ wodzi Egya no nyi no. Obiara a onndzi Ɔba no nyi no, onndzi Egya no a ɔsomaa no no so nyi. 24 Nokwar, nokwar mese hom dɛ, obiara a otsie m’asɛm na ɔgye Nyia ɔsomaa me no dzi no wɔ daa nkwa, na worummbu no atsɛn osiandɛ oefi owu mu aba nkwa mu.

25 “Nokwar, nokwar mese hom dɛ, ber no reba, na woenya edu, dɛ ewufo bɛtse Nyankopɔn ne Ba no ne ndze, na hɔn a wɔayɛ aso etsie no no benya nkwa. 26 Na dɛ mbrɛ Egya no wɔ nkwa wɔ nankasa no mu* no, dɛmara so na ɔama Ɔba no enya nkwa wɔ nankasa no mu. 27 Na Egya no ama no tum dɛ ombu atsɛn, osiandɛ ɔno nye nyimpa Ba no. 28 Mma hom mma iyi nnyɛ hom nwanwa, osiandɛ ber bi reba a hɔn a wɔwɔ nkaa nda mu nyina bɛtse ne ndze 29 na woeepue, hɔn a wɔyɛɛ papa no bɔkɔ nkwa wusoɛr mu, na hɔn a wɔyɛɛ ndzɛmba bɔn no aakɔ atsɛmbu wusoɛr mu. 30 Murunntum nnhyɛ moho nnyɛ hwee. Dza matse efi Egya no hɔ no, ɔno ara na migyina do bu atsɛn, na atsɛn a mubu no tsen, osiandɛ monnhwehwɛ dza mankasa mepɛ, mbom mohwehwɛ dza nyia ɔsomaa me no pɛ.

31 “Sɛ mankotsee midzi moho dase a, me dasee no nnyɛ nokwar. 32 Mbom obi fofor wɔ hɔ a odzi mo ho dase, na minyim dɛ dase a odzi fa mo ho no yɛ nokwar. 33 Hom somaa nkorɔfo ma wɔkɔr John hɔ, na odzii nokwar no ho dase. 34 Naaso menngye dase mmfi nyimpa hɔ, na mbom meka dɛm nsɛm yi ama hom eenya nkwa. 35 Nna dɛm ɔbarimba no yɛ kandzea a ɔdzɛw na ɔhyerɛn, na hom dze, nna hom pɛ dɛ hom dzi ehurusi kɛse wɔ ne kan mu ber tsiabaa bi. 36 Naaso mowɔ dase a ɔkyɛn John nedze no, osiandɛ ndwuma a m’Egya dze hyɛɛ me nsa dɛ menyɛ no, mekyerɛ ndwuma a mereyɛ no seseiara yi, ɔno ara na odzi dase dɛ Egya no na ɔsomaa me. 37 Na Egya a ɔsomaa me no, nankasa edzi mo ho dase. Hom nntsee ne ndze da, na hom nnhun mbrɛ ɔtse* so da. 38 Na n’asɛm nntse hom mu, osiandɛ obi a ɔsomaa no nankasa mpo, hom nngye no nndzi.

39 “Hom hwehwɛ Kyerɛwnsɛm no mu osiandɛ hom dwen dɛ iyi na ɔbɛma hom enya daa nkwa; na iyi ara* so na odzi mo ho dase. 40 Naaso iyi nyina ekyir no, hom mmpɛ dɛ hom ba me nkyɛn mbrɛ ɔbɛyɛ a hom benya nkwa. 41 Menngye enyimnyam mmfi nyimpa hɔ, 42 na minyim paa so dɛ hom nnyi Nyankopɔn no dɔ wɔ hom mu. 43 Maba wɔ m’Egya ne dzin mu, naaso hom nngye me. Mbom sɛ obi fofor na ɔbae wɔ nankasa ne dzin mu a, nkyɛ ɔno dze hom bɛgye no. 44 Adze yi ara hom mu biara gye enyimnyam fi ne nyɛnko hɔ na hom nnhwehwɛ Nyankopɔn kor pɛ no n’enyimnyam no, ntsi ɔbɛyɛ dɛn na hom aagye edzi? 45 Mma hom nnsusu dɛ mobɔbɔ hom sombo akyerɛ Egya no; na nyimpa kor na ɔbɔ hom sombo, ɔno nye Moses a hom dze hom enyi ato no do no. 46 Nokwasɛm nye dɛ, sɛ hom gyee Moses dzii a, nkyɛ hom bɛgye mo so edzi, osiandɛ ɔkyerɛɛw mo ho asɛm. 47 Na sɛ hom nngye nsɛm a ɔkyerɛwee no nndzi a, ɔbɛyɛ dɛn na hom aagye dza meka no edzi?”