Luke Asɛmpa

5 Da kor bi, nna Jesus gyina Gennesaret nsutaae* no ho. Nna nyimpadɔm akyer no do ritsie Nyankopɔn n’asɛm. 2 Na ohun ahɛmba ebien bi wɔ nsu no n’ano hɔ, naaso nna afarfo no esian efi mu rohohor hɔn eboa mu. 3 Na ɔkɔr hɛmba no mu kor a ɔyɛ Simon dze no mu, na ɔkaa kyerɛɛ no dɛ ɔnkwan mfi daadze nkɔ ekyir kakra. Afei ɔtsenaa ase wɔ hɛmba no mu, na ɔhyɛɛ ase kyerɛkyerɛɛ nyimpadɔm no. 4 Aber a ɔkasae wiei no, ɔkaa kyerɛɛ Simon dɛ: “Kwan kɔ beebi a hɔ dɔ, na hom ntow hom eboa no mfa mpa nam.” 5 Naaso Simon kaa kyerɛɛ no dɛ: “Kyerɛkyerɛnyi, yɛayɛ edwuma anafua mu no nyinara a yeennya hwee, naaso osian dza aka yi ntsi mobɔtow eboa no.” 6 Na aber a wɔtoow eboa no, wɔpaa nam* pii. Nokwasɛm nye dɛ, hɔn eboa no mpo hyɛɛ ase dɛ ɔretsetsew. 7 Ntsi wɔtoo hɔn mfɛfo afarfo a wɔwɔ hɛmba kor no mu no so nsa dɛ wɔmbra mbɔboa hɔn. Na aber a wɔbae no, wɔdze nam hyɛɛ hɛmba ebien no nyina amaama na ɔhyɛɛ ase dɛ ɔremem. 8 Aber a Simon Peter hun iyi no, obuu ntwɛr wɔ Jesus n’enyim na ɔkaa kyerɛɛ no dɛ: “Ewuradze, fi me nkyɛn kɔ, osiandɛ meyɛ dzebɔnyɛnyi.” 9 Siantsir a ɔkaa dɛm nye dɛ, nam* pii a wɔpae no maa ɔno na hɔn a wɔwɔ hɔ no nyinara ho dwuruuw hɔn paa. 10 Dɛmara so na Zebedee ne mba James na John a wɔnye Simon yɛ edwuma no so ho dwuruuw hɔn. Naaso Jesus kaa kyerɛɛ Simon dɛ: “Mma nnsuro, na ofitsi ndɛ rokɔ no ibeyi nyimpa.”* 11 Ntsi wɔdze hɔn hɛmba no baa mpoano na wogyaa biribiara hɔ kedzii n’ekyir.

12 Da bi so, ɔkɔr nkurow no mu kor mu, na hwɛ! nna ɔbarimba bi wɔ hɔ a kwata eguar no twom!* Aber a ohun Jesus no, ɔdze n’enyim butuuw famu na ɔserɛɛ no dɛ: “Ewuradze, sɛ epɛ a, ibotum asa me yarba.” 13 Ntsi ɔtseen ne nsa kaa no, na ɔkaa kyerɛɛ no dɛ: “Mepɛ! Woho ntɔ wo.” Na amonmu hɔ ara no kwata no tui yewee. 14 Na ɔhyɛɛ ɔbarimba no dɛ mma ɔnnka nnkyerɛ obiara, mbom ɔkaa kyerɛɛ no dɛ: “Kɔ, fa woho kɛkyerɛ asɔfo no, na osiandɛ wo yarba no kɔ ntsi kɔbɔ afɔr a Moses hyɛɛ ho mbra no, ama hɔnankasa eedzi ho dase.”* 15 Naaso no ho asɛm kɔr do tserɛwee, na nyimpadɔm pii baa ne nkyɛn dɛ woribetsie no na ɔaasa hɔn yarba. 16 Iyi nyina ekyir no, nna ɔtaa kɔ beebi a obiara nnyi hɔ kɔbɔ mpaa.

17 Da kor bi a nna ɔrekyerɛkyerɛ no, nna Phariseefo nye hɔn a wɔkyerɛkyerɛ Mbra no fifi Galilee, Judea nye Jerusalem nkuraase nyinara mu aba ma wɔtsenatsena hɔ; nna Jehovah* no tum wɔ no do a ɔdze bɛsa yarba. 18 Na hwɛ, nna mbarimba bi soa banyin bi a oebubu wɔ kɛtɛ do, na wɔbɔɔ mbɔdzen dɛ wɔdze no bɛba abɔto Jesus n’enyim. 19 Naaso osian nyimpadɔm no ntsi, woennya kwan nye no ennwura mu. Ntsi wɔfowee kɔr dan no etsifi, na wogyaagyaa kɛtɛ a ɔbarimba no da do no mu faa dan no sor dze no besii Jesus n’enyim pɛɛ. 20 Aber a ohun hɔn gyedzi no, ɔkaa dɛ: “Ɔbarimba, wɔdze wo bɔn akyɛ wo.” 21 Naaso akyerɛwfo no nye Phariseefo no hyɛɛ ase susuu ho wɔ hɔn akoma mu na wɔkekaa kyerɛɛ hɔnho dɛ: “Woana nye dɛm nyimpa yi a ɔka ebususɛm yi? Sɛ yeyi Nyankopɔn fi hɔ a, woana bio na obotum dze bɔn akyɛ?” 22 Nna Jesus nyim dza worususu ho no, ntsi obisaa hɔn dɛ: “Ebɛnadze na hom rususu ho wɔ hom akoma mu no? 23 Dza ɔwɔ hen na ne ka yɛ mberɛw, dɛ wɔbɛka dɛ, ‘Wɔdze wo bɔn akyɛ wo,’ anaa wɔbɛka dɛ, ‘Soɛr na nantsew’? 24 Naaso mbrɛ ɔbɛyɛ a hom bohu dɛ nyimpa Ba no wɔ tum dɛ ɔdze bɔn kyɛ wɔ asaase do ntsi—” ɔkaa kyerɛɛ ɔyarfo no dɛ: “Mese wo dɛ, Soɛr, fa wo kɛtɛ, na kɔ wo fie.” 25 Nna ɔbarimba no soɛree gyinaa hɔn nyina enyim, na ɔfaa ne kɛtɛ a nna ɔda do no, na ɔkɔr ne fie. Ɔrokɔ nyina nna ɔrehyɛ Nyankopɔn enyimnyam. 26 Na ɔyɛɛ hɔn nyinara nwanwa, na wɔhyɛɛ ase yii Nyankopɔn ayɛw, na hu kɛse kaa hɔn ma wɔkaa dɛ: “Ndɛ dze, yeehu anwanwadze!”

27 Iyi ekyir no, opuei kohun obi a ɔgyegye tow a wɔfrɛ no Levi dɛ ɔtsena beebi a wɔgyegye tow no, na ɔkaa kyerɛɛ no dɛ: “Bedzi m’ekyir.” 28 Ntsi ogyaa biribiara hɔ, na ɔsoɛree kedzii n’ekyir. 29 Na Levi too pon kɛsenara wɔ ne fie maa no, na nna nyimpa pii a wɔgyegye tow nye binom so ka hɔn ho ma woridzidzi.* 30 Ntsi Phariseefo nye akyerɛwfo no hyɛɛ ase hwinhwinii tsiaa n’esuafo no, na wobisaa hɔn dɛ: “Ebɛnadze ntsi na hom nye hɔn a wɔgyegye tow nye ndzebɔnyɛfo dzidzi na hom nye hɔn nom yi?” 31 Nna Jesus so yii hɔn ano dɛ: “Hɔn a wɔtse apɔw no nnhia ɔyarsafo, mbom hɔn a wɔyar no na wohia. 32 Mammbɛfrɛ atseneneefo, mbom mebɛfrɛɛ ndzebɔnyɛfo dɛ wonnu hɔnho.”

33 Na wɔkaa kyerɛɛ no dɛ: “John n’esuafo no taa yɛ akɔnkyen, na wɔdze nkotoserɛ bɔ mpaa, na dɛmara na Phariseefo no hɔn esuafo no so yɛ. Naaso w’esuafo no dze, wodzidzi na wɔnom.” 34 Nna Jesus kaa kyerɛɛ hɔn dɛ: “Hom runntum mma ayeforkun no n’anyɛnkofo nnyɛ akɔnkyen aber a ayeforkun no wɔ hɔn nkyɛn, anaa moboa? 35 Naaso nda bi bɛba a, wɔbɛfa ayeforkun no efi hɔn nkyɛn; na dɛm aber no mu no na wɔbɛyɛ akɔnkyen.”

36 Ɔsanee maa hɔn mfatoho bi so dɛ: “Obiara nnyi hɔ a obotwa tam fofor na ɔdze ataa atar dadaw mu. Sɛ ɔyɛ dɛm a, tam fofor no bɛtsew efi atar no mu, na fofor no bɛyɛ soronko efi dadaw no ho. 37 Dɛmara so na obiara nnyi hɔ a ɔbɛfa nsa fofor dze egu nsa kotoku dadaw mu. Osiandɛ sɛ ɔyɛ dɛm a, nsa kotoku no bɛpaa ma nsa no eegu famu na nsa kotoku no aasɛɛ. 38 Mbom, ɔsɛ dɛ wɔdze nsa fofor gu nsa kotoku fofor mu. 39 Obiara a ɔanom nsa dadaw no mmpɛ dɛ ɔnom nsa fofor, osiandɛ ɔka dɛ, ‘Dadaw no ara ye.’”