Asomafo Ndwuma

2 Na da a nna woridzi Pentecost Afahyɛ no, nna hɔn nyina ehyia mu wɔ fakor. 2 Na aber a wɔtsenatsena hɔ no, awerɛfirmu ara na dede bi fi sor bae, tse dɛ mframa bi a ɔrobɔ dzendzenndzen, na dede no bɛhyɛɛ dan no mu nyina ma. 3 Na wohun tɛkyerɛma beberee a ɔtse dɛ gya, na oyiyii nkorkor kesisii hɔn mu biara do. 4 Na sunsum krɔnkrɔn hyɛɛ hɔn nyina ma, na wɔhyɛɛ ase dɛ wɔreka kasa horow dɛ mbrɛ sunsum no dze maa hɔn dɛ wɔnka.

5 Dɛm aber no, nna Jewfo a wɔmmfa hɔn nyamesom nndzi agor na wofi aman ahorow a ɔwɔ wiadze nyina mu no abɛtsena Jerusalem. 6 Na aber a ngyegyee no bae no, nyimpadɔm bi behyiaa mu na hɔnho boow hɔn, osiandɛ nna hɔn mu biara tse dɛ wɔreka no kurow mu kasa.* 7 Nokwasɛm nye dɛ ɔyɛɛ hɔn nwanwa paa na wɔkaa dɛ: “Hwɛ, hɔn a wɔrekasa yi nyina nnyɛ Galileefo bi a? 8 Ntsi ɔyɛ dɛn na hɛn mu biara tse dɛ wɔreka nankasa no kurow mu kasa yi? 9 Parthiafo, Mediafo na Elamfo, nye hɔn a wɔtse Mesopotamia, Judea na Cappadocia nye Pontus na Asia mantɔw no mu, 10 nye Phrygia, Pamphylia, Egypt nye amantɔw ahorow a ɔwɔ Libya a ɔbɛn Cyrene no nye ahɔho a wofi Rome aba, kyerɛ dɛ, Jewfo nye hɔn a wɔabɛyɛ Jewfo nyina; 11 Cretefo na Arabiafo—yɛtse dɛ wɔdze hɛn kasaa reka ndzɛmba akɛse a Nyankopɔn ayɛ no ho asɛm.” 12 Nyew, ɔyɛɛ hɔn nyina nwanwa, na hɔn adwen mu yɛɛ hɔn konsee na wɔhyɛɛ ase bisabisaa hɔnho dɛ: “Iyi kyerɛ dɛn?” 13 Naaso binom so dzii hɔn ho fɛw na wɔkaa dɛ: “Wɔanonom nsa dɔkɔdɔkɔ* ma wɔabobow.”

14 Na Peter nye Dubiako no soɛree, na Peter maa ne ndze do kaa kyerɛɛ hɔn dɛ: “Judea mbarimba nye hom a hom tsetse Jerusalem nyina, hom nhu iyi na hom nyɛ aso ntsie me nsɛm yi yie. 15 Nokwasɛm nye dɛ nkorɔfo yi mmbobowee dɛ mbrɛ hom susu no, osiandɛ dɔn a otsia ebiasa* ara nye yi. 16 Mbom iyi nye dza wɔnam nkɔnhyɛnyi Joel do kae no: 17 ‘Nyankopɔn se, “Nda a odzi ekyir no mu no, mubohue mo sunsum no bi egu ɔhonam nyina do. Na hom mbabanyin nye hom mbabaa bɛhyɛ nkɔm, na hom mberantsɛ benya enyido-adzehu na hom nkɔkora bɔsoso adaa. 18 Na mo nkowaa na me mbaawa mpo, mubohue mo sunsum no bi egu hɔn do wɔ dɛm nda no mu, na wɔbɛhyɛ nkɔm. 19 Na mebɛma anwanwadze* aba wimu wɔ sor, na nsɛnkyerɛdze aba asaase do wɔ famu—bɔgya na gya nye wusiw kumbɔɔ. 20 Ewia bɛdan sum na bosoom adan bɔgya ansaana Jehovah* ne da kɛse a ɔkyɛn biara no aba. 21 Na obiara a ɔbɔbɔ Jehovah* ne dzin afrɛ no no, wɔbɛgye no nkwa.”’

22 “Israel mbarimba, hom ntsie dɛm nsɛm yi: Nyankopɔn maa hom hun no pefee dɛ ɔno na ɔsomaa Nazarethnyi Jesus, na ɔnam no do yɛɛ tum ndwuma, anwanwadze nye nsɛnkyerɛdze wɔ hom mu, dɛ mbrɛ hom nyim no. 23 Dɛm ɔbarimba yi na wɔdze no hyɛɛ hom nsa no. Nna Nyankopɔn abɔ ne tsirmu* wɔ iyi ho na nna onyim dada dɛ iyi nye dza obesi, na hom maa mbarimba mbratofo bɔɔ no asɛndua mu kum no. 24 Naaso Nyankopɔn nyaan no dze gyee no fii owu ne yaw mu,* osiandɛ nna owu runntum nnkyekyer no ma ɔnnyɛ yie. 25 Na David kaa no ho asɛm dɛ: ‘Medze Jehovah* esi m’enyim daa, na osiandɛ ɔwɔ me nsa nyimfa ntsi mirinnhihim dabiarada. 26 Osian iyi ntsi m’akoma enyi gyee na me tɛkyerɛma dzii ehurusi kɛse. Na mebɛtsena* enyidado mu; 27 osiandɛ irinngyaa me* wɔ Adakamona* mu, na eremma obi a odzi wo nokwar no mmprɔw.* 28 Ama mehu nkwa n’akwan; ebɛma menya enyigye kɛse wɔ w’enyim.’

29 “Mbarimba, enuanom, hom mma menka ebusuapanyin David no ho asɛm pefee nkyerɛ hom. Ɔno nye dɛ, owui na wosiee no, na ne nda wɔ hɛn nkyɛn dze besi ndɛ. 30 Osiandɛ nna ɔyɛ nkɔnhyɛnyi na onyim dɛ Nyankopɔn aka no ntam dɛ ɔdze n’asenyi* bi bɛtsena n’ahengua do ntsi, 31 odzii kan hun Christ no wusoɛr no, na ɔkaa ho asɛm dɛ oenngyaa no wɔ Adakamona* mu, na no honam so ammprɔw.* 32 Dɛm Jesus yi na Nyankopɔn nyaan no no, na hɛn nyina yɛ ho adasefo. 33 Na wɔhyɛɛ no enyimnyam dze no kɛtsenaa Nyankopɔn ne nsa nyimfa na onyaa sunsum krɔnkrɔn a Egya no dze hyɛɛ no bɔ no. Iyi ntsi na oehue dza hom hu nye dza hom tse yi egu hɛn do yi. 34 Osiandɛ David ammfow annkɔ sor, naaso nankasa kaa dɛ, ‘Jehovah* kaa kyerɛɛ mo Wura dɛ: “Tsena me nsa nyimfa, 35 kesi dɛ medze w’atamfo bɛyɛ w’ananadzegua.”’ 36 Dɛm ntsi, wɔmma Israel fie nyina nhu ampaara dɛ, Jesus yi a hom bɔɔ no asɛndua mu no, Nyankopɔn ayɛ no Ewuradze nye Christ.”

37 Na aber a wɔtsee iyi no, ɔwowɔɔ hɔn akoma mu, na wɔkaa kyerɛɛ Peter nye asomafo nkaa no dɛ: “Mbarimba, enuanom, ebɛnadze na yɛnyɛ?” 38 Nna Peter kaa kyerɛɛ hɔn dɛ: “Hom nnu homho na hom mma wonnuma hom mu biara wɔ Jesus Christ ne dzin mu ama wɔdze hom bɔn aakyɛ hom, na hom benya sunsum krɔnkrɔn no n’akyɛdze a wɔdze ma kwa no. 39 Osiandɛ hom, nye hom mba nye hɔn a wɔwɔ ekyirekyir nyinara a Jehovah* hɛn Nyankopɔn bɛfrɛ hɔn aba ne nkyɛn no nyina ntsi na wɔhyɛɛ dɛm bɔ yi.” 40 Na ɔkaa nsɛm afofor pii kaa ho dze dzii hɔn dase kofekofe, na ɔkɔr do tuu hɔn fo dɛ: “Hom mma wɔngye hom mfi ebusuasantsen a wɔakyea yi mu.” 41 Dɛm ntsi, hɔn a wɔdze enyigye gyee asɛm no wonumaa hɔn, na dɛm da no nyimpa* bɛyɛ 3,000 bɛkaa hɔn ho. 42 Na wɔkɔr do yɛɛ aso tsiee asomafo no hɔn nkyerɛkyerɛ, wɔnye hɔnho bɔɔ fɛkuw,* wodzidzii, na wɔbɔɔ mpaa daa.

43 Nokwasɛm nye dɛ, hu hyɛɛ ase tɔɔ obiara* do na asomafo no hyɛɛ ase yɛɛ anwanwadze* nye nsɛnkyerɛdze ahorow pii. 44 Hɔn a wɔbɛyɛɛ agyedzifo no nyina behyiaa mu na wɔnye hɔnho kyɛɛ dza wɔwɔ no. 45 Na wɔtontɔɔn hɔn ahodze nye hɔn egyapadze, na dza wonyae no, wɔkyekyɛe ma obiara nyaa dza ohia. 46 Wɔdze adwen kor kɔr asɔrfie hɔ da biara da, na obiara dzidzii wɔ ne nyɛnko ne fie, na wɔdze ahosɛpɛw nye akoma a no mu tsew bɔɔ mu dzidzii. 47 Na wɔkɔr do yii Nyankopɔn ayɛw na obiara bɛpɛɛ hɔn asɛm.* Ber kor no ara so, Jehovah* kɔr do dze hɔn a ɔregye hɔn nkwa no bɛkaa agyedzifo no ho daa.