Asomafo Ndwuma

8 Na Saul so peen do ma wokum no.

Na ofi dɛm da no rokɔ no, nkorɔfo taan asafo a nna ɔwɔ Jerusalem no enyi dzendzenndzen. Na hɔn nyina bɔe petsee wɔ Judea nye Samaria nsaase nyina do ma ɔkaa asomafo no nkotsee. 2 Na mbarimba bi a wɔmmfa hɔn nyamesom nndzi agor faa Stephen kesiee no, na wosuu no pii. 3 Na Saul hyɛɛ ase tuu n’enyi sii asafo no do. Na ɔbɔe wurawuraa efiefie mu kɔtwetwee mbarimba na mbaa nyina puei, na ɔmaa wɔdze hɔn koguu efiadze.

4 Naaso hɔn a wɔbɔɔ apetse no kekyinkyiin asaase no do kɛkaa Nyankopɔn n’asɛm no ho asɛmpa. 5 Na Philip kɔr Samaria kurow no mu,* na ɔhyɛɛ ase kaa Christ no ho asɛm kyerɛɛ hɔn. 6 Na nyimpadɔm no yɛɛ adwen kor, na wotsiee nsɛm a Philip kae no, na wɔyɛɛ aso maa no na wɔhwɛɛ nsɛnkyerɛdze a ɔyɛe no so. 7 Nna nyimpa pii wɔ esunsum fi, ntsi esunsum no dze ndze kɛse tseatseaa mu na wopuepuei fii hɔn mu. Afei so, ɔsaa hɔn a nna woebubu nye mpakye pii yarba. 8 Ntsi enyigye kɛse baa kurow no mu hɔ.

9 Nna ɔbarimba bi so wɔ kurow no mu a wɔfrɛ no Simon. Nna oyi nkongyaa ma Samariafo no hɔnho dwuruw hɔn, na nna ɔka dɛ ɔyɛ nyimpa tsitsir. 10 Nna obiara yɛ aso tsie no, ofi obi a ɔyɛ kakraba wɔ hɔn mu no do araa kesi obi a ɔyɛ kɛse no do, na nna wɔka dɛ: “Nyankopɔn no Tum a wɔfrɛ no Kɛse no wɔ ɔbarimba yi mu.” 11 Ntsi nna wɔyɛ aso tsie no osiandɛ nna ɔdze no nkongyaayi no ama hɔnho edwuruw hɔn akyɛr. 12 Naaso nna Philip reka Nyankopɔn n’Ahendzi nye Jesus Christ ne dzin ho asɛmpa. Na mbarimba na mbaa a wɔgyee no dzii no, wɔmaa wonumaa hɔn. 13 Simon nankasa so bɛyɛɛ gyedzinyi, na wɔ n’enuma ekyir no, ɔdze noho kɔbɔɔ Philip; na aber a ohun nsɛnkyerɛdze na tum ndwuma akɛse a ɔrokɔ do no, noho dwuruuw no.

14 Aber a asomafo a wɔwɔ Jerusalem no tsee dɛ Samariafo no agye Nyankopɔn n’asɛm no, wɔsomaa Peter na John kɔr hɔn nkyɛn; 15 ntsi asomafo beenu yi sianee kɔr hɔ na wɔkɔbɔɔ mpaa maa hɔn mbrɛ ɔbɛyɛ a wobenya sunsum krɔnkrɔn. 16 Osiandɛ nna numa ara na woenuma hɔn wɔ Ewuradze Jesus ne dzin mu, mbom sunsum krɔnkrɔn no dze nna onnyae mmbaa hɔn mu biara do. 17 Afei wɔdze hɔn nsa guu hɔn do, na wɔhyɛɛ ase nyaa sunsum krɔnkrɔn.

18 Na aber a Simon hun dɛ sɛ asomafo no dze hɔn nsa gu nkorɔfo do a wonya sunsum krɔnkrɔn no, ɔyɛɛ dɛ ɔrema hɔn sika, 19 na ɔkaa dɛ: “Hom mma me dɛm tum yi bi, ama obiara a mo so medze me nsa bogu no do no eenya sunsum krɔnkrɔn.” 20 Naaso Peter kaa kyerɛɛ no dɛ: “Ɔwo na wo dwetɛ nyina nsɛɛ,* osiandɛ w’adwen yɛ wo dɛ ibotum dze sika atɔ Nyankopɔn n’akyɛdze a ɔdze ma kwa no. 21 Innyi kyɛfa anaa ɔfa biara wɔ iyi mu, osiandɛ w’akoma nntsen wɔ Nyankopɔn n’enyim. 22 Ntsi nu woho wɔ dɛm bɔn a ayɛ yi ho, na totɔ serɛ Jehovah* dɛ sɛ ɔbɛyɛ yie a ɔmfa nsusui bɔn a wɔaba w’akoma mu no nkyɛ wo; 23 osiandɛ muhu dɛ eyɛ ewudur wenwen* na bɔn n’akowaa.” 24 Nna Simon kaa kyerɛɛ hɔn dɛ: “Hom ntotɔ nserɛ Jehovah* mma me amma dza hom aka yi mu biara aammba mo do.”

25 Na aber a wodzii dase kofekofe na wɔkaa Jehovah* n’asɛm no, wɔsanee dze hɔn enyi kyerɛɛ Jerusalem. Na aber a wɔrokɔ no, wɔkaa asɛmpa no wɔ Samaria nkuraase pii mu.

26 Naaso Jehovah* no bɔfoe kaa kyerɛɛ Philip dɛ: “Soɛr na kɔ anaafo afamu kwan a osian fi Jerusalem kɔ Gaza no do.” (Iyi yɛ kwan a ɔda sar do.) 27 Ntsi ɔsoɛree kɔree, na ohun Ethiopianyi bi a ɔyɛ ahemfie panyin.* Nna dɛm ɔbarimba yi wɔ tum wɔ Ethiopiafo hɔn hembaa Candace n’ahendzi no mu; ɔno na nna ɔhwɛ ne sikasɛm nyina do. Nna ɔakɔ Jerusalem akɔsom, 28 na nna ɔtsena ne tseaseanam mu resan akɔ. Nna ɔrekenkan nkɔnhyɛnyi Isaiah no nwoma no dzen. 29 Ntsi sunsum no kaa kyerɛɛ Philip dɛ: “Kɔ hɔ na bɛn tseaseanam yi ho.” 30 Philip tuu mbirika kɔr ho, na ɔtsee dɛ ɔrekenkan nkɔnhyɛnyi Isaiah no nwoma no dzen. Ntsi obisaa no dɛ: “Etse dza erekenkan yi ase a?” 31 Oyii no ano dɛ: “Sɛ obi ammboa me a, mebɛyɛ dɛn etum atse ase?” Ntsi ɔserɛɛ Philip dɛ ɔmfow mbɛtsena ne nkyɛn. 32 Asɛm a nna ɔrekenkan wɔ Kyerɛwsɛm no mu nye yi: “Wɔdze no kɔr dɛ oguan a worukoku no, na dɛ mbrɛ oguan yɛ komm aber a worutwitwa no ho nhwi no, dɛmara na ɔno so oemmbue n’ano. 33 Aber a woguu n’enyim ase no, woemmbu atsɛntsenenee amma no. Woana na ɔbɛkyerɛ ebusuasantsen a ofi mu? Osiandɛ wotwaa no nkwa fii asaase do.”

34 Ntsi ahemfie panyin no bisaa Philip dɛ: “Meserɛ wo o, woana na nkɔnhyɛnyi no reka no ho asɛm yi? Nankasa anaa obi fofor a?” 35 Philip hyɛɛ ase kasae, na ɔkaa Jesus no ho asɛmpa kyerɛɛ no. Kyerɛwsɛm a nna ahemfie panyin no rekenkan no na ɔdze hyɛɛ ase. 36 Na aber a wɔnam kwan do rokɔ no, wokodur nsu bi ho, na ahemfie panyin no bisaa no dɛ: “Hwɛ! Nsu nye yi; ebɛnadze na osiw m’enuma ho kwan?” 37* —— 38 Ntsi ɔmaa tseaseanam no gyinae, na Philip nye ahemfie panyin no nyina sianee kɔr nsu no mu, na onumaa no. 39 Aber a wofii nsu no mu puei no, ntsɛmara na Jehovah* no sunsum faa Philip fii hɔ kɔree, na ahemfie panyin no ennhu no bio, naaso ɔdze enyigye toaa do kɔr no kwan. 40 Na Philip kopuee Ashdod, na okekyiin mpɔtamu hɔ na ɔkɔr do kaa asɛmpa no wɔ nkurow nkurow no nyina mu, kesii dɛ okodur Caesarea.