Luke Asɛmpa

4 Afei, Jesus a sunsum krɔnkrɔn ahyɛ no ma no fii Jordan Esutsen no ho, na sunsum no dze no kekyinkyiin sar no do 2 ndafua 40. Dɛm aber no nyina oenndzi hwee, ntsi ndafua 40 no baa n’ewiei no, nna ɔkɔm dze no. Na dɛm aber yi na Abɔnsam kɔsɔɔ no hwɛe. 3 Abɔnsam kaa kyerɛɛ no dɛ: “Sɛ eyɛ Nyankopɔn ne ba a, kasa kyerɛ bobaa yi ma ɔndan paanoo.” 4 Naaso Jesus kaa kyerɛɛ no dɛ: “Wɔakyerɛw dɛ, ‘Ɔnnyɛ paanoo nkotsee na nyimpa nam do bɛtsena ase.’”

5 Afei Abɔnsam dze no baa bepɔw bi do, na ɔdze wiadze ahendzi nyinara kyerɛɛ no prɛko pɛ. 6 Na ɔkaa kyerɛɛ no dɛ: “Medze dɛm tum yi nyinara na no mu enyimnyam bɛma wo, osiandɛ wɔdze ama me, na obiara a mepɛ no medze ma no. 7 Ntsi sɛ ebɔ wo mu adze kor pɛ som me a, ne nyinara bɛyɛ wodze.” 8 Nna Jesus kaa kyerɛɛ no dɛ: “Wɔakyerɛw dɛ, ‘Jehovah* wo Nyankopɔn na ɔwɔ dɛ ekotow no, na ɔno nkotsee na ɔwɔ dɛ esom no.’”

9 Afei ɔdze no kɔr Jerusalem, na ɔnye no kegyinaa asɔrfie no n’etsifi* na ɔkaa kyerɛɛ no dɛ: “Sɛ eyɛ Nyankopɔn ne ba a, tow woho fi ha kɔhwe famu, 10 osiandɛ wɔakyerɛw dɛ, ‘Ɔwo ntsi, ɔbɔsoma n’abɔfoe dɛ wɔmbɔbɔ wo ho ban,’ 11 na ‘Wɔbɔsoa wo wɔ hɔn nsa do amma aammfa wo nan ammpem bobaa.’” 12 Nna Jesus kaa kyerɛɛ no dɛ: “Wɔaka dɛ, ‘Mma nnsɔ Jehovah* wo Nyankopɔn nnhwɛ.’” 13 Ntsi aber a Abɔnsam sɔɔ no hwɛe wiei no, ogyaa no hɔ kesii ber fofor a ɔfata.

14 Afei Jesus sanee baa Galilee, na nna sunsum krɔnkrɔn no tum ahyɛ no ma. Na no ho nsɛmpa tahyee wɔ nkurow nkurow a ɔwɔ hɔ no nyina mu. 15 Na ɔhyɛɛ ase kyerɛkyerɛe wɔ hɔn nhyiamudan no mu, na obiara kamfoo no.*

16 Afei ɔkɔr Nazareth, beebi a wɔtsetsee no no, na dɛ mbrɛ odu Ahomgyeda a nna ɔtaa yɛ no, ɔkɔr nhyiamudan no mu na ɔsoɛree gyinaa hɔ dɛ ɔrebɛkenkan. 17 Ntsi wɔdze nkɔnhyɛnyi Isaiah no nwoma mbobɔwee no maa no, na obuee mu, na ohun beebi a wɔakyerɛw dɛ: 18 “Jehovah* no sunsum wɔ mo do, osiandɛ ɔasera me dɛ membɛka asɛmpa nkyerɛ ehiafo. Na mempaa mu nka ɔgye ho asɛm nkyerɛ hɔn a wɔwɔ nkowaasom mu no, na memma hɔn a hɔn enyi efura no nhu adze, na mengye hɔn a wɔhyɛ hɔn do no mfi atseetsee mu, 19 na menka Jehovah* n’adom mber* nkyerɛ.” 20 Afei ɔbobɔɔw nwoma mbobɔwee no, na ɔsanee dze maa ɔsomfo no na ɔtsenaa famu, na hɔn a wɔwɔ nhyiamudan no mu nyina hwɛɛ no dzinn. 21 Na ɔhyɛɛ ase kaa kyerɛɛ hɔn dɛ: “Ndɛ na kyerɛwsɛm a hom tsee no seseiara yi aba mu.”

22 Na hɔn nyina hyɛɛ ase dɛ woridzi no ho dase pa, na nsɛm a ɔka akoma a ofi n’anomu bae no maa hɔnho boow hɔn na wobisabisaa hɔnho dɛ: “Ɔnnyɛ Joseph ne ba no nye yi bi a?” 23 Wɔkaa dɛm no ɔkaa kyerɛɛ hɔn dɛ: “Minyim paa dɛ hom bobu me dɛm bɛ yi dɛ, ‘Ɔyarsafo, sa woho yarba. Ndzɛmba a yɛatse dɛ ekɛyɛe wɔ Capernaum no, yɛ bi wɔ wo kurow mu ha so.’” 24 Na ɔkaa dɛ: “Nokwar mese hom dɛ nkɔnhyɛnyi biara nnyi hɔ a wɔgye no to mu wɔ noara no kurow mu. 25 Mereka nokwar akyerɛ hom: Aber a wɔtoow ɔsor mu mfe ebiasa na abosoom esia ma kɔm kɛse baa asaase no nyinara do wɔ Elijah n’aber do no, nna ekunafo pii wɔ Israel. 26 Naaso wɔannsoma Elijah ma ɔannkɔ dɛm mbaa yi mu biara nkyɛn, mbom okunafo bi a ɔwɔ Sidon kurow Zarephath mu no nkotsee na wɔsomaa no ma ɔkɔr no hɔ. 27 Bio so, wɔ nkɔnhyɛnyi Elisha n’aber do no, nna akwatafo pii wɔ Israel, naaso wɔannsa hɔn mu biara yarba,* gyedɛ Syrianyi Naaman nkotsee.” 28 Aber a hɔn a wɔwɔ nhyiamudan no mu no nyina tsee dɛm nsɛm yi no, hɔn bo fuuw paa, 29 na wɔsoɛree, na wɔdze no twitwiitwi nye no puei fii kurow no mu. Na wɔdze no kɔr bepɔw a hɔn kurow no wɔ do no no sor dɛ worukosun no ahwe famu. 30 Naaso Jesus faa hɔn finimfin pɛɛ na ɔtoaa do kɔr no kwan.

31 Afei osianee kɔr Galilee kurow Capernaum mu. Na ɔkyerɛkyerɛɛ hɔn wɔ Ahomgyeda, 32 na kwan a ɔfaa do kyerɛkyerɛe no yɛɛ hɔn nwanwa, osiandɛ ɔkasae wɔ tum do. 33 Nna ɔbarimba bi wɔ nhyiamudan no mu a ɔwɔ sunsum fi, na ɔdze ndze kɛse tseatseaa mu dɛ: 34 “Ah! Nazarethnyi Jesus, ebɛnadze na yɛnye wo wɔ yɛ? Aba dɛ erebɛsɛɛ hɛn anaa? Minyim wo nyimpaban, ɔwo nye Nyankopɔn no Krɔnkrɔnnyi no.” 35 Naaso Jesus twuuw n’enyim, na ɔkaa kyerɛɛ no dɛ: “Ka w’ano to mu, na fi no mu pue.” Na sunsum fi no maa ɔbarimba no hwee famu wɔ hɔn enyim, na ofii no mu puei, naaso oemmpira no. 36 Iyi yɛɛ hɔn nyina nwanwa na wɔhyɛɛ ase kekaa kyerɛɛ hɔnho dɛ: “Ebɛn asɛm nye yi? Ɔdze tum na ahoɔdzen kasa kyerɛ esunsum fi ma wopue!” 37 Iyi ntsi, no ho asɛm kɔr do tahyee wɔ nkurow nkurow a ɔwowɔ hɔ no mu beebiara.

38 Aber a ofii nhyiamudan no mu no, ɔkɔr Simon ne fie. Nna fiiva* dzendzenndzen bi akyer Simon n’asew basia, ntsi wɔserɛɛ no dɛ ɔnsa no yarba. 39 Ntsi okegyinaa ne nkyɛn, na ɔtseaa fiiva no, na fiiva no kɔree. Amonmu hɔ ara na ɔsoɛree, na ɔhyɛɛ ase dɛ ɔrosom hɔn.

40 Na aber a ewia rokɔtɔ no, hɔn a wɔwɔ nkorɔfo a yarba ahorow retseetsee hɔn no nyina dze hɔn brɛɛ no. Na ɔdze ne nsa guu hɔn mu biara do saa hɔn yarba. 41 Na esunsum bɔn so fi nyimpa pii mu puei, na wɔtseatseaa mu kaa dɛ: “Ɔwo nye Nyankopɔn ne Ba no.” Naaso otwuuw hɔn enyim, na ɔamma hɔn kwan ma wɔannkasa osiandɛ nna wonyim dɛ ɔno nye Christ no.

42 Na adze kyee no, ofii hɔ kɔr beebi a obiara nnyi hɔ. Na nyimpadɔm no hyɛɛ ase dɛ wɔrohwehwɛ no, na wɔbaa beebi a ɔwɔ no, na wɔyɛɛ dɛ wɔremma ommfi hɔn nkyɛn nnkɔ. 43 Naaso ɔkaa kyerɛɛ hɔn dɛ: “Ɔsɛ dɛ mokɔ nkurow afofor so mu na mekɛka Nyankopɔn n’Ahendzi* ho asɛmpa no wɔ hɔ, osiandɛ iyi ntsi na wɔsomaa me.” 44 Ntsi ɔtoaa do kaa asɛmpa no wɔ nhyiamudan a ɔwowɔ Judea no mu.