Luke Asɛmpa

8 Iyi ekyir no, wɔannkyɛr biara na otutuu akwan kɔr nkurow nye nkuraase mu kɛkaa asɛm no, na ɔkaa Nyankopɔn n’Ahendzi* ho asɛmpa no. Nna Duebien no ka no ho. 2 Nna mbaa bi a ɔasa hɔn yarba nye hɔn a oetu esunsum bɔn efi hɔn mu so ka ho bi. Dɛm mbaa yi nye: Mary a wɔfrɛ no Magdalene a otuu esunsum bɔn esuon fii no mu no; 3 Chuza a nna ɔhwɛ Herod ne fie do no ne yer Joanna; Susanna; nye mbaa afofor pii a nna wɔdze hɔn ahodze rosom hɔn no.

4 Afei nyimpadɔm kɛse bi bɛkaa hɔn a nna ɔnye hɔn kɔ nkurow nkurow ahorow mu no ho, na ɔdze mfatoho bi kasaa kyerɛɛ hɔn. Ɔkaa dɛ: 5 Okuafo bi kɔr dɛ orukogu n’aba. Na aber a orugu aba no, bi koguu kwan nkyɛn ma nkorɔfo tsiatsiaa do na wimu nnoma bɔsosɔwee. 6 Bi so koguu abotan do, na aber a ofifirii no, ɔkyenkyenee osiandɛ woennya nsu. 7 Bi so koguu nsoɛ mu, na nsoɛ no nye no nyinii na omiaa no. 8 Naaso bi so koguu asaase pa mu, na aber a ofifirii no, ɔsoow aba mbɔho 100.” Aber a ogu do reka iyinom no, ɔmaa ne ndze do kaa dɛ: “Ma obi a ɔwɔ asowa a ɔdze betsie no ntsie.”

9 Naaso n’esuafo no bisaa no dza mfatoho yi kyerɛ. 10 Nna ɔkaa dɛ: “Hom na wɔdze ama hom dɛ hom ntse esumasɛm krɔnkrɔn a ɔfa Nyankopɔn n’Ahendzi* ho no ase. Naaso hɔn a wɔaka no dze, mfatoho na wɔdze kasa kyerɛ hɔn. Dɛm ntsi sɛ wɔhwɛ a, wɔhwɛ no kwa, na wɔtse so a wɔnntse ase. 11 Dza mfatoho no kyerɛ nye yi: Aba no nye Nyankopɔn n’asɛm. 12 Dza okoguu kwan nkyɛn no nye hɔn a wɔtse asɛm no, naaso Abɔnsam ba bɛfa asɛm a wɔtsee no fi hɔn akoma mu, amma wɔaanngye enndzi na wɔaanngye hɔn nkwa. 13 Dza okoguu ɔbotan do no nye hɔn a sɛ wɔtse asɛm no a wɔdze enyigye suo mu, naaso wonnyi ndwow biara wɔ hɔn mu no. Wɔgye dzi mber kakra, naaso sɛ wɔsɔ hɔn hwɛ a, nna woegyaa mu. 14 Na dza okoguu nsoɛ mu no nye hɔn a wɔtse asɛm no, naaso ɔbra yi mu dadwen, ahonyadze nye wiadze yi mu enyigyedze twetwe hɔn adwen, na omia hɔn fee ma ntsi wonntum nnsow aba. 15 Naaso dza okoguu asaase pa mu no dze, ɔno nye hɔn a wɔdze akoma a oye na ɔyɛ papa tsie asɛm no na wɔdze sie na wɔdze enyimia sow aba.

16 “Obiara nnyi hɔ a ɔsɔ kandzea a ɔdze adze kata do anaa ɔdze hyɛ mpa ase, mbom ɔdze si kandzeadua do ama hɔn a wɔbɛba dan no mu no eehu kan no. 17 Na biribiara nnyi hɔ a wɔdze esuma a wɔrennda no edzi, na biribiara so nnyi hɔ a wɔdze esie fee a orummpue na ɔremmbɛda gua. 18 Dɛm ntsi hom nhwɛ mbrɛ hom si tsie asɛm no yie, na obiara a ɔwɔ bi* no, wɔdze pii bɛka no ho, naaso obi a onnyi bi no dze, dza osusu dɛ ɔwɔ no mpo, wɔbɛgye efi ne nsamu.”

19 Afei ne maame nye no nuanom mbanyimfo baa no hɔ, naaso osian nyimpadɔm no ntsi woenntum ammba ne nkyɛn. 20 Ntsi wɔbɛkaa kyerɛɛ no dɛ: “Wo maame nye wo nuanom mbanyimfo gyina abowano, na wɔpɛ dɛ wohu wo.” 21 Ɔkaa kyerɛɛ hɔn dɛ: “Me maame nye mo nuanom mbanyimfo nye woyinom a wotsie Nyankopɔn n’asɛm na wodzi do no.”

22 Da kor bi, ɔnye n’esuafo no kɛtsenaa hɛmba bi mu na ɔkaa kyerɛɛ hɔn dɛ: “Hom mma yentwa nkɔ nsutaae no n’ekyir.” Ntsi wɔkɔree. 23 Naaso aber a wɔrokwan kɔ no, ɔfaa mu dae. Na ehum kɛse bi tui wɔ nsutaae no do, na nsu hyɛɛ ase dɛ ɔreba hɛmba no mu na hɔn nkwa bɛdaa esian mu. 24 Ntsi wokenyaan no, na wɔkaa kyerɛɛ no dɛ: “Kyerɛkyerɛnyi, Kyerɛkyerɛnyi, yerubowuwu o!” Nna ɔsoɛree, na ɔtseaa ehum no nye nsu a ɔayɛ begyabegya no, na ehum no na nsu no gyaae, na hɔ taa dzinn. 25 Nna obisaa hɔn dɛ: “Hom gyedzi wɔ hen?” Naaso hu kaa hɔn, na hɔnho dwuruuw hɔn araa ma wobisabisaa hɔnho dɛ: “Woana koraa nye yi? Otum hyɛ mframa na nsu mpo ma wotsie no.”

26 Na wɔdze hɛmba no kodur mpoano wɔ Gerasafo hɔn asaase do, beebi a ɔnye Galilee dzi abɔenyim no, na wogyinae. 27 Na aber a Jesus sianee fii hɛmba no mu no, ɔbarimba bi a ɔwɔ sunsum bɔn fi kurow no mu hɔ behyiaa no. Atar dze, nna ɔhyɛɛ bi akyɛr paa. Nna ɔnntsena fie mbom esiei na nna ɔtse. 28 Aber a ohun Jesus no, ɔtseatseaa mu, na ɔbɔkotoow n’enyim. Afei ɔdze ndze kɛse tseaa mu dɛ: “Jesus, Ɔsorsornyi Nyankopɔn ne Ba, ebɛnadze na menye wo wɔ yɛ? Meserɛ wo, mma nnhaw me.” 29 (Osiandɛ nna Jesus rehyɛ sunsum fi no dɛ omfi ɔbarimba no mu mpue. Nna sunsum no taa ba no do,* na nna wɔtaa dze kyein* to ne nsa nye ne nan na wɔweɔn no, naaso nna ɔyɛ a ɔtsetsew kyein no mu na sunsum no nye no kɔ beebi a obiara nnyi hɔ.) 30 Nna Jesus bisaa no dɛ: “Wɔfrɛ wo dɛn?” Oyii no ano dɛ: “Wɔfrɛ me Asafokuw,” osiandɛ nna esunsum fi pii na wɔakɛhyɛ ɔbarimba no mu. 31 Na wɔkɔr do serɛɛ Jesus dɛ mma ɔmmpam hɔn nnkɔ amona donkodonko no mu. 32 Nna mpreko beberee ridzidzi wɔ bepɔw no do, ntsi wɔserɛɛ no dɛ ɔmma wɔnkɛhyehyɛ hɔn mu, na ɔmaa hɔn kwan. 33 Ntsi esunsum fi no fii ɔbarimba no mu, na wɔkɛhyehyɛɛ mpreko no mu, na mpreko no nyina dze mbirika siaan bepɔw no koguu nsutaae no mu na wowuwui. 34 Naaso aber a hɔn a wɔhwɛ mpreko no hun dza woesi no, woguanee kɔbɔɔ amandzɛɛ wɔ kurow no nye nkuraase a ɔbembɛn hɔ no mu.

35 Na nkorɔfo puei kɔhwɛɛ dza woesi no. Ntsi wɔbaa Jesus ne nkyɛn na wohun ɔbarimba a esunsum fi efi no mu no dɛ ɔhyɛ atar tsena Jesus n’ananadze. Nna n’adwen mu ada hɔ, na iyi maa wɔbɔɔ hu paa. 36 Hɔn a wohun mbrɛ ɔyɛe a ɔbarimba a ɔwɔ esunsum fi no ho tɔɔ no no kaa ho asɛm kyerɛɛ nyimpa a wɔbae no. 37 Ntsi nyimpadɔm a wofifi Gerasafo hɔn nsaase a ɔbembɛn hɔ do no kaa kyerɛɛ Jesus dɛ omfi hɔn nkyɛn nkɔ, osiandɛ nna hɔn akoma etu paa. Ntsi ɔkɛtsenaa hɛmba no mu na ofii hɔ kɔree. 38 Naaso ɔbarimba a esunsum fi no fii no mu no kɔr do serɛɛ Jesus dɛ ɔnye no bɔkɔ, naaso Jesus gyaa no kwan na ɔkaa kyerɛɛ no dɛ: 39 “San w’ekyir kɔ fie, na kɔ do ka dza Nyankopɔn ayɛ ama wo no ho asɛm kyerɛ nkorɔfo.” Ntsi ɔsaan n’ekyir kɔree, na ɔkɛkaa dza Jesus ayɛ ama no no ho asɛm wɔ kurow no mu nyina.

40 Aber a Jesus sanee bae no, nyimpadɔm no gyee no fɛw do, osiandɛ nna hɔn nyina rohwɛ no kwan. 41 Na hwɛ, ɔbarimba bi a wɔfrɛ no Jairus bae; nna ɔyɛ nhyiamudan mu panyin. Na ɔbɔhwee Jesus n’ananadze, na ɔserɛɛ no dɛ ɔnye no nkɔ ne fie, 42 osiandɛ nna ne babaa kor pɛ* a oedzi mfe 12 no reyɛ ewu.

Aber a nna Jesus rokɔ ɔbarimba no ne fie no, nna nyimpadɔm no akyer no do. 43 Nna ɔbaa bi wɔ hɔ a bɔgya etu no mfe 12, na nna obiara nntum nnsa no yarba. 44 Ɔfaa Jesus n’ekyir dze ne nsa kɛkaa n’atar ngugudo no n’ano ndwow, na amonmu hɔ ara bɔgya a nna orutu no no twae. 45 Ntsi Jesus bisaa dɛ: “Woana na ɔdze ne nsa kaa me no?” Aber a nna obiara reka dɛ ɔnnyɛ ɔno no, Peter kaa dɛ: “Kyerɛkyerɛnyi, nyimpadɔm yi akyer wo do, na worimia wo.” 46 Naaso Jesus kaa dɛ: “Obi dze ne nsa aka me, osiandɛ muhu dɛ tum bi efi mo mu.” 47 Aber a ɔbaa no hun dɛ Jesus ehu no no, ɔdze ahopopo bɔkotoow n’enyim na ɔkaa mbrɛ ɔyɛe a ɔdze ne nsa kaa no, nye mbrɛ noho tɔɔ no amonmu hɔ ara no kyerɛɛ no wɔ nkorɔfo no nyina enyim. 48 Nna Jesus kaa kyerɛɛ no dɛ: “Babaa, wo gyedzi ama woho atɔ wo. Fa asomdwee kɔ.”

49 Aber a ogu do rekasa no, nhyiamudan mu panyin no n’ananmusinyi bi bɛkaa kyerɛɛ no dɛ: “Wo babaa no ewu o; mma nnhaw Kyerɛkyerɛnyi no bio.” 50 Aber a Jesus tsee iyi no, ɔkaa kyerɛɛ Jairus dɛ: “Mma nnsuro, mbom nya gyedzi ara, na obenya nkwa.” 51 Aber a odur fie hɔ no, ɔamma obiara annka no ho ennwura mu gyedɛ Peter, John, James, nye basiaba no ne maame nye ne papa. 52 Naaso nna nkorɔfo rusu na woridzi basiaba no ho awerɛhow.* Ntsi ɔkaa kyerɛɛ hɔn dɛ: “Hom ngyaa su, osiandɛ basiaba no nnwui mbom ɔada.” 53 Aber a ɔkaa dɛm no, wɔhyɛɛ ase sereew no twee, osiandɛ nna wonyim dɛ basiaba no ewu. 54 Naaso osuoo basiaba no ne nsa mu na ɔkaa kyerɛɛ no dɛ: “Abofra, soɛr!” 55 Na basiaba no nkwa* sanee baa no mu, na ɔsoɛɛr amonmu hɔ ara, na Jesus kaa dɛ wɔmma basiaba no biribi ma ondzi. 56 Na n’awofo hɔn enyi gyee araa ma nna wonnhu dza wɔnyɛ hɔnho mpo, naaso Jesus kaa kyerɛɛ hɔn dɛ mma wɔnnka dza woesi no ho asɛm nnkyerɛ obiara.