John Asɛmpa
2 Na da a otsia ebiasa no, nna ayeforhyia aponto bi rokɔ do wɔ Cana a ɔwɔ Galilee no, na nna Jesus ne maame wɔ hɔ bi. 2 Jesus na n’esuafo no so, wɔtoo nsa frɛɛ hɔn ma wɔkɔr ayeforhyia aponto yi ase bi.
3 Aber a nsa no sae no, Jesus ne maame kaa kyerɛɛ no dɛ: “Hɔn nsa no asa o.” 4 Naaso Jesus kaa kyerɛɛ no dɛ: “Ɔbaa, iyi dze ɔfa emi na ɔwo hɛnho dɛn?* Me ber nnyae nnsoe.” 5 Nna ne maame kaa kyerɛɛ asomfo no dɛ: “Dza ɔbɛka akyerɛ hom biara hom nyɛ.” 6 Dɛm aber no, nna nsuhina esia a wɔdze abo ayɛ sisi hɔ dɛ mbrɛ Jewfo hɔn ahoguar ho mbra tse no, na nna no mu biara botum afa etwahina* ebien anaa ebiasa. 7 Na Jesus kaa kyerɛɛ hɔn dɛ: “Hom mfa nsu ngu nsuhina no mu ma ɔnyɛ ma.” Ntsi wɔdze nsu guu mu ma ɔyɛɛ ma tɔtɔɔtɔr. 8 Nna ɔkaa kyerɛɛ hɔn dɛ: “Hom nsaw bi nkɛma nyia ɔhwɛ aponto no do no.” Ntsi wɔsaaw bi kɔree. 9 Na nyia ɔhwɛ aponto no do no kaa nsu a wɔadan no nsa no bi hwɛe, nna onnyim beebi a dɛm nsa yi fi (naaso asomfo a wɔsesaaw nsu no dze nna wonyim), ntsi nyia ɔhwɛ aponto no do no frɛɛ ayeforkun no, 10 na ɔkaa kyerɛɛ no dɛ: “Obiara dzi kan dze nsa pa besisi hɔ, na sɛ nkorɔfo bobow wie a, nna wɔdze dza ɔnnyɛ papa no aba. Naaso ɔwo dze, edze nsa pa no esie araa ebodu dɛm aber yi.” 11 Jesus yɛɛ iyi wɔ Cana a ɔwɔ Galilee no. Iyi nye anwanwadze a odzi kan a ɔyɛe, na ɔdaa n’enyimnyam edzi, na n’esuafo no gyee no dzii.
12 Iyi ekyir no, ɔnye ne maame nye no nuanom nye n’esuafo no sianee kɔr Capernaum, naaso wɔanntsena hɔ annkyɛr.
13 Nna Jewfo hɔn Apaho afahyɛ no abɛn, na Jesus fowee kɔr Jerusalem. 14 Na ohun dɛ binom rotɔn anantwi na nguan na mbubur wɔ asɔrfie hɔ, na binom so tsenatsena hɔ a wɔresesa sika. 15 Ntsi ɔdze ahoma yɛɛ abaa, na ɔpaam hɔn a wɔtɔn nguan na anantwi no fii asɔrfie hɔ, na ohuee hɔn a wɔsesa sika no hɔn sika no gui na obutubutuuw hɔn apon no. 16 Na ɔkaa kyerɛɛ hɔn a wɔtɔn mbubur no dɛ: “Hom mfa iyinom mfi ha! Hom ngyaa dɛ hom dze m’Egya ne fie reyɛ beebi a wodzi gua!”* 17 Nna n’esuafo no kaa dɛ wɔakyerɛw dɛ: “Wo fie ho mbɔdzembɔ bɛhyɛ me ma.”*
18 Na Jewfo no bisaa no dɛ: “Ebɛn asɛnkyerɛdze na ibotum ayɛ dze akyerɛ hɛn, ama yeehu dɛ ewɔ hokwan dɛ eyɛ dɛm ndzɛmba yi?” 19 Nna Jesus kaa kyerɛɛ hɔn dɛ: “Hom ndwuruw asɔrfie yi ngu famu, na mibesi no wɔ nda ebiasa ntamu.” 20 Nna Jewfo no kaa kyerɛɛ no dɛ: “Mfe 46 na wɔdze sii dɛm asɔrfie yi, nna ese ibesi no wɔ nda ebiasa ntamu yi a?” 21 Naaso asɔrfie a nna ɔreka ho asɛm no, nna ɔyɛ ne nyimpadua. 22 Na aber a wonyaan no fii ewufo mu no, n’esuafo no kaa dɛ nna ɔtaa ka dɛm asɛm yi, na wɔgyee kyerɛwsɛm no nye dza Jesus kae no dzii.
23 Na aber a ɔwɔ Apaho afahyɛ no ase wɔ Jerusalem no, nyimpa pii hun nsɛnkyerɛdze a ɔyɛe no na wɔgyee ne dzin dzii. 24 Naaso Jesus ammfa no werɛ annhyɛ hɔn mu osiandɛ nna onyim hɔn nyina. 25 Afei so nna onnhia obiara ma oeedzi nyimpa ho dase akyerɛ no, osiandɛ nna onyim dza ɔwɔ nyimpa no mu.*