Luke Asɛmpa

7 Aber a ɔkaa dza nna ɔwɔ dɛ ɔka kyerɛ nkorɔfo no nyina wiei no, ɔkɔr Capernaum. 2 Nna sogyanyi panyin bi n’akowaa a ɔpɛ n’asɛm yar dzendzenndzen ma ɔreyɛ ewu. 3 Aber a ɔtsee Jesus ne nka no, ɔsomaa Jewfo mpanyimfo no bi kɔr Jesus hɔ dɛ wɔnkɛka nkyerɛ no ma ɔmbɛsa n’akowaa no yarba. 4 Aber a wɔbaa Jesus hɔ no, wɔhyɛɛ ase serɛɛ no dzendzenndzen dɛ: “Ɔfata dɛ eyɛ n’ebisadze yi ma no, 5 osiandɛ ɔdɔ hɛn man yi, na ɔnoara mpo na osii hɛn nhyiamudan yi.” 6 Ntsi Jesus nye hɔn kɔree. Naaso aber a ɔrebɛn fie hɔ no, nna sogyanyi panyin no edzi kan asoma n’anyɛnkofo dɛ wɔmbɛka nkyerɛ no dɛ: “Owura, mma nnhaw woho, osiandɛ memmfata dɛ ebɛba me fie. 7 Iyi ntsi na mubuu moho dɛ memmfata dɛ mebɛba wo nkyɛn no. Ɔwodze ka biribi, na m’akowaa no ho bɔtɔ no. 8 Osiandɛ mara so mehyɛ obi n’ase, na mowɔ asogyafo so a wɔhyɛ m’ase, na sɛ meka kyerɛ oyi dɛ, ‘Kɔ!’ a ɔkɔ, na sɛ meka kyerɛ ɔfofor so dɛ, ‘Bra!’ a, ɔba, na sɛ meka kyerɛ m’akowaa so dɛ, ‘Yɛ dɛm adze yi!’ a ɔyɛ.” 9 Aber a Jesus tsee iyi no, ɔbarimba no ho yɛɛ no nwanwa, na ɔdaan noho kaa kyerɛɛ nyimpadɔm a wodzi n’ekyir no dɛ: “Mereka akyerɛ hom dɛ, Israel mpo munnhun obiara a ɔwɔ gyedzi kɛse dɛm.” 10 Na hɔn a wɔsomaa hɔn no sanee kɔr fie, na wokohun dɛ akowaa no ho atɔ no.

11 Iyi ekyir no, wɔannkyɛr biara na ɔkɔr kurow bi a wɔfrɛ no Nain mu, na nna n’esuafo no nye nyimpadɔm pii nye no nam. 12 Ber a ɔbɛɛn kurow no no pon ano no, hwɛ! nna wɔso ɔbarimba bi a oewu rupue efi kurow no mu, nna ɔyɛ ne maame ne ba kor pɛ.* Nna maame no so yɛ okunafo, na nna nyimpadɔm pii a wofi kurow no mu ka maame no ho. 13 Aber a Ewuradze hun ɔbaa no, no ho yɛɛ no mbɔbɔr, na ɔkaa kyerɛɛ no dɛ: “Gyaa su.” 14 Ntsi Jesus kɔr hɔn nkyɛn, na ɔdze ne nsa kaa adze a fun no da do no, na hɔn a wɔso fun no gyinae. Nna ɔkaa dɛ: “Aberantsɛ, mese wo dɛ, soɛr!” 15 Na aberantsɛ a oewu no soɛree tsenaa ase na ɔhyɛɛ ase kasae, na Jesus dze no maa ne maame. 16 Na hu kaa hɔn nyina, na wɔhyɛɛ ase hyɛɛ Nyankopɔn enyimnyam. Wɔkaa dɛ: “Wɔama nkɔnhyɛnyi kɛse bi do wɔ hɛn mu,” na wɔsanee kaa dɛ, “Nyankopɔn akaa no nkorɔfo.” 17 Na dza ɔyɛe yi ho asɛm tahyee kɔr Judea nyina nye nkurow a woetwa ho ehyia nyina mu.

18 Na John n’esuafo no kɛkaa iyinom nyina ho asɛm kyerɛɛ no. 19 Ntsi John frɛɛ n’esuafo no mu beenu, na ɔsomaa hɔn kɔr Ewuradze hɔ dɛ wonkebisa no dɛ: “Ɔwo nye Obi A Ɔreba no, anaadɛ yɛnhwɛ obi fofor kwan?” 20 Aber a mbarimba no bodur Jesus ne nkyɛn no, wɔkaa kyerɛɛ no dɛ: “John Onumanyi no asoma hɛn dɛ yembebisa wo dɛ, ‘Ɔwo nye Obi A Ɔreba no, anaadɛ yɛnhwɛ obi fofor kwan?’” 21 Dɛm aber no ara mu no, ɔsaa hɔn a hɔn yarba mu yɛ dzen nye hɔn a hɔn yarba mu nnyɛ dzen nyina yarba, na otuu esunsum fi, afei ɔmaa enyifurafo pii so hun adze. 22 Na Jesus yii hɔn ano dɛ: “Hom nkɔ na hom nkɛka dza hom ehu nye dza hom atse yi ho asɛm nkyerɛ John dɛ: Seseiara enyifurafo ruhu adze, na ebubuafo renantsew, wɔresa akwatafo yarba, na hɔn a hɔn asowa esisiw no retse asɛm, worinyan ewufo na wɔreka asɛmpa no kyerɛ ehiafo. 23 Enyigye nye obi a monnto no fintsidua.”

24 Aber a hɔn a John somaa hɔn no kɔree no, Jesus hyɛɛ ase kaa John ho asɛm kyerɛɛ nyimpadɔm no dɛ: “Ebɛnadze na hom kɔr sar no do kɔhwɛe? Ndzɛmbir* a mframa rihim no anaa? 25 Nna ɔno ebɛnadze na hom puei kɔhwɛe? Ɔbarimba a ofura tam pa anaa? Hwɛ, hɔn a wɔhyɛ ntar fɛɛfɛw na hɔn nsa ka adze pa biara a wɔpɛ no, ahemfie na wɔwɔ. 26 Ntsi ebɛnadze koraa na hom puei kɔhwɛe? Hom kɔhwɛɛ nkɔnhyɛnyi anaa? Nyew, ɔyɛ nkɔnhyɛnyi, na ɔkyɛn nkɔnhyɛnyi mpo. 27 Oyi nye obi a wɔakyerɛw no ho asɛm dɛ: ‘Hwɛ, morosoma mo somafo ma oeedzi w’enyim kan, ɔno na obesiesie wo kwan mu ama wo.’ 28 Mereka akyerɛ hom dɛ, nyimpa a mbaa awo hɔn no mu biara nnyi hɔ a ɔyɛ kɛse sen John, naaso obi a osuar koraa wɔ sor Ahendzi no mu no yɛ kɛse sen no.” 29 (Aber a nkorɔfo no nyina nye hɔn a wɔgyegye tow no tsee iyi no, wɔkaa dɛ Nyankopɔn yɛ ɔtseneneenyi, osiandɛ nna John enuma hɔn. 30 Naaso Phariseefo no nye hɔn a wonyim Mbra no dze, wɔammfa Nyankopɔn n’afotusɛm* a ɔdze maa hɔn no annyɛ hwee, osiandɛ wɔamma John ennuma hɔn.)

31 “Ntsi, woananom na medze ebusuasantsen yi bɔtoto hɔn ho, na wɔtse dɛ ebɛn nyimpa? 32 Wɔtse dɛ mbofra a wɔtsenatsena guamu a wɔretseatsea mu frɛ hɔn anyɛnkofo, dɛ: ‘Yɛhɛɛn atɛntɛbɛn maa hom, naaso hom annsaw; yɛtseatseaa mu sui, naaso hom ennsu bi.’ 33 Dɛmara so na John Onumanyi no aba, onndzidzi na ɔnnom nsa, eso hom ka dɛ: ‘Ɔwɔ sunsum fi.’ 34 Nyimpa Ba no aba, odzidzi na ɔnom nsa, naaso hom ka dɛ: ‘Hwɛ! Ɔbarimba tumfur kɔwensanyi a ɔfa hɔn a wɔgyegye tow na ndzebɔnyɛfo nyɛnko!’ 35 Naaso nyansa nam ne mba nyina do da no edzi dɛ odzi bem.”*

36 Afei, Phariseenyi bi kɔr do serɛɛ no dɛ ɔnye no mbedzidzi. Ntsi ɔkɔr Phariseenyi no ne fie na ɔtsenaa ase* dzidzii. 37 Na hwɛ, ɔbaa bi a wonyim no wɔ kurow mu hɔ dɛ ɔyɛ ɔdzebɔnyɛnyi no tsee dɛ Jesus ridzidzi* wɔ Phariseenyi no ne fie, na ɔdze alabasta toa a ngohuam wɔ mu bae. 38 Na obegyinaa Jesus ne nan ho wɔ n’ekyir sui, na ɔhyɛɛ ase dze ne nyinsuwa fɔɔw ne nan ho, na ɔdze ne tsinhwi pepae. Afei ɔfeew ne nan ho na ɔdze ngohuam no seraseraa ho. 39 Aber a Phariseenyi a ɔtoo nsa frɛɛ no no hunii no, ɔkaa no wɔ no mu dɛ: “Sɛ ɔbarimba yi yɛ nkɔnhyɛnyi ampa a, nkyɛ obohu obi a ɔdze ne nsa aka no no, nkyɛ obohu dɛ ɔbaa yi yɛ ɔdzebɔnyɛnyi.” 40 Nna Jesus kaa kyerɛɛ no dɛ: “Simon,* mowɔ asɛm bi ka kyerɛ wo.” Nna ɔkaa kyerɛɛ no dɛ: “Kyerɛkyerɛnyi, ka kyerɛ me!”

41 “Mbarimba beenu bi kɔbɔɔ bosa fii owura bi hɔ; kor gyee denare* 500, na kor so gyee denare 50. 42 Nna wonnyi bi a wɔdze botua, ntsi ɔdze kaw no kyɛɛ hɔn beenu nyina korakora. Ntsi ehwɛ a, hɔn mu woana na ɔbɔdɔ owura no kɛse?” 43 Nna Simon yii no ano dɛ: “Mususu dɛ nyia ɔdze pii kyɛɛ no no a.” Nna Jesus kaa kyerɛɛ no dɛ: “Ebua no yie.” 44 Nna ɔdaan n’enyi hwɛɛ ɔbaa no na ɔkaa kyerɛɛ Simon dɛ: “Ehu ɔbaa yi a? Aber a mebaa wo fie ha no, amma me nsu annhohor me nan ho. Naaso dɛm ɔbaa yi dze nyinsuwa afɔw me nan ho na ɔdze ne tsinhwi apepa. 45 Ɔwo ammfew m’ano. Naaso ɔbaa yi dze, ofitsi aber a mebaa ha, onngyaa m’anan ho few. 46 Ɔwo ammfa ngo annsera me tsirmu, naaso ɔbaa yi dze ngohuam aserasera m’anan ho. 47 Osian iyi ntsi mereka akyerɛ wo dɛ, ɔwɔ mu dɛ no bɔn dɔɔ so* dze, naaso wɔdze akyɛ no, osiandɛ ɔkyerɛɛ ɔdɔ kɛse. Naaso obi a wɔdze kakraabi kyɛ no no, ɔkyerɛ ɔdɔ kakraabi.” 48 Nna ɔkaa kyerɛɛ ɔbaa no dɛ: “Wɔdze wo bɔn akyɛ wo.” 49 Nna hɔn a wɔnye no ridzidzi no hyɛɛ ase kekaa kyerɛɛ hɔnho dɛ: “Ebɛn nyimpa koraa nye yi a ɔdze bɔn mpo kyɛ yi?” 50 Nna Jesus kaa kyerɛɛ ɔbaa no dɛ: “Wo gyedzi agye wo nkwa; fa asomdwee kɔ.”