Asomafo Ndwuma

10 Nna ɔbarimba bi so wɔ Caesarea a wɔfrɛ no Cornelius. Nna ɔyɛ sogyanyi panyin* wɔ dza nna wɔfrɛ no Italy asogyafokuw* no mu. 2 Nna ɔyɛ obi a ɔmmfa ne nyamesom nndzi agor, na nna ɔno na ne fiefo nyina yɛ nyamesurofo. Nna ɔyɛ nkorɔfo adɔyɛ paa, na aber nyina nna ɔdze nkotoserɛ kɔ Nyankopɔn n’enyim. 3 Da kor bi, wɔ bɛyɛ dɔn a otsia akron* no mu no, ohunii wɔ enyido-adzehu mu pefee dɛ Nyankopɔn no bɔfoe aba ne nkyɛn, na ɔfrɛɛ no dɛ: “Cornelius!” 4 Cornelius hwɛɛ no hann, na ɔdze akomatu bisaa no dɛ: “Owura, ɔyɛ ebɛn asɛm a?” Nna ɔkaa kyerɛɛ no dɛ: “Wo mpaabɔ na w’adɔyɛ no afow edu Nyankopɔn n’enyim, na ɔkaa ne nyina. 5 Ntsi soma mbarimba ma wɔnkɔ Joppa na wɔnkɛfrɛ Simon a wɔfrɛ no Peter no mbra. 6 Dɛm ɔbarimba yi akɔsoɛ Simon* a ɔdze mbowa nwoma yɛ lɛda no ne fie. Ne fie no wɔ mpoano.” 7 Aber a ɔbɔfo a ɔnye no bɛkasae no kɔree ara pɛ na ɔfrɛɛ no nkowaa beenu nye sogyanyi nyamesuronyi bi so a ɔka n’asomfo no ho, 8 na ɔkaa biribiara kyerɛɛ hɔn, na ɔsomaa hɔn ma wɔkɔr Joppa.

9 Na adze kyee a wɔnam kwan do rokɔ na wɔaka kakra ma woeedu kurow no mu no, Peter fowee kɔr dan no etsifi kɔbɔɔ mpaa. Nna ɔyɛ bɛyɛ dɔn a otsia esia* no mu. 10 Naaso ɔkɔm dzee no paa na nna ɔpɛ dɛ odzidzi. Na aber a wogu do reyɛ edziban no, onyaa enyido-adzehu bi. 11 Na ohun dɛ ɔsor ebue na biribi* a ɔtse dɛ tam kɛse bi a wɔdzedze n’ano n’ano anan mu risian ba asaase do. 12 Nna mbowa ahorow pii wɔ mu; bi nye mbowa a wɔwɔ nan anan, nye wimu nnoma, nye mbowa a wɔweawea asaase do tse dɛ mbowatsena na nketsew. 13 Na ndze bi kaa kyerɛɛ no dɛ: “Peter, soɛr na ku bi dzi!” 14 Nna Peter kaa dɛ: “Oho Ewuradze, murunntum nnyɛ dɛm da, osiandɛ minndzii biribiara a no ho egu fi anaa no ho nntsew da.” 15 Nna ndze no kaa kyerɛɛ no bio ne mprɛnu do dɛ: “Ndzɛmba a Nyankopɔn atsew ho no, mma nnka dɛ no ho egu fi.” 16 Ndze no baa bio ne mprɛnsa do, na ntsɛmara wɔfaa adze* no kɔr sor.

17 Peter yɛɛ basaa, na nna ɔrodwendwen dza enyido-adzehu a oehu no kyerɛ no ho. Na dɛm aber no mu ara so, nna mbarimba a Cornelius somaa hɔn no ebisa Simon ne fie kwan ma woebegyina n’abow ekyir. 18 Ntsi wɔtseaa mu bisaa dɛ Simon a wɔfrɛ no Peter no abɔsoɛ hɔ anaa. 19 Na aber a Peter gu do rodwendwen enyido-adzehu no ho no, sunsum no kaa kyerɛɛ no dɛ: “Hwɛ! Mbarimba baasa bi rohwehwɛ wo. 20 Ntsi soɛr, na sian famu na enye hɔn nkɔ. Mma w’adwen mu nnyɛ wo konsee koraa, osiandɛ mara na masoma hɔn.” 21 Nna Peter siaan famu kɔr mbarimba no nkyɛn, na ɔkaa kyerɛɛ hɔn dɛ: “Emi nye nyia hom rohwehwɛ no no. Ebɛnadze nye hom baa ha?” 22 Wɔkaa dɛ: “Ɔbɔfo krɔnkrɔn bi dze Nyankopɔn n’akwankyerɛ maa sogyanyi panyin Cornelius, ɔtseneneenyi a osuro Nyankopɔn na Jewfo no nyina bɔ no dzin pa no, dɛ ɔnsoma ma wɔmbɛfrɛ wo mbra ne fie na ontsie dza ewɔ ka.” 23 Ntsi Peter kaa kyerɛɛ hɔn dɛ wɔmbra mu, na ɔsoom hɔn hɔho.

Adze kyee no, ɔsoɛree nye hɔn kɔree, na enuanom a wɔwɔ Joppa no mu binom so kaa no ho ma wɔkɔree. 24 Da a odzi hɔ no, okodur Caesarea, na nna Cornelius afrɛfrɛ n’ebusuafo nye n’anyɛnkofo a ɔbɛn hɔn paa no ma woebehyia mu rotweɔn hɔn. 25 Aber a Peter ruwura fie no mu no, Cornelius kehyiaa no na obuu ntwɛr wɔ n’ananadze na ɔkotoow no. 26 Naaso Peter maa no do na ɔkaa kyerɛɛ no dɛ: “Soɛr, na mara so meyɛ nyimpa tse dɛ woara.” 27 Aber a ogu do nye no rekasa no, ɔhɛɛn fie no mu na ohun dɛ nyimpa pii ehyia mu wɔ hɔ. 28 Na ɔkaa kyerɛɛ hɔn dɛ: “Homara hom nyim paa dɛ mbra mma kwan dɛ Jewnyi bɔkɔ obi a ofi ɔman fofor do no ne nkyɛn anaadɛ ɔnye no bɔbɔ. Naaso Nyankopɔn ama mehu dɛ onnyi dɛ meka kyerɛ nyimpa biara dɛ no ho egu fi anaadɛ no ho nntsew. 29 Ntsi na aber a hom somaa dɛ wɔmbɛfrɛ me no, mammpopo me tsir koraa no. Ntsi miribisa dɛ, ebɛnadze ntsi na hom somae ma wɔbɛfrɛɛ me?”

30 Nna Cornelius kaa kyerɛɛ no dɛ: “Ndaanan a abɛsen kɔ nye yi, bɛyɛ dɛm aber yi ara, nna morobɔ mpaa wɔ dɔn a otsia akron* no mu wɔ me fie, nna ɔbarimba bi a ɔhyɛ atar hyɛnhyɛn bi begyinaa m’enyim 31 na ɔkaa dɛ: ‘Cornelius, Nyankopɔn etsie wo mpaabɔ no wɔ aso pa mu na ɔkaa w’adɔyɛ. 32 Ntsi soma ma wɔnkɔ Joppa nkɛfrɛ Simon a wɔfrɛ no Peter no. Dɛm ɔbarimba yi akɔsoɛ Simon a ɔdze mbowa nwoma yɛ lɛda no ne fie. Ne fie no wɔ mpoano.’ 33 Iyi ntsi ntsɛmara na mosomae ma wɔbaa wo nkyɛn. Na wo so, ayɛ adze paa dɛ etum ebodu ha. Ntsi seseiara dze, hɛn nyina ehyia mu wɔ Nyankopɔn n’enyim dɛ yeribetsie dza Jehovah* aka akyerɛ wo dɛ bɛka kyerɛ hɛn no nyina.”

34 Ntsi Peter hyɛɛ ase dɛ ɔrekasa, na ɔkaa dɛ: “Afei paa na mehu dɛ Nyankopɔn nnyɛ nyiyimu,* 35 mbom ɔman biara mu no, nyimpa a osuro no na ɔyɛ dza ɔtsen no, ɔgye no to mu. 36 Nyankopɔn dze n’asɛm kɛmaa Israelmba no na ɔkaa asomdwee a ɔnam Jesus Christ do bɛba no ho asɛmpa kyerɛɛ hɔn. Dɛm asɛmpa no nye dɛ, Jesus nye nyimpa nyina hɔn Ewuradze. 37 Hom nyim asɛm a wɔkae wɔ Judea nyina no, dza nkorɔfo hyɛɛ ase dɛ wɔreka ho asɛm wɔ Galilee, aber a John kaa enuma ho asɛm wiei no: 38 Ɔfa Jesus a ofi Nazareth no ho. Ɔno nye dɛ, Nyankopɔn dze sunsum krɔnkrɔn na tum seraa no, na okekyinkyiin asaase no do yɛɛ papa, na ɔsaa hɔn a Abɔnsam retseetsee hɔn no nyina yarba, osiandɛ nna Nyankopɔn ka no ho. 39 Na ndzɛmba a ɔyɛe wɔ Jewfo hɔn nkurow no mu nye Jerusalem nyina, yɛyɛ ho adasefo; naaso wɔbɔɔ no asɛndua mu* kum no. 40 Oyi na da a otsia ebiasa no Nyankopɔn nyaan no no, na ɔmaa no kwan ma oyii noho edzi kyerɛɛ nyimpa. 41 Ɔnnyɛ nyimpa nyina na oyii noho edzi kyerɛɛ hɔn, mbom oyii noho edzi kyerɛɛ adasefo a nna Nyankopɔn edzi kan eyi hɔn no, kyerɛ dɛ hɛn a yɛnye no dzidzii nomee wɔ no wusoɛr ekyir no. 42 Afei so ɔhyɛɛ hɛn dɛ yɛnka asɛm no na yendzi dase kofekofe nkyerɛ ɔman no dɛ, oyi na Nyankopɔn eyi no dɛ ombu atseasefo na ewufo atsɛn. 43 Ɔno na nkɔnhyɛfo no nyina dzi no ho dase dɛ, obiara a ɔgye no dzi no, ɔnam ne dzin do benya bɔnfakyɛ.”

44 Aber a Peter gu do reka dɛm nsɛm yi no, sunsum krɔnkrɔn no baa hɔn a woritsie asɛm no nyina do. 45 Na agyedzifo* a woetwa hɔn bɔtɔ* a wɔnye Peter bae no hɔnho dwuruuw hɔn, osiandɛ wohuee Nyankopɔn n’akyɛdze a wɔdze ma kwa a ɔyɛ sunsum krɔnkrɔn no guu amanaman mufo no so do. 46 Na wɔtsee dɛ wɔreka kasa horow, na woriyi Nyankopɔn ayɛw. Ntsi Peter kaa dɛ: 47 “Woyinom enya sunsum krɔnkrɔn dɛ hɛnara, ntsi woana na obotum esiw hɔn kwan dɛ mma wɔmmfa nsu nnuma hɔn?” 48 Ntsi ɔkaa dɛ wonnuma hɔn wɔ Jesus Christ ne dzin mu. Na ɔno ekyir no, wɔserɛɛ no dɛ ɔntsena hɔ nda kakra.