John Asɛmpa

14 “Mma hom akoma nntu. Hom ngye Nyankopɔn ndzi; na hom ngye mo so ndzi. 2 Tsenabea* pii wɔ m’Egya ne fie. Sɛ ɔnntse dɛm a, nkyɛ mebɛka akyerɛ hom, osiandɛ morokɔ ekesiesie beebi ama hom. 3 Na sɛ mokɔ na mikesiesie beebi ma hom a, mebɛsan aba bio na maabɛfa hom akɔ me fie, mbrɛ ɔbɛyɛ a beebi a mowɔ no hom so bɛba hɔ bi. 4 Na beebi a morokɔ no, hom nyim kwan no.”

5 Nna Thomas kaa kyerɛɛ no dɛ: “Ewuradze, yennyim beebi a erokɔ. Ntsi yebesi dɛn ehu kwan no?”

6 Jesus kaa kyerɛɛ no dɛ: “Emi nye ɔkwan no nye nokwar no nye nkwa no. Obi mmba Egya no nkyɛn gyedɛ ɔnam mo do. 7 Sɛ hom nyim me a, nkyɛ hom nyim m’Egya so, na ofitsi dɛm aber yi rokɔ no hom nyim no na hom ehu no.”

8 Nna Philip kaa kyerɛɛ no dɛ: “Ewuradze, kyerɛ hɛn Egya no, na ɔno ara ye ma hɛn.”

9 Jesus kaa kyerɛɛ no dɛ: “Philip, ntsi ber tsentsen a menye hom atsena yi nyina, innyim me a? Obiara a oehu me no ehu Egya no so. Ɔyɛ dɛn ntsi na ereka dɛ, ‘Kyerɛ hɛn Egya no’? 10 Enngye nndzi dɛ menye Egya no yɛ kor na Egya no so nye me yɛ kor a? Nsɛm a meka kyerɛ hom no, ɔnnyɛ mara na mobɔ me tsirmu ka, mbom Egya no a ɔnye me yɛ kor no na ɔreyɛ no ndwuma. 11 Hom ngye ndzi dɛ menye Egya no yɛ kor, na Egya no so nye me yɛ kor. Sɛ ɔnntse dɛm so a, hom nhwɛ ndwuma no ara na hom ngye ndzi. 12 Nokwar, nokwar mese hom dɛ, obiara a ɔgye me dzi no, ɔno so bɛyɛ ndwuma a mereyɛ yi bi; na ɔbɛyɛ ndwuma akɛse akyɛn dza mereyɛ yi mpo, osiandɛ morokɔ Egya no nkyɛn. 13 Bio so, biribiara a hom bebisa wɔ me dzin mu no, mebɛyɛ, ama wɔnam Ɔba no do aahyɛ Egya no enyimnyam. 14 Sɛ hom bisa biribiara wɔ me dzin mu a, mebɛyɛ.

15 “Sɛ hom dɔ me a, hom bedzi m’ahyɛdze do. 16 Na mebɛserɛ Egya no ma ɔaama hom ɔboafo* fofor a ɔbɛka hom ho daa. 17 Ɔno nye nokwar sunsum a wiadze no nntum nnya no, osiandɛ onnhu no na onnyim no so. Naaso hom dze hom nyim no, osiandɛ ɔwɔ hom nkyɛn na ɔwɔ hom mu. 18 Mirinngyaa hom dɛ ngyanka.* Mereba hom nkyɛn. 19 Wɔaka kakraabi, wiadze no runnhu me bio, naaso hom dze hom bohu me, osiandɛ metse ase na hom so hom bɛtsena ase. 20 Dɛm da no, hom bohu dɛ menye m’Egya yɛ kor na hom nye me yɛ kor na mo so menye hom yɛ kor.* 21 Obiara a ɔgye m’ahyɛdze to mu na odzi do no, ɔno na ɔdɔ me. Na nyia ɔdɔ me no, m’Egya bɔdɔ no, na mo so mobɔdɔ no na mibeyi moho edzi akyerɛ no pefee.”

22 Judas, nnyɛ Iscariot bi a, bisaa no dɛ: “Ewuradze, ebɛn asɛm na wɔaba a ntsi epɛ dɛ iyi woho edzi kyerɛ hɛn pefee na nnyɛ wiadze no?”

23 Nna Jesus yii no ano dɛ: “Sɛ obi dɔ me a, obedzi m’asɛm do, na m’Egya bɔdɔ no, na yɛbɛba ne nkyɛn na yɛdze hɔ abɛyɛ hɛn tsenabea.* 24 Na obiara a ɔnndɔ me no, onndzi m’asɛm do. Na asɛm a hom ritsie yi, ɔnnyɛ medze a, mbom ɔyɛ Egya no a ɔsomaa me no dze a.

25 “Maka dɛm nsɛm yi akyerɛ hom aber a meda ho ara wɔ hom nkyɛn yi. 26 Naaso ɔboafo no, mekyerɛ sunsum krɔnkrɔn no a Egya no bɔsoma no wɔ me dzin mu no, ɔno na ɔbɛkyerɛkyerɛ hom ndzɛmba nyina, na ɔbɛkaakaa hom biribiara a maka akyerɛ hom nyina. 27 Medze asomdwee gya hom; medze m’asomdwee ma hom. Naaso memmfa mma dɛ mbrɛ wiadze no dze asomdwee ma no. Mma hom mma hom akoma nntu, eso mma hom mma ɔmmbɔ hu. 28 Hom tsee dɛ mekaa kyerɛɛ hom dɛ, ‘Morokɔ, na mebɛsan aba hom nkyɛn.’ Sɛ hom dɔ me a, nkyɛ hom bedzi ehurusi dɛ morokɔ Egya no nkyɛn, osiandɛ Egya no yɛ kɛse sen me. 29 Ntsi sesei medzi kan aka akyerɛ hom ansaana woesi, ama sɛ osi a hom aagye edzi. 30 Menye hom rennkasa pii bio, osiandɛ obi a odzi wiadze no do tum no reba, na onnyi tum biara wɔ mo do. 31 Na dza Egya no ahyɛ me dɛ menyɛ no, ɔno ara na mereyɛ, mbrɛ ɔbɛyɛ a wiadze no bohu dɛ modɔ Egya no. Hom nsoɛr ma yemfi ha nkɔ.