Luke Asɛmpa

1 Nyimpa pii abɔ mbɔdzen dɛ wɔbɛkyerɛw nokwasɛm ahorow a yɛgye dzi paa no ho asɛm. 2 Na dza wɔkyerɛwee no, ɔno ara so na hɔn a wɔdze hɔn enyiwa hun dɛm ndzɛmba yi fi ahyɛse na wɔkaa Nyankopɔn n’asɛm no kaa kyerɛɛ hɛn. 3 Ntsi onyimnyamfo Theophilus, mayɛ m’adwen dɛ mara so mebɛkyerɛw dɛm ndzɛmba yi nyina ho nsɛm ndzidzido ndzidzido abrɛ wo, osiandɛ mahwehwɛ ndzɛmba nyina mu yie, 4 ama eehu dɛ nsɛm a nkorɔfo dze hɔn ano kae dze kyerɛkyerɛɛ wo no yɛ nokwar turododo.

5 Judeahen Herod n’aber do no,* nna ɔsɔfo bi wɔ hɔ a wɔfrɛ no Zechariah a ɔka Abijah asɔfokuw no ho. Nna ne yer fi Aaron n’ebusua mu. Nna wɔfrɛ no Elizabeth. 6 Nna hɔn beenu nyina yɛ atseneneefo wɔ Nyankopɔn n’enyim. Nna asɛm biara nnyi hɔnho, osiandɛ nna wodzi Jehovah* n’ahyɛdze na ne mbra nyina do pɛpɛɛpɛ. 7 Naaso nna wonnyi ba biara, osiandɛ nna Elizabeth nntum nnwo.* Nna hɔn beenu nyina so enyinyin paa.

8 Da bi, nna woedu Zechariah n’asɔfokuw no do dɛ wɔyɛ edwuma wɔ asɔrfie hɔ, ntsi nna ɔrosom wɔ Nyankopɔn n’enyim. 9 Na dɛ mbrɛ asɔfo no hɔn nhyehyɛɛ tse no, nna woedu no do dɛ ɔkɔ Jehovah* n’asɔrdan* no mu kɛhyew eduhuam. 10 Na aber a ɔrehyew eduhuam no, nna nyimpa pii gyinagyina abowano hɔ robɔ mpaa. 11 Na Jehovah* no bɔfoe yii noho edzi kyerɛɛ no. Nna ɔbɔfo no gyina afɔrmbukyia a wɔhyew eduhuam wɔ do no n’enyimfa. 12 Zechariah hun no no, n’akoma tui na ɔbɔɔ hu. 13 Naaso ɔbɔfo no kaa kyerɛɛ no dɛ: “Zechariah, mma nnsuro, osiandɛ Nyankopɔn etsie wo nkotoserɛ no wɔ aso pa mu. Wo yer Elizabeth bɔwo ɔbabanyin ama wo, na ɔsɛ dɛ eto no dzin John. 14 Ɔbɛyɛ wo dɛw, na w’enyi bɛgye paa, na nyimpa pii bedzi n’awoo no ho ehurusi, 15 osiandɛ ɔbɛyɛ nyimpa tsitsir wɔ Jehovah* n’enyim. Naaso ɔnnsɛ dɛ ɔnom wenyin anaa nsa a ɔbow biara, na sunsum krɔnkrɔn bɛhyɛ no ma ansaana wɔawo no mpo.* 16 Ɔbɛdan Israelmba beberee aba Jehovah* hɔn Nyankopɔn nkyɛn. 17 Afei so, ɔdze Elijah no sunsum na no tum bedzi Nyankopɔn n’enyim dze adan egyanom hɔn akoma aba mba nkyɛn, na ɔaadan asoɔdzenfo aba atseneneefo hɔn nyansaa ho, ama oeesiesie nkorɔfo a wɔfata ama Jehovah.”*

18 Nna Zechariah bisaa ɔbɔfo no dɛ: “Ebɛnadze na ɔbɛma mehu dɛ dza aka yi bɛba mu? Osiandɛ mabɔ akɔkora, na me yer so enyin paa.” 19 Nna ɔbɔfo no yii no ano dɛ: “Emi nye Gabriel a migyina Nyankopɔn n’enyim no, na wɔasoma me dɛ menye wo mbɛkasa na menka asɛmpa yi nkyerɛ wo. 20 Na hwɛ, ebɔtɔ mmum na irunntum nnkasa kesi da a iyinom bɛba mu, osiandɛ anngye me nsɛm enndzi, nsɛm a ɔbɛba mu wɔ aber a wɔahyɛ no.” 21 Dɛm aber no nyina nna nkorɔfo no rotweɔn Zechariah, na ɔyɛɛ hɔn nwanwa dɛ ɔakyɛr wɔ asɔrdan no mu dɛm. 22 Na aber a opuei bae no, nna onntum nnye hɔn nnkasa, ntsi wohun dɛ oenya enyido-adzehu* bi wɔ asɔrdan no mu hɔ. Nna ne nsa ara na ɔdze reyɛ asɛnkyerɛdze kyerɛ hɔn, naaso kasa dze, nna onntum nnkasa. 23 Aber a nda a ɔdze yɛ edwuma wɔ asɔrfie hɔ no soe no, ofii hɔ kɔr ne fie.

24 Nda bi ekyir no, ne yer Elizabeth nyinsenii, na ɔdze noho siee abosoom enum, na ɔkaa dɛ: 25 “Dza Jehovah* ayɛ ama me nye yi. Oetwa n’enyi abɔhwɛ me na oeyi m’enyimguase efi nyimpa mu.”

26 Aber a Elizabeth ne yafun no dzii abosoom esia no, Nyankopɔn somaa ɔbɔfo Gabriel ma ɔkɔr Galilee kurow bi a wɔfrɛ no Nazareth mu. 27 Ɔkɔr ɔbaabun bi ne nkyɛn. Nna wɔdze ɔbaabun yi ama ɔbarimba bi dɛ ɔno na ɔbɔwar no. Nna wɔfrɛ ɔbarimba no Joseph, na nna ofi David n’ebusua mu. Na ɔbaabun no so nna wɔfrɛ no Mary. 28 Na aber a ɔbɔfo no baa ne nkyɛn no, ɔkaa kyerɛɛ no dɛ: “Asomdwee nka wo o, ɔwo a woehyira wo kɛse, Jehovah* ka wo ho.” 29 Naaso asɛm a ɔbɔfo no kae no haaw no paa, na ɔhyɛɛ ase dɛ ɔrodwendwen ho dɛ, ebɛn nkyia nye yi?* 30 Na ɔbɔfo no kaa kyerɛɛ no dɛ: “Mary, mma nnsuro, osiandɛ enya Nyankopɔn n’enyim adom. 31 Na hwɛ, ibenyinsen na aawo ɔbabanyin, na ɔsɛ dɛ eto no dzin Jesus. 32 Ɔbɛyɛ nyimpa tsitsir, na wɔbɛfrɛ no Ɔsorsornyi no ne Ba, na n’egya David n’ahengua na Jehovah* Nyankopɔn dze bɛma no, 33 na obedzi Hen wɔ Jacob fie do daa, na n’Ahendzi remmba ewiei da.”

34 Naaso Mary bisaa ɔbɔfo no dɛ: “Iyi dze, obesi dɛn ayɛ yie? Osiandɛ menye banyin biara nndae.” 35 Nna ɔbɔfo no yii no ano dɛ: “Sunsum krɔnkrɔn bɛba wo do, na Ɔsorsornyi no no tum bɛkata wo do. Na osian iyi ntsi, wɔbɛfrɛ abofra a ebɔwo no no ɔkrɔnkrɔnnyi, Nyankopɔn ne Ba. 36 Na hwɛ, wo busuanyi Elizabeth, obi a nkorɔfo se ɔnnwo no,* ɔno so enyinsen ɔbabanyin wɔ ne mberwaber mu, na no bosoom a otsia esia mu nye yi; 37 na asɛm biara nnyi hɔ a Nyankopɔn aka a ɔremmba mu.” 38 Nna Mary kaa dɛ: “Hwɛ, Meyɛ Jehovah* n’abaawa! Ɔnyɛ hɔ mma me dɛ mbrɛ aka yi.” Na ɔbɔfo no fii ne nkyɛn kɔree.

39 Iyi ekyir no Mary sii mu, na ɔdze no ntsɛntsɛm tuu kwan kɔr Judah kurow bi mu wɔ mbepɔw no do, 40 na ɔkɔr Zechariah ne fie. Odur hɔ no okyiaa Elizabeth. 41 Aber a Elizabeth tsee Mary ne nkyia no ara pɛ na abofra a ɔda ne yamu no huruwii, na sunsum krɔnkrɔn hyɛɛ Elizabeth ma, 42 na ɔdze ndze kɛse tseaa mu dɛ: “Woehyira wo akyɛn mbasiafo nyina, na woehyira ɔba a ɔda wo yamu no so! 43 Ntsi emi nye woana a mo Wura ne maame rebɛsera me yi? 44 Na hwɛ, aber a wo nkyia no twaa m’asomu ara pɛ na abofra a ɔda me yamu no dze enyigye huruwii. 45 Enyigye so nye ɔbaa a ɔagye edzi no, osiandɛ nsɛm a Jehovah* aka akyerɛ no no nyinara bɛba mu.”

46 Nna Mary kaa dɛ: “Me kra,* yi Jehovah* ayɛw, 47 na mo sunsum bedzi ehurusi kɛse wɔ m’Agyenkwa Nyankopɔn mu, 48 osiandɛ ɔabɔhwɛ n’abaawa a ɔnnsɛ hwee.* Na hwɛ, ofi ndɛ rokɔ, ebusuasantsen nyina bɛka dɛ mowɔ enyigye, 49 osiandɛ Otumfo no ayɛ ndzɛmba akɛse ama me, na ne dzin dze krɔnkrɔn. 50 Na ofi ebusuasantsen do kesi ebusuasantsen do, ohu hɔn a wosuro no no mbɔbɔr. 51 Ɔdze n’abasa ayɛ ndzɛmba akɛse; na hɔn a hɔn akoma mu nsusui yɛ ahantan no, ɔabɔ hɔn apetse. 52 Oetu etumfo efi nhengua do, na hɔn a hɔn asɛm yɛ mbɔbɔr no, ɔama hɔn do. 53 Ɔdze ndzɛmba pa amee hɔn a ɔkɔm dze hɔn no, na hɔn a wɔyɛ esikafo no, ɔama wɔdze nsapan kɔ. 54 Ɔabɔboa n’akowaa Israel, na ɔakaa no mbɔbɔrhu, 55 dɛ mbrɛ ɔkaa kyerɛɛ hɛn egyanom no, dɛ obohu Abraham na n’asefo mbɔbɔr daa.” 56 Na Mary nye Elizabeth tsenaa bɛyɛ abosoom ebiasa na ɔsanee kɔr nankasa ne fie.

57 Afei ber soo dɛ Elizabeth wo, na ɔwoo ɔbabanyin. 58 Na n’apaamu hɔfo nye n’ebusuafo tsee dɛ Jehovah* ada ehumbɔbɔr kɛse edzi akyerɛ no, na wɔnye no dzii ehurusi. 59 Na da a otsia awɔtwe no, wɔbaa dɛ worubotwa abofra kakraba no no bɔtɔ.* Nna nkyɛ wɔpɛ dɛ wɔdze no to ne papa Zechariah. 60 Naaso ne maame kaa dɛ: “Oho! mbom wɔbɛfrɛ no John.” 61 Ɔkaa dɛm no wɔkaa kyerɛɛ no dɛ: “Wo busuanyi biara nnyi hɔ a wɔfrɛ no dɛm.” 62 Ntsi wɔdze hɔn nsa yɛɛ asɛnkyerɛdze bisaa ne papa dɛ ebɛn dzin na ɔpɛ dɛ wɔdze to no. 63 Nna ɔmaa wɔdze biribi a wɔkyerɛw do* brɛɛ no, na ɔkyerɛwee wɔ do dɛ: “Ne dzin dze John.” Na ɔyɛɛ hɔn nyina nwanwa. 64 Na amonmu hɔ ara n’ano buei, na ne tɛkyerɛma yɛɛ yie na ɔhyɛɛ ase dɛ ɔrekasa, na oyii Nyankopɔn ayɛw. 65 Na hu kaa hɔn a wɔtsetse no mpɔtamu hɔ no nyina, na wɔhyɛɛ ase kaa dɛm ndzɛmba yi nyina ho nsɛm wɔ Judea mbepɔw do nkurow no nyina mu. 66 Na hɔn a wɔtsee no nyina dze siee hɔn akoma mu.* Wobisaa dɛ: “Ebɛnadze na abofra yi benyin abɛyɛ?” Osiandɛ nna biribiara kyerɛ dɛ Jehovah* ne nsa wɔ no do.

67 Na sunsum krɔnkrɔn hyɛɛ ne papa Zechariah ma, na ɔhyɛɛ nkɔm dɛ: 68 “Ayɛyi nka Jehovah,* Israel Nyankopɔn no, osiandɛ oetwa n’enyi abɔhwɛ no nkorɔfo na ɔagye hɔn. 69 Na ɔama nkwagye ambɛn do ama hɛn wɔ n’akowaa David ne fie, 70 dɛ mbrɛ ɔnam no nkɔnhyɛfo akrɔnkrɔmfo a wɔtsenaa ase tsetse no do kae no. 71 Ɔhyɛɛ bɔ dɛ ɔbɛgye hɛn efi hɛn atamfo nye hɔn a wokyir hɛn no nyina nsamu; 72 na oeehu hɛn egyanom mbɔbɔr na ɔaakaa n’ahyɛmu* krɔnkrɔn no. 73 Iyi nye ntam a ɔkaa kyerɛɛ hɛn egya Abraham, 74 dɛ ɔbɛgye hɛn efi atamfo nsamu, na ɔno ekyir no ɔbɛma yeenya hokwan dze asom no a yerunnsuro hwee. 75 Na yɛdze nokwardzi na tsenenee bɔsom no wɔ n’enyim hɛn nkwa nda nyina. 76 Na ɔwo abofra kakraba yi, wɔbɛfrɛ wo Ɔsorsornyi no no nkɔnhyɛnyi, osiandɛ ibedzi Jehovah* n’enyim kan ekesiesie n’akwan. 77 Na ebɛma no nkorɔfo enya nyimdzee dɛ ɔdze hɔn bɔn bɛkyɛ hɔn na ɔaagye hɔn nkwa, 78 osian hɛn Nyankopɔn no mbɔbɔrhu na n’ayamuhyehye ntsi. Na ɔnam dɛm mbɔbɔrhu yi do bɛma adzekyee ne kan efi sor ahyerɛn wɔ hɛn do. 79 Ɔbɛma hɔn a wɔtsena sum nye owu no sunsuma mu no enya kan, na ɔaagye hɛn taataa wɔ asomdwee kwan no do.”

80 Na abofra kakraba no nyinii na Nyankopɔn no sunsum maa ɔyɛɛ dzen,* na ɔtsenaa sar do araa kesii da a ɔdaa noho edzi kyerɛɛ Israel.