Asomafo Ndwuma
1 Me nyɛnko pa Theophilus, asɛm a odzi kan a mekyerɛwee no, mekaa ndzɛmba a Jesus hyɛɛ ase yɛe na ɔkyerɛkyerɛe nyina 2 kesii da a wɔfaa no kɔr sor no ho asɛm. Ansaana wɔrefa no akɔ sor no, ɔnam sunsum krɔnkrɔn do dze akwankyerɛ maa asomafo a nna oeyi hɔn no. 3 Ohun amandze, na ɔno ekyir no ɔnam dase beberee a odzi mu do dze noho kyerɛɛ hɔn dɛ ɔtse ase. Wohun no ndafua 40, na ɔkaa Nyankopɔn n’Ahendzi no ho asɛm. 4 Aber a ɔnye hɔn hyiae no, ɔkaa kyerɛɛ hɔn dɛ: “Mma hom mmfi Jerusalem, na mbom hom nkɔ do ntweɔn dza Egya no ahyɛ ho bɔ a mekaa ho asɛm kyerɛɛ hom no; 5 osiandɛ John dze, nsu na ɔdze numaa nkorɔfo. Naaso hom dze, nda kakraabi ekyir no, wɔdze sunsum krɔnkrɔn bonuma hom.”
6 Ntsi aber a wohyiae no, wobisaa no dɛ: “Ewuradze, dɛm aber yi na eresan dze Ahendzi no ama Israel anaa?” 7 Ɔkaa kyerɛɛ hɔn dɛ: “Mber* na nda a Egya no ahyehyɛ ato hɔ no dze, ɔwɔ nankasa ne nsamu, na ɔnnyɛ homdze dɛ hom bohu. 8 Na mbom sɛ sunsum krɔnkrɔn no nya ba hom do a, hom benya tum na hom bɛyɛ m’adasefo wɔ Jerusalem nye Judea na Samaria nyina dze ekodu asaase ano noho.” 9 Aber a ɔkaa iyinom wiei no, nna wogu do rohwɛ no, na Nyankopɔn maa no do kɔr sor, na mununkum kataa no do na woennhu no bio. 10 Aber a ɔrokɔ nyina nna wɔrohwɛ sor, na prɛko pɛr na mbarimba beenu bi a wɔhyehyɛ ntar fitaa begyinagyinaa hɔn nkyɛn. 11 Na wobisaa hɔn dɛ: “Galilee mbarimba, ɔyɛ dɛn ntsi na hom gyinagyina ha rohwɛ sor yi? Jesus a wɔama no do efi hom nkyɛn kɔ sor yi, dɛ mbrɛ hom hun no dɛ ɔrokɔ sor no dɛmara na ɔbɛba.”
12 Na wofii bepɔw bi a wɔfrɛ no Ngodua Bepɔw no do sanee kɔr Jerusalem. Nna bepɔw no bɛn Jerusalem, na sɛ ifi hɔ rokɔ Jerusalem a ne tsentsen nyina yɛ ahomgyeda kwan.* 13 Na aber a wodur hɔ no, wɔkɔr abansor dan a nna wɔtse mu no mu. Nna Peter, John, James, Andrew, Philip, Thomas, Bartholomew, Matthew, Alphaeus ne ba James, Nsiyɛfo Simon na James ne ba Judas wɔ hɔ. 14 Hɔn nyina kɔr do dze adwen kor bɔɔ mpaa daa. Nna mbaa bi nye Jesus ne maame Mary nye Jesus no nuanom mbanyimfo no so ka ho.
15 Dɛm nda no mu no, Peter soɛree gyinaa enuanom no hɔn finimfin (nna wɔyɛ nyimpa* bɛyɛ 120) na ɔkaa dɛ: 16 “Mbarimba, enuanom, sunsum krɔnkrɔn no nam David do hyɛɛ nkɔm faa Judas ho, ɔno na ɔkyerɛɛ nkorɔfo kwan ma wɔbɛkyeer Jesus no, na nna ohia dɛ dɛm kyerɛwsɛm no ba mu. 17 Osiandɛ nna ɔka hɛn ho na ɔyɛɛ ɔsom edwuma no bi. 18 (Dɛm ɔbarimba yi na ɔdze n’emumuyɛ ho akatua kɔtɔɔ asaase na ɔdze no kɔn kɔwɔɔ hɔ ma no mu paae ma ne yamu ndzɛmba nyina tui gui no. 19 Hɔn a wɔtse Jerusalem nyina tsee iyi ho asɛm, ntsi wɔtoo asaase no dzin Akeldama wɔ hɔn kasaa mu, n’asekyerɛ nye “Bɔgya Asaase.”) 20 Na wɔakyerɛw wɔ Ndwom nwoma no mu dɛ, ‘Ma ne tsenabea nda hɔ kwa, na mma obiara nntsena hɔ’ na ‘Ɔhwɛfo edwuma a nna ɔyɛ no so, ma obi fofor nyɛ.’ 21 Iyi ntsi ohia dɛ mbarimba a nna wɔka hɛn ho aber a nna Ewuradze Jesus wɔ hɛn nkyɛn reyɛ n’edwuma* no, 22 kyerɛ dɛ, ofitsi aber a John numaa Jesus kesi aber a wɔfaa no fii hɛn nkyɛn kɔr sor no, hɔn mu kor bɛka hɛn ho ma yedzi no wusoɛr no ho dase.”
23 Ntsi wɔbɔɔ nyimpa beenu hɔn edzin, Joseph a wɔfrɛ no Barsabbas na wɔsan so frɛ no Justus no, nye Matthias. 24 Na wɔbɔɔ mpaa dɛ: “O Jehovah,* ɔwo na inyim nyimpa nyina hɔn akoma mu. Mbarimba beenu yi, kyerɛ hɔn mu kor a eyi no 25 dɛ ɔmfa ɔsom edwuma na asomafo edwuma a Judas manee fii ho kɛfaa nankasa no kwan do no.” 26 Ntsi wɔtwee tonto, na tonto no kesii Matthias do, na wɔdze no kaa* asomafo 11 no ho.