Asomafo Ndwuma
4 Aber a hɔn beenu no gu do nye nkorɔfo no rekasa no, asɔfo no, nye aweɔmfo a wɔwɔ asɔrfie hɔ no hɔn panyin, nye Sadduceefo no baa hɔn do. 2 Nna hɔn bo efuw osiandɛ nna asomafo no rekyerɛkyerɛ nkorɔfo no na wɔrobɔ no dawur dɛ woenyan Jesus efi ewufo mu.* 3 Ntsi wɔkyeer hɔn dze hɔn koguu efiadze ma adze kyee, osiandɛ nna ɔyɛ ewimbir. 4 Naaso hɔn a wotsiee asɛm a wɔkae no mu pii gyee dzii, na mbarimba no hɔn dodow bodur bɛyɛ 5,000.
5 Adze kyee no, ɔman no mu etumfo nye mpanyimfo nye akyerɛwfo no behyiaa mu wɔ Jerusalem. 6 Nna ɔsɔfopanyin Annas, Caiaphas, John, Alexander na ɔsɔfopanyin no n’ebusuafo nyina so ka ho. 7 Na wɔdze Peter na John begyinaa hɔn finimfin na wɔhyɛɛ ase bisabisaa hɔn dɛ: “Ebɛn tum na hom dze yɛɛ iyi, na woana ne dzin mu na hom yɛe?” 8 Nna Peter a sunsum krɔnkrɔn ahyɛ no ma no kaa kyerɛɛ hɔn dɛ:
“Ɔman mu etumfo nye mpanyimfo, 9 sɛ papa a yɛayɛ ama obubuafo bi ntsi na ndɛ hom rohwehwɛ hɛn asɛm mu na hom pɛ dɛ hom hu obi a ɔmaa dɛm ɔbarimba yi noho tɔɔ no a, 10 nna ɔno hom nyina nye nyimpa a wɔwɔ Israel nyina nhu dɛ ɔyɛ Nazarethnyi Jesus Christ a hom bɔɔ no asɛndua mu, na Nyankopɔn nyaan no fii ewufo mu no ne dzin mu. Na ɔnam no do na ɔbarimba a ogyina hom enyim yi atse apɔw. 11 Oyi nye ‘ɔbo a hom a hom yɛ adansifo emmbu no bi naaso ɔabɛyɛ ɔbo a noho hia paa* no.’ 12 Afei so, nkwagye nnyi obi fofor biara mu, osiandɛ dzin fofor biara nnyi ɔsor ase* a wɔdze ama nyimpa dɛ yɛmfa do nnya nkwa.”
13 Aber a wohun mbrɛ Peter na John dze akokodur* rekasa, na wohun dɛ wɔyɛ nyimpa a wonnsuaa nwoma,* na wɔnnyɛ nyimpa etsitsir biara no, ɔyɛɛ hɔn nwanwa. Na wohun dɛ wɔnye Jesus anantsew pɛn. 14 Na aber a wɔhwɛɛ ɔbarimba a wɔasa no yarba a ɔnye hɔn gyina hɔ no, woenntum annka hwee. 15 Ntsi wɔmaa wofii Sanhedrin asa no do puei, na wɔhyɛɛ ase susuu asɛm no ho. 16 Wɔkaa dɛ: “Mbarimba yi, yɛnyɛ hɔn dɛn? Osiandɛ wɔnam hɔn do ayɛ asɛnkyerɛdze kɛse na nyimpa a wɔtsetse Jerusalem nyina ehu, na yerunntum nngye ho kyim. 17 Na mbrɛ ɔbɛyɛ a asɛm no ronnkɔ do nntserɛw wɔ ɔman no mu no, hom mma yenhunahuna* hɔn na yɛnka nkyerɛ hɔn dɛ onnyi dɛ wɔka dzin yi ho asɛm bio kyerɛ nyimpa biara.”
18 Ntsi wɔfrɛɛ hɔn na wɔhyɛɛ hɔn dzendzenndzen dɛ mma wɔnnka biribiara wɔ Jesus ne dzin mu bio, na mma wɔnnkyerɛkyerɛ wɔ ne dzin mu so. 19 Naaso Peter na John kaa kyerɛɛ hɔn dɛ: “Sɛ oye wɔ Nyankopɔn n’enyi do dɛ yetsie hom mbom sen Nyankopɔn a, homara hom mbua.* 20 Naaso hɛn dze, dza yeehu na yɛatse no, yerunntum nngyaa ho asɛm ka.” 21 Ntsi aber a wohunahunaa* hɔn bio no, wogyaa hɔn, osiandɛ woennya biribiara enngyina do a wɔdze bɔtwe hɔn aso. Afei so, nna wosuro nkorɔfo no, osiandɛ nna hɔn nyina rehyɛ Nyankopɔn enyimnyam wɔ dza woesi no ho. 22 Ɔbarimba a wɔnam anwanwa kwan* do saa no yarba no, nna ɔabor mfe 40.
23 Aber a wogyaa hɔn no, wɔkɔr esuafo a wɔaka no nkyɛn. Na dza asɔfompanyimfo no nye mpanyimfo no kaa kyerɛɛ hɔn no, wɔkɔbɔɔ hɔn amandzɛɛ. 24 Aber a wɔtsee iyi no hɔn nyina bɔɔ mu maa hɔn ndze do, na wɔkaa kyerɛɛ Nyankopɔn dɛ:
“Ewuradze Tumfo, ɔwo na eyɛɛ ɔsor nye asaase nye po nye dza ɔwɔ mu nyina. 25 Na ɔwo na enam sunsum krɔnkrɔn do faa hɛn egya David a ɔyɛ w’akowaa no do* kaa dɛ: ‘Ebɛnadze ntsi na amanaman no yɛɛ gyigyeegye na nkorɔfo dwendween ndzɛmba hun ho? 26 Asaase do ahemfo soɛree gyinae na etumfo bɔɔ mu soɛree tsiaa Jehovah,* na wɔsoɛree tsiaa nyia Nyankopɔn asera no no so.’* 27 Na nokwasɛm nye dɛ Herod, nye Pontius Pilate, nye amanaman mufo no nye nkorɔfo a wofi Israel no kaa hɔnho bɔɔ mu wɔ kurow yi mu, na wɔsoɛree tsiaa Jesus a ɔyɛ w’akowaa krɔnkrɔn a eseraa no no, 28 mbrɛ ɔbɛyɛ a wɔbɛyɛ dza ekae too hɔ no. Na iyinom baa mu osiandɛ ewɔ tum* na nna ɔyɛ wo pɛ so. 29 Na afei, O Jehovah,* hwɛ hɔn ehunahuna no, na ma wo nkowaa nkɔ do ara mfa akokodur nka w’asɛm. 30 Na tsen wo nsa na sa nyimpa yarba na ma nsɛnkyerɛdze nye anwanwadze* mfa w’akowaa krɔnkrɔn Jesus ne dzin mu mbra.”
31 Na aber a wɔbɔɔ mpaa dzendzenndzen* wiei no, beebi a woehyia mu no wosowee, na sunsum krɔnkrɔn hyɛɛ hɔn nyina ma, na wɔdze akokodur kaa Nyankopɔn n’asɛm no.
32 Afei so, nyimpadɔm a wɔgyee dzii no nyina nyaa akoma kor nye ɔkra* kor na hɔn mu kor mpo annka dɛ ndzɛmba a ɔwɔ no yɛ nankasa nedze. Mbom wɔnye hɔnho kyɛɛ ndzɛmba a wɔwɔ no. 33 Na asomafo no dze tum kɛse kɔr do dzii Ewuradze Jesus no wusoɛr no ho dase, na hɔn mu biara nyaa adom pii. 34 Nokwasɛm nye dɛ hɔn mu biara ennhia hwee, osiandɛ hɔn a nna wɔwɔ nsaase nye efie no nyina tontɔnee na wɔdze dza wonyae no bae. 35 Na wɔdze brɛɛ asomafo no,* na asomafo no so kyekyɛe ma obiara nyaa dza ohia. 36 Afei nna ɔbarimba bi so wɔ hɔ a wɔfrɛ no Joseph. Nna asomafo no so frɛ no Barnabas (n’asekyerɛ nye “Awerɛkyekyer Ba”). Nna ɔyɛ Levinyi a ofi Cyprus. 37 Nna ɔwɔ asaase bi, ntsi ɔkɔtɔnee na ɔdze sika no brɛɛ asomafo no.*