Ɔdze Kɛmaa Romefo No
16 Mereka* hɛn akyerɛbaa Phoebe a ɔsom wɔ asafo a ɔwɔ Cenchreae no mu no ho asɛm akyerɛ hom, 2 ama hom aagye no wɔ Ewuradze mu dɛ mbrɛ ɔsɛ fata akrɔnkrɔmfo no, na hom dze mboa biara so a ohia no ama no, osiandɛ ɔnoara so aboa nyimpa pii a mara mpo meka ho.
3 Hom nkyia Prisca na Aquila mma me; wɔyɛ m’anyɛnkofo a menye hɔn yɛ edwuma wɔ Christ Jesus mu. 4 Hɔn na wɔdze hɔnankasa hɔn nkwa too hɔ maa me.* Ɔnnyɛ mankotsee na meda hɔn ase, na mbom asafo ahorow a wɔwɔ amanaman no mu nyina so da hɔn ase. 5 Hom nkyia asafo a ɔwɔ hɔn fie hɔ no so mma me. Hom nkyia mo dɔfo Epaenetus so mma me; ɔka Christ n’aba a odzi kan a wonyae wɔ Asia no ho. 6 Mikyia Mary a ɔayɛ edwumadzen ama hom no so. 7 Mikyia Andronicus na Junias so; wɔyɛ m’ebusuafo na menye hɔn kɛdaa efiadze. Afei so wɔyɛ mbarimba a asomafo no nyim hɔn yie paa, na wɔbaa Christ mu akyɛr sen me.
8 Hom nkyia Ampliatus mma me; ɔyɛ mo dɔfo wɔ Ewuradze mu. 9 Hom nkyia Urbanus so mma me; ɔyɛ hɛn nyɛnko a yɛnye no yɛ edwuma wɔ Christ mu, nye mo dɔfo Stachys so. 10 Hom nkyia Apelles mma me; ɔyɛ Christ no somfo a wɔagye no ato mu. Mikyia hɔn a wɔwɔ Aristobulus ne fie hɔ no so. 11 Mikyia mo busuanyi Herodion. Na hom nkyia hɔn a wɔwɔ Narcissus ne fie hɔ a wɔwɔ Ewuradze mu no so mma me. 12 Hom nkyia Tryphaena na Tryphosa so mma me; wɔyɛ mbaa a wɔreyɛ edwumadzen wɔ Ewuradze mu. Mikyia hɛn dɔfo Persis so, osiandɛ noara so ayɛ edwumadzen wɔ Ewuradze mu. 13 Mikyia Rufus a Ewuradze eyi no no so, nye ne maame a mara so mafa no dɛ me maame no. 14 Mikyia Asyncritus, Phlegon, Hermes, Patrobas, Hermas nye enuanom a wɔka hɔn ho no so. 15 Mikyia Philologus na Julia, Nereus na n’akyerɛbaa no, nye Olympas nye akrɔnkrɔmfo a wɔka hɔn ho no nyina so. 16 Hom mfa mfewano krɔnkrɔn nkyiakyia homho. Christ n’asafo ahorow no nyina kyiakyia hom.
17 Afei enuanom, mutu hom fo dɛ hom nhwɛ homho yie wɔ hɔn a wɔdze mpaapaamu ba na wɔto fintsidua no ho. Dɛm ndzɛmba a wɔyɛ yi nye dza wɔdze akyerɛkyerɛ hom no nnhyia. Hom nntwe homho mfi hɔn ho, 18 osiandɛ hɔn a wɔtse dɛm no nnyɛ nkowaa mma hɛn Ewuradze Christ, mbom wɔyɛ nkowaa ma hɔnankasa hɔn akɔndɔ,* na wɔdze tɛkyerɛmadɛw na adɛfɛdɛfɛsɛm* daadaa hɔn a wonnyim hwee no hɔn akoma. 19 Obiara ehu dɛ hom yɛ setsie, na ɔno ma midzi ehurusi wɔ hom ho. Naaso mepɛ dɛ hom yɛ enyansafo wɔ papa ho, na hom twe homho fi bɔn ho koraa. 20 Na Nyankopɔn a ɔma asomdwee no dze, ɔrennkyɛr biara ɔbɛpɛkyɛw Satan wɔ hom ananadze. Hɛn Ewuradze Jesus n’adom nye hom ntsena.
21 Me nyɛnko Timothy a menye no yɛ edwuma no kyia hom, na dɛmara so na Lucius, Jason na Sosipater a wɔyɛ m’ebusuafo no so kyia hom.
22 Emi Tertius a mekyerɛɛw krataa yi so kyia hom wɔ Ewuradze mu.
23 Gaius a mokɔsoɛɛ* no a asafo no nyina hyia mu wɔ ne fie no so kyia hom. Na Erastus a ɔhwɛ kurow no ne sikasɛm do nye no nua Quartus so kyia hom. 24* ——
25 Na Nyankopɔn botum afa asɛmpa a meka nye Jesus Christ no ho asɛm a meka no do ahyɛ hom dzen. Dza meka no nye esumasɛm krɔnkrɔn a wɔdze siei fi tsetseetse a wɔada no edzi no hyia. 26 Seseiara dze wɔada no edzi akyerɛ hɛn, na wɔnam Kyerɛwnsɛm no mu nkɔnhyɛsɛm do ama yeehu. Hɛn Nyankopɔn a ɔwɔ hɔ afebɔɔ no ahyɛ dɛ wɔnda no edzi wɔ amanaman no mu, mbrɛ ɔbɛyɛ a wɔnam gyedzi do bɛyɛ setsie. 27 Na Nyankopɔn a ɔno nkotsee nye nyansabuakwa* no, ɔno na enyimnyam mfa Jesus Christ do nka no daa daa. Amen.