Ɔdze Kɛmaa Romefo No

5 Ntsi seseiara a hɛn gyedzi ntsi woebu hɛn dɛ atseneneefo yi, hom mma yɛnkɔ do ara ndua hɛn Ewuradze Jesus Christ do nye Nyankopɔn ntsena asomdwee mu.* 2 Na gyedzi a yɛwɔ wɔ Jesus no mu no na wɔama yeenya kwan aba adom a seseiara yɛwɔ mu yi mu. Ntsi hom mma yendzi ehurusi,* osiandɛ yɛwɔ enyidado dɛ Nyankopɔn bɛhyɛ hɛn enyimnyam. 3 Naaso nnyɛ ɔno nko, mbom sɛ yeruhu amandze so a, hom mma yendzi ehurusi,* osiandɛ yenyim dɛ amandzehu dze enyimia ba; 4 na sɛ yemia hɛn enyi a, ɔma Nyankopɔn gye hɛn to mu; na sɛ Nyankopɔn gye hɛn to mu so a, ɔma yenya enyidado, 5 na enyidado no nndzi huambɔ; osiandɛ wɔnam sunsum krɔnkrɔn a wɔdze maa hɛn no do ehue Nyankopɔn no dɔ egu hɛn akoma mu.

6 Na nokwasɛm nye dɛ, aber a nna yɛda ho ara yɛ mberɛw no, Christ wui maa nyimpa ndzebɔnyɛfo wɔ ber a nna wɔahyɛ ato hɔ no mu. 7 Ɔbɛyɛ dzen dɛ obi bowu ama ɔtseneneenyi; naaso nyimpa papa dze, bi a obi besi no bo dɛ obowu ama no. 8 Naaso, Nyankopɔn daa nankasa no dɔ edzi kyerɛɛ hɛn, osiandɛ aber a nna yɛda ho ara yɛ ndzebɔnyɛfo mpo no, Christ wui maa hɛn. 9 Ntsi seseiara a wɔnam no bɔgyaa do ebu hɛn dɛ atseneneefo yi mpo dze, ɔno ɔkwan biara do wɔnam no do bɛgye hɛn efi ebufuhyew mu. 10 Osiandɛ sɛ aber a nna yɛyɛ atamfo no mpo, wɔnam ne Ba no no wu no do siesiee yɛnye Nyankopɔn ntamu a, nna ɔno afei a woesiesie yɛnye no ntamu yi mpo dze, wɔnam Jesus no nkwa do bɛgye hɛn ma wɔabor do koraa. 11 Naaso nnyɛ ɔno nko o, mbom hɛn Ewuradze Jesus Christ a seseiara wɔnam no do esiesie yɛnye Nyankopɔn ntamu no, yɛnam no do dzi ehurusi wɔ Nyankopɔn mu.

12 Ɔnam nyimpa kor do na bɔn baa wiadze, na bɔn na ɔdze owu bae, ntsi owu atserɛw aka nyimpa nyina, osiandɛ hɔn nyina ayɛ bɔn—. 13 Siantsir nye dɛ nna bɔn wɔ wiadze ansaana Mbra no reba, naaso sɛ mbra biara nnyi hɔ a, wommbu obi fɔ dɛ ɔayɛ bɔn. 14 Naaso owu dzii hen fitsi Adam do araa dze besii Moses do, na hɔn a hɔn bɔn nntse dɛ Adam ne mbrato no mpo, odzii hɔn do hen. Nna Adam tse dɛ* obi a ɔbɛba no.

15 Naaso akyɛdze no nntse dɛ mbrato no. Osiandɛ sɛ nyimpa kor ne mbrato ama nyimpa pii ewuwu a, nna ɔno Nyankopɔn n’adom nye n’akyɛdze a ɔdze ma kwa a ɔnam nyimpa kor a ɔno nye Jesus Christ do dze ma no mpo dze, nyimpa beberee benya bi ma wɔabor* hɔn do! 16 Afei so, ɔsor dza ofi akyɛdze a wɔdze ma kwa no mu bae, nna ɔsor dza ofi nyimpa kor no bɔn a ɔyɛe no mu bae. Osiandɛ ɔbaakofo ne mbrato maa wobuu nyimpa beberee fɔ, naaso akyɛdze a odzii mbrato pii ekyir bae no maa wobuu nyimpa beberee atseneneefo. 17 Na sɛ nyimpa kor ne mbrato ntsi owu nam dɛm nyimpa no do dzii hen a, nna ɔno hɔn a wonya adom na tsenenee akyɛdze a wɔdze ma kwa ma ɔbor hɔn do no dze, wobenya biribi a ɔsen dɛm koraa; wɔnam ɔbaakofo a ɔno nye Jesus Christ no do benya nkwa na woedzi hen!

18 Ntsi, dɛ mbrɛ nyimpa kor ne mbrato ama woebu nyimpa ahorow nyina fɔ no, dɛmara so na adze tsenenee kor ama woebu nyimpa ahorow nyina atseneneefo dɛ wobenya nkwa. 19 Na dɛ mbrɛ ɔnam ɔbaakofo n’asoɔdzen do ntsi nyimpa pii bɛyɛɛ abɔnfo no, dɛmara so na ɔnam nyimpa kor ne setsie do no, nyimpa pii bɛba abɛyɛ atseneneefo. 20 Na Mbra no bae mbrɛ ɔbɛyɛ a mbrato bɔdɔɔ so. Naaso aber a bɔn yɛɛ pii no, adom no so yɛɛ pii ma ɔboor do. 21 Ebɛnadze ntsi na ɔbaa no dɛm? Ɔbaa no dɛm mbrɛ ɔbɛyɛ a adom so bɛfa tsenenee do edzi hen dze akɔ onnyiewiei nkwa a ɔnam hɛn Ewuradze Jesus Christ do bɛba no mu, dɛ mbrɛ bɔn na owu dzii hen no.