Asomafo Ndwuma

20 Aber a begyabegya no brɛɛ adze no, Paul somae ma wɔkɛfrɛɛ esuafo no, na aber a ɔhyɛɛ hɔn nkuran na ɔnye hɔn dzii nkra wiei no, osii kwan do dɛ ɔrokɔ Macedonia. 2 Na okekyinkyiin nkurow ahorow* a ɔwowɔ hɔ no mu, na ɔkaa nsɛm pii dze hyɛɛ hɔn a wɔwɔ hɔ no nkuran, na owiei no ɔbaa Greece. 3 Ɔtsenaa hɔ abosoom ebiasa, na aber a ɔrebɛfa po do hɛn efi hɔ akɔ Syria no, Jewfo no bɔɔ no ho pɔw, ntsi ɔyɛɛ n’adwen dɛ ɔbɔkɔ akɛfa Macedonia mbom akɔ. 4 Hɔn a nna wɔka no ho nye Pyrrhus a ofi Beroea no ne ba Sopater, Aristarchus na Secundus a wofi Thessalonica no, Gaius a ofi Derbe no, Timothy, nye Tychicus na Trophimus a wofi Asia mantɔw no mu no. 5 Dɛm mbarimba yi dzii hɛn enyim kan na wɔkɔtweɔɔn hɛn wɔ Troas. 6 Na nda a wɔdze dzi Paanoo A Ɔnnkawee Afahyɛ no baa ewiei no, yɛfaa po do hɛn fii Philippi, na nda enum ekyir no yɛkɔtoo hɔn wɔ Troas, na yedzii nda esuon wɔ hɔ.

7 Da a odzi kan wɔ dapɛn no mu no, hɛn nyina hyiaa mu dɛ yeribedzidzi, na Paul hyɛɛ ase dɛ ɔrekasa kyerɛ hɔn, na ɔkasaa kyerɛɛ hɔn araa kesii esuom, osiandɛ nna adze kye a obefi hɔ. 8 Ntsi nna wɔasosɔ nkandzea pii wɔ abansor dan a nna yeehyia mu wɔ hɔ no mu. 9 Nna aberantsɛ bi tsena tokura n’ano a wɔfrɛ no Eutychus, na aber a Paul gu do rekasa no ɔfaa mu daa hatsee. Na osiandɛ nna ɔada ntsi, ofii abansor a ɔtɔ do ebiasa no do bɔhwee famu, na aber a wɔkɛmaa no do no nna oewu. 10 Nna Paul siaan ase, na okobutuuw no do na ɔbaam no, na ɔkaa dɛ: “Hom ngyaa su na ntseatseamu no, na onnwui.”* 11 Na ɔsanee foow sor na ɔfaa edziban no* na odzii. Na ɔtoaa do nye hɔn bɔɔ nkɔmbɔ araa kesii dɛ adze kyee, na afei ofii hɔ kɔree. 12 Ntsi wɔfaa banyimba no dze no kɔree a nna ɔtse nkwa mu, na awerɛkyekyer a iyi maa wonyae no dze, wɔnnka.

13 Afei yɛfaa po do hɛn dze hɛn enyi kyerɛɛ Assos, na nna ɔwɔ hɛn adwen mu dɛ sɛ yedu hɔ a yɛbɛfa Paul aka hɛnho, osiandɛ nna oedzi kan aka akyerɛ hɛn dɛ ɔbɛnantsew akɔ hɔ, ntsi yenhyia no wɔ hɔ na yɛmfa no. 14 Ntsi aber a yɛnye no hyiae wɔ Assos no, yɛfaa no tsenaa po do hɛn no mu nye no kɔr Mitylene. 15 Na adze kyee no, yɛdze po do hɛn no toaa do kɔr Chios. Adze kyee bio no, yɛkɔr Samos, na da a odzi hɔ no yekodur Miletus. 16 Naaso nna Paul ayɛ n’adwen dɛ orinngyina wɔ Ephesus mbrɛ ɔbɛyɛ a ɔrennsɛɛ ber biara wɔ Asia mantɔw no mu. Osiandɛ nna ɔpɛ no ntsɛm edu Jerusalem, na sɛ ɔbɛyɛ yie mpo a oedu hɔ wɔ da a wobedzi Pentecost Afahyɛ no.

17 Ntsi aber a ɔwɔ Miletus no, ɔsomaa dɛ wɔnkɛfrɛ asafo mu mpanyimfo a wɔwɔ Ephesus no mbra. 18 Na wɔbae no, ɔkaa kyerɛɛ hɔn dɛ: “Homara hom nyim kwan a mefaa do bɔɔ me bra wɔ hom mu ofitsi da a odzi kan a mutuu me nan sii Asia mantɔw yi mu ha no. 19 Mifii ahobrɛadze* nyina mu yɛɛ edwuma dɛ akowaa maa Ewuradze, na pɔw ahorow a Jewfo no bɔe tsiaa me no maa metseew nyinsuwa na mefaa nsɔhwɛ pii mu. 20 Biribiara a no do bɛba mfaso ama hom no,* mammfa ennsie hom. Na mekyerɛkyerɛɛ hom wɔ bagua mu nye efiefie mu. 21 Na midzii dase kofekofe kyerɛɛ Jewfo na Greekfo nyina dɛ wonnu hɔnho, na wɔmbra Nyankopɔn ne nkyɛn na wɔngye hɛn Ewuradze Jesus ndzi. 22 Na afei hwɛ, sunsum no dze me rokɔ* Jerusalem, na minnyim dza ɔbɔto me wɔ hɔ. 23 Naaso wɔ kurow biara mu no, sunsum krɔnkrɔn no kɔ do dzi me dase dɛ wɔdze me bɔto efiadze na amandzehu rotweɔn me wɔ hɔ. 24 Naaso mo nkwa* ho nnhia me pii,* mbom adze a ohia me paa nye dɛ mubowie mbirika a murutu nye ɔsom edwuma a Ewuradze Jesus dze hyɛɛ me nsa no; ɔno nye dɛ mindzi Nyankopɔn n’adom ho asɛmpa no ho dase kofekofe.

25 “Na afei hwɛ, minyim dɛ hom a maka Ahendzi no ho asɛm akyerɛ hom nyina, hom mu biara nnyi hɔ a obohu m’enyim bio. 26 Ntsi mafrɛ hom dɛ hom mbedzi me dase ndɛ dua yi dɛ minndzi nyimpa biara no bɔgyaa ho fɔ, 27 osiandɛ dza Nyankopɔn abɔ ne tsirmu* dɛ ɔbɛyɛ nyina maka akyerɛ hom; mammfa hwee ennsie hom. 28 Hom nhwɛ homho yie na hom nhwɛ nguankuw no nyina so yie, osiandɛ sunsum krɔnkrɔn no eyi hom dɛ ahwɛfo wɔ hɔn mu, dɛ hom nhwɛ Nyankopɔn n’asafo a ɔdze nankasa ne Ba no bɔgyaa tɔe no do yie. 29 Na minyim dɛ sɛ mokɔ a, mpataku abɔyafo bɛba hom mu na wɔrennyɛ nguankuw no berɛberɛ. 30 Na mbarimba bɔsoɛr wɔ homankasa hom mu na wɔaakasa ekyinkyim nsɛm dze atwe esuafo no edzi hɔnankasa hɔn ekyir.

31 “Dɛm ntsi hom nkɔ do nweɔn na hom nkaa dɛ mokɔr do dze nyinsuwa tuu hom mu biara fo adzekyee na adzesaa mfe ebiasa, na menngyaa da. 32 Na afei dze medze hom hyɛ Nyankopɔn ne nsa nye n’adom asɛm no ase. Dɛm asɛm no botum ahyɛ hom dzen na wɔaama hom enya egyapadze wɔ hɔn a wɔatsew hɔnho no nyina mu. 33 M’enyi ammber obiara ne dwetɛ anaa ne sika kɔkɔɔ anaa n’atar. 34 Homara hom nyim dɛ dɛm nsa yi ara na wɔama menya dza mihia na ɔno ara so na wɔama hɔn a wɔka mo ho no enya dza wohia. 35 Mama hom ehu dɛ adze nyina mu ɔsɛ dɛ hom yɛ edwumadzen dɛ mbrɛ meyɛe no, dze boa hɔn a wɔyɛ mberɛw no, na ɔsɛ dɛ hom ma Ewuradze Jesus n’asɛm yi tsena hom adwen mu. Nankasa kaa dɛ: ‘Ɔma mu wɔ enyigye pii sen ɔgye.’”

36 Na aber a ɔkaa dɛm nsɛm yi wiei no, ɔnye hɔn nyina buu ntwɛr na wɔbɔɔ mpaa. 37 Nokwasɛm nye dɛ, hɔn nyina suu pii, na wɔbaam Paul* na wɔfeew n’ano. 38 Adze a ɔmaa hɔn werɛ hoow paa mpo nye asɛm a Paul kaa dɛ worunnhu n’enyim bio no. Na wokegyaa no wɔ po do hɛn no ho.