Asomafo Ndwuma
5 Banyin bi so a wɔfrɛ no Ananias nye ne yer Sapphira kɔtɔɔn hɔn egyapadze bi. 2 Naaso sika a wonyae no, oyii bi siei. Nna ne yer so nyim ho bi, na ɔdze sika no ne fa bi pɛ brɛɛ asomafo no.* 3 Nna Peter bisaa no dɛ: “Ananias, ɔyɛ dɛn ntsi na Satan epiapia wo dɛ bedzi ator kyerɛ sunsum krɔnkrɔn no, na eyi asaase no ne sika no bi esie yi? 4 Aber a enntɔɔn asaase no, nna ɔnnyɛ woara wodze bi a? Na etɔnee no so, nna sika no nnyi woara wo hɔ a? Ntsi ɔyɛ dɛn na adwen adze a ɔtse dɛm ho wɔ w’akoma mu yi? Ɔnnyɛ nyimpa na edzi ator akyerɛ no no, mbom Nyankopɔn a.” 5 Aber a Ananias tsee dɛm asɛm yi no, otwae hwee famu na owui. Na hu kɛse kaa hɔn a wɔtsee asɛm no nyinara. 6 Nna mberantsɛ no soɛree, na wɔdze tam kyekyeer no ho, na wɔmaa no do kesiee no.
7 Afei bɛyɛ ndɔnhwer ebiasa ekyir no, ne yer no so baa hɔ. Nna onnyim asɛm a woesi. 8 Na Peter bisaa no dɛ: “Ka kyerɛ me, aber a hom tɔɔn asaase no, dɛm sika yi na hom gyee a?” Oyii no ano dɛ: “Nyew, dɛmara na yɛgyee.” 9 Nna Peter kaa kyerɛɛ no dɛ: “Ebɛnadze ntsi na hom beenu yɛɛ hom adwen dɛ hom robɔsɔ Jehovah* no sunsum ahwɛ yi? Hwɛ! hɔn a wokesiee wo kun no, hɔn ananadze na etse no wɔ abow no ano no, wɔbɛma woara so do akɔ.” 10 Amonmu hɔ ara na otwae hwee Peter n’ananadze na owui. Na aber a mberantsɛ no baa dan no mu no, wohun dɛ ɔno so ewu, ntsi wɔmaa no do dze no puei na wokesiee no wɔ no kun ne nkyɛn. 11 Iyi maa hu kɛse kaa asafo mu no nyina nye hɔn a wɔtsee dɛm nsɛm yi nyina.
12 Afei so asomafo no kɔr do yɛɛ nsɛnkyerɛdze nye anwanwadze* beberee wɔ nkorɔfo no mu; nna hɔn nyina hyia mu wɔ Solomon Abrandaa no do. 13 Ɔwɔ mu, hɔn a wɔaka no mu biara ennya akokodur ammbɛka hɔn ho dze; naaso nkorɔfo no bɔɔ hɔn dzin pa. 14 Na dza ɔsen iyi no, hɔn a wɔagye Ewuradze edzi no beberee bɛkaa hɔn ho; mbarimba na mbaa pii. 15 Wɔdze ayarfo mpo puei baa abɔntsen, na wɔdze hɔn bɔtotoo mpa na kɛtɛ nkakraba do, ama sɛ Peter rutwa mu a, annyɛ yie koraa no, no sunsum aatɔ hɔn mu binom do. 16 Afei so, nyimpadɔm a wofifi nkurow ahorow a woetwa Jerusalem ho ehyia no mu no baa hɔ. Nna wɔsoso ayarfo nye hɔn a esunsum fi rehaw hɔn, na wɔsaa hɔn nyina yarba.
17 Na ɔsɔfopanyin no nye hɔn a wɔka no ho a wɔyɛ Sadduceefo kuw no mufo nyina soɛree. Nna ahoɔyaw ruku hɔn. 18 Na wɔkyeer asomafo no dze hɔn koguu efiadze.* 19 Naaso odur anafua no, Jehovah* no bɔfoe bobuebuee efiadze no mbobow no, na oyii hɔn fii hɔ puei, na ɔkaa kyerɛɛ hɔn dɛ: 20 “Hom nkɔ nkegyina asɔrfie hɔ na hom nkɔ do nka nkwa yi ho nsɛm nyina nkyerɛ nkorɔfo no.” 21 Aber a wɔtsee iyi no, wɔkɔr asɔrfie hɔ anapatutuutu na wɔhyɛɛ ase dɛ wɔrekyerɛkyerɛ.
Na aber a ɔsɔfopanyin no nye hɔn a wɔka no ho no bodurii no, wɔfrɛfrɛɛ Sanhedrin no nye Israel mpanyimfo no nyina behyiae, na wɔsomae ma wɔkɔr efiadze hɔ dɛ wɔnkɛfrɛ asomafo no mbra hɔn enyim. 22 Naaso aber a aweɔmfo no kodur efiadze hɔ no, woennhu hɔn wɔ hɔ, ntsi wɔsanee bae bɔbɔɔ hɔn amandzɛɛ. 23 Wɔkaa dɛ: “Yɛkɔree no, yekohun dɛ wɔatow efiadze no mu yie ankasa, na nna aweɔmfo no so gyinagyina abow no ano, naaso aber a yebuei no, yeennhu obiara wɔ hɔ.” 24 Na aber a ɔweɔmfo panyin a ɔwɔ asɔrfie hɔ nye asɔfompanyimfo no tsee dɛm nsɛm yi no, hɔn adwen tui forae, osiandɛ nna wonnyim dza iyi bɔkɔ akɛfa aba. 25 Naaso obi bae bɛkaa kyerɛɛ hɔn dɛ: “Hwɛ! Mbarimba a hom dze hɔn koguu efiadze no, wɔwɔ asɔrfie hɔ na wogyina hɔ rekyerɛkyerɛ nkorɔfo no.” 26 Ntsi ɔweɔmfo panyin no nye n’aweɔmfo no kɔree kɛfaa hɔn bae, naaso wɔannyɛ hɔn basabasa osiandɛ nna wosuro dɛ nkorɔfo no besiw hɔn abo.
27 Na wɔdze hɔn bae no, wɔdze hɔn begyinaa Sanhedrin no enyim na ɔsɔfopanyin no bisabisaa hɔn nsɛm. 28 Ɔkaa kyerɛɛ hɔn dɛ: “Yɛhyɛɛ hom katsee dɛ mma hom nnkyerɛkyerɛ wɔ dɛm dzin yi mu bio. Naaso hwɛ! hom dze hom nkyerɛkyerɛ ahyɛ Jerusalem ma, na hom esi hom bo dɛ hom dze ɔbarimba yi no bɔgyaa bɛba hɛn do.” 29 Nna Peter nye asomafo nkaa no yii no ano dɛ: “Nyankopɔn nye tumdzifo a ɔsɛ dɛ yetsie no na nnyɛ nyimpa bi a. 30 Hɛn egyanom hɔn Nyankopɔn no nyaan Jesus a hom sɛɛn no wɔ dua do kum no no. 31 Ɔno na Nyankopɔn ama no do na ɔayɛ no Safohen na Agyenkwa, na ɔdze no atsena ne nsa nyimfa dɛ ɔmma Israel nnu hɔnho na wonnya bɔnfakyɛ. 32 Na yɛyɛ dɛm nsɛm yi ho adasefo, na dɛmara so na sunsum krɔnkrɔn a Nyankopɔn dze ama hɔn a wotsie no dɛ tumdzifo no so dzi ho dase.”
33 Aber a wɔtsee iyi no, hɔn bo fuuw paa* na nna wɔpɛ dɛ woku asomafo no. 34 Naaso Phariseenyi bi a wɔfrɛ no Gamaliel soɛree wɔ Sanhedrin no mu; nna ɔyɛ kyerɛkyerɛnyi a ɔkyerɛ Mbra, na nna nkorɔfo no nyina bu no paa. Na ɔkaa dɛ wɔmma mbarimba no mpue kakra. 35 Afei ɔkaa kyerɛɛ hɔn dɛ: “Israel mbarimba, dza hom pɛ dɛ hom dze yɛ mbarimba yi, hom ndwen ho bio. 36 Hwɛ, mber bi a abɛsen kɔ no, Theudas soɛree, na nna ɔrekeka dɛ ɔyɛ nyimpa tsitsir, na mbarimba a hɔnho dɔɔ so kakra ara yie, bɛyɛ 400 kɛkaa no kuw no ho. Naaso wokum no, na hɔn a wodzi n’ekyir no nyina bɔe petsee na woennhu hɔn bio. 37 Ɔno ekyir no, Galileenyi bi a wɔfrɛ no Judas so soɛree wɔ aber* a nna wɔrekan nyimpa na wɔrekyerɛw hɔn edzin no mu, na onyaa nkorɔfo ma wodzii n’ekyir. Ɔno so wui, na hɔn a nna wodzi n’ekyir no nyina so bɔe petsee. 38 Ntsi dza ɔrokɔ do seseiara yi so, mereka akyerɛ hom dɛ, mma hom mmfa homho nngyegye dɛm mbarimba yi hɔn asɛm no mu, mbom hom ngyaa hɔn. Na sɛ dɛm nkyerɛkyerɛ yi anaa dɛm edwuma yi fi nyimpa a, obogu. 39 Naaso sɛ ofi Nyankopɔn dze a, ɔnodze hom runntum nngu no. Annyɛ dɛm a ɔbɛyɛ tse dɛ mbrɛ hom nye Nyankopɔn nankasa roko.” 40 Na ɔkaa dɛm no wotsiee n’afotu no na wɔfrɛɛ asomafo no, na wɔhwee* hɔn, na wɔhyɛɛ hɔn dɛ mma wɔnnka Jesus ne dzin ho asɛm bio,* na wogyaa hɔn ma wɔkɔree.
41 Na wopuei fii Sanhedrin no enyim kɔree. Nna hɔn enyi agye osiandɛ wohun dɛ ɔyɛ hokwan kɛse* dɛ osian Jesus ne dzin ntsi woegu hɔn enyim ase. 42 Na wɔkɔr do kyerɛkyerɛe, na wɔkaa Jesus a ɔno nye Christ no ho asɛmpa wɔ asɔrfie no mu na efiefie da biara, na woenngyaa da.