Ɔdze Kɛmaa Romefo No
14 Obi a ne gyedzi yɛ mberɛw no, hom ngye no nto mu, na hɔn a hɔn adwen nye homdze nnhyia no,* mma hom mmbu hɔn atsɛn. 2 Obi wɔ gyedzi a ɔma otum dzi biribiara, naaso nyimpa a ɔyɛ mberɛw no dze, nhabanhaban* nkotsee na odzi. 3 Nyia odzi edziban biara no, ɔnnsɛ dɛ obu nyia ɔnnyɛ biribiara na odzi no enyimtsia. Na dɛmara so na obi a ɔnnyɛ biribiara na odzi no, ɔnnsɛ dɛ obu obi a odzi biribiara no atsɛn, osiandɛ Nyankopɔn agye no ato mu. 4 Na ɔwo nye woana a ibu obi no somfo atsɛn? Osiandɛ sɛ obegyina o, sɛ ɔbɔhwe ase o, ɔnoara no wura na ɔbɛkyerɛ. Na nokwasɛm nye dɛ obegyina, osiandɛ Jehovah* botum ama oegyina.
5 Obi wɔ hɔ a obu da bi dɛ noho hia kyɛn nda a wɔaka no; na obi so wɔ hɔ a obu nda nyina dɛ ɔyɛ pɛr. Hom mma obiara nankasa n’adwen nsi no pi. 6 Obi a obu da bi dɛ noho hia no, ɔyɛ dɛm dze hyɛ Jehovah* enyimnyam. Na obi a odzi biribiara no so, odzi dze hyɛ Jehovah* enyimnyam, osiandɛ ɔda Nyankopɔn ase wɔ ho; na obi a onndzi no so, Jehovah* ntsi na onndzi, na ɔnoara so da Nyankopɔn ase. 7 Nokwasɛm nye dɛ, hɛn mu biara nnyi hɔ a ɔtsena ase ma nankotsee noho, na obiara so nnyi hɔ a owu ma nankotsee noho. 8 Osiandɛ sɛ yɛtse ase a, yɛtse ase ma Jehovah,* na sɛ yewu so a, yewu ma Jehovah.* Ntsi sɛ yɛtse ase o, sɛ yewu o, yɛyɛ Jehovah* dze a. 9 Na iyi ntsi na Christ wui na ɔsanee baa nkwa mu bio no, ama ɔaayɛ atseasefo na ewufo nyina hɔn Wura.
10 Ntsi ɔyɛ dɛn ntsi na ibu wo nua atsɛn? Na ebɛnadze ntsi na ibu no enyimtsia yi? Osiandɛ hɛn nyina yebegyina Nyankopɔn n’atsɛmbu egua no enyim. 11 Na wɔakyerɛw dɛ: “‘Dɛ metse ase yi, anankoroma nyina bɔkotow me, na tɛkyerɛma nyina so apaa mu aka dɛ emi nye Nyame,’ Jehovah* na ɔse.” 12 Ntsi hɛn mu biara bobu nankasa n’akontaa akyerɛ Nyankopɔn.
13 Dɛm ntsi, mma hom mma yemmbubu hɛnho atsɛn bio, mbom hom mma yensi hɛn bo dɛ yɛremmfa fintsidua anaa akwansidze biara nnto onua bi no kwan mu. 14 Minyim na megye dzi paa wɔ Ewuradze Jesus mu dɛ biribiara nnyi hɔ a noho nntsew. Mbom sɛ obi bu biribi dɛ noho nntsew a, ɔyɛ ɔno na no ho nntsew mma no. 15 Na sɛ edziban a idzi no haw wo nua a, nna ɔno ennam ɔdɔ kwan no do bio. Mma mmfa w’edziban nnsɛɛ obi a Christ ewu ama no no. 16 Dɛm ntsi, mma hom nnyɛ ma wɔnnka papa a hom yɛ no ho asɛmbɔn. 17 Osiandɛ Nyankopɔn n’Ahendzi no nnyɛ edzidzi na ɔnom, mbom ɔyɛ tsenenee, asomdwee na enyigye a ɔnam sunsum krɔnkrɔn do ba no. 18 Na obiara a ɔsom Christ* wɔ dɛm kwan yi do no, Nyankopɔn gye no to mu na nyimpa so pen no do.
19 Dɛm ntsi ndzɛmba a ɔdze asomdwee ba nye ndzɛmba a ɔma yɛhyehyɛ hɛnho dzen no, ɔno na hom mma yendzi ekyir. 20 Hom ngyaa dɛ edziban kɛkɛ ntsi hom resɛɛ Nyankopɔn n’edwuma. Ampa, adze nyina ho tsew, naaso sɛ idzi edziban bi a ɔbɔto obi fintsidua a, ɔyɛ bɔn. 21 Oye paa dɛ eronnwe nam anaa eronnom nsa anaa erennyɛ biribiara a ɔbɔto wo nua fintsidua. 22 Dza egye dzi fa dɛm nsɛm yi ho no, ɔyɛ ɔwo na Nyankopɔn hom ntamu asɛm. Sɛ nyimpa bi emmbu noho atsɛn wɔ dza noara susu dɛ oye no ho a, n’enyi bɛgye. 23 Na sɛ n’adwen nnsi no pi na odzi a, oebu noho fɔ dada, osiandɛ ɔnnyɛ gyedzi na ɔdze dzi. Nokwasɛm nye dɛ, biribiara a onngyina gyedzi do no yɛ bɔn.