Ɔdze Kɛmaa Romefo No

4 Sɛ dɛm na ɔtse dze a, nna ɔno ebɛn adze na yɛbɛka dɛ hɛn honam afamu egya Abraham nyae? 2 Ndwuma a Abraham yɛe no, sɛ ɔno na wɔhwɛɛ ho dze buu no ɔtseneneenyi a, nkyɛ obenya biribi a obotum egyina do dze ahoahoa noho, naaso nkyɛ orunntum nnhoahoa noho wɔ Nyankopɔn n’enyim. 3 Kyerɛwsɛm no ka dɛn? Ɔka dɛ: “Abraham gyee Jehovah* dzii, na iyi maa wobuu no dɛ ɔyɛ ɔtseneneenyi.” 4 Sɛ obi yɛ edwuma a, n’akatua a ɔsɛ dɛ wɔdze ma no no, wommbu no dɛ ɔyɛ adom, mbom wobu no dɛ kaw a ɔsɛ dɛ wotua ma no. 5 Naaso sɛ obi nnyɛ edwuma, na sɛ ɔgye Obi a obu ɔdzebɔnyɛnyi bem no dzi a, ne gyedzi a ɔwɔ no ntsi, wobobu no dɛ ɔtseneneenyi. 6 David so kaa dɛ obi a Nyankopɔn mmfa ndwuma mmbu no bem no, n’enyi gye. Ɔkaa dɛ: 7 “Enyigye nye hɔn a wɔdze hɔn mbrato akyɛ hɔn na wɔakata hɔn bɔn do;* 8 enyigye nye nyimpa a Jehovah* rummbu no bɔn ho akontaa wɔ kwan biara do.”

9 Dɛm enyigye yi, hɔn a woetwa hɔn bɔtɔ no nkotsee na wonya bi a? Anaadɛ hɔn a wonntwaa hɔn bɔtɔ no so nya bi? Osiandɛ yɛka dɛ: “Gyedzi a nna Abraham wɔ ntsi wobuu no dɛ ɔyɛ ɔtseneneenyi.” 10 Ebɛn aber na wobuu no dɛ ɔyɛ ɔtseneneenyi? Ɔyɛ aber a nna woetwa no bɔtɔ no anaa aber a nna wonntwaa no bɔtɔ no? Ɔnnyɛ aber a nna woetwa no bɔtɔ no, mbom ɔyɛ aber a nna wonnyae nntwaa no bɔtɔ no a. 11 Na wɔmaa otwaa no bɔtɔ dze yɛɛ asɛnkyerɛdze* a ɔbɛma oehu dɛ ampa woebu no dɛ ɔtseneneenyi osian gyedzi a nna ɔwɔ aber a nna wonntwaa no bɔtɔ no ntsi, mbrɛ ɔbɛyɛ a ɔbɛyɛ hɔn a wonntwaa hɔn bɔtɔ a wɔwɔ gyedzi no nyina hɔn egya, ama woeetum ebu hɔn dɛ atseneneefo; 12 na afei so ɔaabɛyɛ hɔn a woetwa hɔn bɔtɔ no hɔn egya. Naaso nnyɛ hɔn a wotwa hɔn bɔtɔ nko, mbom hɔn so a wɔnantsew pɛpɛɛpɛ wɔ hɛn egya Abraham ne gyedzi mu* aber a nna wonntwaa no bɔtɔ no.

13 Osiandɛ ɔnnyɛ mbra bi na wɔnam do hyɛɛ Abraham anaa n’asefo bɔ dɛ obenya wiadze bi dɛ n’egyapadze, mbom wɔnam gyedzi a onyae ma wobuu no dɛ ɔyɛ ɔtseneneenyi no do. 14 Na sɛ hɔn a wodzi mbra no do na wobedzi adze dze a, nna ɔno gyedzi abɛyɛ biribi a mfaso biara nnyi do na bɔhyɛ no so abɛyɛ adze gyangyan. 15 Mbrɛ ɔtse ankasa nye dɛ Mbra no dze ebufuw ba, na beebi a mbra nnyi no, mbrato so nnyi hɔ.

16 Ntsi na ɔnam gyedzi do no, mbrɛ ɔbɛyɛ a ɔbɛyɛ biribi a ogyina adom do, ama bɔhyɛ no aaba mu ama n’asefo nyina, na nnyɛ hɔn a wɔbata mbra no ho nkotsee, na mbom hɔn so a wɔbata Abraham ne gyedzi ho no, osiandɛ Abraham yɛ hɛn nyina hɛn egya. 17 (Iyi nye dza wɔakyerɛw no hyia pɛpɛɛpɛ dɛ: “Meyi wo dɛ amanaman pii hɔn egya.”) Iyi sii wɔ Nyankopɔn a onyaa no mu gyedzi no n’enyim, ɔno na otum ma ewufo ba nkwa mu na ɔka ndzɛmba a onnyi hɔ no ho asɛm tse dɛ mbrɛ ɔwɔ hɔ.* 18 Ɔwɔ mu dɛ nna enyidado biara nnyi hɔ dze, naaso ɔgyee dzii na onyaa enyidado dɛ ɔbɛba abɛyɛ amanaman pii hɔn egya, dɛ mbrɛ nna wɔaka dɛ: “Dɛm na w’asefo bɛyɛ” no. 19 Na ɔwɔ mu dɛ ne gyedzi annyɛ mberɛw dze, naaso nna ɔrodwen ne nyimpadua a nna oewu no ho (osiandɛ nna oedzi bɛyɛ mfe 100), nye Sarah n’awodze a nna oewu* no ho. 20 Naaso osian bɔ a nna Nyankopɔn ahyɛ ntsi, ɔanngye kyim, na ɔamma ne gyedzi so ennhihim; mbom ne gyedzi maa ɔyɛɛ dzen na ɔhyɛɛ Nyankopɔn enyimnyam. 21 Na nna ɔgye dzi paa dɛ dza Nyankopɔn ahyɛ ho bɔ no, obotum ayɛ. 22 Iyi ntsi, “wobuu no dɛ ɔtseneneenyi.”

23 Naaso asɛm “wobuu no dɛ” no, ɔnnyɛ nankotsee na wɔkyerɛwee maa no o, 24 mbom wɔkyerɛwee maa hɛnara so. Hɛn so wobobu hɛn dɛ atseneneefo osiandɛ yɛgye Obi a onyaan hɛn Ewuradze Jesus fii ewufo mu no dzi. 25 Hɛn mbrato ntsi na woyii no mae no, na mbrɛ ɔbɛyɛ a wobobu hɛn atseneneefo so ntsi na wonyaan no no.