Ɔdze Kɛmaa Romefo No

15 Ɔsɛ dɛ hɛn a yɛyɛ dzen no, yɛsoa hɔn a wɔnnyɛ dzen no hɔn mberɛwyɛ, na ɔnnsɛ dɛ yɛyɛ dza hɛnankasa yɛpɛ. 2 Hom mma hɛn mu biara nyɛ dza ne nyɛnko pɛ, ama oeetum ahyɛ ne nyɛnko dzen. 3 Na Christ mpo annyɛ dza nankasa pɛ, mbom dɛ mbrɛ wɔakyerɛw no: “Hɔn a wɔhyehyɛ wo ahorba no, hɔn ahorbahyehyɛ no aba mo do.” 4 Na biribiara a wɔkyerɛwee too hɔ no, wɔkyerɛwee ama wɔaakyerɛkyerɛ hɛn, na yɛnam hɛn enyimia na Kyerɛwnsɛm no mu awerɛkyekyer do eenya enyidado. 5 Nyame a ɔboa hɛn ma yetum mia hɛn enyi gyina ɔhaw ano na ɔkyekye hɛn werɛ no, ɔmma hom nyina so nnya adwen a nna Christ Jesus wɔ no ara bi, 6 ama hom aayɛ kor na hom dze ndze* kor aahyɛ hɛn Ewuradze Jesus Christ ne Nyankopɔn na n’Egya enyimnyam.

7 Ntsi obiara ngye ne nyɛnko nto mu dɛ mbrɛ Christ so gyee hom too mu no, na iyi hyɛ Nyankopɔn enyimnyam. 8 Na mereka akyerɛ hom dɛ, Christ bɛyɛɛ ɔsomfo maa hɔn a osian Nyankopɔn no nokwardzi ntsi woetwa hɔn bɔtɔ no, mbrɛ ɔbɛyɛ a ɔbɛma wɔada edzi dɛ bɔ ahorow a Nyankopɔn hyɛɛ hɔn egyanom no bɛba mu, 9 na ama amanaman no aahyɛ Nyankopɔn enyimnyam osian no mbɔbɔrhu ntsi. Dɛ mbrɛ wɔakyerɛw dɛ: “Ɔno ntsi na mebɛpaa mu abɔ wo dzin wɔ amanaman no mu na matow ayɛyindwom ama wo dzin no.” 10 Na ɔsanee kaa dɛ: “Amanaman, hom nye ne man enyi ngye.” 11 Ɔkaa bio dɛ: “Amanaman nyina, hom nyi Jehovah* ayɛw na hom mma aman nyina ntonton no.” 12 Na bio so Isaiah kaa dɛ: “Jesse no ndwow bɛba, ɔno nye obi a ɔbɔsoɛr ebedzi amanaman no do no; ɔno na amanaman no dze hɔn enyi bɔto no do.” 13 Na Nyame a ɔma enyidado no mfa enyigye na asomdwee kɛse nhyɛ hom ma osian homho a hom dze ato no do no ntsi, mbrɛ ɔbɛyɛ a sunsum krɔnkrɔn no tum bɛma hom enyidado mbordo.

14 Mo nuanom, emi mara megye dzi paa dɛ homara so papayɛ ahyɛ hom ma na nyimdzee nyina ahyɛ hom ma, na obiara so tum tu ne nyɛnko fo.* 15 Naaso makyerɛw hom na maka nsɛm ahorow bi penpen mbrɛ ɔbɛyɛ a medze bɛkaakaa hom bio osian adom a Nyankopɔn dze ama me no ntsi. 16 Wɔdze dɛm adom yi ama me mbrɛ ɔbɛyɛ a mebɛyɛ Christ Jesus no somfo wɔ bagua mu ama amanaman no. Mereyɛ Nyankopɔn n’asɛmpa ho edwuma krɔnkrɔn no, ama dɛm amanaman yi aabɛyɛ afɔrbɔdze a wɔgye to mu na wɔdze sunsum krɔnkrɔn atsew ho.

17 Ntsi sɛ ɔba no ndzɛmba a ɔfa Nyankopɔn ho a, mowɔ dza mibegyina do edzi ehurusi wɔ Christ Jesus mu. 18 Na merennka adze biara a mankasa mayɛ ho asɛm, mbom dza Christ afa mo do ayɛ mbrɛ ɔbɛyɛ a amanaman no bɛyɛ setsie no, ɔno nkotsee na mebɛka ho asɛm. Ɔnam me nsɛm na mo ndwuma, 19 nye tum a ɔdze nsɛnkyerɛdze na anwanwadze* ba nye Nyankopɔn no sunsum no tum no do na ɔyɛɛ iyi. Ɔno na wɔama metum aka Christ no ho asɛmpa yie ofitsi Jerusalem araa dze ekodu Illyricum nyina no. 20 Nokwasɛm nye dɛ, wɔ dɛm kwan yi do no medze sii m’enyi do dɛ merennka asɛmpa no wɔ beebi a wonyim Christ ne dzin wɔ hɔ dada mbrɛ ɔbɛyɛ a moronntow obi fofor ne fapem do; 21 na mbom dɛ mbrɛ wɔakyerɛw no: “Hɔn a wɔnnkaa no ho asɛm biara nnkyerɛɛ hɔn no bohu, na hɔn a wɔnntsee no bɛtse ase.”

22 Iyi so ntsi na wosiiw me kwan mpɛn pii ma menntum ammba hom nkyɛn no. 23 Naaso seseiara, beebiara nnyi hɔ a mennkaa asɛm no wɔ ɔmantɔw yi mu, na mfe pii nye yi* na mahwɛ kwan dzendzenndzen dɛ mebɛba hom nkyɛn. 24 Ntsi morohwɛ kwan dɛ sɛ morokɔ Spain a mubohu hom, na medzi kan nye hom abɔ kakra, na ɔno ekyir no, hom ekegya me kwan kakra ma makɔ hɔ. 25 Naaso seseiara dze, morobɔkɔ Jerusalem akɔsom akrɔnkrɔmfo no. 26 Na hɔn a wɔwɔ Macedonia na Achaia no fi enyigye mu dze hɔn ndzɛmba ama dɛ ntoboa dɛ wɔmfa nkɛma akrɔnkrɔmfo a wɔwɔ Jerusalem a wɔyɛ ehiafo no. 27 Ampa, ɔwɔ mu dɛ wɔdze enyigye na wɔdze yɛɛ dɛm dze, naaso nokwasɛm nye dɛ nna wɔdze akrɔnkrɔmfo a wɔwɔ Jerusalem no kaw; osiandɛ ndzɛmba a akrɔnkrɔmfo a wɔwɔ Jerusalem no nyae fii Nyankopɔn hɔ no,* wɔnye amanaman mufo no kyɛe, ntsi ɔsɛ dɛ hɔn so wɔdze ndzɛmba a wɔwɔ no som hɔn bi. 28 Ntsi sɛ medze ntoboa* yi kɛma hɔn wie a, mibesi hom hɔ na maatoa do akɔ Spain. 29 Bio so minyim dɛ sɛ meba hom nkyɛn a, medze nhyira esusudze ma a ofi Christ hɔ bɛba.

30 Afei enuanom, menam hɛn Ewuradze Jesus Christ nye ɔdɔ a sunsum no ma yenya* no do serɛ hom dɛ hom nka mo ho na hom nyer homho mbɔ Nyankopɔn mpaa dzendzenndzen mma me, 31 mbrɛ ɔbɛyɛ a wɔbɛgye me efi hɔn a wɔnnyɛ agyedzifo a wɔwɔ Judea no nsamu, na akrɔnkrɔmfo a wɔwɔ Jerusalem no so enyi asɔ ɔsom edwuma a merekɛyɛ wɔ hɔ no, 32 ama sɛ ɔyɛ Nyankopɔn ne pɛ a, medze enyigye aaba hom nkyɛn na hɛn nyina hɛn ahom aaka hɛnho. 33 Na Nyame a ɔma asomdwee no nye hom nyina ntsena. Amen.