Luke Asɛmpa

18 Afei ɔmaa hɔn mfatoho bi dze kyerɛɛ hɔn dɛ ohia dɛ wɔkɔ do bɔ mpaa aber nyina, na onnyi dɛ wɔpa abaw. 2 Ɔkaa dɛ: “Nna ɔtsɛmbuafo bi wɔ kurow bi mu. Nna onnsuro Nyankopɔn na ommbu nyimpa so. 3 Nna okunafo bi so wɔ dɛm kurow no mu, na nna ɔtaa kɔ ɔtsɛmbuafo no hɔ kɛka kyerɛ no dɛ, ‘Menye obi enya asɛm, ntsi meserɛ wo hwɛ na bu atsɛntsenenee ma me.’ 4 Iyi kɔr do kyɛɛr kakra, naaso nna ɔtsɛmbuafo no mmpɛ dɛ ɔyɛ. Naaso ekyir yi ɔkaa kyerɛɛ noho dɛ, ‘Ɔwɔ mu dɛ munnsuro Nyankopɔn na mummbu nyimpa biara so dze, 5 naaso osiandɛ okunafo yi gu do ara rehaw m’adwen ntsi, mobɔhwɛ edzi n’asɛm no ama no, amma ɔaannkɔ do ammba ha ammfa n’ebisadze yi ammbɛtseetsee me.’” 6 Afei Ewuradze kaa dɛ: “Ɔtsɛmbuafo a ɔnntsen yi mpo, hom nhwɛ dza ɔkae. 7 Na Nyankopɔn so ɛ, ɔwɔ mu dɛ ɔdze abotar na ɔdze yɛ n’adze dze, naaso hom hwɛ a, orummbu atsɛntsenenee mma hɔn a oeyi hɔn a wosu frɛ no adzekyee na adzesaa no anaa? 8 Mereka akyerɛ hom dɛ, obobu atsɛntsenenee ama hɔn ntsɛmara. Naaso sɛ nyimpa Ba no ba a, obohu gyedzi a ɔtse dɛm* wɔ asaase yi do ampaara?”

9 Afei nyimpa binom a nna wobu hɔnho dɛ wɔyɛ atseneneefo, na wommbu nyimpa a wɔaka no hwee no, ɔyɛɛ dɛm mfatoho yi kyerɛɛ hɔn. Ɔkaa dɛ: 10 “Mbarimba beenu bi kɔr* asɔrfie no mu dɛ wɔrokɔbɔ mpaa. Nna kor yɛ Phariseenyi, na kor no so gyegye tow. 11 Phariseenyi no soɛree na ɔhyɛɛ ase bɔɔ dɛm mpaa yi wɔ ne tsirmu dɛ, ‘O Nyankopɔn, meda wo ase dɛ menntse dɛ nyimpa a wɔaka no; epoobɔfo, hɔn a wɔnntsen, awarsɛɛfo, anaa mpo dɛ towgyenyi yi. 12 Dapɛn biara meyɛ akɔnkyen* mpɛn ebien; na dza minya biara so miyi ho ebupɛn du.’ 13 Naaso nyia ɔgyegye tow no dze, nna ogyina ekyirekyir, na nna ɔmmpɛ dɛ ɔma n’enyi mpo do hwɛ sor, mbom nna bɔ ara na ɔdze ne nsa robobɔ n’akoko, na ɔkaa dɛ, ‘Ao Nyankopɔn, hu me mbɔbɔr,* na meyɛ ɔdzebɔnyɛnyi.’ 14 Mereka akyerɛ hom dɛ, aber a ɔbarimba yi kɔr ne fie no, Nyankopɔn buu no dɛ ɔyɛ ɔtseneneenyi kyɛn Phariseenyi no koraa. Osiandɛ obiara a ɔmema noho do no wɔbɛbrɛ no adze, na obiara a ɔbrɛ noho adze no wɔbɛma no do.”

15 Na nkorɔfo dze hɔn mba nkakraba brɛɛ no dɛ ɔmfa ne nsa nka hɔn, naaso aber a n’esuafo no hunii no wɔhyɛɛ ase twuuw hɔn enyim. 16 Naaso Jesus frɛɛ mbofra nkakraba no baa ne nkyɛn. Ɔkaa dɛ: “Hom mma mbofra nkakraba no kwan ma wɔmbra me nkyɛn, na mma hom nnsiw hɔn kwan, na hɔn a wɔtse dɛm na Nyankopɔn n’Ahendzi* no yɛ hɔndze. 17 Nokwar mese hom dɛ, obiara a ɔanngye Nyankopɔn n’Ahendzi no tse dɛ abofra kakraba no ronnkɔ mu dabiarada.”

18 Na etumfo no mu kor bisaa no dɛ: “Kyerɛkyerɛfo pa, ebɛnadze na menyɛ ama meenya onnyiewiei nkwa?” 19 Jesus kaa kyerɛɛ no dɛ: “Ebɛnadze ntsi na efrɛ me papa? Obiara nnyɛ papa gyedɛ ɔbaako, ɔno nye Nyankopɔn. 20 Inyim mbransɛm no. Ɔka dɛ: ‘Mma nnsɛɛ awar, mma nndzi ewu, mma nnwia adze, mma nndzi dase a ɔnnyɛ nokwar,* dzi wo maame na wo papa nyi.’ 21 Nna ɔbarimba no kaa kyerɛɛ no dɛ: “Iyinom nyina medzi do fitsi mo mbofrase.” 22 Aber a Jesus tsee dza ɔkae no, ɔkaa kyerɛɛ no dɛ, “Wɔaka wo adze kor bi a ɔsɛ dɛ eyɛ: Kɔtɔn dza ewɔ nyina, na dza ibenya no kyɛ ma ehiafo, na ibenya egyapadze wɔ sor; na bra bedzi m’ekyir.” 23 Aber a ɔtsee dɛm asɛm yi no, no werɛ hoow papaapa, osiandɛ nna ɔwɔ sika paa.

24 Ntsi Jesus hwɛɛ ɔbarimba no na ɔkaa dɛ: “Ɔbɛyɛ dzen ama esikafo dɛ wɔbɔkɔ Nyankopɔn n’Ahendzi no mu. 25 Nokwasɛm nye dɛ, ɔyɛ mberɛw dɛ efupɔnkɔ bɛfa pandze a wɔdze pam adze n’enyiwa mu, kyɛn dɛ osikanyi bɔkɔ Nyankopɔn n’Ahendzi no mu.” 26 Hɔn a wɔtsee dɛm asɛm yi no kaa dɛ: “Ɔnodze, woana paa na wobotum agye no nkwa?” 27 Nna ɔkaa dɛ: “Dza nyimpa runntum nnyɛ no, Nyankopɔn dze obotum ayɛ.” 28 Naaso Peter kaa dɛ: “Hwɛ, yɛadan hɛn ndzɛmba egya ebedzi w’ekyir.” 29 Nna ɔkaa kyerɛɛ hɔn dɛ: “Nokwar mese hom dɛ, obiara a osian Nyankopɔn n’Ahendzi no ntsi oegya fie anaa ɔyer anaa enuanom anaa awofo anaa mba no, 30 obenya no mbɔho pii sesei, na obenya onnyiewiei nkwa wɔ wiadze a ɔreba* no so mu.”

31 Afei ɔfrɛɛ Duebien no kɔr nkyɛn na ɔkaa kyerɛɛ hɔn dɛ: “Hwɛ, yɛrofow akɔ Jerusalem, na ndzɛmba a wɔnam nkɔnhyɛfo no do kyerɛwee faa nyimpa Ba no ho nyina bɛba mu. 32 Bi nye dɛ, wobeyi no ahyɛ amanaman mufo nsa na wobedzi no ho fɛw. Wɔbɛhyehyɛ no ahorba na wɔaatoto ntafi egu no do. 33 Na wɔbɔbɔ no mbaa, na sɛ wowie a woboku no, na da a otsia ebiasa no ɔbɔsoɛr.” 34 Naaso wɔanntse iyinom mu biara ase, osiandɛ nna wɔdze dɛm nsɛm yi esie hɔn, ntsi nna wonnhu dza ɔrepɛ akyerɛ.

35 Afei aber a wɔaka kakra ma Jesus edu Jericho no, nna onyifuranyi bi tsena kwan ho reserɛserɛ adze. 36 Ɔtsee dɛ nyimpadɔm bi rutwa mu, ntsi ɔhyɛɛ ase dɛ oribisabisa dza ɔrokɔ do. 37 Nna wɔkaa kyerɛɛ no dɛ: “Nazarethnyi Jesus na orutwa mu.” 38 Ɔtsee ara pɛ na ɔhyɛɛ ase dɛ ɔretseatsea mu dɛ: “Jesus, David ne Ba, hu me mbɔbɔr!” 39 Na hɔn a wodzi enyim no tseatseaa no dɛ ɔnka n’ano nto mu, naaso afei koraa na nna ɔrekeka mu kɛse dɛ: “David ne Ba, hu me mbɔbɔr!” 40 Ntsi Jesus gyinae, na ɔkaa dɛ wɔmfa ɔbarimba no mbrɛ no. Na ɔbae no, Jesus bisaa no dɛ: 41 “Ebɛnadze na epɛ dɛ meyɛ ma wo?” Oyii no ano dɛ: “Ewuradze, ma munhu adze bio.” 42 Ntsi Jesus kaa kyerɛɛ no dɛ: “Hu adze; wo gyedzi ama woho atɔ wo.” 43 Na amonmu hɔ ara na ɔsanee hun adze bio, na ɔhyɛɛ ase dzii Jesus n’ekyir, na ɔhyɛɛ Nyankopɔn enyimnyam. Na aber a nkorɔfo no nyina so hunii no, woyii Nyankopɔn ayɛw.