Ɔdze Kɛmaa Romefo No
12 Dɛm ntsi enuanom, osiandɛ Nyankopɔn ada ehumbɔbɔr edzi akyerɛ hom ntsi, meserɛ hom ara dɛ, hom mfa hom nyimpadua mbɔ afɔr a ɔtse ase na ɔyɛ krɔnkrɔn na Nyankopɔn gye to mu. Na aber a hom dze ɔsom a ɔyɛ krɔnkrɔn rema no, hom mfa hom adwen nyɛ edwuma ndwen ndzɛmba ho yie. 2 Na hom ngyaa dɛ hom ma wiadze no* kyerɛ hom dza ɔsɛ dɛ hom yɛ, na mbom hom nsesa hom adwen mfa nyɛ homho fofor, ama hom eehu dza Nyankopɔn pɛ na oye na ɔsɔ n’enyi na odzi mu.
3 Na menam adom a wɔdze adom me no do meka kyerɛ hom mu biara dɛ, mma ommbu noho dodoodow ma ɔnntra mbrɛ ɔsɛ dɛ obu noho no do, mbom ɔndwen ndzɛmba ho wɔ kwan bi do a ɔkyerɛ dɛ n’adwen mu da hɔ dɛ mbrɛ gyedzi a Nyankopɔn esusu* ama hom mu biara no tse. 4 Na dɛ mbrɛ nyimpadua kor wɔ akwaa pii, naaso akwaa no nyina nndzi dwuma kor no, 5 dɛmara na hɛn so ɔwɔ mu dɛ yɛdɔɔ so dze, naaso yɛyɛ nyimpadua kor wɔ Christ mu, mbom dɛ ankorankor no, hɛn mu biara yɛ akwaa na yɛka bɔ mu yɛ edwuma. 6 Osian adom a wɔdze adom hɛn no ntsi, ɔsor akyɛdze a hɛn mu biara wɔ, dɛm ntsi sɛ ɔyɛ nkɔnhyɛ a, hom mma yɛnhyɛ nkɔm dɛ mbrɛ hɛn gyedzi tse. 7 Sɛ ɔyɛ ɔsom so a, hom mma yɛnkɔ do nsom; na obi a ɔkyerɛkyerɛ no so, ɔnkɔ do ara nkyerɛkyerɛ. 8 Obi a ɔhyɛ nkorɔfo nkuran* no so, ɔnkɔ do ara nhyɛ nkuran;* na obi a ɔkyɛ adze* no so, omfi n’akoma mu nyɛ dɛm; na obi a odzi enyim no so, ɔnyer noho* nyɛ; na obi a ohu nkorɔfo mbɔbɔr no so, ɔmfa enyigye nyɛ.
9 Mma hom mma nyaatwem mmba hom dɔ mu. Hom nkyir bɔn; na hom ntakyer papa ho. 10 Hom nnya enuadɔ mma homho, na obiara mpɛ ne nyɛnko n’asɛm yie paa. Obiara ndzi kan ndzi ne nyɛnko nyi. 11 Hom nyer homho* nyɛ edwumadzen, mma hom nnyɛ akwadwer.* Hom nyɛ hyew wɔ sunsum mu. Hom nyɛ edwuma mma Jehovah* dɛ nkowaa. 12 Hom ndzi dɛw wɔ enyidado no mu. Hom mmia hom enyi ngyina amandzehu ano. Mma hom nngyaa mpaa bɔ da. 13 Akrɔnkrɔmfo a woehia hɔn no, hom nyɛ hɔn mboa. Hom nhwehwɛ hokwan ahorow a hom dze bɛda ahɔhoyɛ edzi. 14 Hom nkɔ do nhyira hɔn a wɔtan hom enyi no; hom nhyira na mma hom nndom. 15 Hom nye hɔn a woridzi dɛw no ndzi dɛw; na hom nye hɔn a worusu no nsu. 16 Adwen a hom wɔ wɔ homho no, hom nnya dɛm adwen no ara bi wɔ afofor so ho; na mma hom mmfa hom adwen nnsi ndzɛmba akɛse do, mbom hom ndzi ndzɛmba a ɔba famu ekyir. Na mma hom nnyɛ homho enyansafo wɔ homara hom enyi do.
17 Mma hom mmfa bɔn nntua obiara no bɔn do kaw. Dza nyimpa nyina hu dɛ oye no,* ɔno na hom ndwen ho na hom nyɛ. 18 Sɛ ɔbɛyɛ yie a, hom afamu dze, hom nyɛ dza hom botum biara nye nyimpa nyina ntsena asomdwee mu. 19 Adɔfo, mma hom nntua bɔn do kaw, mbom hom ngyaa mu mma Nyankopɔn n’ebufuw no; osiandɛ wɔakyerɛw dɛ: “‘Emi na mutua bɔn do kaw; mara mubotua kaw,’ Jehovah* na ɔse.” 20 Na “sɛ ɔkɔm dze wo tamfo a, ma no biribi ma ondzi; sɛ nsukɔm so dze no a, ma no biribi ma ɔnnom; na sɛ eyɛ dɛm a, nna edze roboaboa gyansenama ano egu n’etsifi.”* 21 Mma hom mma bɔn nndzi hom do konyim, mbom hom nkɔ do ara mfa papa ndzi bɔn do konyim.