John Asɛmpa

17 Aber a Jesus kaa dɛm nsɛm yi wiei no, ɔmaa n’enyi do hwɛɛ sor na ɔkaa dɛ: “Egya, ber no aso. Hyɛ wo ba no enyimnyam na ama wo ba no so aahyɛ wo enyimnyam. 2 Osiandɛ ama no ɔhonam* nyina do tum, mbrɛ ɔbɛyɛ a ɔbɛma hɔn a edze hɔn ama no no nyina onnyiewiei nkwa. 3 Sɛ obi benya onnyiewiei nkwa a, ɔsɛ dɛ ohu ɔwo a eyɛ nokwar Nyame kor pɛ no,* na ɔsan so hu Jesus Christ a esomaa no no.* 4 Edwuma a edze ama me dɛ menyɛ no, mayɛ ewie dze ahyɛ wo enyimnyam wɔ asaase do. 5 Ntsi afei Egya, enyimnyam a nna mowɔ wɔ wo nkyɛn ansaana wiadze reba no, san fa ma me bio wɔ wo nkyɛn.

6 “Nyimpa a iyii hɔn fii wiadze maa me no, mama woehu wo dzin.* Nna wɔyɛ wodze, nna edze hɔn maa me, na woetsie w’asɛm.* 7 Afei woebohu dɛ ndzɛmba a edze maa me no nyina fi wo hɔ, 8 osiandɛ nsɛm a edze maa me no medze ama hɔn. Na wɔagye ato mu na woebohu ampa dɛ mebaa dɛ w’ananmusinyi, na wɔagye edzi dɛ ɔwo na esomaa me. 9 Meserɛ ma hɔn, mennserɛ mma wiadze no, mbom meserɛ ma hɔn a edze hɔn ama me no, osiandɛ wɔyɛ wodze a. 10 Dza mowɔ nyina yɛ wodze, na wodze so yɛ medze, na wɔahyɛ me enyimnyam wɔ hɔn mu.

11 “Minnyi wiadze no mu bio, naaso hɔn dze wɔwɔ wiadze, na mereba wo nkyɛn. Egya Krɔnkrɔn, hwɛ hɔn do osian woara wo dzin a edze ama me no ntsi, mbrɛ ɔbɛyɛ a wɔbɛyɛ kor* dɛ mbrɛ emi na ɔwo so yɛyɛ kor no.* 12 Aber a mowɔ hɔn nkyɛn no, nna mohwɛ hɔn do osian woara wo dzin a edze ama me no ntsi; na mabɔ hɔn ho ban, na hɔn mu kor mpo annsɛɛ gyedɛ ɔsɛɛ ba no, mbrɛ ɔbɛyɛ a kyerɛwsɛm no bɛba mu. 13 Naaso seseiara dze mereba wo nkyɛn, na mereka iyinom aber a mowɔ wiadze yi, mbrɛ ɔbɛyɛ a hɔn so wobenya enyigye a mowɔ no bi pɛpɛɛpɛ. 14 Medze w’asɛm ama hɔn, na wiadze tan hɔn, osiandɛ wɔnnka wiadze no ho* dɛ mbrɛ mo so mennka wiadze no ho* no.

15 “Mennserɛ dɛ yi hɔn fi wiadze no mu, mbom m’adzeserɛ nye dɛ hwɛ hɔn do osian ɔbɔnfo no ntsi. 16 Wɔnnka wiadze no ho, dɛ mbrɛ mo so mennka wiadze no ho no. 17 Fa nokwar no tsew hɔn ho;* w’asɛm yɛ nokwar. 18 Dɛ mbrɛ esomaa me baa wiadze no, dɛmara na mo so mosomaa hɔn kɔr wiadze. 19 Na hɔn ntsi merema moho atsew, mbrɛ ɔbɛyɛ a nokwar no bɛma hɔn so hɔnho atsew.

20 “Ɔnnyɛ woyinom nkotsee na meserɛ ma hɔn, na mbom meserɛ ma hɔn a wɔnam hɔn asɛm do kyerɛ dɛ wɔgye me dzi no so. 21 Ama hɔn nyina aayɛ kor dɛ mbrɛ ɔwo Egya enye me yɛ kor na mo so menye wo yɛ kor no, ama hɔn so nye hɛn aayɛ kor, mbrɛ ɔbɛyɛ a wiadze no bɛgye edzi dɛ ɔwo na esomaa me. 22 Enyimnyam a edze ama me no medze ama hɔn, mbrɛ ɔbɛyɛ a wɔbɛyɛ kor dɛ mbrɛ emi na ɔwo so yɛyɛ kor no. 23 Menye hɔn yɛ kor na ɔwo so nye me yɛ kor, mbrɛ ɔbɛyɛ a wɔbɛyɛ kor ankasa,* ama wiadze no eehu dɛ ɔwo na esomaa me na edɔ hɔn dɛ mbrɛ edɔ me no. 24 Egya, hɔn a edze hɔn ama me no, mepɛ dɛ nkyɛ wɔbɛka mo ho wɔ beebi a mowɔ no, mbrɛ ɔbɛyɛ a wobohu enyimnyam a edze ama me no, osiandɛ nna edɔ me ansaana wɔrehyɛ wiadze ase. 25 Tsenenee Egya, ɔyɛ ampa dɛ wiadze no nnyim wo, naaso emi dze minyim wo, na woyinom ebohu dɛ ɔwo na esomaa me. 26 Mama woehu wo dzin na mebɛma woehu, ama ɔdɔ a edze dɔɔ me no aatsena hɔn mu na menye hɔn aayɛ kor.”