Luke Asɛmpa
15 Afei nna ba ara na hɔn a wɔgyegye tow nye ndzebɔnyɛfo nyina reba ne nkyɛn. Wɔbaa dɛ woribetsie no. 2 Na Phariseefo no nye akyerɛwfo no nyina hyɛɛ ase dɛ wɔrekasakasa. Wɔkaa dɛ: “Ɔbarimba yi gye ndzebɔnyɛfo ba ne nkyɛn na ɔnye hɔn dzidzi.” 3 Ntsi ɔyɛɛ hɔn dɛm mfatoho yi: 4 “Hom mu woana na sɛ ɔwɔ nguan 100 na hɔn mu kor yew a, orinngya 99 no hɔ wɔ sar do na ɔronnkɔhwehwɛ dza ɔayew no kesi dɛ obohu no? 5 Na sɛ ohu no a, ɔdze no bɔ no kɔn ho na n’enyiwa gye. 6 Na sɛ ɔba fie a, ɔfrɛfrɛ n’anyɛnkofo nye hɔn a wɔtse n’apaamu hɔ no nyina hyia na ɔka kyerɛ hɔn dɛ, ‘Hom nye me ndzi ehurusi, osiandɛ mehu mo guan a ɔyewee no.’ 7 Mereka akyerɛ hom dɛ, dɛmara so na hɔn a wɔwɔ sor no enyi gye paa aber a ɔdzebɔnyɛnyi kor enu noho no. Hɔn enyi gye wɔ iyi ho kyɛn atseneneefo 99 a onnhia dɛ wonu hɔnho.
8 “Anaa ebɛn ɔbaa na ɔwɔ drakma* du na sɛ drakma* no mu kor yew a ɔronnsɔ kandzea na ɔremmprapra ne fie hɔ na ɔronnhwehwɛ nnkesi dɛ obohu? 9 Na sɛ ohu a, ɔfrɛfrɛ n’anyɛnkofo* nye hɔn a wɔtse n’apaamu hɔ no nyina hyia na ɔka kyerɛ hɔn dɛ, ‘Hom nye me ndzi ehurusi, osiandɛ mehu me drakma* a ɔyewee no.’ 10 Mereka akyerɛ hom dɛ, dɛmara so na Nyankopɔn n’abɔfoe no hɔn enyi gye aber a ɔdzebɔnyɛnyi kor enu noho no.”
11 Afei ɔkaa dɛ: “Nna ɔbarimba bi wɔ mbabanyin beenu. 12 Na kakraba a ɔwɔ mu no kaa kyerɛɛ ne papa dɛ, ‘Dada, kyɛ w’egyapadze no na fa medze ma me.’ Ntsi ɔkyɛɛ n’egyapadze no mu maa hɔn. 13 Na nda kakraabi ekyir no, ne ba kakraba no boaboaa ne ndzɛmba nyina ano. Na otuu kwan kɔr ɔman bi do wɔ ekyirekyir beebi kɔbɔɔ ɔbra gyangyan,* na ɔsɛɛ n’egyapadze no nyinara wɔ hɔ. 14 Aber a ɔsɛɛ dza ɔwɔ nyina wiei no, ɔkɔm kɛse bi sii dɛm ɔman no mu beebiara, na iyi maa noho kyeer no paa. 15 Ɔdze noho kɔbɔɔ ɔman no munyi bi mpo ho, na ɔmaa ɔkɔr ne haban mu kɔhwɛɛ ne mpreko. 16 Na no kɔn dɔɔ dɛ obedzi edziban a mpreko no ridzi no mpo bi, naaso obiara amma no hwee.
17 “Aber a n’enyi baa noho do no, ɔkaa dɛ, ‘Me papa n’apaafo mpo, edziban ebu hɔn do, nna meda ha ma ɔkɔm ruku me yi a! 18 Mobɔsoɛr akɔ me papa ne nkyɛn na maakɛka akyerɛ no dɛ: “Dada, mayɛ bɔn etsia Nyankopɔn* na ɔwo. 19 Memmfata dɛ wɔfrɛ me wo ba bio. Yɛ me w’apaafo no mu kor.”’ 20 Ntsi osii mu dɛ ɔrokɔ ne papa ne nkyɛn. Na aber a ɔnam ekyirekyir reba no, ne papa hun no, na no ho yɛɛ no mbɔbɔr, na ɔdze mbirika kɛyɛɛ no etuu* na ɔfeew n’ano. 21 Nna ne ba no kaa kyerɛɛ no dɛ, ‘Dada, mayɛ bɔn etsia Nyankopɔn na ɔwo. Memmfata dɛ wɔfrɛ me wo ba bio.’ 22 Naaso papa no kaa kyerɛɛ no nkowaa no dɛ, ‘Hom nyɛ no ntsɛm mfa atar tsentsen mbɛhyɛ no, hom nyi dza ɔyɛ papa paa no, na hom mfa nkaba* nhyɛ ne nsa na hom mfa mpaboa nhyɛ n’anan. 23 Hom mfa nantwi ne ba a ɔadɔ seradze no so mbra ma yenku no, na yendzidzi na yɛngye hɛn enyi. 24 Osiandɛ me ba yi wui naaso ɔasan aba nkwa mu bio; ɔyewee, na woehu no.’ Na wɔhyɛɛ ase gyee hɔn enyi.
25 “Dɛm aber yi nyina nna ne ba panyin no wɔ haban mu, na aber a ɔreba fie na wɔaka kakra ma oeedu hɔ no, ɔtsee dɛ ndwom na asaw rokɔ do. 26 Ntsi ɔfrɛɛ nkowaa no mu kor, na obisaa no dza ɔrokɔ do. 27 Nna ɔkaa kyerɛɛ no dɛ, ‘Wo nua no aba, na wo papa eku nantwiba a ɔadɔ seradze osiandɛ ɔasan aba ne nkyɛn na ɔtse apɔw.’* 28 Na no bo fuwii, na nna ɔmmpɛ dɛ ɔkɔ fie. Na ne papa bae bɛpaa no kyɛw. 29 Nna ɔkaa kyerɛɛ ne papa dɛ, ‘Hwɛ, masom wo mfe pii na mummbuu wo mbra kor mpo do da, naaso iyi nyina ekyir no emmaa me apɔnkyeba kor mpo dɛ menye m’anyɛnkofo mfa ngye hɛn enyi da. 30 Naaso wo ba yi a ɔnye tuutuufo kɛsɛɛ w’egyapadze no dze, ɔbae ara eku nantwiba a ɔadɔ seradze ama no.’ 31 Nna ɔkaa kyerɛɛ no dɛ, ‘Me ba, atsena me nkyɛn aber nyina, na dza mowɔ nyina so yɛ wodze. 32 Naaso nna ɔsɛ dɛ hɛn enyi gye na yedzi ehurusi, osiandɛ wo nua no wui, naaso ɔasan aba nkwa mu; ɔyewee, na woehu no.’”