Luke Asɛmpa

22 Afei nna Paanoo A Ɔnnkawee* Afahyɛ a wɔfrɛ no Apaho no rebɛn. 2 Na nna asɔfompanyimfo no nye akyerɛwfo no rohwehwɛ kwan pa a wɔbɛfa do eku no, osiandɛ nna wosuro nkorɔfo no. 3 Afei Satan kɛhyɛɛ Judas no mu, nyia wɔfrɛ no Iscariot a nna ɔka Duebien no ho no. 4 Na ɔkɔr asɔfompanyimfo nye aweɔmfo a wɔwɔ asɔrfie hɔ no hɔn mpanyimfo no nkyɛn, na ɔnye hɔn kɛkaa kwan a ɔbɛfa do eyi no ama hɔn no ho asɛm. 5 Iyi maa hɔn enyi gyee paa, na wɔgyee too mu dɛ wɔbɛma no dwetɛ sika. 6 Ntsi ɔpeen do, na ɔhyɛɛ ase dɛ ɔrohwehwɛ ber pa a obeyi no ama hɔn, aber a nyimpadɔm nnyi hɔ.

7 Na da a wodzi Paanoo A Ɔnnkawee Afahyɛ no durii. Nna dɛm da yi na ɔsɛ dɛ wɔdze Apaho abowa no bɔ afɔr; 8 ntsi Jesus somaa Peter na John, na ɔkaa kyerɛɛ hɔn dɛ: “Hom nkɔ nkesiesie Apaho no ma yembedzi.” 9 Nna wobisaa no dɛ: “Henfa na epɛ dɛ yɛkɔ kesiesie?” 10 Nna ɔkaa kyerɛɛ hɔn dɛ: “Hwɛ, hom nkɔ kurow no mu, na ɔbarimba bi a ɔso nsuhina behyia hom. Hom ndzi n’ekyir nkɔ fie a ɔbɔkɔ mu no mu. 11 Na hom nka nkyerɛ fiewura no dɛ, ‘Kyerɛkyerɛnyi no se: “Ahɔhodan a menye m’esuafo no bedzi Apaho no wɔ mu no wɔ hen?”’ 12 Dɛm ɔbarimba no bɛkyerɛ hom abansor dan kɛse bi a woesiesie mu kama. Hom nyɛ Apaho no ho ntotoe wɔ hɔ mma hɛn.” 13 Ntsi wɔkɔree na wokohun dza ɔkaa kyerɛɛ hɔn no pɛpɛɛpɛ, na wɔtotoo ndzɛmba yie maa Apaho no.

14 Ntsi ber soe no, ɔnye asomafo no bɛtsenaa pon ho. 15 Na ɔkaa kyerɛɛ hɔn dɛ: “Mepɛ paa dɛ menye hom dzi Apaho yi ansaana mehu amandze. 16 Na mereka akyerɛ hom dɛ, mirinndzi bio kesi dɛ ɔbɛba mu wɔ Nyankopɔn n’Ahendzi no mu.” 17 Nna ɔgyee kɔɔpow no, na ɔdaa ase na ɔkaa dɛ: “Hom ngye iyi na hom mfa mma hom mu biara nkorkor ma ɔnnom bi. 18 Na mereka akyerɛ hom dɛ, ofitsi ndɛ rokɔ, moronnom nsa yi bio kesi dɛ Nyankopɔn n’Ahendzi no bɛba.”

19 Afei so, ɔfaa paanoo na ɔdaa ase na obubuu mu dze maa hɔn, na ɔkaa dɛ: “Iyi gyina hɔ ma me nyimpadua a osian hom ntsi wɔdze bɛma no. Hom nkɔ do nyɛ iyi mfa nkaa me.” 20 Afei ɔyɛɛ kɔɔpow no so dɛmara aber a wodzii ewimbir edziban no wiei no, ɔkaa dɛ: “Kɔɔpow yi gyina hɔ ma apam fofor a wɔnam mo bɔgyaa do reyɛ no, ɔno na wobohue egu ama hom no.

21 “Naaso hwɛ, obi a obeyi me ama no nye me tsena pon ho. 22 Na nokwasɛm nye dɛ nyimpa Ba no rokɔ dɛ mbrɛ wɔahyɛ ato hɔ no, na mbom obi a wɔnam no do beyi no ama no dze, ondue!” 23 Ntsi wɔhyɛɛ ase bisabisaa hɔnho dɛ: “Hɛn mu woana paa na ɔrebɛyɛ dɛm adze yi?”

24 Naaso wɔhyɛɛ ase dɛ wɔregye kyim dzendzenndzen wɔ obi a ɔyɛ kɛse wɔ hɔn mu no ho. 25 Na ɔkaa kyerɛɛ hɔn dɛ: “Ahemfo a wɔwɔ amanaman no mu no, wodzi hɔn nkorɔfo do tum dɛ ewuranom, na wɔfrɛ hɔn a wodzi tum no Ayamuyiefo. 26 Naaso hom dze, ɔnnsɛ dɛ hom yɛ dɛm. Na mbom obi a ɔyɛ kɛse wɔ hom mu no, ɔsɛ dɛ ɔyɛ kakraba koraa, na obi a odzi hom enyim no so, ɔsɛ dɛ ɔno na ɔsom hom. 27 Woana na ɔyɛ kɛse, nyia oridzidzi* anaa nyia ɔrosom? Nnyɛ nyia oridzidzi* bi a? Naaso emi dze, mowɔ hom mu dɛ nyia ɔrosom.

28 “Naaso hom na hom da ho ara bata mo ho wɔ mo nsɔhwɛ mu. 29 Na menye hom reyɛ ahendzi ho apam, dɛ mbrɛ m’Egya nye me ayɛ apam no, 30 ama hom eedzidzi na hom aanom wɔ mo pon do wɔ m’Ahendzi mu, na hom aatsena nhengua do ebu Israel mbusuakuw 12 no atsɛn.

31 “Simon, Simon, hwɛ, Satan pɛ dɛ onya hom nyina na ohuw hom do dɛ hwiit. 32 Naaso matotɔ aserɛ ama wo na wo gyedzi aannsa; na ɔwo, inya ara ba a, hyɛ wo nuanom dzen.” 33 Nna ɔkaa kyerɛɛ no dɛ: “Ewuradze, mayɛ krado dɛ menye wo bɔkɔ efiadze na owu mu mpo.” 34 Naaso ɔkaa kyerɛɛ no dɛ: “Peter, mereka akyerɛ wo dɛ, ansaana akokɔ bɔbɔn ndɛ no, nna aka no mpɛn ebiasa dɛ innyim me.”

35 Afei so obisaa hɔn dɛ: “Aber a mosomaa hom na hom ammfa sika kotoku na edziban kotoku na mpaboa annkɔ no, biribi hiaa hom a?” Woyii no ano dɛ: “Oho!” 36 Nna ɔkaa kyerɛɛ hɔn dɛ: “Naaso seseiara dze, obi a ɔwɔ sika kotoku no, ɔmfa, na obi a ɔwɔ edziban kotoku no so nyɛ dɛmara. Na obi a onnyi sekan no, ɔntɔn n’atar ngugudo na ɔnkɔtɔ bi. 37 Osiandɛ mereka akyerɛ hom dɛ, ɔsɛ dɛ dza wɔakyerɛw no nya mbamu wɔ mo do. Wɔakyerɛw dɛ, ‘Wɔkaan no foraa mbratofo.’ Na dza wɔkyerɛwee faa mo ho no reba mu.” 38 Nna wɔkaa kyerɛɛ no dɛ: “Ewuradze, hwɛ! sekan ebien nye yi.” Na ɔkaa kyerɛɛ hɔn dɛ: “Ɔno ara ye.”

39 Na aber a ofii hɔ no, ɔkɔr Ngodua Bepɔw no do dɛ mbrɛ nna ɔtaa yɛ no, na esuafo no so dzii n’ekyir. 40 Na wodur hɔ no, ɔkaa kyerɛɛ hɔn dɛ: “Hom nkɔ do mbɔ mpaa amma hom aannkɔ nsɔhwɛ mu.” 41 Na ofii hɔn nkyɛn kɔr n’enyim kakra, afei obuu ntwɛr na ɔhyɛɛ ase bɔɔ mpaa. 42 Ɔkaa dɛ: “Egya, sɛ epɛ a, yi dɛm kɔɔpow yi fi mo do. Naaso nnyɛ dɛ mbrɛ mepɛ, mbom dza ɔwo pɛ na ɔnyɛ hɔ.” 43 Nna ɔbɔfo bi fi sor beyii noho edzi kyerɛɛ no na ɔhyɛɛ no dzen. 44 Naaso nna noho reyerɛw no paa, ntsi ɔkɔr do bɔɔ mpaa dzendzenndzen; na noho mfifir yɛɛ tse dɛ bɔgya a ɔrososɔ gu famu. 45 Aber a ɔbɔɔ mpaa wiei no, ɔkɔr esuafo no nkyɛn, na ɔkɔtoo hɔn dɛ wɔadeda, osiandɛ nna awerɛhow ahyɛ hɔn do ma wɔaberɛ. 46 Ntsi obisaa hɔn dɛ: “Ebɛnadze ntsi na hom adeda yi? Hom nsoɛr na hom nkɔ do mbɔ mpaa, amma hom aannkɔ nsɔhwɛ mu.”

47 Na aber a ogu do rekasa no, hwɛ, nyimpadɔm bi baa beebi a ɔwɔ no. Nna Duebien no mu kor a wɔfrɛ no Judas no na odzi hɔn enyim. Na ɔbaa Jesus ne nkyɛn befeew n’ano. 48 Naaso Jesus bisaa no dɛ: “Judas, ntsi edze mfewano ribeyi nyimpa Ba no ama?” 49 Aber a hɔn a wɔka no ho no hun dza oribesi no, wobisaa no dɛ: “Ewuradze, yɛntwe sekan nkɔ hɔn do a?” 50 Hɔn mu kor mpo twee ne sekan twaa ɔsɔfopanyin no n’akowaa n’asowa nyimfa fii hɔ. 51 Naaso Jesus kaa dɛ: “Oye, hom mma ɔmpa ha ara.” Afei ɔdze ne nsa kaa n’asowa no na ɔsaa no yarba. 52 Na Jesus kaa kyerɛɛ asɔfompanyimfo, nye aweɔmfo a wɔwɔ asɔrfie hɔ no hɔn mpanyimfo, nye ɔman no mu mpanyimfo a wɔrebɛkyer no no dɛ: “Meyɛ ewi* na hom dze sekan na mpɔtsibaa aba mo do rebɛkyer me yi a? 53 Menye hom wɔ asɔrfie hɔ da biara no, hom annkyer me. Naaso iyi nye hom ber nye ber a sum dzi tum.”

54 Afei wɔkyeer no nye no kɔree, na wɔdze no kɔr ɔsɔfopanyin no ne fie; naaso Peter dzii n’ekyir wɔ ekyirekyir. 55 Aber a wɔsɔɔ gya wɔ yaad no ne finimfin na wɔtsenatsenaa ho no, nna Peter so tsena hɔn mu bi. 56 Na abaawa bi hun no dɛ ɔtsena gya no ho, ɔhwɛɛ no dzinn na ɔkaa dɛ: “Nna ɔbarimba yi so ka no ho.” 57 Naaso ɔanngye annto mu. Ɔkaa dɛ: “Ɔbaa, minnyim no.” 58 Wɔannkyɛr koraa na obi fofor so hun no na ɔkaa dɛ: “Nkyɛ ɔwo so ka hɔn ho?” Naaso Peter kaa dɛ: “Me gyafo, mennka hɔn ho.” 59 Na bɛyɛ dɔnhwer kor ekyir no, ɔbarimba fofor bi so hun no na ɔkaa no dzendzenndzen dɛ: “Biribiara kyerɛ dɛ nna ɔbarimba yi ka no ho. Nokwasɛm nye dɛ ɔyɛ Galileenyi.” 60 Naaso Peter kaa kyerɛɛ no dɛ: “Me gyafo, asɛm a ereka yi minnyim ho hwee!” Na aber a ogu do rekasa no, amonmu hɔ ara na akokɔ bɔnee. 61 Na Ewuradze daan noho hwɛɛ Peter n’enyim, na Peter kaa asɛm a Ewuradze kaa kyerɛɛ no no dɛ: “Ansaana akokɔ bɔbɔn ndɛ no, nna aka no mpɛn ebiasa dɛ innyim me.” 62 Na opuee abowano kosuu yayaayaw.

63 Afei mbarimba a nna wɔroweɔn Jesus no hyɛɛ ase dzii no ho fɛw, na wɔbobɔɔ no. 64 Wɔdze adze kataa n’enyim na wɔkekaa kyerɛɛ no dɛ: “Sɛ eyɛ nkɔnhyɛnyi ampa a, kyerɛ hɛn obi a ɔbɔɔ wo no.” 65 Na wɔkekaa ebususɛm afofor pii so tsiaa no.

66 Na adze kyee no, ɔman no mu mpanyimfo no, kyerɛ dɛ asɔfompanyimfo no na akyerɛwfo no nyina behyiae, na wɔnye no baa Sanhedrin asa no do na wɔkaa kyerɛɛ no dɛ: 67 “Sɛ ɔwo nye Christ no a, ka kyerɛ hɛn.” Naaso ɔkaa kyerɛɛ hɔn dɛ: “Sɛ meka kyerɛ hom mpo a, hom renngye nndzi ara da. 68 Na sɛ mibisa hom asɛm so a, hom rinnyi me ano. 69 Naaso ofitsi ndɛ rokɔ no, nyimpa Ba no bɛtsena otumfo Nyankopɔn ne nsa nyimfa.” 70 Ɔkaa dɛm no, hɔn nyina bisaa no dɛ: “Ntsi kyerɛ dɛ eyɛ Nyankopɔn ne Ba bi a?” Nna ɔkaa kyerɛɛ hɔn dɛ: “Homara na hom reka dɛ meyɛ.” 71 Nna wɔkaa dɛ: “Ebɛn dase bio na yehia? Osiandɛ hɛnara yɛatse efi noara n’anomu.”