Ɔdze Kɛmaa Romefo No

11 Ntsi mimbisa dɛ, Nyankopɔn poow ne man anaa? Oho, ɔnntse dɛm koraa! Osiandɛ mara so meyɛ Israelnyi, Abraham n’asenyi* a mifi Benjamin ebusuakuw mu. 2 Nyankopɔn ammpow ne man a odzii kan yii hɔn no. Dza kyerɛwsɛm no ka aber a Elijah bɔɔ Israelfo no sombo wɔ Nyankopɔn n’enyim no, hom nnyim anaa? 3 Ɔkaa dɛ: “Jehovah,* woekuku wo nkɔnhyɛfo no na woedwuruw w’afɔrmbukyia no so egu, seseiara mankotsee na maka, na mara so mpo wɔpɛ dɛ wɔgye mo nkwa* fi me nsamu.” 4 Naaso ebɛn asɛm na Nyankopɔn kaa kyerɛɛ no? Ɔkaa kyerɛɛ no dɛ: “Meda ho ara wɔ mbarimba 7,000 a wommbuu ntwɛr wɔ Baal n’enyim.” 5 Ndɛ mber yi mu so dɛmara na ɔtse, nyimpa kakraabi pɛ na wɔnam adom no do eyi hɔn. 6 Ntsi seseiara sɛ ɔnam adom do a, nna ɔnodze ɔnnam ndwuma do bio; annyɛ dɛm a, adom no rennyɛ adom bio.

7 Sɛ dɛm dze a, nna ɔno ebɛn asɛm na yɛbɛka? Adze a nna Israel rohwehwɛ no dzendzenndzen no, hɔn nsa annka, mbom hɔn a woeyi hɔn no na hɔn nsa kae. Na hɔn a wɔaka no dze, wopiriim hɔn akoma, 8 dɛ mbrɛ wɔakyerɛw dɛ: “Nyankopɔn ama hɔn sunsum a ɔma wɔda hatsee, nye enyiwa a onnhu adze nye asowa a ɔnntse asɛm dze ebesi ndɛ da yi.” 9 Afei so David kaa dɛ: “Ma hɔn edzidzipon nyɛ efir mma hɔn na ɔnyɛ eboa mpa hɔn na ɔnto hɔn fintsidua na ɔmma wɔntwe hɔn aso. 10 Ma hɔn enyi do nyɛ hɔn tumm mbrɛ ɔbɛyɛ a worunnhu adze, na ma wɔnkom hɔn mu aber nyina.”

11 Ntsi miribisa dɛ, Wofintsiwii hwee ase koraa a wɔannsoɛr bio anaa? Oho, ɔnntse dɛm koraa! Naaso mfom a Jewfo no dzii ntsi, amanaman mufo no enya nkwagye mbrɛ ɔbɛyɛ a ɔbɛhye Jewfo no.* 12 Na sɛ mfom a wodzii no ama wiadze no enya noho, na hɔn dodow a no do tsewee no so ama amanaman mufo no enya hɔnho dze a, nna ɔno sɛ hɔn dodow no nyina bɔ ano a, hwɛ mbrɛ ahonyadze no besi adɔɔ so afa!

13 Afei merekasa akyerɛ hɔn a wofi amanaman no mu no. Osiandɛ meyɛ ɔsomafo ma amanaman no ntsi, mehyɛ mo som enyimnyam. 14 Meyɛ dɛm mbrɛ ɔbɛyɛ a mubotum afa kwan bi do ayɛ adze ma wɔahye mara mo nkorɔfo,* ama meetum agye hɔn mu binom nkwa. 15 Na sɛ tow a wɔtoow hɔn kyenee no maa asomdwee baa Nyankopɔn na wiadze no ntamu a, nna ɔnodze sɛ wɔgye hɔn a, ehwɛ a ebɛn asɛm besi? Ɔbɛma ewufo aba nkwa mu. 16 Afei so, sɛ wɔfa isiam a wɔafetsew no bi dɛ ɔyɛ aba a odzi kan na ɔyɛ krɔnkrɔn a, nna ɔno nkaa no nyina so yɛ krɔnkrɔn; na sɛ dua no no ndwow yɛ krɔnkrɔn a, nna ɔno no nkorbata no so yɛ krɔnkrɔn.

17 Naaso sɛ woebubu nkorbata no bi efi hɔ, na wɔdze ɔwo a eyɛ kwaa mu ngodua no nkorbata abɛhyɛ hɔn ananmu ma irinya ndzɛmba pa a ɔwɔ ngodua no ndwow no mu no bi a, 18 mma mmema woho do* wɔ nkorbata no do.* Na sɛ emema woho do wɔ hɔn do a,* kaa dɛ nnyɛ ɔwo na edze ndwow no mu, mbom ndwow no na ɔdze wo mu. 19 Bi a ebɛka dɛ: “Nkyɛ wobubuu nkorbata no mbrɛ ɔbɛyɛ a wɔdze me bɛhyɛ mu.” 20 Ɔyɛ nokwar! Gyedzi a woennya ntsi na wobubuu hɔn fii hɔ no, naaso ɔwo dze, wo gyedzi ntsi na wɔama eda ho ara gyina hɔ no. Mma mmema woho do, mbom suro.* 21 Osiandɛ, sɛ nkorbata a wofi dua no ara mu mpo Nyankopɔn amma wɔammfa hɔnho enndzi a, ɔwo na ɔbɛma afa woho edzi anaa? 22 Dɛm ntsi, dwen Nyankopɔn n’ayamuyie na n’asotwe no ho. Hɔn a wɔhwee ase no, ɔtwee hɔn aso, naaso ɔwo dze, sɛ ekɔ do ara tsena Nyankopɔn n’ayamuyie mu a, ɔbɛda ayamuyie edzi akyerɛ wo; annyɛ dɛm a wobotwa woara so efi hɔ. 23 Na hɔn so sɛ wɔhyɛ ase dɛ worinya gyedzi a, wɔdze hɔn bɛba abɛhyɛ mu, osiandɛ Nyankopɔn botum asan dze hɔn abɛhyɛ mu bio. 24 Siantsir nye dɛ, ɔwo wotwaa wo fii kwaa mu ngodua ho, ntsi sɛ yɛreka paa a, nkyɛ onnyi dɛ wɔdze wo bɛhyɛ ture mu ngodua mu. Naaso sɛ woetum dze wo abɛhyɛ mu a, nna ɔno ture mu ngodua nankasa no nkorbata na wonnkotum asan dze hɔn abɛhyɛ mu bio anaa?

25 Enuanom, mepɛ dɛ hom hu dɛm esumasɛm krɔnkrɔn yi, mbrɛ ɔbɛyɛ a hom rennyɛ enyansafo wɔ homankasa hom enyi do: Ɔno nye dɛ Israelfo no mu binom epirim hɔn akoma na wɔbɛyɛ dɛm araa ekesi dɛ amanaman mufo no hɔn dodow bɔbɔ ano. 26 Na dɛm kwan yi do no, Israel nyina benya nkwa. Dɛ mbrɛ wɔakyerɛw dɛ: “Ɔgyefo no befi Zion aba na obeyi ndzeyɛbɔn efi Jacob mu. 27 Na sɛ miyi hɔn bɔn fi hɔ a, dɛm apam yi na menye hɔn bɛyɛ.” 28 Nokwasɛm nye dɛ, sɛ ɔba no asɛmpa no dze a, hom ntsi wɔyɛ atamfo; naaso sɛ ɔba no hɔn a Nyankopɔn eyi hɔn no dze a, osian hɔn egyanom ntsi wɔyɛ adɔfo. 29 Osiandɛ, Nyankopɔn n’akyɛdze a ɔdze ma nye frɛ a ɔfrɛ nkorɔfo no, onnu noho wɔ ho. 30 Na dɛ mbrɛ mber bi a abɛsen kɔ no hom yɛɛ Nyankopɔn do asoɔdzen naaso seseiara oehu hom mbɔbɔr osian asoɔdzen a wɔyɛe no ntsi no, 31 dɛmara so na seseiara woyinom ayɛ asoɔdzen ma woehu hom mbɔbɔr, ama afei dze woeehu hɔnara so mbɔbɔr. 32 Na Nyankopɔn ama hɔn nyina abɛyɛ nkowaa ama asoɔdzen,* mbrɛ ɔbɛyɛ a obohu hɔn nyina mbɔbɔr.

33 O hwɛ mbrɛ Nyankopɔn n’ahonya na ne nyansaa na ne nyimdzee mu dɔ fa! Yerunntum nnhwehwɛ n’atsɛmbu mu nnwie da, na n’akwan so bor hɛn ntseasee do! 34 Na “woana na onyim Jehovah* n’adwen, na woana na obotum etu no fo?” 35 Anaa “woana na oedzi kan ama no biribi ma ntsi ɔsɛ dɛ ɔhyɛ no ananmu?” 36 Osiandɛ ndzɛmba nyina fi no hɔ na wɔnam no do na wɔbae na wɔyɛ nedze. Ɔno na enyimnyam nka no daa daa. Amen.