John Asɛmpa

6 Iyi ekyir no, Jesus sii mu kɔr Galilee Po a wɔsan frɛ no Tiberias Po no n’ekyir. 2 Na nyimpadɔm kɛse bi kɔr do dzii n’ekyir, osiandɛ wohun anwanwadze ahorow a ɔyɛe dze saa ayarfo yarba no. 3 Na Jesus fowee kɔr bepɔw bi do na ɔnye n’esuafo no kɛtsenaa hɔ. 4 Dɛm aber yi, nna Jewfo hɔn afahyɛ a wɔfrɛ no Apaho no abɛn. 5 Na aber a Jesus maa n’enyi do no, ɔnkɔhwɛ a nyimpadɔm kɛse bi na wɔreba ne nkyɛn yi. Ntsi obisaa Philip dɛ: “Henfa na yebenya paanoo atɔ ama nkorɔfo yi ma woeedzi?” 6 Naaso ɔkaa iyi dze sɔɔ no hwɛe, osiandɛ nna onyim dza ɔrebɛyɛ. 7 Philip yii no ano dɛ: “Sɛ yɛtɔ paanoo denare* 200 ma hɔn dɛ wɔnkyɛ no nkakrankakra mpo a, ɔronnso obiara do.” 8 Na n’esuafo no mu kor a wɔfrɛ no Andrew, Simon Peter no nua no, kaa kyerɛɛ no dɛ: 9 “Banyimba kakraba bi wɔ ha a ɔwɔ baali paanoo enum na nam* nkakraba ebien. Naaso dɛm nyimpa pii yi dze, iyi bɛyɛ hɔn dɛn?”

10 Nna Jesus kaa dɛ: “Hom mma nkorɔfo no ntsenatsena famu.” Nna sar pii wɔ beebi a wɔwɔ no, ntsi mbarimba no tsenatsenaa hɔ. Nna wɔyɛ bɛyɛ 5,000. 11 Na Jesus faa paanoo no, na ɔdaa ase wiei no, ɔkyekyɛe maa hɔn a wɔtsenatsena hɔ no; na dɛmara so na ɔkyɛɛ nam* nkakraba no. Na hɔn nsa kaa dodow a wɔpɛ biara. 12 Na aber a wodzidzii mee wiei no, ɔkaa kyerɛɛ n’esuafo no dɛ: “Hom mboaboa dza wɔaka no nyina ano, amma biribiara aannsɛɛ kwa.”* 13 Ntsi wɔboaboaa ano, na baali paanoo enum a nkorɔfo no dzii no, dza ɔkaa no yɛɛ nkɛntsɛn 12 amaama.

14 Aber a nkorɔfo no hun anwanwadze a ɔyɛe no, asɛm a wɔkae nye dɛ: “Ampa, oyi nye nkɔnhyɛnyi a ɔreba wiadze no.” 15 Afei Jesus hun dɛ wɔpɛ dɛ wɔkyer no yɛ no ɔhen. Ntsi ofii hɔ, na nankotsee kɛhyɛɛ bepɔw no do bio.

16 Na odur ewimbir no, n’esuafo no sianee kɔr mpoano, 17 na wɔkɔfoow hɛmba bi dɛ wɔdze rutwa po no akɔ Capernaum. Dɛm aber yi dze nna sum aba, na nna Jesus mmbaa hɔn nkyɛn. 18 Afei so, nna po no do ayɛ begyabegya osiandɛ nna mframa bi a n’ano yɛ dzen robɔ. 19 Na aber a wɔkwaan bɛyɛ akwansin ebiasa anaa anan* no, wohun Jesus dɛ ɔnam po no do reba hɛmba no ho, na hɔn akoma tui. 20 Naaso ɔkaa kyerɛɛ hɔn dɛ: “Ɔyɛ mara a; mma hom nnsuro!” 21 Ntsi wɔdze enyigye faa no tsenaa hɛmba no mu, na wɔannkyɛr biara na wokodur daadze wɔ beebi a wɔrokɔ no.

22 Adze kyee no, nyimpadɔm a wɔkaa po no n’ekyir no hun dɛ hɛmba biara nnda hɔ. Nna nkyɛ hɛmba kakraba kor bi da hɔ, naaso Jesus annka n’esuafo no ho ma wɔammfa dɛm hɛmba no annkɔ. N’esuafo no nkotsee na wɔfowee kɔree. 23 Na ahɛmba bi so fi Tiberias baa beebi a Ewuradze daa ase ma wodzii paanoo no ne nkyɛn hɔ beebi. 24 Ntsi aber a nyimpadɔm no hun dɛ Jesus na n’esuafo no nnyi hɔ no, wɔfoow ahɛmba no na wɔbaa Capernaum dɛ wɔrobɔhwehwɛ Jesus.

25 Na aber a wokohun no wɔ po no n’ekyir no, wobisaa no dɛ: “Rabbi, ebɛn aber na ebaa ha?” 26 Jesus yii hɔn ano dɛ: “Nokwar, nokwar mese hom dɛ, nnyɛ asɛnkyerɛdze a hom hunii ntsi na hom rohwehwɛ me, mbom paanoo a hom dzii mee no ntsi a. 27 Mma hom nnyɛ edziban a ɔsɛɛ ho edwuma, mbom hom nyɛ edziban a ɔnnsɛɛ a ɔma onnyiewiei nkwa no ho edwuma. Dɛm edziban yi, nyimpa Ba no na ɔdze bɛma hom, osiandɛ ɔno na Egya Nyankopɔn nankasa dze no nsɔwano etsim no do* dze akyerɛ dɛ ɔgye no to mu.”

28 Ntsi wobisaa no dɛ: “Ebɛnadze na yɛnyɛ ama yeetum ayɛ Nyankopɔn no ndwuma?” 29 Nna Jesus yii hɔn ano dɛ: “Nyankopɔn n’edwuma nye dɛ hom bɛgye obi a ɔsomaa no no edzi.” 30 Nna wobisaa no dɛ: “Ebɛn asɛnkyerɛdze na ebɛyɛ ama yeehu na yaagye wo edzi? Ebɛn adze na ebɛyɛ? 31 Hɛn egyanom dzii manna wɔ sar no do dɛ mbrɛ wɔakyerɛw no. Wɔakyerɛw dɛ: ‘Ɔmaa hɔn paanoo fii sor ma wodzii.’” 32 Nna Jesus kaa kyerɛɛ hɔn dɛ: “Nokwar, nokwar mese hom dɛ, Moses amma hom paanoo a ofi sor, na mbom m’Egya na ɔma hom nokwar paanoo a ofi sor no. 33 Osiandɛ Nyankopɔn ne paanoo nye nyia osian fi sor na ɔma wiadze nkwa no.” 34 Ntsi wɔkaa kyerɛɛ no dɛ: “Ewuradze, ma hɛn dɛm paanoo yi bi daa.”

35 Jesus kaa kyerɛɛ hɔn dɛ: “Emi nye nkwa paanoo no. Obiara a ɔba me nkyɛn no, ɔkɔm renndze no da. Na obiara a ɔgye me dzi no, nsukɔm renndze no da. 36 Naaso dɛ mbrɛ mekaa kyerɛɛ hom no, hom ehu me naaso hom nngye nndzi. 37 Na hɔn a Egya no dze hɔn ama me no nyina bɛba me nkyɛn, na meremmpam obiara a ɔbɛba me nkyɛn no da; 38 osiandɛ misianee fii sor baa dɛ merebɛyɛ nyia ɔsomaa me no n’apɛdze, na nnyɛ mankasa m’apɛdze. 39 Nyia ɔsomaa me no n’apɛdze nye dɛ, monhwɛ na hɔn a ɔdze hɔn ama me no, hɔn mu biara aannyew, na meenyan hɔn wɔ da a odzi ekyir no. 40 Na m’Egya n’apɛdze nye dɛ, obiara a ɔgye Ɔba no to mu na ɔgye no dzi no benya onnyiewiei nkwa, na mibenyan no wɔ da a odzi ekyir no.”

41 Afei Jewfo no hyɛɛ ase hwinhwinii tsiaa Jesus osiandɛ ɔkaa dɛ: “Emi nye paanoo a mifii sor sianee no.” 42 Na wɔhyɛɛ ase kaa dɛ: “Ɔnnyɛ Jesus, Joseph ne ba no nye yi bi a? Nkyɛ yenyim ne maame na ne papa, anaa? Ntsi ɔyɛ dɛn na afei dze ɔreka dɛ, ‘Misianee fii sor bae’ yi?” 43 Nna Jesus kaa kyerɛɛ hɔn dɛ: “Hom ngyaa ehwinhwin no. 44 Obiara runntum mmba me nkyɛn gyedɛ Egya no a ɔsomaa me no twe no, na mibenyan no wɔ da a odzi ekyir no. 45 Wɔakyerɛw wɔ Nkɔnhyɛfo no mu dɛ: ‘Jehovah* bɛkyerɛkyerɛ hɔn nyina.’ Obiara a oetsie Egya no na ɔagye ne nkyerɛkyerɛ ato mu no ba me nkyɛn. 46 Iyi nnkyerɛ dɛ nyimpa bi ehu Egya no, mbom nyia ofi Nyankopɔn ne nkyɛn no, ɔno nkotsee na oehu Egya no. 47 Nokwar, nokwar mese hom dɛ, obiara a ɔgye dzi no, ɔwɔ onnyiewiei nkwa.

48 “Emi nye nkwa paanoo no. 49 Hom egyanom dzii manna wɔ sar no do, naaso wowuwui. 50 Iyi nye paanoo a ofi sor esian aba no, na obiara a obedzi bi no runnwu. 51 Emi nye paanoo a ɔtse ase a ofi sor esian aba no. Sɛ obi dzi dɛm paanoo yi bi a, ɔbɛtsena ase daa; na nokwasɛm nye dɛ, paanoo a medze bɛma no nye mo honam a osian wiadze nkwagye ntsi medze bɛma no.”

52 Afei Jewfo no hyɛɛ ase nye hɔnho gyee kyim dɛ: “Ɔbɛyɛ dɛn na ɔbarimba yi dze no honam ama hɛn ma yeedzi?” 53 Ntsi Jesus kaa kyerɛɛ hɔn dɛ: “Nokwar, nokwar mese hom dɛ, sɛ hom enndzi nyimpa Ba no no honam na hom annom no bɔgyaa a, hom nnyi nkwa wɔ hom mu. 54 Obiara a odzi mo honam na ɔnom mo bɔgyaa no wɔ onnyiewiei nkwa, na mibenyan no wɔ da a odzi ekyir no; 55 osiandɛ mo honam yɛ edziban ankasa, na mo bɔgyaa so yɛ anondze ankasa. 56 Obiara a odzi mo honam na ɔnom mo bɔgyaa no nye me yɛ kor, na mo so menye no yɛ kor. 57 Dɛ mbrɛ Egya a ɔtse ase no somaa me, na osian Egya no ntsi metse ase no, dɛmara so na obi a odzi mo honam no so bɛtsena ase osian emi ntsi. 58 Iyi nye paanoo a osianee fii sor bae no. Ɔnntse dɛ dza hom egyanom dzii naaso wowuwui no. Obiara a odzi dɛm paanoo yi bi no, ɔbɛtsena ase daa.” 59 Ɔkaa dɛm nsɛm yi aber a nna ɔrekyerɛkyerɛ wɔ nhyiamudan bi mu* wɔ Capernaum no.

60 Aber a n’esuafo no tsee no, hɔn mu pii kaa dɛ: “Asɛm yi dze n’ano yɛ hyew ae; woana botum etsie?” 61 Nna Jesus ehu* dɛ n’esuafo no rekasakasa asɛm no ho, ntsi obisaa hɔn dɛ: “Iyi ato hom fintsidua anaa? 62 Nna ɔno sɛ hom hu dɛ nyimpa Ba no rofow akɔ beebi a nna ɔwɔ no so ɛ? 63 Sunsum no na ɔma nkwa, na honam no dze, mfaso biara nnyi do. Nsɛm a maka akyerɛ hom no yɛ sunsum na ɔyɛ nkwa. 64 Naaso hom mu binom wɔ hɔ a wɔnngye nndzi.” Na ofitsi ahyɛse no nyina nna Jesus nyim hɔn a wɔnngye nndzi no, nye obi a obeyi no ama no. 65 Na Jesus toaa do kaa dɛ: “Iyi ntsi na mekaa kyerɛɛ hom dɛ obiara runntum mmba me nkyɛn gyedɛ Egya no ama no kwan.”

66 Osian iyi ntsi, n’esuafo no mu pii sanee kɔr ndzɛmba a woegya no wɔ ekyir no ho na wɔannye no annantsew bio. 67 Ntsi Jesus bisaa Duebien no so dɛ: “Hom so ɛ, hom pɛ dɛ hom kɔ anaa?” 68 Simon Peter yii no ano dɛ: “Ewuradze, woana ne nkyɛn na yɛbɔkɔ? Ɔwo na ewɔ nsɛm a ɔma onnyiewiei nkwa. 69 Yɛagye edzi na yeebohu dɛ ɔwo nye Nyankopɔn no Krɔnkrɔnnyi no.” 70 Nna Jesus kaa kyerɛɛ hɔn dɛ: “Mara na miyii hom duebien yi, ɔnntse dɛm a? Naaso hom mu kor yɛ dzinsɛɛfo.”* 71 Mbrɛ ɔtse nye dɛ, nna ɔyɛ Simon Iscariot ne ba Judas ho asɛm na ɔreka no. Ɔwɔ mu dɛ nna ɔka Duebien no ho dze, naaso nna ɔno na oribeyi no ama.