Nyankopɔn n’Ahendzi no, Ɔyɛ Ebɛnadze?

1. Mpaabɔ a ɔagye dzin bɛn na yebosusu ho?

NYIMPA ɔpepem pii na wonyim mpaabɔ a ɔagye dzin a wɔfrɛ no Hɛn Egya a ɔwɔ sor anaa Ewuradze Mpaabɔ no. Jesus nam dɛm mpaabɔ yi do kyerɛɛ n’ekyidzifo mbrɛ wonsi mbɔ mpaa. Ebɛnadze na ɔkãa ho asɛm wɔ mpaabɔ no mu? Ebɛnadze ntsi na dɛm mpaabɔ yi ho hia hɛn ndɛ?

2. Ebɛn ndzɛmba etsitsir ebiasa na Jesus kãa dɛ yɛmbɔ ho mpaa?

² Jesus kãa dɛ: “Dɛm ntsi hom nsɔr dɛ iyi: Hɛn Egya a ewɔ sor, wo dzin ho ntsew, w’ahendzi mbra, wɔnyɛ wo pɛ wɔ asaase do dɛ ɔsor.” (Kenkan Matthew 6:9-13.) Ebɛnadze ntsi na Jesus kãa dɛ yɛmbɔ dɛm ndzɛmba ebiasa no ho mpaa?​—Hwɛ Nsɛm bi a Wɔakyerɛ Mu 20.

3. Ebɛnadze ntsi na ɔsɛ dɛ yesũa Nyankopɔn n’Ahendzi no ho adze?

³ Yeedzi kan esũa dɛ Nyankopɔn ne dzin dze Jehovah. Afei so, yeesusu botae a Nyankopɔn wɔ ma nyimpa na asaase ho. Naaso, nna Jesus repɛ akyerɛ dɛn ber a ɔkãa dɛ: “W’ahendzi mbra” no? Yebosũa dza Nyankopɔn n’Ahendzi no yɛ, dza Ahendzi no bɛyɛ, nye mbrɛ Ahendzi no besi atsew Nyankopɔn ne dzin ho.

NYANKOPƆN N’AHENDZI NO, ƆYƐ EBƐNADZE?

4. Nyankopɔn n’Ahendzi no, ɔyɛ ebɛnadze? Woana nye Ahendzi no do Hen?

⁴ Jehovah dze ɔsor tumdzi bi esi hɔ na ɔapaw Jesus dɛ no do Hen. Bible no frɛ tumdzi yi Nyankopɔn n’Ahendzi. Jesus yɛ “ahemfo Hen, nye ewuranom Ewuradze.” (1 Timothy 6:15) Ndzepa a Jesus botum ayɛ no, nyimpa tumdzifo biara nnkotum ayɛ da. Sɛ wɔkã nyimpa tumdzifo hɔn tum nyinara bɔ mu mpo a, Jesus no tum bor ne nyinara do.

5. Henfa na Nyankopɔn no tumdzi no befi edzi tum? Obedzi ebɛnadze do tum?

⁵ Wonyaan Jesus fii ewufo mu no, adaduanan ekyir no, ɔsanee kɔr sor. Ewiei koraa no, Jehovah paaw no dɛ Ahendzi no do Hen. (Ndwuma 2:33) Nyankopɔn no tumdzi no befi sor edzi asaase do tum. (Nyikyerɛ 11:15) Iyi ntsi na Bible no frɛ Nyankopɔn n’Ahendzi no dɛ, “sor ahendzi” no.​—2 Timothy 4:18.

6, 7. Ebɛnadze na ɔma Jesus yɛ ɔhen a ɔsɛ fata sen ɔhen biara?

⁶ Bible no kã dɛ Jesus yɛ kɛse sen ɔhen fofor biara, osiandɛ ɔno nye “onyia no nko wɔ nkwa a ɔkyẽ.” Iyi kyerɛ dɛ Jesus wɔ hɔ afebɔɔ. (1 Timothy 6:16) Ewiei koraa no, nyimpa tumdzifo nyina bowuwu, naaso Jesus nnkowu ara da. Ndzepa a Jesus bɛyɛ ama hɛn no bɛtsena hɔ daa.

⁷ Bible nkɔnhyɛ kã dɛ Jesus bɛyɛ Ɔhen a ɔnnyɛ enyimhwɛ na ɔwɔ ehumbɔbɔr: “Ewuradze no sunsum besi no do, nyansa ɔnye ntseasee sunsum, apam ɔnye ahoɔdzen sunsum, na nyimdzee ɔnye Ewuradze suro sunsum; na Ewuradze ho suro mu na ɔbɛfa n’enyika: na onnkedzi dza n’enyiwa hu no ekyir ebu atsɛn, eso onnkedzi dza n’asowa tse no ekyir akã enyim: tsenenee mbom na ɔdze bobu ɔbɔbɔfo [anaa, ohianyi] atsɛn.” (Isaiah 11:2-4) Ana w’enyiwa renngye ho dɛ ibenya ɔhen a ɔtse dɛm?

8. Yesi dɛn hu dɛ nyimpa binom nye Jesus bɔbɔ mu edzi tum?

⁸ Nyankopɔn apaw nyimpa binom dɛ wɔnye Jesus mbɔ mu ndzi tum wɔ sor ahendzi no mu. Dɛ nhwɛdo no, ɔsomafo Paul kãa kyerɛɛ Timothy dɛ: “Sɛ yɛsɔw a, yɛnye no bedzi hen” abɔ mu. (2 Timothy 2:12) Nyimpadodow ahen na wɔnye Jesus bɔbɔ mu edzi tum dɛ ahemfo?

9. Nyimpadodow ahen na wɔnye Jesus bɔbɔ mu edzi tum? Ebɛn aber na Nyankopɔn hyɛɛ ase yii hɔn?

⁹ Dɛ mbrɛ yesũaa ho adze wɔ Tsir 7 no mu no, ɔsomafo John nyaa enyido-adzehu na ohun Jesus dɛ Ɔhen wɔ sor a ahemfo afofor 144,000 kã no ho. Woananom nye ahemfo 144,000 no? John kyerɛkyerɛɛ mu dɛ, “wɔakyerɛw [Jesus] ne dzin, nye Egya no ne dzin, wɔ hɔn momapɔw do.” Ɔdze kãa ho dɛ: “Iyinom nye hɔn a wodzi Eguambaa no [kyerɛ dɛ, Jesus] ekyir wɔ beebiara a ɔkɔ. Iyinom na wɔtɔɔ hɔn fii nyimpa mu.” (Kenkan Nyikyerɛ 14:1, 4.) Ahemfo 144,000 no yɛ Christianfo anokwafo a Nyankopɔn eyi hɔn dɛ wɔnye Jesus ndzi “hen wɔ asaase do.” Sɛ wowu a, wonyan hɔn ma wɔkɛtsena sor. (Nyikyerɛ 5:10) Ofi asomafo no aber do no, Jehovah akɔ do eyi Christianfo anokwafo dɛ kuw a wɔyɛ ahemfo 144,000 no mufo.

10. Ebɛnadze ntsi na nhyehyɛɛ a Jehovah ayɛ dɛ ahemfo 144,000 nye Jesus mbɔ mu ndzi nyimpa do tum no kyerɛ ɔdɔ a ɔwɔ ma hɛn?

¹⁰ Jehovah dwen hɛn ho papaapa ma ntsi ɔayɛ nhyehyɛɛ dɛ nyimpa nye Jesus mbɔ mu ndzi tum. Jesus bɛyɛ ɔhen pa osiandɛ ɔtse nyimpa ase. Ɔatsena ase dɛ nyimpa pɛn na onyim mbrɛ amandzehu so tse. Paul kãa dɛ Jesus tse nkã ma hɛn, osiandɛ ɔnnyɛ “sɔfopanyin a hɛn mberɛwyɛ nntum nntsɛ no.” Iyi kyerɛ dɛ, Jesus botum atse hɛn mberɛwyɛ ase. Bio so, “wɔasɔ no adze nyina mu ahwɛ dɛ hɛnara.” (Hebrewfo 4:15; 5:8) Ahemfo 144,000 no so atsena ase dɛ nyimpa pɛn. Woehyia amandzehu nye yarba a ɔto nyimpa no bi pɛn. Ntsi, yebotum enya awerɛhyɛmu dɛ, Jesus nye ahemfo 144,000 no bɛtse mbrɛ yɛtse nkã nye ɔhaw ahorow a ɔsɛ dɛ yegyina ano no ase.

EBƐNADZE NA NYANKOPƆN N’AHENDZI NO BƐYƐ?

11. Ebɛnadze ntsi na Jesus kyerɛɛ n’ekyidzifo dɛ wɔmbɔ mpaa dɛ wɔnyɛ Nyankopɔn ne pɛ wɔ sor?

¹¹ Jesus kyerɛɛ n’esuafo no dɛ, wɔmbɔ mpaa dɛ wɔnyɛ Nyankopɔn ne pɛ wɔ sor. Ebɛnadze ntsi a? Yesũae wɔ Tsir 3 no mu dɛ Satan Abɔnsam tseew etũa tsiaa Jehovah. Aber a Satan tseew etũa ekyir no, Jehovah maa ɔno nye n’abɔfo bɔn no kwan ma wɔtsenaa sor kakra. Ntsi, nna nnyɛ abɔfo a wɔwɔ sor nyina na wɔreyɛ Nyankopɔn n’apɛdze. Yebosũa Satan nye n’abɔfoe no ho adze pii wɔ Tsir 10 no mu.

12. Ebɛn nsɛm etsitsir ebien na wɔakã ho asɛm wɔ Nyikyerɛ 12:10?

¹² Bible no kyerɛkyerɛ mu dɛ, sɛ wɔdze Jesus si egua do dɛ Nyankopɔn n’Ahendzi no do Hen ara pɛr a, ɔnye Satan bedzi akõ. (Kenkan Nyikyerɛ 12:7-10.) Nyiyimu 10 no kã nsɛm etsitsir ebien a obesi ho asɛm. Odzi kan, Nyankopɔn n’Ahendzi a Jesus Christ yɛ do Hen no bɛhyɛ ase edzi tum. Iyi ekyir no, wɔbɔtow Satan efi sor akyen asaase do. Dɛ mbrɛ yebohu no, dɛm nsɛm etsitsir yi esisi dadaw.

13. Ebɛn asɛm sii wɔ sor ber a wɔtoow Satan kyenee no?

¹³ Bible no kã dɛw a abɔfo anokwafo dzii ber a wɔtoow Satan nye n’abɔfoe fii sor kyenee no ho asɛm. Yɛkenkan ho asɛm dɛ: “Dɛm ntsi hom sorsor, nye hom a hom tsetse no mu no ndzi dɛw.” (Nyikyerɛ 12:12) Seseiara no, asomdwee mapa na koryɛ wɔ sor osiandɛ obiara a ɔwɔ hɔ reyɛ Nyankopɔn n’apɛdze.

14. Osian Satan a wɔatow no efi sor akyen ntsi, ebɛn asɛm na oesi wɔ asaase do?

¹⁴ Naaso asaase do asetsena nntse dɛm koraa. Nsɛm a ɔyɛ hu sisi “osiandɛ abɔnsam dze ebufuw kɛse esian aba” na “onyim dɛ ne ber a ɔwɔ yɛ tsia.” (Nyikyerɛ 12:12) Satan no bo efuw paa. Ɔatow no akyen asaase do na onyim dɛ, ɔnnkɛkyɛr koraa ma wɔasɛɛ no. Iyi ma ɔyɛ dza obotum biara dze ɔhaw nye amandzehu ba nyimpa do wɔ asaase do beebiara.

15. Ebɛn botae na Nyankopɔn wɔ ma asaase?

¹⁵ Naaso botae a Nyankopɔn wɔ ma asaase nnsesãe. Ɔda ho ara pɛ dɛ nyimpa a wodzi mu tsena ase daa wɔ paradise wɔ asaase yi do. (Ndwom 37:29) Sɛ dɛm dze a, Nyankopɔn n’Ahendzi no besi dɛn ama iyi aba mu?

16, 17. Ebɛn asɛm na Daniel 2:44 kã kyerɛ hɛn fa Nyankopɔn n’Ahendzi no ho?

¹⁶ Nkɔnhyɛ a ɔwɔ Daniel 2:44 no kã dɛ: “Na ahemfo no hɔn nda no mu na ɔsor Nyankopɔn bɛma ahendzi a wɔrennsɛɛ no da, eso wɔrenndan n’ahendzi nngya ɔman fofor bi do; na obobu ahendzi yinom pɔsɔpɔsɔ na ɔama ɔasã, na ɔnodze begyina daa.” Ebɛnadze na dɛm nkɔnhyɛ yi kyerɛkyerɛ hɛn fa Nyankopɔn n’Ahendzi no ho?

¹⁷ Odzi kan, ɔma yehu dɛ Nyankopɔn n’Ahendzi no bɛhyɛ ase edzi tum wɔ “ahemfo no hɔn nda no mu.” Iyi kyerɛ dɛ, Ahendzi no bɛhyɛ ase edzi tum ber a tumdzi afofor da ho ara wɔ asaase do no. Otsĩa ebien, ɔma yehu dɛ Nyankopɔn n’Ahendzi no begyina daa. Nkyii so, ahendzi fofor biara remmbɛhyɛ Ahendzi no ananmu. Otsĩa ebiasa, Nyankopɔn n’Ahendzi no nye wiadze tumdzi ahorow no bedzi akõ. Nyankopɔn n’Ahendzi no bedzi konyim na ɔaabɛyɛ ahendzi kortsee a obedzi asaase nyinara do tum. Afei, nyimpa benya ahendzi a odzi mu sen biara.

18. Wɔfrɛ ɔkõ a otwa tun a Nyankopɔn n’Ahendzi no nye wiadze ahendzi ahorow no bɔkõ no dɛn?

¹⁸ Nyankopɔn n’Ahendzi no besi dɛn edzi asaase nyinara do tum? Ansaana ɔkõ a otwa tun a wɔfrɛ no Har-Magedon no bɛpae egu no, esunsum fĩ a wɔyɛ mbɔnsam esunsum befir edzi akɛdaadaa ‘wiadze nyina ahemfo na wɔaaboaboa hɔn ano ama Nyankopɔn, adze nyina do Tumfo, ne da kɛse kõ no.’ Ampaara, nyimpa ahendzi ahorow no nye Nyankopɔn n’Ahendzi no bɔkõ.​—Nyikyerɛ 16:14, 16; hwɛ Nsɛm bi a Wɔakyerɛ Mu 10.

19, 20. Ebɛnadze ntsi na yehia Nyankopɔn n’Ahendzi no wɔ asaase do?

¹⁹ Ebɛnadze ntsi na yehia Nyankopɔn n’Ahendzi no? Annyɛ yie koraa no, siantsir ebiasa bi ntsi a. Odzi kan, yɛyɛ ndzebɔnyɛfo, ntsi yɛyaryar na yewuwu. Naaso Bible no kã dɛ, yɛbɛtsena ase daa wɔ Nyankopɔn n’Ahendzi no mu. Nokwar mu no, John 3:16 kã dɛ: “Na mbrɛ Nyankopɔn dɔɔ wiadze nye yi, dɛ ɔdze ne Ba a ɔwoo no kor no mae, ama obiara a ɔgye no dzi no ɔaannhera, na oeenya onnyiewiei nkwa.”

²⁰ Siantsir a otsĩa ebien ntsi a yehia Nyankopɔn n’Ahendzi no nye dɛ, emumuyɛfo etwa hɛn ho ehyia. Nyimpa pii dzi akɔhwi, wosisi nkorɔfo, na wɔbɔ ehuhubra. Biribiara nnyi hɔ a yebotum ayɛ dze eyi hɔn efi hɔ, naaso Nyankopɔn beyi hɔn efi hɔ. Wɔbɛsɛɛ nyimpa a wɔkɔ do yɛ emumuyɛdze wɔ Har-Magedon kõ no mu. (Kenkan Ndwom 37:10.) Siantsir a otsĩa ebiasa ntsi a yehia Nyankopɔn n’Ahendzi no nye dɛ, nyimpa ahendzi ahorow no nnyɛ hɔn edwuma yie, wodzi etsirmɔdzensɛm, na kɛtɛasehyɛ ayɛ hɔn mã. Hɔn enyi nngye ho dɛ wɔbɔboa nkorɔfo ma wɔaayɛ setsie ama Nyankopɔn. Bible no kã dɛ, “nyimpa dzi ne nyɛnko no do tum dze ma noara no mbusu.”​—Ɔsɛnkafo 8:9.

21. Ebɛn kwan do na Nyankopɔn n’Ahendzi no bɔhwɛ ma wɔaayɛ Nyankopɔn ne pɛ wɔ asaase do?

²¹ Har-Magedon kõ no ekyir no, Nyankopɔn n’Ahendzi no bɔhwɛ ma wɔaayɛ Nyankopɔn ne pɛ wɔ asaase do. Dɛ nhwɛdo no, obeyi Satan nye n’abɔfoe no efi hɔ. (Nyikyerɛ 20:1-3) Ewiei koraa no, nyimpa biara nnkɛyar bio anaa mpo oeewu. Osian werdam no ntsi, nyimpa anokwafo nyina botum atsena ase daa wɔ Paradise. (Nyikyerɛ 22:1-3) Ahendzi no bɛtsew Nyankopɔn ne dzin ho. Iyi kyerɛ dɛn? Dza iyi kyerɛ nye dɛ, ber a Nyankopɔn no tumdzi no dzi asaase do tum no, nyimpa nyina bɛhyɛ Jehovah ne dzin enyimnyam.​—Hwɛ Nsɛm bi a Wɔakyerɛ Mu 21.

EBƐN ABER NA JESUS BƐYƐƐ ƆHEN?

22. Yesi dɛn hu dɛ, Jesus ammbɛyɛ Ɔhen ber a nna ɔwɔ asaase do no anaa wɔ no wusoɛr ekyir pɛɛ?

²² Jesus kyerɛɛ n’esuafo dɛ, wɔmbɔ mpaa dɛ: “W’ahendzi mbra.” Ntsi ɔda edzi dɛ, daakye na Nyankopɔn n’Ahendzi no bɛba. Jehovah bedzi kan dze n’Ahendzi no esi hɔ na ɔaayɛ Jesus Ɔhen wɔ do. Aso Jesus sanee kɔr sor ara pɛr na wɔyɛɛ no Ɔhen? Oho, nna ɔsɛ dɛ ɔtweɔn kakra. Peter na Paul maa dɛm asɛm yi mu daa hɔ mber bi mu wɔ Jesus no wusoɛr ekyir. Wɔtwee adwen sii nkɔnhyɛ a ɔwɔ Ndwom 110:1 no do dɛ ɔfa Jesus ho. Jehovah kãe wɔ nkɔnhyɛ no mu dɛ: “Tsena m’abanyimfa, kodu dɛ medze w’atamfo bɛyɛ w’ananadzegua.” (Ndwuma 2:32-35; Hebrewfo 10:12, 13) Nna ɔsɛ dɛ Jesus tweɔn ber tsentsen ahen ansaana Jehovah ayɛ no Ɔhen?

23. (a) Ebɛn aber na Jesus hyɛɛ ase dzii tum dɛ Nyankopɔn n’Ahendzi no do Hen? (b) Ebɛnadze na yebosusu ho wɔ tsir a odzi hɔ no mu?

²³ Mfe pii ansaana afe 1914 reba no, kuw bi a wɔyɛ Christianfo anokwafo hun dɛ dɛm afe no bɛyɛ afe tsitsir wɔ Bible nkɔnhyɛ mu. Nsɛm a esisi wɔ wiadze ofi afe 1914 reba no ada no edzi dɛ wɔyɛ anokwafo. Jesus hyɛɛ ase dzii tum dɛ Ɔhen wɔ dɛm afe no mu. (Ndwom 110:2) Iyi ekyir pɛɛ no, wɔtoow Satan kyeen asaase do. Seseiara no, “onyim dɛ ne ber a ɔwɔ yɛ tsia.” (Nyikyerɛ 12:12) Wɔ tsir a odzi hɔ no mu no, yebohu ndzɛmba pii a odzi dase dɛ yɛtse mber a ɔtse dɛm mu. Bio so, yebohu dɛ ɔnnkɛkyɛr koraa, Nyankopɔn n’Ahendzi no bɔhwɛ ma wɔaayɛ Nyankopɔn ne pɛ wɔ asaase do.​—Hwɛ Nsɛm bi a Wɔakyerɛ Mu 22.