ADZESUA 17

Jesus No Suban Tse Dɛn?

Dza Wɔprent

Sɛ yesua nsɛm a Jesus kae nye ndzɛmba a ɔyɛe aber a nna ɔwɔ asaase do no ho adze a, yebohu suban ahorow pii a ɔbɛma yɛatwe abɛn ɔno na n’Egya, Jehovah. Dɛm suban fɛɛfɛw yi, ibi nye dza ɔwɔ hen? Afei, yebesi dɛn esuasua Jesus wɔ hɛn abrabɔ mu?

1. Jesus tse dɛ n’Egya wɔ ebɛn kwan do?

Nyankopɔn yɛ ɔdɔ, ntsi aber a nna Jesus nye no wɔ sor no, ɔdze mfe ɔpepepem pii suasuaa no. Iyi ntsi, dɛ mbrɛ Jesus dwen ndzɛmba ho, mbrɛ ɔtse nka, nye kwan a ɔfa do yɛ n’adze no tse dɛ n’Egya pɛpɛɛpɛ. (Kenkan John 5:19.) Nokwasɛm nye dɛ, Jesus daa n’Egya no suban no edzi yie paa ma Jesus narankasa mpo kaa dɛ: “Nyia oehu me no, oehu Egya no.” (John 14:9) Sɛ isua Jesus no suban ahorow ho adze a, ibohu Jehovah yie. Dɛ mfatoho no, dɛ mbrɛ Jesus maa nkorɔfo hɔn asɛm yɛɛ n’asɛm no ma yehu dɛ Jehovah dwen woho paa.

2. Ebɛnadze na Jesus ayɛ dze akyerɛ dɛ ɔdɔ Jehovah?

Jesus kaa dɛ: “Mbrɛ ɔbɛyɛ ma wiadze eehu dɛ modɔ Egya no, . . . dɛ mbrɛ Egya no hyɛɛ me no, dɛmara na meyɛ.” (John 14:31) Jesus wɔ asaase do no, nna ɔtɔ da a ɔyɛ dzen ma no dɛ obetsie n’Egya, naaso osiandɛ ɔdɔ n’Egya ntsi otsiee no aber nyina. Bio so, osiandɛ nna ɔdɔ n’Egya paa ntsi, nna ɔpɛ dɛ ɔka n’Egya ho asɛm kyerɛ afofor ma hɔn so wɔbɛyɛ n’Egya n’anyɛnkofo.—John 14:23.

3. Ebɛnadze na Jesus yɛe dze kyerɛɛ dɛ ɔdɔ nyimpa?

Bible no ka dɛ Jesus ‘n’enyi ka adasamba ho.’ (Mbɛbusɛm 8:31) Ɔhyɛɛ nkorɔfo nkuran na ofi n’akoma nyina mu boaa hɔn dze kyerɛɛ dɛ ɔdɔ nyimpa. Ɔyɛɛ anwanwadze pii dze kyerɛɛ dɛ ɔwɔ tum na ɔsan so dwen nyimpa ho. (Mark 1:40-42) Ɔnye obiara dzii no yie na ɔannyɛ nyiyimu. Hɔn a wɔwɔ akoma pa a wotsiee ne nsɛm no, wonyaa awerɛkyekyer na enyidado. Osiandɛ Jesus dɔ adasamba nyina ntsi, nna ɔayɛ krado dɛ obohu amandze na oeewu ama hɔn. Naaso hɔn a wotsie n’asɛm no mpo dze, ɔdɔ hɔn papaapa.—Kenkan John 15:13, 14.

PƐNSAPƐNSA MU KƆ EKYIR

Ma yensua Jesus no suban ho adze pii. Afei yɛbɔhwɛ mbrɛ yebotum ada ɔdɔ na ayamuhyehye edzi tse dɛ mbrɛ Jesus yɛe no.

4. Jesus dɔ n’Egya

Dza Jesus yɛe no ma yehu kwan a yebotum afa do akyerɛ Nyankopɔn dɛ yɛdɔ no. Ma yɛnkenkan Luke 6:12 na John 15:10; 17:26. Sɛ yɛkenkan kyerɛwsɛm no mu biara wie a, yebosusu asɛmbisa yi ho:

Yebesi dɛn esuasua Jesus, na yaakyerɛ dɛ yɛdɔ Jehovah?

Jesus robɔ mpaa. — Nna Jesus dɔ no sor Egya no paa, ntsi nna ɔtaa bɔ no mpaa

5. Jesus dwen hɔn a wohia mboa no ho

Nna Jesus dwen nyimpa ho paa, ntsi nna odzi kan yɛ hɔn ehiadze ma hɔn ansaana ɔayɛ narankasa mpo nedze. Sɛ nna ɔaberɛ mpo a, ɔdze ne ber na n’ahoɔdzen boa afofor. Ma yɛnkenkan Mark 6:30-44, na yensusu nsɛmbisa yi ho:

Wɔ kyerɛwsɛm yi mu no, ebɛnadze na Jesus yɛe dze kyerɛɛ dɛ ɔdwen nyimpa ho?—Hwɛ nyiyimu 31, 34, 41, na 42.
Ebɛnadze na ɔmaa Jesus boaa afofor?—Hwɛ nyiyimu 34.
Jesus suasua Jehovah na ɔda no suban edzi. Iyi ma ihu ebɛnadze fa Jehovah ho?
Dɛ mbrɛ Jesus yɛe no, ebɛnadze na hɛn so yebotum ayɛ dze akyerɛ dɛ yɛdwen afofor ho?

Jesus ayɛ anwanwadze bi ma paanoo enum na nam ebien ayɛ pii, na wɔdze rema nyimpa mpempem pii ma oeedzi. N’esuafo no na wɔrekyekyɛ edziban no ama mbaa, mbanyin na mbofra no.

6. Jesus ne yamu ye

Nna Jesus nnyi ndzɛmba pii, naaso kakra a ɔwɔ no ɔnye afofor kyɛe. Jesus tu hɛn fo dɛ hɛn so yɛnkyɛ adze. Ma yɛnkenkan Asomafo Ndwuma 20:35, na yensusu asɛmbisa yi ho:

Jesus se ebɛnadze na ɔbɛma yenya nhyira anaa enyigye?

Ma yɛnhwɛ VIDEO yi, na yensusu asɛmbisa a odzi do no ho:

VIDEO: ‘Ɔma Mu Wɔ Enyigye Pii’—Ne Fa Bi’ (4:00)

Sɛ yennyi hwee wɔ asetsena mu mpo a, ebɛnadze na yebotum ayɛ dze aboa afofor?

Ana inyim?

Bible no kyerɛkyerɛ dɛ sɛ yɛrobɔ Jehovah mpaa a, ɔsɛ dɛ yɛdze fa Jesus do. (Kenkan John 16:23, 24.) Sɛ yɛbɔ mpaa wɔ dɛm kwan no do a, nna yɛrekyerɛ dɛ dza Jesus ayɛ ama yeetum ayɛ Jehovah n’anyɛnkofo no, hɛn enyi sɔ.

BINOM KA DƐ: “Papa o, bɔn o, ne nyina yɛ Nyankopɔn ne nhyehyɛɛ.”