Ma Nkɔmbɔ No Ara Mfa No Ho Mbra

Dza Philip Yɛe

VIDEO: Philip Dzii Ethiopianyi Ahemfie Panyin Bi Dase

1. Hwɛ VIDEO no, anaa kenkan Asomafo Ndwuma 8:​30, 31. Afei, susu nsɛmbisa a odzidzi do yi ho:

1. Ebɛn asɛm na Philip kae dze hyɛɛ nkɔmbɔ no ase?

2. Ebɛnadze ntsi na yebotum aka dɛ dza ɔyɛe no na ɔkɔtwetwee nkɔmbɔ no bae ma otumii kyerɛkyerɛɛ nokwar no?

Ebɛnadze Na Yesua Fi Dza Philip Yɛe No Mu?

2. Sɛ yɛma nkɔmbɔ no ara dze no ho ba a, ɔbɛma nyimpa no efi n’akoma mu akasa na oetsie dza yɛwɔ ka no.

Suasua Philip

3. Fa w’enyi to famu. Sɛ enye obi rekasa a, hwɛ mbrɛ osi yɛ n’enyim nye mbrɛ osi yɛ n’adze no, na ɔbɛma ehu mbrɛ ɔtse ankasa. Iyi bɛma ehu dɛ ɔpɛ dɛ ɔnye wo bɔ nkɔmbɔ anaa ɔmmpɛ. Sɛ epɛ dɛ ehyɛ ase ka Bible mu asɛm bi kyerɛ no a, ibotum ebisa no dɛ, “Inyim dɛ . . . ?” Sɛ nyimpa no mmpɛ dɛ ɔnye wo bɔ nkɔmbɔ a, mma nnhyɛ no.

4. Mma mmper woho. Mma nnya adwen dɛ ehyɛ nkɔmbɔ no ase ara a, ɔsɛ dɛ eka Bible mu asɛm bi kyerɛ no. Tweɔn ma Bible mu asɛm bi ankasa mfa no ho mbra. Ɔtɔ da a, bi a ɔwɔ dɛ etweɔn na itu Bible mu asɛm a epɛ dɛ eka no hyɛ ber fofor.

5. Sɛ nkɔmbɔ no dan a, wo so dan no. Sɛ enye obi rekasa a, nkɔmbɔ a hom robɔ no botum asesa prɛko pɛ. Wɔse, ‘Sɛ mber dan a, wo so dan woho.’ Ntsi sɛ nkɔmbɔ no sesa a, wo so sesa dza nkyɛ epɛ dɛ eka no, na pɛ Bible mu asɛm bi a ɔfa asɛm a nyimpa no reka no ho, na ka kyerɛ no.