Jesus N’anwanwadze Ahorow No—Ebɛnadze Na Ibotum Esũa Efi Mu?
IBIA ɔbɛyɛ wo nwanwa dɛ ibohu dɛ kyerɛwtohɔ a ɔwɔ Bible mu a ɔfa Jesus n’asaase do asetsena ho no ammfa Greek kasafua a ogyina hɔ ma “anwanwadze” no enndzi dwuma. Dza Greek kasafua (dyʹna·mis) a ɔtɔ da a wɔkyerɛ ase “anwanwadze” no kyerɛ ankasa nye “ahoɔdzen.” (Luke 8:46) Na wotum so kyerɛ ase dɛ “tum” anaa “tum ndwuma.” (Matthew 11:20; 25:15) Dɛ mbrɛ nwomanyimfo bi kyerɛ no, dɛm Greek kasafua yi “si ndwuma akɛse a wɔayɛ, nye nkanka tum a wɔdze yɛɛ dɛm ndwuma no do dua. Wɔkã dɛm adzeyɛ yi ho asɛm dɛ Nyankopɔn no tum na ɔreyɛ edwuma.”
Wɔtaa kyerɛ Greek kasafua fofor (teʹras) ase dɛ “anwanwadze.” (John 4:48; Asomafo Ndwuma 2:19) Dɛm kasafua yi si nkantando a dɛm anwanwadze no nyae wɔ hɔn a wohunii no do dua. Nyimpadodow nye esuafo no ho boow hɔn mpɛn pii aber a wohun Jesus no tum ndwuma no.—Mark 2:12; 4:41; 6:51; Luke 9:43.
Greek kasafua a ɔtɔ do ebiasa (se·meiʹon) a wɔdze kã Jesus n’anwanwadze ho asɛm no kyerɛ “asɛnkyerɛdze.” Nwomanyimfo bi a wɔfrɛ no Robert Deffinbaugh kã dɛ: “Ɔtwe adwen si anwanwadze no ne nkyerɛase a no mu dɔ no do.” Ɔdze kãa ho bio dɛ: “Asɛnkyerɛdze yɛ anwanwadze a ɔda hɛn Ewuradze Jesus ho nokwasɛm edzi.”
Ndaadaasɛm Anaa Tum A Ofi Nyankopɔn Hɔ?
Bible no nnkã Jesus n’anwanwadze ho asɛm dɛ ɔyɛ ndaadaasɛm bi a nna ɔdze gyegye nyimpa enyi kɛkɛ. Dɛ mbrɛ yehu fa banyimba a Jesus tuu mbɔnsam fii no mu ho no, nna ɔyɛ ‘Nyankopɔn no tum kɛse’ na ɔreda no edzi. (Luke 9:37-43) Aso dɛm tum ndwuma yi bɛyɛ dzen ama Adze Nyina Do Tumfo Nyankopɔn—Nyia wɔkã noho asɛm dɛ ‘n’ahoɔdzen yɛ kɛse’ no? (Isaiah 40:26) Oho, ɔrennyɛ dzen mma no koraa!
Nsɛmpa nwoma no kã anwanwadze ahorow 35 a Jesus yɛe ho asɛm. Naaso ɔnnda anwanwadze ahorow a Jesus yɛe nyina no dodow edzi. Dɛ nhwɛdo no, Matthew 14:14 kã dɛ: ‘Na Jesus hun nyimpadodow pii, na ne yamu hyehyee no maa hɔn, na ɔyɛɛ hɔn ayarfo edur.’ Wɔannkã nyimpadodow a ɔsaa hɔn yarba dɛm aber no ho asɛm annkyerɛ hɛn.
Nna tum ndwuma a ɔtse dɛm no yɛ kã a Jesus kã dɛ ɔyɛ Nyankopɔn ne Ba, Messiah a wɔahyɛ noho bɔ no ho adanse tsitsir. Kyerɛwnsɛm no ankasa daa no edzi dɛ Nyankopɔn na ɔmaa Jesus tum ma ɔdze yɛɛ anwanwadze ahorow no. Ɔsomafo Peter kãa Jesus ho asɛm dɛ, “ɔbarimba a Nyankopɔn dze ahoɔdzendze nye anwanwadze nye nsɛnkyerɛdze a ɔnam no do yɛe wɔ hom mu yii no kyerɛɛ hom, dɛ mbrɛ homankasa so hom nyim no.” (Asomafo Ndwuma 2:22) Peter daa no edzi ber fofor so dɛ “Nyankopɔn dze sunsum krɔnkrɔn nye ahoɔdzen seraa [Jesus], na okyinii yɛɛ yie, na ɔyɛɛ hɔn a abɔnsam dzi hɔn do tum no nyina edur, osiandɛ Nyankopɔn ka no ho.”—Asomafo Ndwuma 10:37, 38.
Jesus yɛɛ anwanwadze ahorow aber a nna ɔrekã asɛmpa no. Mark 1:21-27 da mbrɛ nyimpadodow no yɛɛ hɔn adze wɔ Jesus ne nkyerɛkyerɛ nye n’anwanwadze kor ho no edzi. Mark 1:22 kã dɛ “ne nkyerɛkyerɛ yɛɛ hɔn ahobow,” na nyiyimu 27 no so ma yehu dɛ nyimpadodow no hɔnho “boow hɔn” dɛ Jesus etu esunsum fĩ. Jesus no tum ndwuma nye ne nkyerɛkyerɛ daa no edzi dɛ ɔno nye Messiah a nna wɔahyɛ no ho bɔ no.
Jesus annkyerɛ kɛkɛ dɛ ɔno nye Messiah no; ne nsɛm nye ndwuma afofor a ɔyɛe, nye tum a Nyankopɔn dze maa no ma ɔdze yɛɛ anwanwadze ahorow no nyina dzii adanse dɛ ɔno nye Messiah no. Aber a nsɛmbisa soɛree faa Jesus no dwumadzi nye no tum ho no, ɔdze akokodur yii ano dɛ: “Emidze, mowɔ dasefo a ɔkyɛn John [Onumanyi no], na ndwuma a Egya no dze ama me dɛ munwie no, ndwuma a meyɛ noara gye mo ho dase dɛ Egya no na ɔasoma me.”—John 5:36.
Adanse A Ɔkyerɛ Dɛ Jesus N’anwanwadze No Yɛ Nokwar
Ebɛnadze ntsi na yebotum agye edzi dɛ anwanwadze a Jesus yɛɛ no yɛ paara, na ɔyɛ nokwar turododo? Susu adanse ahorow a ɔma ɔyɛ nokwar turododo no ho.
Aber a Jesus yɛɛ tum ndwuma ahorow no, ɔanntwe adwen ammba noho do da. Ɔhwɛe hun dɛ dza obefi anwanwadze biara a ɔbɛyɛ mu aba no, ɔdze ho enyimnyam nye nkamfo bɛma Nyankopɔn. Dɛ nhwɛdo no, ansaana Jesus resa onyifurafo bi yarba no, osii do dua dɛ ɔresa yarba no mbrɛ ɔbɛyɛ a “Nyankopɔn ndwuma bɛda edzi wɔ no mu ntsi a.”—John 9:1-3; 11:1-4.
Nna Jesus nntse dɛ nkongyaayifo nye gyedzi ayarsafo no, dɛm ntsi ɔammfa kaberkyer, ndaadaasɛm, guadodze nye amandze ahorow bi do annsa yarba da. Ɔammfa gyedzihun anaa nyamesom mu nkaadze bi enndzi dwuma. Hyɛ kwan tsiabaa bi a ɔfaa do saa enyifurafo beenu bi yarba no nsew. Kyerɛwtohɔ no kã dɛ: “Jesus ne yamu hyehyee no wɔ hɔn ho, na ɔkaa hɔn enyiwa, na ntsɛmara wohun adze na wɔkaa no do.” (Matthew 20:29-34) Jesus annyɛ amandze anaa biribi kukuntann biara, na ɔannhyɛ da ara so ammfrɛfrɛ nyimpadɔm emmbehyia mu. Jesus annyɛ n’anwanwadze no wɔ nsumaa mu, na mbom wɔ adasefo pii enyim. Ɔammfa nkandzea hyirenhyireen, asɛnkadaka soronko anaa ahosiesie soronko bi enndzi dwuma tse dɛ mbrɛ ndɛ wɔyɛ no. Ndɛ, hɔn a wɔse wɔyɛ anwanwadze ahorow no nnyɛ dza wɔyɛ no ho kyerɛwtohɔ tse dɛ mbrɛ wɔyɛe no wɔ Jesus n’aber do no.—Mark 5:24-29; Luke 7:11-15.
Ɔtɔ da a, nna Jesus kã gyedzi a hɔn a ɔsaa hɔn yarba no wɔ no ho asɛm. Naaso sɛ obi nnyi gyedzi mpo a, nna ɔno mpo nntum nnsiw Jesus kwan dɛ ɔbɛsa no yarba. Aber a nna Jesus wɔ Capernaum a ɔwɔ Galilee no, “wɔdze [nkorɔfo] pii a mbɔnsam afa hɔn brɛɛ no; na ɔdze n’asɛm tuu esunsum no, ɔyɛɛ hɔn a wɔyar nyina edur.”—Matthew 8:16.
Jesus yɛɛ anwanwadze ahorow dze dzii nkorɔfo hɔn honam afamu ehiadze ho dwuma, nnyɛ dɛ nna ɔreyɛ dɛm dze aasɔ hɔn a wɔrepɛ biribi ehu no enyi. (Mark 10:46-52; Luke 23:8) Jesus annyɛ anwanwadze ammfa ammpɛ narankasa ne mfaso wɔ kwan biara do.—Matthew 4:2-4; 10:8.
Asɛmpa No Ho Kyerɛwtohɔ Ahorow No So Ɛ?
Nsɛmpa anan no ma yehu anwanwadze ahorow a Jesus yɛe no. Dza dɛm kyerɛwtohɔ yi kã fa anwanwadze ahorow a Jesus yɛe no ho no, aso yebotum enya mu ahotodo? Nyew, yebotum.
Dɛ mbrɛ yeedzi kan ehu no, Jesus yɛɛ n’anwanwadze ahorow no wɔ bagua mu, wɔ nyimpa pii enyim. Wɔkyerɛɛw Nsɛmpa a odzi kan no wɔ aber a nna hɔn a wohuu anwanwadze no mu dodow no ara da ho tse ase. Wɔ Asɛmpa akyerɛwfo no hɔn nokwardzi ho dze, nwoma bi a wɔato dzin The Miracles and the Resurrection kã dɛ: “Ɔrennyɛ papa dɛ obi bɔbɔ asɛmpa akyerɛwfo no sombo dɛ wɔahyɛ da ara akã nsɛm bi a ɔkyerɛ dɛ anwanwadze ahorow no sii wɔ abakɔsɛm mu mbrɛ ɔbɛyɛ a wɔdze bɔfoa nyamesom nkyerɛkyerɛ bi do. . . . Nna wɔyɛ akyerɛwfo a wodzi nokwar.”
Jewfo a wɔsoɛɛr tsiaa Christiansom no mpo anngye anwanwa ndwuma a wɔakã ho asɛm wɔ Nsɛmpa no mu ho no kyim. Tum a Jesus nam do yɛɛ dɛm anwanwa ndwuma yi na wɔgyee ho kyim. (Mark 3:22-26) Dɛmara so na akasatsiafo a ekyir yi wɔbae no mpo enntum anngye Jesus n’anwanwadze no ho kyim. Dza ɔnye iyi bɔ ebira no, wɔ afeha a odzi kan nye afeha a otsĩa ebien H.B. no, nna kyerɛwtohɔ ahorow a ɔtwe adwen si anwanwadze ahorow a Jesus yɛe no do wɔ hɔ. Ɔda edzi pefee dɛ, yɛwɔ siantsir a odzi mũ a ɔno ntsi yebu Asɛmpa kyerɛwtohɔ a ɔfa Jesus n’anwanwadze ahorow ho no dɛ ɔyɛ nokwar.
Dza Yenyim Fa Nyimpa A Ɔyɛɛ Anwanwadze Ahorow No Ho
Sɛ yegyina adanse ahorow a ɔkyerɛ dɛ anwanwadze a Jesus yɛe no yɛ nokwar nkotsee do dze yɛ Jesus n’anwanwadze ahorow no ho nhwehwɛmu a, hɛn nhwehwɛmu no nnkedzi mũ ara da. Sɛ Nsɛmpa no rekã Jesus n’anwanwadze ahorow no ho nsɛm a, ɔma yehu dɛ nna Jesus yɛ nyimpa a ɔwɔ tsema nye ayamuhyehye a no mu yɛ dzen, na nna ɔdwen ne nyɛnko nyimpa ho so.
Susu kwatanyi bi ho hwɛ. Ɔbaa Jesus nkyɛn bɛserɛɛ no dzendzenndzen dɛ: “Sɛ epɛ a, ibotum dɛ ema mo ho san.” “[Jesus] ne yamu hyehyee no,” na ɔtseen ne nsa kaa kwatanyi no kãa dɛ: “Mepɛ, wo ho nsan.” Amonmu hɔ ara na ɔbarimba noho tɔɔ no. (Mark 1:40-42) Jesus nam dza ɔyɛe no do daa tsema edzi, na tsema a ɔwɔ no kaa no ma ɔdze tum a Nyankopɔn dze ama no no yɛɛ anwanwadze ahorow.
Ebɛn asɛm na osii aber a Jesus hyiaa hɔn a wɔso fun rokɔ esiei wɔ Nain kurotsia no? Nna aberantsɛ a oewu no yɛ okunafo bi ne ba kor pɛ. Jesus “ne yamu hyehyee no maa” ɔbaa no, na ɔkɔr ne nkyɛn kɛsee no dɛ: “Mma nnsũ.” Afei onyaan aberantsɛ no baa nkwa mu.—Luke 7:11-15.
Esuadze a ɔma awerɛkyekyer a yebotum enya efi Jesus n’anwanwadze ahorow no mu no nye dɛ, nna ne ‘yamu hyehye no ma nkorɔfo’ na ɔyɛɛ ndzɛmba boaa hɔn no. Naaso dɛm anwanwadze ahorow no nnyɛ abakɔsɛm mu adze bi kɛkɛ. Hebrewfo 13:8 kã dɛ: “Jesus Christ tse dɛmara ndeda, nye ndɛ, nye daapem nyina.” Seseiara dze, oridzi Hen wɔ sor, na ɔayɛ krado dɛ ɔdze tum a Nyankopɔn dze ama no dɛ ɔmfa nyɛ anwanwadze no bedzi dwuma akyɛn dza ɔyɛe ber a nna ɔyɛ nyimpa wɔ asaase do no. Ɔnnkɛkyɛr, Jesus dze no tum no bedzi dwuma dze asa nyimpa a wɔyɛ setsie nyina yarba. Jehovah Adasefo enyi bɛgye ho dɛ wɔbɔboa wo ma eesũa pii afa daakye a yɛrohwɛ kwan a ɔyɛ enyigye yi ho.
[Mfonyin]
Jesus n’anwanwadze ahorow no daa ‘Nyankopɔn no tum kɛse’ no edzi
[Mfonyin]
Nna Jesus yɛ nyimpa a ɔwɔ tsema a no mu yɛ dzen