Bible Mu Nsɛm A Wɔakyerɛkyerɛ Mu

A D E G H M N Ɔ S W

A

• Adakamona.

  Sɛ wɔdze akyerɛwaba kakraba hyɛ kasafua yi n’akyerɛw ase na ɔyɛ “adakamona” a, ɔkyerɛ amona a obi wu a wosie no wɔ mu. Naaso sɛ wɔdze akyerɛwaba kɛse hyɛ ase na ɔyɛ “Adakamona” a, ogyina hɔ ma adasamba nyina adakamona. Hebrew mu no, wɔfrɛ no “Sheol” na Greek mu so, wɔfrɛ no “Hades.” Bible mu no, wɔdze gyina hɔ ma beebi a edwuma biara nnkɔ do wɔ hɔ. Wotum so dze gyina hɔ ma beebi a sɛ obi kɔ a, onntum nnyɛ dza wɔyɛ no wɔ wiadze no mu biara bio.​—Ge 47:30; Ɔsɛ 9:10; Mt 27:61; Adw 2:31.

• Adɔyɛ.

  Iyi yɛ adɔyɛ a nna wɔyɛ ma ehiafo. Dza ɔkyerɛ nye dɛ obi dze biribi bɛkyɛ obi a odzi hia. Ɔwɔ mu dɛ Hebrew Kyerɛwnsɛm no nnhyɛ da ara nnka adɔyɛ yi ho asɛm pɔtsee dze, naaso Moses Mbra no dze akwankyerɛ pɔtsee maa Israelfo no dɛ ɔsɛ dɛ wɔboa ehiafo.​—Mt 6:2.

• Asɛndua.

  Wɔkyerɛ Greek kasafua stauros ase dɛ asɛndua. Na dza ɔkyerɛ nye dua tsentsen bi a wɔdze esi hɔ tse dɛ dza wokum Jesus wɔ do no. Dase biara nnyi hɔ a ɔkyerɛ dɛ Greek kasafua stauros kyerɛ krɔs anaa mbeamudua. Mfe pii ansaana Christ reba no, nna hɔn a wɔsom abosom no dze krɔs anaa mbeamudua yɛ hɔn som mu asɛnkyerɛdze. Kasafua “asɛndua” a wɔdze gyinaa hɔ maa Greek kasafua stauros no, ɔfata paa osiandɛ ɔma yɛtse dɛm kasafua no ase yie. Jesus so dze kasafua stauros dzii dwuma dze kyerɛɛ ayakayakadze, amandzehu na enyimguase a n’ekyirdzifo bɛfa mu. (Mt 16:24; Heb 12:2)​—Hwɛ DUA.

D

• Dua.

  Ɔyɛ dua a wɔdze esi hɔ tsentsen a wɔdze nyimpa sɛn do anaa wɔdze no fam ho. Aman bi do no, nna wɔsɛn nyimpa wɔ dua do. Nna wotum so dze obi a oewu no fun sɛn dua do dze yɛ kɔkɔbɔ ma afofor, anaadɛ wɔdze gu nyimpa no n’enyim ase wɔ bagua mu. Nna wonyim Asiriafo no dɛ hɔn tsirmu yɛ dzen paa. Sɛ nna wɔkɔ ko na wonya nkowaa a, nna wɔdze ndua a n’ano yɛ mfeamfeaa wɔ hɔn ayerɛdze (yafun ase) ma obopue hɔn akoko. Wowie a nna wɔdze hɔn asɛn dua no do esi hɔ. Jewfo hɔn mbra no mu dze, sɛ nna obi ka ebususɛm, ɔsom abosom, anaa ɔyɛ bɔn kɛse bi a, nna wodzi kan siw no abo anaa wɔfa kwan fofor bi do ku no. Sɛ wowie a nna wɔdze no fun no asɛn dua do dze abɔ hɔn a wɔaka no kɔkɔ. (De 21:22, 23; 2Sa 21:6, 9) Romefo no dze, sɛ nna ɔtɔ da na sɛ wɔpɛ dɛ woku obi a, nna wɔkyekyer dɛm nyimpa no fam dua ho. Ɔba no dɛm a, nyimpa no nnwu ntsɛm. Mbom ibohu dɛ ɔyaw, nsukɔm, ɔkɔm na ewia ruku no nkakrankakra. Na sɛ ɔtɔ da so na wobu obi fɔ dɛ wonku no a, nna wotum dze mprɛgow bɔ ne nsa na n’anan mu fam dua no ho. Na dɛm na wɔdze yɛɛ Jesus. (Lu 24:20; Joh 19:14-16; 20:25; Adw 2:23, 36)​—Hwɛ ASƐNDUA.

E

• Edwamambɔ.

  Iyi fi Greek kasafua porneia mu. Wɔdze kasafua porneia gyina hɔ ma nda mu ndzeyɛɛ ahorow a Nyankopɔn kyir. Bi nye awarsɛɛ, tuutuusi, nda mu nkitahodzi a ɔkɔ do wɔ banyin na basia a wɔnnyɛ awarfo ntamu, mbanyimfo a wɔnye hɔnho da anaa mbasiafo a wɔnye hɔnho da, nye nyimpa a ɔnye abowa da. Nyikyerɛ nwoma no ka tuutuunyi bi a ɔwɔ nyamesom mu a wɔfrɛ no “Babylon Kɛse” no ho asɛm. Ɔka dɛ ɔnye wiadze etumfo ayɛ kor mbrɛ ɔbɛyɛ a obenya tum na ahonyadze.​—Ny 14:8; 17:2; 18:3; Mt 5:32; Adw 15:29; Ga 5:19.

• Ehyɛ.

  Wonya fi ndua na nhaban bi no mu nsu a wɔakyenkyen mu. Na dɛm ndua na nhaban yi na wɔka bɔ mu yɛ Boswellia kuw no. Sɛ wɔhyew a oyi nka huahuannhuam. Eduhuam krɔnkrɔn a nna wɔdze dzi dwuma wɔ ntamadan no nye asɔrdan no mu no, nna ehyɛ ka ndzɛmba a wɔdze fora yɛ no ho. Nna wɔdze ka edziban afɔr no so ho. Afei so, paanoo a nna wɔdze ba Nyankopɔn n’enyim wɔ Krɔnkrɔnbea hɔ no, sɛ wɔhyehyɛ esia biara a nna wɔdze ehyɛ to do.​—Ex 30:34-36; Le 2:1; 24:7; Mt 2:11.

G

• Gehenna.

  Ɔyɛ dzin bi a nna wɔdze frɛ Hinnom Bɔnsa no wɔ Greek kasa mu. Nna ɔwɔ tsetse Jerusalem kurow no n’anaafo dze rokɔ n’anee afamu hɔ beebi (southwest). (Jer 7:31) Wɔhyɛɛ nkɔm dɛ Gehenna bɛyɛ beebi a nyimpa no fun bɛdeda. (Jer 7:32; 19:6) Dase biara nnyi hɔ a ɔkyerɛ dɛ nna wɔtow mbowa anaa nyimpa gu Gehenna hyew hɔn enyimon anaa wɔtseetsee hɔn wɔ hɔ. Ntsi Gehenna runntum nnyɛ beebi a wɔyɛ nyimpa ne kra ayakayakadze daa wɔ gya mu. Mbom Jesus nye n’esuafo no dze gyinaa hɔ maa daa ɔsɛɛ anaa ɔsɛɛ pasaa. Iyi nye “owu mprɛnu” no.​—Ny 20:14; Mt 5:22; 10:28.

H

• Herod.

  Ɔyɛ ebusua bi a nna wodzi hen wɔ Jewfo no do no hɔn dzin. Rome aban no na ɔmaa hɔn tum dɛ wondzi hɔn do. Obi a odzii kan dzii adze nye Herod Ɔkɛse no. Ɔno na ɔsanee sii Jerusalem asɔrfie no bio. Na osiandɛ nna ɔpɛ dɛ oku Jesus ntsi, ɔhyɛe ma wokunkum mbofra pii. Dɛm ndzɛmba yi na wɔdze nyim no paa. (Mt 2:16; Lu 1:5) Nna Herod Archelaus na Herod Antipas yɛ Herod Ɔkɛse no ne mba, na wɔmaa hɔn tum ma wodzii hɔn papa n’ahendzi no n’afa ahorow bi do. (Mt 2:22) Nna Antipas dzi Rome Ahenman no n’afa ahorow bi do, na nna wɔtaa frɛ no “ɔhen.” Mfe ebiasa a Christ dze yɛɛ no som edwuma no, nna Antipas na odzi adze. Na odzii adze araa kesii aber a nsɛm a ɔwɔ Asomafo Ndwuma tsir 12 no sisii. (Mr 6:14-17; Lu 3:1, 19, 20; 13:31, 32; 23:6-15; Adw 4:27; 13:1) Iyi ekyir no, Herod Ɔkɛse ne banana Herod Agrippa I, bedzii adze. Naaso wɔannkyɛr biara na Nyankopɔn no bɔfoe kum no. (Adw 12:1-6, 18-23) Herod Agrippa I ne ba Herod Agrippa II bedzii n’adze, na odzii adze araa kesii ber a Jewfo no tseew etua tsiaa Rome aban no.​—Adw 23:35; 25:13, 22-27; 26:1, 2, 19-​32.

• Hesɔp.

  Ɔyɛ eduadzewa bi a oyiyi nkorbata na ahataw nketsenketse. Sɛ nna wɔretsew nyimpa anaa adze bi ho a, nna wotum dze hesɔp bɔ bɔgya anaa nsu mu dze petsepetse ho. Greek na Hebrew kasafua a wɔakyerɛ ase wɔ Bible no mu dɛ hesɔp no, obotum egyina hɔ ama nduadzewa asorɔtow pii. ‘Hesɔp’ a wɔaka ho asɛm wɔ John 19:29 no botum ayɛ eduadzewa bi a onyin yɛ tsentsenntsen. Dɛm ntsi nna wobotum dze sapɔw a wɔdze bɔɔ nsa a wɔakaw no mu no asɛn do dze akɔ Jesus n’ano.​—Ex 12:22; Nd 51:7.

M

• Mbae anaa Aba.

  Christianfo Greek Kyerɛwnsɛm no mu no, ɔtɔ da a, wɔdze “mbae” anaa “aba” kyerɛ aber a wɔnye Jesus Christ sii adze do wɔ sor dɛ Messiah Ahendzi no do Hen wɔ wiadze yi n’ewiei mber mu no. Sɛ wɔka Christ ne mbae a, ɔnnkyerɛ dɛ Christ bae ara nna ɔrokɔ, mbom obedzi ber tsentsen bi.​—Mt 24:3.

• Mɛɛr.

  Ɔyɛ ndua bi no mu nsu a wɔakyenkyen a ɔyɛ huam. Wonya fi ndua a ɔyɛ nsoɛnsoɛ anaa ndua nketsenketse bi mu. Dɛm ndua yi na wɔka bɔ mu yɛ Commiphora kuw no. Nna mɛɛr ka ndzɛmba a wɔdze yɛ ɔserango krɔnkrɔn no ho. Nna wɔdze gu ndzɛmba bi tse dɛ mpa do, anaa ntar mu ma ɔyɛ huam. Afei so, nna wɔdze fora ngo mu ma wɔdze twetwe nyimpa, na wotum dze fora nku a wɔdze sera so mu. Nna wotum dze mɛɛr fora nsa so mu, ama obi nom a ɔaanntse yaw. Afei so, nna wɔdze serasera fun ho ansaana woekesie no.​—Ex 30:23; Mbɛ 7:17; Mr 15:23; Joh 19:39.

N

• Ndzeyɛɛ a ɔyɛ enyito.

  Dɛm asɛmfua yi fi Greek kasafua aselgeia mu. Na ɔyɛ biribi a sɛ obi yɛ a, otsia Nyankopɔn ne mbra paa. Ɔyɛ ndzeyɛɛ ahorow a ɔkyerɛ dɛ obi asen no kɔn na ɔawe ataa do dɛ ɔrennkyerɛ obu ketseketse bi mpo mma Nyankopɔn ne mbra. Bio so, ɔkyerɛ dɛ dɛm nyimpa no mmbu tumdzi, mbra anaa nhyehyɛɛ biara so. Ndzeyɛɛ a ɔyɛ enyito nnyɛ bɔn nketsenketse.​—Ga 5:19; 2Pe 2:7.

• Nkaweedur.

  Ɔyɛ biribi a wotum dze fora isiam anaa adze fofor mu ma ɔkaw. Sɛ mbɔr anaa isiam bi kaw a, wobotum dze afora mbɔr fofor anaa isiam fofor mu ma ɔno so aakaw. Mpɛn pii no, Bible no dze nkaweedur gyina hɔ ma bɔn anaa ndaadaasɛm. Wotum so dze gyina hɔ ma biribi a orinyin a wonnhu.​—Ex 12:20; Mt 13:33; Ga 5:9.

Ɔ

• Ɔkra anaa Kra.

  Wɔkyerɛ Hebrew kasafua nephesh na Greek kasafua psykhe ase dɛ ɔkra. Sɛ yɛhwɛ mbrɛ wɔdze dɛm nkasafua yi dzi dwuma wɔ Bible no mu a, ɔma yehu dɛ sɛ wɔka ɔkra a, obotum akyerɛ (1) nyimpa, (2) mbowa, anaadɛ (3) nyimpa anaa abowa bi no nkwa. (Ge 1:20; 2:7; Nk 31:28; 1Pe 3:20; hwɛ ase hɔ nsɛm no so.) Sɛ yɛhwɛ mbrɛ ɔsom ahorow dze kasafua “ɔkra” dzi dwuma no a, ɔyɛ soronko koraa fi dza Bible no ka no ho. Bible no ma yehu dɛ, sɛ wɔdze nephesh anaa psykhe ka abɔdze a wɔwɔ asaase do ho asɛm a, obotum akyerɛ adze a ɔwɔ honam, adze a wobotum esuo mu, adze a wobotum dze enyiwa ehu anaa adze a obotum ewu. Bible yi mu dze, beebi a nephesh anaa psykhe pue no, mpɛn pii no, wɔhwɛ adzekor a wɔreka ho asɛm no na wɔkyerɛ ase ma ɔnye no hyia. Wotum kyerɛ ase “nkwa,” “abɔdze,” “nyimpa,” “obi ne nyimpadua nyina,” anaa wɔdze dzinhyɛananmu kyerɛ ase. (Dɛ mfatoho no, sɛ wɔrekyerɛ “me kra” ase a, wotum kyerɛ ase “me” anaa “mo”). Mpɛn pii no, sɛ wɔdze kasafua fofor bi gyina hɔ ma ɔkra a, ibohu dɛ wɔdze kasafua “ɔkra” no ankasa so ahyɛ ase hɔ asɛm no mu. Dɛm ntsi, sɛ “ɔkra” pue wɔ Bible no mu anaa ase hɔ asɛm no mu a, dɛm nkyerɛkyerɛmu ahorow yi boa hɛn ma yɛtse ase. Sɛ Bible no ka dɛ obi mfi ne kra nyina mu nyɛ biribi a, ɔkyerɛ dɛ ɔsɛ dɛ ɔdze ne nyimpadua nyina, n’akoma nyina anaa no nkwa nda nyina yɛ dɛm adze no. (De 6:5; Mt 22:37) Ɔyɛ so a, nephesh na psykhe botum akyerɛ biribi a ɔda abɔdze bi n’akoma do anaa no kɔn dɔ. Obotum so akyerɛ nyimpa anaa abowa a oewu.​—Nk 6:6; Mbɛ 23:2; Isa 56:11; Hag 2:13.

• Ɔmantɔw Soafo.

  Sɛ nna Rome Mbrahyɛ Bagua no hwɛ ɔmantɔw bi do a, nna wɔfrɛ ɔpanyin paa a ɔda dɛm ɔmantɔw no ano no Ɔmantɔw Soafo. Ɔwɔ mu dɛ nna ɔhyɛ Mbrahyɛ Bagua no ase dze, naaso nna ɔwɔ tum a ɔdze bu atsɛn wɔ ɔmantɔw no mu. Na asogyafo a wɔwɔ ɔmantɔw no mu so, nna ɔno na wɔhyɛ n’ase. Nna Mbrahyɛ Bagua no tum hwehwɛ ne nsɛm mu, naaso nna ɔno na ɔwɔ tum paa wɔ ɔmantɔw no mu.​—Adw 13:7; 18:12.

S

• Syrtis.

  Ɔyɛ mpoano bi a ɔwɔ beebi a ndɛ wɔfrɛ no Tunisia na Libya no, wɔ Africa N’Etsifi afamu. Nsu a ɔwɔ hɔ no mu nndɔ, na ɔyɛ a nna asorɛkye a n’ano yɛ dzen taa boaboa po mu anhwea no ano wɔ mbea ahorow bi wɔ po no mu. Dɛm anhwea no, sɛ ɔboaboa ano gu ha ndɛ a, ɔkyena nna wɔaboaboa ano ekogu beebi fofor. Iyi ntsi nna hɔn a wɔka po do hɛn wɔ tsetse mber mu no suro paa dɛ wɔbɛfa hɔ.​—Adw 27:17.

W

• Werdam anaa Agyedze.

  Ɔyɛ biribi a wotua dze gye obi fi nkowaasom, asotwe, amandzehu, anaa bɔn mu. Otum so yɛ biribi a wotua dze yi asodzi bi a ɔda obi do no fi hɔ. Nna ɔnnyɛ aber nyina na ɔyɛ sika, mbom nna obotum so ayɛ adze fofor bi. (Isa 43:3) Nna ndzɛmba ahorow pii wɔ hɔ a ɔma wotua werdam. Bi na odzidzi do yi: Sɛ wɔwo ɔbabanyin bi wɔ Israel na sɛ ɔyɛ abakan a, nna ɔyɛ Jehovah nedze. Na dɛmara so na sɛ abowa bi wo n’abakan, na sɛ ɔyɛ onyin a, ɔno so yɛ Jehovah dze. Na osiandɛ nna woehyira do korakora ama Jehovah no som ntsi, sɛ nna wobotum agye no bio a, gyedɛ wotua ho werdam anaa mpata. (Nk 3:45, 46; 18:15, 16) Sɛ nna obi ne nantwi taa pempem nkorɔfo, na no wura no annhwɛ no do yie na ɔkɛpem obi ku no a, nna ɔsɛ dɛ woku no wura no so bi. Mbom sɛ otua werdam dze a, ɔnodze nna worunnku no. (Ex 21:29, 30) Naaso obi a nna ɔbɛhyɛ da ara eku obi dze, nna wɔrenngye werdam biara mmfa nngye no nkwa. (Nk 35:31) Werdam a noho hia paa nye Christ no werdam no. Jesus dze noho bɔɔ afɔr mbrɛ ɔbɛyɛ a obotua werdam no, na ɔaagye nyimpa a wɔyɛ setsie efi bɔn na owu mu.​—Nd 49:7, 8; Mt 20:28; Eph 1:7.

• Wiadze yi anaa Ndɛ mber yi.

  Greek kasafua aion a wɔkyerɛ ase dɛ wiadze yi no, ɔyɛ a wɔdze ka ndzɛmba a ɔrokɔ do ho asɛm anaaso dɛ wɔdze kyerɛ mber pɔtsee bi. Sɛ Bible no ka “ndɛ wiadze yi” a, ɔkyerɛ ndzɛmba a ɔrokɔ do wɔ wiadze yi mu. Ɔsan so kyerɛ mbrɛ nkorɔfo si bɔ hɔn bra wɔ wiadze yi mu. (2Ti 4:10) Nyankopɔn nye Israelfo no yɛɛ Mbra apam, na dɛm a ɔyɛe no maa mber bi hyɛɛ ase. Binom frɛ no Israelfo hɔn aber do anaa Jewfo hɔn aber do. Nyankopɔn nam Jesus Christ no werdam afɔrbɔ no do dze mber fofor (wiadze fofor) bi bae. Dɛm mber no dze, Christianfo a wɔdze sunsum krɔnkrɔn asera hɔn a wɔbɔ mu yɛ asafo no na wodzi mu akotsen. Nna Mbra apam no yɛ dɛm wiadze fofor yi no sunsuma. Sɛ wɔka “mber yi” a, ɔkyerɛ ndzɛmba a wɔakɔ do, ndzɛmba a ɔrokɔ do anaa ndzɛmba a ɔreba.​—Mt 24:3; Mr 4:19; Ro 12:2; 1Co 10:11.