Paradise Ho Bɔhyɛ No, Jehovah Dze Ne Nsa Ahyɛ Ase

1. Ebɛn asɛm na nkɔnhyɛnyi Isaiah kaa kyerɛɛ ne mfɛfo Israelfo no?

NKƆNHYƐNYI Isaiah kaa Jehovah ho asɛm dɛ ɔyɛ “nokwar Nyankopɔn.” Sɛ wɔkyerɛ kasafua “nokwar” ase a, dza ɔkyerɛ nye “amen.” (Isa. 65:16) Kasafua “amen” kyerɛ dɛ “ɔnyɛ hɔ” anaa “ɔmbra mu.” Sɛ yɛhwɛ Bible no mu a, aber biara a wɔbɛka “amen” afa Jehovah na Jesus ho no, ɔma yenya awerɛhyɛmu dɛ adze kor a wɔreka ho asɛm no yɛ nokwar. Dɛm ntsi yebotum aka dɛ nna asɛm a Isaiah reka akyerɛ ne mfɛfo Israelfo no mu da hɔ pefee. Ɔno nye dɛ: Jehovah akyerɛ dɛ, asɛm biara a ɔaka no bɛba mu. Nokwasɛm nye dɛ, sɛ Jehovah hyɛ bɔ a, odzi do.

2. Ebɛnadze ntsi na yebotum dze hɛnho ato asɛm a Jehovah aka afa hɛn daakye ho no do, na ebɛn nsɛmbisa na yebosusu ho?

² Na bɔ a Jehovah ahyɛ afa hɛn daakye ho no so ɛ, yɛgye dzi dɛ ɔno so bɛba mu anaa? Bɛyɛ mfe 800 wɔ Isaiah no wu ekyir no, ɔsomafo Paul kyerɛkyerɛɛ siantsir a yebotum enya awerɛhyɛmu dɛ Nyankopɔn n’anohoba ahorow nyina yɛ paara na ɔbɛba mu no mu. Paul kaa dɛ: “Nyankopɔn nndzi ator wɔ biribiara mu.” (Heb. 6:18) Dɛ mbrɛ mango dua nnkotum asow ekutu no, dɛmara na Jehovah a ɔyɛ nokwar nyina Farbaa no runntum nndzi ator da. Dɛm ntsi yebotum dze hɛn werɛ ahyɛ dza Jehovah aka nye anohoba ahorow a ɔabɔ afa hɛn daakye ho no nyina mu. Adzesua yi mu no, yebosusu dɛm nsɛmbisa yi ho: Ebɛnadze na Jehovah abɔ hɛn anohoba dɛ ɔdze bɛma hɛn daakye? Na ebɛn asɛm na Jehovah aka a ɔma yenya awerɛhyɛmu dɛ dɛm anohoba yi bɛba mu?

EBƐN ANOHOBA NA JEHOVAH DZE ABƆ HƐN?

3. (a) Ebɛn anohoba na ɔda Nyankopɔn n’asomfo hɔn akoma do paa? (Nyikyerɛ 21:​3, 4) (b) Sɛ yɛka dɛm anohoba yi ho asɛm kyerɛ nkorɔfo a, ɔyɛ a binom ka dɛn?

³ Anohoba a yɛrebɛka ho asɛm yi da Nyankopɔn n’asomfo a wɔwɔ wiadze nyina no hɔn akoma do paa. (Kenkan Nyikyerɛ 21:​3, 4.) Jehovah aka dɛ, ber bi bɛba a ‘owu, awerɛhow, su nye yaw nyina befi hɔ.’ Sɛ yɛnam asɛnka mu a, hɛn mu piinara taa kenkan dɛm kyerɛwnsɛm yi dze kyekye nkorɔfo hɔn werɛ na yɛma wohu mbrɛ asetsena bɛyɛ wɔ Paradise. Sɛ yɛka dɛm bɔhyɛ yi ho asɛm kyerɛ nkorɔfo a, ɔyɛ a binom ka dɛn? Ɔyɛ a wɔka dɛ, “Ɔyɛ asɛmpa, naaso menngye nndzi dɛ obotum esi wɔ asaase yi do.”

4. (a) Nna ebɛnadze na Jehovah nyim, na ebɛnadze na ohun dɛ obesi? (b) Sɛ anohoba a Jehovah dze abɔ hɛn no da nkyɛn a, ebɛnadze bio na Jehovah ayɛ?

⁴ Naaso, aber a Jehovah maa ɔsomafo John kyerɛɛw dɛm anohoba yi ho asɛm no, nna onyim dɛ ndɛ, sɛ yɛreka Ahendzi ho asɛmpa no a, yɛbɛka dɛm enyidado yi so ho asɛm. Bio so, asɛm a Jehovah kaa dɛ ɔbɛyɛ “ndzɛmba afofor” daakye no, nna onyim dɛ ɔbɛyɛ dzen ama nkorɔfo pii dɛ wɔbɛgye edzi. (Isa. 42:9; 60:2; 2 Cor. 4:​3, 4) Ntsi, yebesi dɛn aboa nkorɔfo ma wɔaagye edzi dɛ asɛm a ɔwɔ Nyikyerɛ 21:​3, 4 no bɛba mu? Afei so, yebesi dɛn ahyɛ gyedzi a yɛwɔ wɔ Jehovah na n’anohoba ahorow no mu dzen? Jehovah ammfa n’ano annka dɛm asɛm yi ara kɛkɛ, mbom ɔama hɛn ngyinado ahorow a obotum ama yaagye dɛm asɛm yi edzi. Ebɛn ngyinado ahorow na ɔdze ama hɛn?

JEHOVAH MA HƐN AWERƐHYƐMU DƐ DZA ƆAKA NO BƐBA MU

5. Ebɛn kyerɛwnsɛm na ɔma yɛgye dzi dɛ Nyankopɔn n’anohoba a ɔfa Paradise ho no bɛba mu, na ebɛn asɛm na ɔwɔ hɔ?

⁵ Kyerɛwnsɛm a odzi do yi ma yenya ngyinado ahorow bi a obotum aboa hɛn ma yaagye anohoba a Jehovah dze abɔ hɛn afa Paradise ho no edzi. Ɔka dɛ: “Nyia ɔtse ahengua no do no see dɛ, Hwɛ, mereyɛ adze nyina fofor na ɔsee me dɛ, Kyerɛw: na nsɛm no yɛ ampa nye nokwar. Na ɔsee me dɛ, Ayɛ hɔ. Emi nye Alpha nye Omega, ahyɛse nye ewiei.”—Nyi. 21:​5, 6a.

6. Ebɛnadze ntsi na asɛm a ɔwɔ Nyikyerɛ 21:​5, 6 hyɛ ahotodo a yɛwɔ wɔ Nyankopɔn n’anohoba no mu no dzen?

⁶ Ebɛnadze ntsi na dɛm Bible mu asɛm yi ma yɛgye to mu ampaara dɛ dza Nyankopɔn aka no, ɔkwan biara do ɔbɛba mu? Buukuu a wɔato dzin Adiyisɛm Awiei no kyerɛkyerɛ dɛm kyerɛwnsɛm yi mu dɛ: “Nhyira ahorow a adasamba anokwafo nsa bɛka daakye no, ɔtse dɛ mbrɛ Jehovah nankasa dze ne nsa rehyɛ ase ma adasamba eehu dɛ hɔn nsa bɛka.”b Ntsi aber a Nyankopɔn hyɛɛ bɔ a wɔayɛ ho kyerɛwtohɔ wɔ Nyikyerɛ 21:​3, 4 no wiei no, ɔdze asɛm a ɔwɔ nyiyimu 5 na 6 no kyerɛɛ dɛ ɔdze ne nsa ahyɛ dɛm anohoba no ase, na ɔbɛba mu ɔkwan biara do. Hom mma yɛnhyɛ da ara nhwɛ mbrɛ Jehovah sii no bɔhyɛ yi pi wɔ dɛm nyiyimu no mu.

7. Ebɛnadze na ɔma asɛm a ɔhyɛ Nyikyerɛ 21:5 no ase no da nsew, na ebɛnadze ntsi na dɛm asɛm no ho hia?

⁷ Nyiyimu 5 no hyɛ ase dɛ: “Nyia a ɔtse ahengua no do no see dɛ.” (Nyi. 21:5a) Mpɛn ebiasa a Jehovah nankasa kasaa wɔ Nyikyerɛ nwoma no mu, no mu kor nye yi, na dɛm nsɛm yi na ɔdze hyɛɛ ne kasaa no mu biara ase. Ntsi dɛm awerɛhyɛmu yi, ɔnnyɛ ɔbɔfo bi a ɔwɔ tum anaa Jesus a woenyan no no na ɔdze rema hɛn, na mbom ɔyɛ Jehovah nankasa! Iyi ma yehu hia a ohia dɛ yɛdze hɛn werɛ hyɛ nsɛm a ɔkae toaa do no mu. Ebɛnadze ntsi na yɛreka dɛm? Siantsir nye dɛ Jehovah ‘nndzi ator.’ (Titus 1:2) Dɛm asɛm yi ma yehu dɛ yebotum dze hɛnho ato asɛm a ɔwɔ Nyikyerɛ 21:​5, 6 no do koraa dɛ ɔbɛba mu.

“HWƐ, MEREYƐ NDZƐMBA NYINA FOFOR”

8. Ebɛn asɛm na Jehovah kae dze sii do dua dɛ n’anohoba no bɛba mu ɔkwan biara do? (Isaiah 46:10)

⁸ Afei ma yɛnhwɛ asɛm a odzi hɔ a Jehovah kae no. Ɔkaa dɛ: “Hwɛ.” (Nyi. 21:5) Sɛ yɛhwɛ Nyikyerɛ nwoma no mu a, wɔdze Greek kasafua a wɔkyerɛɛ ase “hwɛ” no dzii dwuma mpɛn pii wɔ mu. Nhwehwɛmu nwoma bi ka dɛ, nna wɔdze dɛm kasafua yi dzi dwuma “mbrɛ ɔbɛyɛ a ɔbɔtwe ɔkenkamfo no n’adwen akɔ asɛm a ɔtoa do no do.” Nyankopɔn kaa “hwɛ” no, ebɛn asɛm bio na ɔkae toaa do? Ɔkaa dɛ: “Mereyɛ ndzɛmba nyina fofor.” Nokwasɛm nye dɛ, dza Jehovah kaa ho asɛm yi bɛba daakye. Naaso, osiandɛ onyim paa dɛ ɔbɛyɛ dza ɔaka no ntsi, ɔkaa ho asɛm tse dɛ mbrɛ ogu do reyɛ.—Kenkan Isaiah 46:10.

9. (a) Asɛm a Jehovah kae a ɔno nye dɛ “mereyɛ ndzɛmba nyina fofor” no kyerɛ dɛn? (b) Ebɛn asɛm bɔto “sor” nye “asaase” a ɔwɔ hɔ ndɛ no?

⁹ Ma yɛnhwɛ asɛm a odzi hɔ a Jehovah kae wɔ Nyikyerɛ 21:5 no. Ɔkaa dɛ: “Mereyɛ ndzɛmba nyina fofor.” Sɛ yɛhwɛ Nyikyerɛ 21 no mu a, dɛm asɛm yi ma yehu ndzɛmba ahorow ebien bi a Jehovah pɛ dɛ ɔyɛ. Ɔno nye dɛ, obeyi ndzɛmba bi efi hɔ na ɔdze fofor abɛhyɛ ananmu, na oesiesie ndzɛmba bi so. Odzi kan, ebɛn ndzɛmba na Jehovah beyi efi hɔ na ɔdze fofor abɛhyɛ ananmu? Nyikyerɛ 21:1 ka dɛ: “Kan sor no nye kan asaase no etwa mu kɔ.” “Kan sor” a wɔkaa ho asɛm no gyina hɔ ma aban ahorow a Satan nye n’abɔfo bɔn no taa hɔn ekyir. (Matt. 4:​8, 9; 1 John 5:19) Bible tum dze “asaase” gyina hɔ ma nyimpa. (Gen. 11:1; Ndw. 96:1) Dɛm ntsi, “kan asaase” a wɔdze dzii dwuma wɔ ha no gyina hɔ ma nyimpa ndzebɔnyɛfo a wɔwɔ hɔ ndɛ no. Ntsi, Jehovah rinnsiesie “sor” nye “asaase” a ɔwɔ hɔ sesei no. Mbom no, obeyi efi hɔ korakora, na ɔdze “sor fofor nye asaase fofor” a ogyina hɔ ma aban fofor nye adasamba a wɔyɛ dza ɔtsen no abɛhyɛ ananmu.

10. Ebɛn ndzɛmba na Jehovah bɛyɛ no fofor?

¹⁰ Yɛhwɛ Nyikyerɛ 21:5 a, yɛsan hu dza Jehovah aka afa ndzɛmba a ɔbɛyɛ no fofor no ho. Hyɛ no nsew dɛ Jehovah annka dɛ: “Morobɔ ndzɛmba afofor koraa.” Mbom ɔkaa dɛ: “Mereyɛ ndzɛmba nyina fofor.” Jehovah besiesie asaase no na ɔaasa nyimpa a wɔwɔ do no yarba ma wɔaayɛ nyimpa a mfom biara nnyi hɔnho. Dɛ mbrɛ Isaiah kae too hɔ no, Jehovah besiesie asaase yi ma wɔaayɛ fɛfɛɛfɛw tse dɛ Eden ture no. Afei so, obesiesie hɛn nyimpadua no ma wɔaayɛ fofor, kyerɛ dɛ, ɔbɛsa hɛn yarba ma hɛnho atɔ hɛn korakora. Dɛm aber no, mbubuafo bɛnantsew, enyifurafo bohu adze, na hɔn a hɔn asowa esiw no bɛtse asɛm. Na obenyan ewufo asan aba nkwa mu bio.—Isa. 25:8; 35:​1-7.

‘NSƐM NO YƐ AMPA NYE NOKWAR, WƆAYƐ HƆ!’

11. Ebɛnadze na Jehovah kaa kyerɛɛ John dɛ ɔnyɛ, na ebɛnadze ntsi a?

¹¹ Ebɛn asɛm na Jehovah kae a ɔma yenya awerɛhyɛmu dɛ yebotum dze hɛnho ato nsɛm a ɔaka no do? Ɔno nye dɛ Jehovah kaa kyerɛɛ John dɛ: “Kyerɛw: na nsɛm no yɛ ampa nye nokwar.” (Nyi. 21:5) Ɔnnyɛ nsɛm no nkotsee na Jehovah kaa dɛ ‘ɔnkyerɛw,’ mbom ɔmaa ohun siantsir a nna ɔsɛ dɛ ɔkyerɛw no. Ɔkaa kyerɛɛ no dɛ: ‘Nsɛm no yɛ ampa nye nokwar!’ Iyi kyerɛ dɛ yebotum dze hɛnho ato nsɛm a Jehovah aka no do, osiandɛ ɔyɛ nokwar. Ɔyɛ hɛn dɛw paa dɛ John tsiee Jehovah na ‘ɔkyerɛɛw’ dɛm nsɛm yi. Osian iyi ntsi, yebotum akenkan Paradise a Nyankopɔn dze abɔ hɛn anohoba no ho nsɛm na yaadwendwen nhyira a yebenya no ho.

12. Ebɛnadze ntsi na Jehovah kaa dɛ: ‘Wɔayɛ hɔ!’

¹² Ebɛn asɛm bio na Nyankopɔn kae? Ɔkaa dɛ: ‘Wɔayɛ hɔ!’ (Nyi. 21:6) Jehovah kaa asɛm yi tse dɛ mbrɛ nna anohoba a ɔabɔ afa Paradise ho no nyina aba mu dada. Ebɛnadze ntsi na Jehovah kaa dɛm? Mbrɛ ɔtse nye dɛ, biribiara runntum nnsiw Nyankopɔn kwan wɔ dza ɔabɔ ne tsirmu dɛ ɔbɛyɛ no ho. Afei so, Jehovah kaa biribi fofor a ɔma yenya awerɛhyɛmu dɛ, sɛ ɔyɛ dɛn ara mpo a, anohoba a ɔdze abɔ hɛn no bɛba mu ɔkwan biara do. Ebɛn asɛm mpo na ɔkae?

“EMI NYE ALPHA NYE OMEGA”

13. Ebɛnadze ntsi na Jehovah kaa dɛ: “Emi nye Alpha nye Omega”?

¹³ Dɛ mbrɛ yeedzi kan aka ho asɛm no, Jehovah nankasa nye John kasaa mpɛn ebiasa wɔ enyido-adzehu no mu. (Nyi. 1:8; 21:​5, 6; 22:13) Mpɛn ebiasa a Jehovah nye John kasae nyina mu no, Jehovah kaa dɛ: “Emi nye Alpha nye Omega.” Sɛ yɛhwɛ Greek akyerɛwamba no mu a, alpha nye akyerɛwaba a odzi kan na omega nye akyerɛwaba a otwa tun. Ntsi aber a Jehovah kaa dɛ ɔno nye “Alpha nye Omega” no, nna ɔrepɛ akyerɛ dɛ sɛ ɔhyɛ biribi ase a, ɔkwan biara do no obowie.

14. (a) Ma nhwɛdo bi a ɔma yehu ber a Jehovah kaa “Alpha” nye ber a ɔbɛka “Omega” no. (b) Ebɛn awerɛhyɛmu na asɛm a ɔwɔ Genesis 2:​1-3 ma yenya?

¹⁴ Aber a Jehovah bɔɔ Adam na Eve no, ɔmaa wohun dza ɔbɛyɛ ama adasamba na asaase no. Bible no ka dɛ: “Nyankopɔn hyiraa hɔn na Nyankopɔn see hɔn dɛ, Hom nwo, na wɔndɔr, na wɔnhyɛ asaase do ma, na wɔnhom do.” (Gen. 1:28) Aber a Jehovah kaa dza ɔbɛyɛ ama adasamba na asaase no ho asɛm no, nna ɔtse dɛ mbrɛ ɔaka dɛ “Alpha” anaa ɔahyɛ ase. Ntsi nna ɔrohwɛ kwan dɛ Adam na Eve hɔn asefo a wɔyɛ setsie no bɛhyɛ asaase no do ma na woeesiesie do ma ɔadan Paradise. Ntsi sɛ nna dɛm asɛm no ba mu a, wɔ kwan bi do no nna Jehovah reka dɛ, “Omega.” Na aber a Jehovah wiee ‘sor nye asaase nye biribiara a ɔwɔ mu nyina yɛ no,’ Jehovah kaa biribi a ɔma yehu dɛ nna dza ɔabɔ ne tsirmu dɛ ɔbɛyɛ no bɛba mu ɔkwan biara do. Yehu dɛm asɛm yi wɔ Genesis 2:​1-3. (Kenkan.) Jehovah kaa dɛ ɔatsew da a otsia esuon no ho na ɔayɛ no krɔnkrɔn. Dɛm asɛm no kyerɛ dɛn? Iyi yɛ awerɛhyɛmu a Jehovah dze rema hɛn dɛ ɔmmfa ho dza obesi biara no, dza ɔabɔ ne tsirmu dɛ ɔbɛyɛ ama adasamba nye asaase yi nyina bɛba mu wɔ da a otsia esuon no n’ewiei.

15. Ebɛnadze ntsi na bi a Satan nyaa adwen dɛ ɔasɛɛ dza Nyankopɔn pɛ dɛ ɔyɛ ma adasamba no?

¹⁵ Aber a Adam na Eve tseew etua no, wɔbɛyɛɛ nyimpa a bɔn wɔ hɔnho, na wɔdze bɔn na owu gyaa hɔn asefo. (Rom. 5:12) Osian iyi ntsi, nna ɔtse dɛ mbrɛ Satan asɛɛ dza Nyankopɔn abɔ ne tsirmu dɛ ɔbɛyɛ no, ɔno nye dɛ ɔbɛma nyimpa a asɛm biara nnyi hɔnho na wotsie no no ahyɛ asaase no do ma. Nna wɔakɛyɛ tse dɛ mbrɛ Satan reka akyerɛ Jehovah dɛ orunntum nnka “Omega” da. Bi a nna Satan dwen dɛ ɔama Jehovah no ho akyer no na orunntum nndzi n’anohoba no do. Bi a nna Satan n’adwen nye dɛ, dza Jehovah botum ayɛ ara nye dɛ oboku Adam na Eve, na ɔabɔ awarfo fofor a bɔn biara nnyi hɔnho ama siantsir a ɔbɔɔ adasamba no aaba mu. Naaso sɛ Nyankopɔn yɛɛ dɛm a, nkyɛ Abɔnsam bɛka akyerɛ no dɛ ɔyɛ ɔtorfo. Ebɛnadze ntsi a? Osiandɛ wɔ Genesis 1:28 no, nna Jehovah aka akyerɛ Adam na Eve dɛ hɔn asefo na wɔbɛhyɛ asaase no do ma.

16. Ebɛnadze ntsi na nkyɛ obotum aba dɛ Satan bɛka akyerɛ Jehovah dɛ dza ɔkae no oenntum annyɛ?

¹⁶ Ebɛnadze fofor na bi a nna Satan susu dɛ Nyankopɔn bɛyɛ? Obotum aba dɛ Satan nyaa adwen dɛ Jehovah bɛma Adam na Eve awo mba dze, naaso nna bɔn remmpar dɛm mba no da. (Ɔsɛnk. 7:20; Rom. 3:23) Ekyingye biara nnyi ho dɛ, sɛ ɔba no dɛm a, nkyɛ Abɔnsam bɛka akyerɛ Jehovah dɛ dza ɔkae no, oenntum annyɛ. Ebɛnadze ntsi na yɛreka dɛm? Siantsir nye dɛ sɛ Nyankopɔn yɛɛ dɛm a nkyɛ dza ɔabɔ ne tsirmu dɛ ɔbɛma Adam na Eve hɔn asefo a bɔn biara nnyi hɔnho, na wotsie no no atsena Paradise asaase no do na wɔaahyɛ do ma no remmba mu.

17. Jehovah sii dɛn siesie etua a Satan, Adam na Eve tsewee no, na ebɛn mfaso na ɔbɛma yeenya? (Hwɛ mfonyin no so.)

¹⁷ Kwan a Jehovah faa do siesiee etua a Satan na awarfo a wodzi kan no tsewee no, Satan annda anndwen ho da. (Ndw. 92:5) Jehovah maa Adam na Eve woo mba, na iyi maa dza Jehovah kae no baa mu. Ntsi Satan ennya biribiara enngyina do ammbɔ Jehovah sombo dɛ ɔyɛ ɔtorfo. Afei so, Jehovah maa ɔdaa edzi dɛ sɛ ɔka dɛ ɔbɛyɛ biribi a, biribiara nntum nnsiw no kwan. Ɔhwɛe hun dɛ dza ɔaka no bɛba mu na ɔmaa hɛn ‘asenyi’ bi a ɔbɛgye Adam na Eve hɔn asefo a wɔyɛ setsie no nkwa. (Gen. 3:15; 22:18) Ɔbɛyɛ dɛ, werdam no ho nhyehyɛɛ a Jehovah yɛɛ no tɔɔ Satan do papaapa. Ebɛnadze ntsi na yɛreka dɛm? Siantsir a Jehovah dze werdam no maa hɛn nye dɛ, ɔdɔ hɛn papaapa. (Matt. 20:28; John 3:16) Naaso, Satan dze, nankotsee ne yieyɛ na ɔhwehwɛ, ɔnndɔ obiara. Ma yembisa dɛ, ebɛn mfaso na yebenya efi werdam no mu? Sɛ Christ dze mfe 1,000 dzi adze wie a, Adam na Eve hɔn asefo a wɔaabɛyɛ nyimpa a bɔn biara nnyi hɔnho no bɛtsena Paradise asaase do. Ɔno nye dza nna Jehovah abɔ ne tsirmu dɛ ɔbɛyɛ ama adasamba. Dɛm aber no, ɔbɛyɛ tse dɛ mbrɛ Jehovah reka dɛ, “Omega.”

YEBESI DƐN AHYƐ AWERƐHYƐMU A YƐWƆ WƆ PARADISE BƆHYƐ NO MU NO DZEN?

18. Ebɛn nsɛm ebiasa na Jehovah aka a ɔma yenya awerɛhyɛmu dɛ n’anohoba no bɛba mu? (Hwɛ adakaba a wɔato dzin “Siantsir Ebiasa Ntsi A Yebotum Dze Hɛnho Ato Jehovah No Bɔhyɛ No Do” no so.)

¹⁸ Adzesua yi mu no, yeebohu siantsir a yebotum enya awerɛhyɛmu dɛ asaase no bɛdan Paradise ampa. Ebɛnadze na yebotum aka akyerɛ nkorɔfo ma hɔn so woeenya awerɛhyɛmu dɛ dɛm anohoba yi bɛba mu ɔkwan biara do? Odzi kan, dɛm anohoba yi fi Jehovah nankasa hɔ. Nyikyerɛ nwoma no ka dɛ: “Nyia ɔtse ahengua no do no see dɛ, Hwɛ! mereyɛ ndzɛmba nyina fofor.” Enyigyesɛm nye dɛ, onyim kwan a obotum afa do ama n’anohoba yi aba mu, ɔwɔ tum, na ɔpɛ paa so dɛ ɔbɛyɛ dɛm. Otsia ebien, Jehovah hu dza ɔaka no dɛ ɔbɛba mu ɔkwan biara do. N’enyi do no, ɔtse dɛ mbrɛ wɔaba mu dada. Ɔaka dɛ: ‘Asɛm no yɛ nokwar nye ampa. Wɔayɛ hɔ!’ Otsia ebiasa, sɛ Jehovah ka dɛ ɔbɛyɛ biribi a, adze biara nnyi hɔ a obotum esiw no kwan. Iyi so ntsi, ɔse: “Emi nye Alpha nye Omega.” Jehovah bɛma obiara ehu dɛ Satan yɛ ɔtorfo, na orunntum nnsiw dza ɔabɔ ne tsirmu dɛ ɔbɛyɛ no kwan.

19. Sɛ nyimpa binom nngye Paradise a Nyankopɔn dze abɔ hɛn anohoba no nndzi a, ebɛnadze na ibotum ayɛ dze aboa hɔn?

¹⁹ Awerɛhyɛmu a Jehovah dze ama hɛn dɛ n’anohoba ahorow nyina bɛba mu no, ɔyɛ a yɛka ho asɛm kyerɛ nkorɔfo wɔ asɛnka mu. Aber biara a yɛbɛyɛ dɛm no, ɔma ahotodo a hɛnankasa yɛwɔ wɔ dɛm bɔhyɛ ahorow no mu no yɛ dzen. Ntsi sɛ erekenkan Paradise ho bɔhyɛ a ɔyɛ ahomka, tse dɛ dza ɔwɔ Nyikyerɛ 21:4 no akyerɛ obi, na sɛ ɔka dɛ ɔnngye nndzi a, ebɛyɛ dɛn aboa no? Ibotum akenkan nyiyimu 5 na 6 no akyerɛ no, na akyerɛkyerɛ no mu ma oehu dɛ, dɛm nsɛm no kyerɛ dɛ Jehovah nankasa dze ne nsa ahyɛ dɛm anohoba no ase, na ɔbɛma wɔaba mu wɔ kwan biara do.—Isa. 65:16.