Lako Yani

3 O Mosese e qai ivakatawanisipi nei Jecoro na vugona,+ na bete ni Mitiani. Ni kauta tiko na qelenisipi ina ra ni vanua talasiga, e yaco sara i Orepi na ulunivanua ni Kalou dina.+ 2 E qai rairai vua na agilosi i Jiova ena yameyame ni buka e loma ni dua na kau vakavotona.+ Ni rai tiko yani, e raica ni caudre tiko na kau vakavotona, ia e sega ni yavu na vunikau. 3 E kaya o Mosese: “Au na lako meu lai raica na ka duatani qo, meu raica mada se cava e sega ni kama yavu kina na kau vakavotona.” 4 Ni raica o Jiova ni lako yani me vakaraica, e kacivi koya sara mai na loma ni kau vakavotona qai kaya: “Mosese! Mosese!” e sauma o koya: “O yau saka qo.” 5 E qai kaya: “Kua ni toso voleka mai. Luvata mai yavamu nomu ivava, baleta na vanua o butuka tu e qele tabu.”

6 E kaya tale o koya: “O yau na Kalou i tamamu, na Kalou i Eparama,+ na Kalou i Aisake,+ kei na Kalou i Jekope.”+ E qai vunia na matana o Mosese, ni rere me raica na Kalou dina. 7 E kuria o Jiova: “Au sa raica dina na nodra vakaloloma na noqu tamata e Ijipita, au sa rogoca tale ga na nodra tagi ena vukudra na veivakasaurarataki mera cakacaka, niu kila vinaka na ka mosimosi era vakila tiko.+ 8 Ia qo au na lako sobu meu vakabulai ira mai na ligadra na kai Ijipita,+ au na qai kauti ira cake mai na vanua oya ina dua na vanua vinaka qai vakacirigalala, na vanua e drodro kina na sucu kei na oni,+ na nodra vanua na kai Kenani, na Itaiti, na Amoraiti, na Perisaiti, na Aivaiti, kei ira na Jepusaiti.+ 9 Ia raica! Sa yaco mai vei au na nodra tagi na Isireli, au sa raica tale ga na nodra vakaloloma nira vakasaurarataki vei ira na kai Ijipita.+ 10 Lako mai meu talai iko vei Fero, mo lai kauti ira tani mai Ijipita na noqu tamata, na Isireli.”+

11 Ia e kaya o Mosese vua na Kalou dina: “O cei o yau meu lako vei Fero, meu lai kauti ira tani na Isireli mai Ijipita?” 12 E sauma o koya: “Au na tiko sara ga kei iko,+ qo na ivakatakilakila vei iko ni o yau ga au talai iko: Ni o kauti ira tani na tamata mai Ijipita, oni na qarava* na Kalou dina ena ulunivanua qo.”+

13 Ia e kaya o Mosese vua na Kalou dina: “Vakacava keu yaco yani vei ira na Isireli, au qai kaya vei ira, ‘Na nodra Kalou na tukamuni e talai au tiko mai vei kemuni,’ ia ra qai taroga, ‘O cei na yacana?’+ Na cava meu tukuna vei ira?” 14 E mani kaya na Kalou vei Mosese: “Au na Cakava na ka ga au Vinakata.”*+ E kaya tale: “Qo na ka mo tukuna vei ira na Isireli, ‘O koya e talai au mai vei kemuni e yacana o Au na Cakava.’”+ 15 E kaya tale vei Mosese na Kalou:

“Qo na ka mo tukuna vei ira na Isireli, ‘O Jiova na nodra Kalou na tukamuni, na Kalou i Eparama,+ na Kalou i Aisake,+ kei na Kalou i Jekope+ e talai au mai vei kemuni.’ Qo na yacaqu me tawamudu,+ meu nanumi kina mai na dua na itabatamata ina dua tale na itabatamata. 16 Mo lako, lai kumuni ira na qase ni Isireli, mo kaya vei ira, ‘E rairai vei au o Jiova na nodra Kalou na tukamuni, na Kalou i Eparama, i Aisake, kei Jekope, e kaya: “Au sa raici kemuni+ kei na veika e caka vei kemuni e Ijipita. 17 Au mani kaya, au na kauti kemuni tani mai na veivakalolomataki+ e ligadra na kai Ijipita, ina nodra vanua na kai Kenani, na Itaiti, na Amoraiti,+ na Perisaiti, na Aivaiti, kei na Jepusaiti,+ ina vanua e drodro kina na sucu kei na oni.”’+

18 “Era na rogoca sara ga na domomu,+ o na lako, o iko kei ira na qase ni Isireli vua na tui Ijipita, moni kaya vua: ‘O Jiova na nodra Kalou na Iperiu+ e vosa vei keimami. Ni yalovinaka, me keimami lako ena ilakolako siga tolu ena vanua talasiga, me keimami lai vakacaboisoro vei Jiova na neimami Kalou.’+ 19 Ia o yau, au kila vinaka ni na sega ni vakadonuya na tui Ijipita moni lako, vakavo ke vakasaurarataki koya e dua na liga qaqa.+ 20 Au na qai dodoka yani na ligaqu meu mokuti Ijipita ena noqu cakacaka veivakurabuitaki kece e kea, oti oya ena qai vakatalai kemuni tani o koya.+ 21 Au na cakava mera nanumi na noqu tamata ena matadra na kai Ijipita, ni oni sa biubiu oni na sega ni lako ligalala.+ 22 Na yalewa yadua me kerea vei koya erau tiko veivolekati, vei koya tale ga na yalewa e tiko ena nona lomanivale na iyaya siliva, na iyaya koula, kei na isulu, moni qai vakadarama qori vei ira na luvemuni tagane kei ira na luvemuni yalewa, oni na yauta na nodra iyau na kai Ijipita.”+