Na Rai ni iVolatabu

Donu Beka ke Rau Veiyacovi ni Bera na Vakamau e Rua Erau Veidomoni?

RAUTA na 90 na pasede ni itabagone era vakatarogi era kaya ni kevaka erau veidomoni dina e rua, ena sega ni cala ke rau veiyacovi veitalia ke rau se bera ni vakamau. Oqo na rai e dau vakabulabulataki ena ivola kei na iyaloyalo yavala. Dau saravi se talanoataki kina nodrau veidomoni e rua, qai dau kena ivakarau ga ni rau na tini veiyacovi.

Ia, o ira na via vakamarautaka na Kalou era cata na rai ni vuravura, nira kila ni yavutaki oya ena vakasama ni Tevoro na kena iliuliu. (1 Joni 5:19) Era qarauna tale ga me kua ni lewai ira nodra vakasama, nira kila ni ‘dau veivakaisini na loma ni tamata qai dredre ni vinaka.’ (Jeremaia 17:9) O ira era vuku era nuitaki koya ga na Dauveibuli kei na nona Vosa.​—Vosa Vakaibalebale 3:5, 6; 2 Timoci 3:16.

iSolisoli ni Kalou na Veiyacovi

E kaya na Jemesa 1:17: “Sa lako maicake nai solisoli vinaka kecega kei nai solisoli kecega e yaga sara, a sa lako sobu mai vua na Tama ni rarama.” Dua vei ira na isolisoli talei oqori nodrau veiyacovi e rua erau sa vakamau. (Ruci 1:9; 1 Korinica 7:2, 7) Na isolisoli oqo e rawa kina na vakatubukawa, erau veivolekati tale ga kina vakayago na veiwatini ena sala e vakavumarau vei rau. Vola kina oqo na tui o Solomoni: “Mo marautaki koya sa watimu ni ko sa cauravou . . . Mo mamau ga e na sucuna e na veigauna kecega.”​—Vosa Vakaibalebale 5:18, 19.

O Jiova e vinakata meda marautaka na nona isolisoli. Oya na vuna e solia kina vei keda na lawa kei na idusidusi era vinaka vakaoti meda bulataka. (Same 19:7, 8) O Jiova e ‘vakavulici iko mo vinaka kina, qai tuberi iko e na sala mo lakova.’ (Aisea 48:17) Vakaevei, ena burogotaka vei keda e dua na ka e vinaka na Tamada vakalomalagi, e usutu ni nona bula na loloma?​—Same 34:10; 37:4; 84:11; 1 Joni 4:8.

Sega ni Yavutaki ena Loloma na Veiyacovi ni se Bera na Vakamau

Ni rau sa vakamau na tagane kei na yalewa, ena isema oqori e vaka ga ni rau sa mai ‘duabau na lewe.’ Ni rau veiyacovi e rua erau se bera ni vakamau se rau veidauci, o rau tale ga erau mai cokoti vata me ‘duabau na lewe,’—ia na isema oqori e dukadukali ena mata ni Kalou.a Kena ikuri, e sega ni yavutaki ena loloma na veidauci. Ena sala cava?​—Marika 10:7-9, VV; 1 Korinica 6:9, 10, 16, NW.

E sega ni yavutaki ena loloma dina na veidauci baleta ni oti ga nodrau veiyacovi na lerua, erau veitalatala tale. Sega wale ga ni dau veivakalolovirataki na veidauci, e kauta tale ga mai na mate ca, bukete i sala, kei na vutugu. Qai ca sara ni beci kina na ivakatagedegede uasivi ni Kalou. O koya gona, e yali na loloma kei na veinanumi ena veidauci, ia o koya e vakavurea, e sega ni kauaitaka nona marau kei na nona tiko vinaka mai muri o koya adua.

Na lotu Vakarisito e veidauci e buturaka sobu nona dodonu na tacina vakayalo. (1 Cesalonaika 4:3-6) Me kena ivakaraitaki, o ira era kaya voli nira lotu Vakarisito ra qai veidauci era vakadukadukalitaka na ivavakoso vakarisito. (Iperiu 12:15, 16) Kena ikuri, e lai tawasavasava tale ga kina o koya e dauci, ia ke se bera ni vakawati na cauravou se goneyalewa oya, sa na dukadukali rawa tu yani ena gauna e qai vakawati kina. Ena rogorogo ca tale ga nona vuvale, kei na vuvale i koya e dauca. Kena iotioti, o rau na veidauci erau beca na Kalou, ni rau vakararawataka na yalona ena nodrau voroka na lawa kei na ivakavuvuli dodonu vakalou. (Same 78:40, 41) Ia o Jiova ena “cudrutaka” na itovo torosobu kece ga vaka oya era cakava na sega ni veivutuni. (1 Cesalonaika 4:6) Sa rauta me tukuna na iVolatabu meda “dro tani mai na daudara” se veidauci!​—1 Korinica 6:18.

O sa domona tiko e dua o nanuma mo na vakawatitaka? Vakayagataka sara nomudrau gauna ni veikilai oqo mo drau vaqaqacotaka nomudrau veikilai kei na veinuitaki. Vakasamataka mada oqo: Rawa vakacava vua e dua na yalewa me nuitaka na tagane e nona ivalavala na dauyalewa? Ena rawa beka vua e dua na tagane me doka qai vakamareqeta na yalewa e beca na lawa ni Kalou ena nona lai vakaceguya tu nona gagano, se me vakamarautaka e dua na tagane?

Nanuma tale ga oqo, o ira era beca na ivakatagedegede vinaka ni Kalou era na tauca na vuana. (Kalatia 6:7) Kaya na iVolatabu: “Ko koya sa daudara sai valavala ca ki na yagona.” (1 Korinica 6:18; Vosa Vakaibalebale 7:5-27) Ia kevaka erau veivutuni dina o rau sa veidauci, saga vakaukaua me rau veivinakati tale kei na Kalou, vaqaqacotaka tale ga nodrau veinuitaki, lakolako sa na sega ni qai ora tale tiko na lomadrau. Ia ena tiko ga na mawe ni nodrau itovo ca. Erau veivutunitaka nodrau veidauci e dua na veiwatini gone. So na gauna, dau vaka oqo nona nanuma o tagane: ‘De dua, e vu ni neirau dau veivala na yavu ca keirau tauyavutaka mai kina neirau veikilai.’

Loloma Dina e Sega ni Nanumi Koya Ga

Sa macala ni loloma dina ena dau salavata kei na dodomo, ia ena sega ga ni “cakava na ka sa sega ni kilikili kaya, sa sega [tale ga] ni qara na ka me nona ga.” (1 Korinica 13:4, 5) O koya e loloma dina ena kauaitaka nona tiko vinaka kei na nona tiko marau na kena isa. Na loloma vaka oqori ena uqeti rau na tagane kei na yalewa me rau veidokai, me rau ciqoma tale ga ni gauna ga e dodonu me rau qai veiyacovi kina, me vaka ni oqo na isolisoli ni Kalou, oya ni rau sa vakamau.​—Iperiu 13:4.

E bibi vei ira na gone nira qai sucu mai, na bula vakawati e vakilai kina na yalo ni veinuitaki kei na vakacegu, ni a inaki ni Kalou mera susugi ena vuvale e kune kina na veilomani kei na vakacegu. (Efeso 6:1-4) Ena dei ga na veidinadinati ena kedrau maliwa e rua ni rau sa vakamau. Erau bubuluitaka kina mai vu ni lomadrau ni rau na veilomani rau qai veikaroni tiko ena nodrau bula kece, ena gauna vinaka kei na gauna ca.​—Roma 7:2, 3.

Na isolisoli ni veiyacovi e dau vakavuna me rau veivolekati na veiwatini. Ni vakilai na marau ena nodrau bula vakawati, erau na marautaka qai veivakacegui dina vei rau na nodrau dau veiyacovi—rau na sega ni maduataka, ena sega ni vakaleqai nodrau lewaeloma, rau na sega tale ga ni talaidredre vua na Dauveibuli.

[iVakamacala e ra]

O BAU VAQAQA BEKA?

◼ Na cava na rai ni Kalou me baleta na veiyacovi ni se bera na vakawati?​—1 Korinica 6:9, 10, NW.

◼ Na cava e vakavuleqa kina na veidauci?​—1 Korinica 6:18, NW.

◼ Erau na vakaraitaka vakacava e rua erau veidomoni na loloma dina?​—1 Korinica 13:4, 5.