Au a Gone Cidroi

Talanoataka o Meros William Sunday

Au tuberi meu lomana na Kalou niu se gonedramidrami; ia au biubiu mai vale niu yabaki 18 ena noqu vakau yaloqu. Via 13 na yabaki noqu bula voli me vaka na gone cidroi a cavuta o Jisu. (Luke 15:11-24) Au sa qai dau volitaki wainimate gaga, voleka tale ga ni vakarusa vakadua na noqu bula. Ia, meu tukuna mada na ka a vakavuna noqu lakosese, kei na noqu qai kilai yaloqu tale.

AU SUCU ena 1956. Erau lotu Vakarisito ruarua na noqu itubutubu, keitou lewe ciwa na gone, o yau na ikarua ni qase. Keitou vakaitikotiko e Ilesha, e dua na tauni ena cevaira kei Nigeria. A susu ena lotu Katolika o tamaqu, ia ena 1945 a solia vua o nona tatalevu na ivola The Harp of God.a Ni wilika oti na ivola oqo o tamaqu, sa tekivu vaqarai ira sara ga na iVakadinadina i Jiova. E mani papitaiso ena 1946, oti vakalailai oya sa qai papitaiso o Na.

Au se nanuma vinaka tu ga na qaqaco ni noqu dau vakabauti Jiova niu se gone, kei na noqu dau yalogu meu tomani rau noqu itubutubu ena cakacaka vakavunau. E dau vakavulici au ena iVolatabu o tamaqu. So na gauna e dau vakavulici au o Alice Obarah, na watina e ivakatawa dauveilakoyaki. Erau a vinakata noqu itubutubu meu na vakaitavi ena cakacaka vakaitalatala vakatabakidua niu qase mai. Ia, a vakatura o Na meu na vuli mada e liu ena sekeneri.

Ena gauna ga au tekivu vuli kina ena sekeneri, niu se yabaki 16, sa tekivu tale ga na noqu vakailala vata kei ira e koronivuli era sega ni doka na iVolatabu. Oya e dua na noqu cala levu! Au sa tekivu vakatavako, au vakaitavi tale ga ena veiyacovi tawadodonu. Au sa vakila ni sega ni veiriti na ivakarau ni noqu bula kei na veika au vakavulici kina ena soqoni. Au sa mani muduka na noqu dau lakova na soqoni kei na noqu vakaitavi ena cakacaka vakavunau e veivale. Dua na ka na nodrau rarawa na noqu itubutubu, ia, au sa sega tale ni qai kauaitaka e dua.

Biubiu Mai Vale

Oti e rua na yabaki noqu vuli ena sekeneri, au sa biubiu mai vale meu lai tiko vata kei ira noqu itokani ena neitou yasayasa. So na gauna au dau lako lo i vale meu lai qoqona mai na kakana ga au tara rawa, au dro lesu. Dua na ka na lomaleqa nei tamaqu, sa sega ni qai via sauma na noqu icurucuru ena nona nuitaka niu na veisau kina.

Ia, gauna vata oya e soli kina vei au e dua na sikolasivi. E sa bolea me sauma na noqu vuli e dua mai Sikoteladi, so na gauna e dau vakauta mai vei au e so na iloloma kei na ilavo. Ena gauna vata oqori, erau sa muduka tale ga kina e rua na taciqu na nodrau dau sosoqoni vata kei ira na iVakadinadina i Jiova. Oqo e vakamosia sara ga na yalodrau na noqu itubutubu. Vakavica nona mai vakamamasu vei au o tinaqu ena nona tagi. E dau tarai au na madua ni yaco oqo, ia au sega ga ni veisautaka na noqu ivalavala.

Ena Veikorolelevu

Niu vakaotia noqu vuli ena 1977, au a gole i Lagos, au lai cakacaka sara. Sega ni dede au sa volia e dua na motoka ni usa pasidia ena dua na ilavo au a rawata vakailawaki. Ni sa levu na noqu ilavo, au sa tekivu vakayagataka na wainimate gaga, au lakova tale ga vakalevu na valenidanisi kei na vale ni yalewa ca. Lakolako sa vakavucesa vei au na bula e Lagos, au mani toki i Lodoni ena 1981. Mai kea, au sa qai dewa i Belgium. Au lai vuli vosa vakaVaranise e kea, au cakacaka vagauna tale ga ena dua na valenikana. Ia, e levu na gauna au dau vakau motoka kei na iyaya vakalivaliva tale e so i Nigeria.

Dua na gauna a volavola sara o tamaqu ina valenivolavola ni tabana ni iVakadinadina i Jiova mai Belgium me kerei ira me dua e mai raici au, me uqeti au tale ga meu vulica na iVolatabu. Ia, veigauna kece era lako mai noqu vale, au dau vakatalai ira. Au sa lai lewena e dua na lotu e dau caka kina na kana, gunu, kei na qito ni oti na lotu.

Volitaki Wainimate Gaga

Ena 1982, au vakauta i Nigeria e dua na motoka saulevu sara. Au mani lako meu lai raica sara ga na kena talaci. Ra mani raica na tabana ni kasitaba e Nigeria niu cakava vakailawaki na kena ivola, au mai vesu me 40 na siga. Mani lako mai o tamaqu, mai sauma sara na ilavo meu belemauti kina. Ia, au gadreva e so tale na ilavo me vakacavari vinaka kina na veilewai, au mani kauta lesu i Belgium e so na ivoli, kei na vica na kilo na mariwana. O koya gona ni talaci na noqu kisi, au sa tekivu tale ena volitaki wainimate gaga.

Ena dua na noqu ilakolako, au a lai vesu mai Necaladi. Ra vakavodoki au lesu na tabana ni curuvanua mai kea ena dua na waqavuka i Nigeria. Ena vuka oqo, au sotava tale e so na dau volitaki wainimate gaga, tauyavu sara na neimami veidinadinati ni veivoli. Ena Janueri 1984, au a toki kina ena dua tale na matanitu e Aferika. Niu kila na vosa vakaVaranise, na vosa e vosataki ena vanua oya, e totolo sara noqu lai veikilai kei ira na ovisa, sotia, kei ira na cakacaka ena tabana ni curuvanua. Oqo e rawarawa sara kina na vakacurumi mai ni vica vata na udolu na kilo mariwana ena matanitu oqo.

Vesu

Au baci sotava na leqa. Keirau a sa veivosaki kei na dua na kavetani ni mataivalu me vukei au me siviti iratou rawa ena raraniwaqavuka ena matanitu oya na noqu ivoli. Ia, e qai bera yani na kavetani oya, au mani vesu. Era mokulaki au vakaca na ovisa me yacova niu ciba. Era kauti au ena dua na valenibula ra lai biuti au tu kina ena nodra nuitaka niu sa na mate. Ia, au mani bula, e muri sa qai tau na kequ itotogi, au bala sara i valeniveivesu.

Bera niu curu i valeniveivesu, au a kerea e dua noqu itokani me raica tiko noqu vale. Niu qai suka mai sa volitaki na noqu vale, sega tale ga na kena o na noqu itokani oya. Ena noqu sasaga bula, sega ni bera noqu baci lesuva na volitaki mariwana. Ia, ni oti ga e tini na siga, au se baci vesu, au bala tale i valeniveivesu me vula tolu. Ena gauna au sere mai kina, au vovoleka sara ni mate ena kaukaua ni mate a tarai au voli ena gauna oya. Au sega ni kila ga na noqu sa butuki Lagos tale.

Suka Tale ena Noqu Bisinisi Makawa

Au sotavi ira e so noqu ilala e Lagos, keitou mua sara i Idia, keitou lai volia kina na waigaga na heroin e kena isau e rauta ni $600,000. Mai Bombay, (yacana nikua o Mumbai) keitou gole sara i Suwitisiladi, oti oya keitou dewa i Potukali, keitou lai tini sara i Sipeni. Dua na ka na tubu keitou rawata, keitou sa mani suka i Lagos, ia e duidui na sala keitou muria. Ena icavacava ni 1984, au volitaka tale kina e dua na iusausa levu ni wainimate gaga. Au a saga sara ga vakaukaua meu rawata e duanamilioni na dola, oti meu sa qai toki i Mereke meu lai vakaitikotiko kina ena vo ni noqu bula.

Ena 1986, au kumuna vata kece na ilavo e tu vei au meu volia kina e Lagos e so na wainimate gaga na heroin. Na kena oqo e sega ni veiwaki tale kei na dua na ka. Au mani kauta ina dua tale na matanitu, e lai taura e dua na dauveivoli kocokoco, ia e sega sara ga ni sauma. Dua na ka na noqu lomaleqataka noqu bula, au mani lesu i Lagos, au sega ni qai cavuta e dua na ka ena ka e yaco oya. Oti sara ga vakadua vei au. Lala noqu taga, veilecayaki tale ga noqu vakasama. Qai vakadua meu dabe, qai vakasamataka se cava sara mada na inaki ni noqu bula. ‘Cava e veilecayaki kina vakalevu noqu bula?’ Au vaqaqa lo e lomaqu.

Lesu Vua na Kalou

Ena dua na bogi ni oti vakalailai oya, au sa qai masuti Jiova me vukei au. Ena mataka e tarava, erau mai tukituki e mata ni noqu vale e dua na veiwatini qase. Erau iVakadinadina i Jiova. Au vakarogoci rau vakamalua, au taura sara e dua na ivoladraudrau. Au sa qai vakamacalataka vei rau ni “rau iVakadinadina i Jiova na noqu itubutubu.” Au tomana ni “a dau vakavulici au ena iVolatabu o Alice Obarah.”

Mani sauma mai na kena turaga oqo, o P. K. Ogbanefe: “Keirau kilai rau vinaka na Obarah. Erau sa cakacaka tiko nikua ena neimami valenivolavola ni tabana e Nigeria, e tiko e Lagos.” Rau mani uqeti au meu qai lai sikovi rau na Obarah ena dua na siga. E vakayaloqaqataki au sara ga na neitou lai sota. Oti oya, keirau sa qai tekivu vuli iVolatabu kei Brother Ogbanefe, tekivu tale ga meu sa veisautaka na ivakarau ni noqu bula dukadukali. Sega ni ka rawarawa oqo baleta ni sa balavu na noqu vakayagataka tiko na wainimate gaga. Ia, e sa lomaqu sara ga meu sa vakasavasavataka na noqu bula.

Au sotava e levu sara na ka dredre kei na veivakatovolei! Era dau lako mai noqu vale e so au dau nanuma tu nira itokani dina, ra qai temaki au ena levu sara na ka. Dua na gauna au bau sikalutu tale ena vakatavako kei na itovo vakasisila. Au mani talaucaka vei Jiova na lomaqu ena masu. Sa mai macala vei au ni o ira na noqu itokani vakavuravura era na sega ni vukei au, era a saga ga mera vakaleqai au tale. Au siqema niu na qai toso vinaka ga vakayalo keu toki tani mai Lagos. Ia, au madua ni lesu tale i Ilesha. Dua na siga au sa sega ni vosota rawa, au sa qai volavola vei tamaqu kei tuakaqu, au vakaraitaka vei rau niu sa via lesu mai vale. Erau na vakadonuya se sega.

Vakaraitaka vei au o tamaqu ni dola tu ga na vale, tukuna tale ga o tuakaqu ni na vukei au vakailavo. Rauta gona ni tini na yabaki noqu vakanadakui rau noqu itubutubu, au sa qai lesu tale. Au ciqomi ena marau. E kaya ga o tinaqu ena levu ni nona marau, “Vinaka Jiova!” E kaya vei au o tamaqu ena yakavi oya ni suka mai vale, “ena vukei iko o Jiova.” Ni keitou tiko kece vakavuvale, sa qai masuti Jiova o tamaqu me vukei au niu sa lesu mai oqo meu cakava na lomana.

Qarava na iTavi a Dodonu Meu se Qarava Makawa

E totolo sara noqu toso niu tekivu vulica tale na iVolatabu; au papitaiso sara ena 24 Epereli, 1988. Au sa tekivu solia sara ga noqu vinaka kece ena cakacaka vakaitalatala. Ena 1 Noveba, 1989, au sa tekivu painia​—na cakacaka vakaitalatala vakatabakidua. Ena 1995, au a sureti meu lai tiko ena ika10 ni kalasi ena Vuli ni Veiqaravi Vakaitalatala e vakayacori Nigeria. Ena vula o Julai 1998, au sa lesi meu ivakatawa dauveilakoyaki, meu dau sikova na veivavakoso ni iVakadinadina i Jiova. Oti e dua tale na yabaki, au vakalougatataki ena neirau sa vakamau kei Ruth, e sa yaco tale ga me noqu itokani ena cakacaka ni veisiko.

Era toso vinaka tale ga vakayalo e so na lewe ni noqu vuvale. Dua na taciqu a biuti Jiova e sa lesu tale mai ena nona sa mai ciqoma tale na sokalou savasava, e sa papitaiso sara. Au marau vakalevu ni se bula tiko o tamaqu keirau sa lesu tale mai. E marautaka voli nona ilesilesi vakadauveiqaravi ni ivavakoso me yacova nona takali ena 1993 ni sa yabaki 75. Se qaravi Jiova tiko ga ena yalogu o tinaqu e Ilesha.

Au butuka e 16 na matanitu e Urope, Esia, kei Aferika ena noqu qara na iyau. Ia, au cokai au ga vakavuqa ena yaluma kei na rarawa. (1 Timoci 6:9, 10) Niu rai lesu, au veivutunitaka dina na gauna levu au vakamaumautaka ena wainimate gaga kei na itovo vakasisila. Au rarawataka dina na noqu a vakamosia na yalo i Jiova kei na yalodratou e vale. Ia, au marau baleta niu kilai yaloqu tale ni bera niu mate. Au na saga ena noqu vinaka kece meu yalodina tiko ga vei Jiova, meu qaravi koya me tawamudu.

[iVakamacala e ra]

[iYaloyalo ena tabana e 13]

Niu se gone talaidredre

[iYaloyalo ena tabana e 15]

Siga au papitaiso kina

[iYaloyalo ena tabana e 15]

O yau kei Ruth na watiqu