Na Ka Era Tukuna Eso

Varanise “O ira na iVakadinadina i Jiova era lewenivanua dau doka na lawa ni matanitu. . . . Era sega ni dauvakacaca se ra vakaleqa na nodra tiko vinaka na lewenivanua. Era cakacaka, era sauma na nodra ivakacavacava, era vakaitavi ena veivakatorocaketaki ni matanitu ra dau cau tale ga ena isoqosoqo era dau veivukei. Na nodra veimaliwai vinaka kei na nodra soqoni ena duavata na duidui matatamata mai na duidui vanua e ka marautaki dina meda raica. . . . Ke ra iVakadinadina i Jiova kece na tamata, ena sega na neimami cakacaka na ovisa.”​—Mata ni dua na unioni ni ovisa mai Varanise.

Ukraine “O ira na iVakadinadina i Jiova era dau vakavulici luvedra ena ivakavuvuli vakaivolatabu. Era vakavulici luvedra me kua ni laurai vei ira na itovo, ivukivuki kei na ivakarau ni rai vakavuravura e sa ciqomi tu nikua, ia e rawa ni vakaleqai ira kei ira tale na so. Era dau vakasalataki luvedra ena rerevaki ni wainimate gaga, na vakatavako kei na gunuvi sivia ni alakaolo. Era kila na bibi ni daudina kei na cakacaka vakaukaua. . . . O ira na iVakadinadina i Jiova era dau vakavulici luvedra ena itovo vinaka, mera dau dokai ira na veiliutaki, dokai ira tale na so kei na ka era taukena, mera dau muria tale ga na lawa.”​—The History of Religion in Ukraine, e vola o Parofesa Petro Yarotskyi.

Itali “Era tu ena Olympic Stadium e le tolusagavulu na udolu ra qai vakadirorogo . . . E sega na benu ca, na kosakosa, na kaikaila me vaka a laurai ena Olympic Stadium nanoa . . . E sega kina na ivukivuki tawakilikili, na tavako se na alakaolo. E laurai ga ni cegai na iVolatabu, era volavola na vakarorogo, ra qai dabe vakadirorogo na gone.”​—Volatukutukutaki ena niusiveva na L’Unità me baleta e dua na soqo ni tikina ni iVakadinadina i Jiova mai Roma.

Igiladi “E tukuna na Archdeacon ni Cheltenham ni gadrevi ena [Lotu Jaji] na ilawalawa tamata era yalodina me vakataki ira na iVakadinadina i Jiova, era dau lai vunau e veivale.”​—The Gazette, Gloucester Diocese.

Necaladi Era solia e dua na ivola vei ira na iVakadinadina o ira na vakaitikotiko volekata na Kingdom Hall ena siti o Leeuwarden, e volai tu kina: “Keimami via vakavinavinakataki kemuni ena rairai vinaka ni gaunisala na Noorderweg [Noorder Road]. Era dau vakaisulu vinaka ra qai vakaitovo na nomuni lewenilotu. Era vakaitovo na gone, o ira na uabula era sega ni dau vakelea vakaveitalia na motoka, era sega ni benuca na gaunisala, e dau savasava tu ga qai rairai vinaka na lomanibai ni Kingdom Hall. Keimami nuitaka ni na balavu na noda tiko veitikivi, baleta keimami marautaka vakalevu na nomuni tiko ena yasayasa qo.”

Mexico O Elio Masferrer, e dua na parofesa qai dua na dauvakadidike ena National School of Anthropology and History, e tukuna ni o ira na iVakadinadina era dau vukei ira era “sotava na leqa lelevu e dau yaco ena vuvale me vaka na kucu, na ivalavala veivakalolomataki tale eso, na gunu vakasivia, kei na leqa e vu mai na vakayagataki sivia ni wainimate gaga.” Na ka era dau veivakavulici kina na iVakadinadina, e tukuna o parofesa “e veisautaka na nodra rai o ira era dau beci ira tu,” era vukei tale ga mera “vakamarautaka na Kalou mera kua ni sotava na leqa lelevu.”​—Niusiveva na Excélsior.

Brazil E ripotetaka e dua na niusiveva: “E sega ni vakamelei rawa na isoqosoqo ni iVakadinadina i Jiova. Na vanua era dau soqoni kina e savasava tu ga. Na ka kece e tuvanaki vakamatau. . . Ni oti na nodra soqo, e dau savasava cake sara na vanua e caka kina na nodra soqo ni vakatauvatani kei na gauna era se bera ni vakayagataka kina. Ni vakacagau tiko na vunau, e sega sara ga ni dua na rorogo. Era sega ni dau veibilibili. E laurai ga kina na itovo vinaka. . . . E dua dina na lotu e tuvanaki matau. Era kila na ibalebale ni nona sokaloutaki na Kalou.”​—Comércio da Franca.

Era vakabauta dei na iVakadinadina i Jiova ni Dauveibuli ga e kila vinaka cake na ivakavuvuli meda muria. (Aisea 48:17, 18) Era dau vakacaucautaki koya ga na iVakadinadina ni dau tukuni eso na ka vinaka me baleti ira. E tukuna o Jisu: “Me serau . . . na nomuni cina, mera raica na tamata na nomuni ivakarau vinaka, mera vakalagilagia na Tamamuni mai lomalagi.”​—Maciu 5:16.