Na Taro e Dau Tarogi

Na cava era dau vosavakacacataki kina na iVakadinadina i Jiova?

E levu era sega ga ni kila na ka dina era vakabauta na iVakadinadina i Jiova. Eso tale era rairai sega ni dau taleitaka na nodra cakacaka vakavunau. Ia na kena dina ga oya, era cakava qo na iVakadinadina nira lomani ira na wekadra, era kila tiko “nira na bula o ira kece era masuta na yaca i Jiova.”​—Roma 10:13.

Era Lotu vaKarisito na iVakadinadina i Jiova? Era lotu ribatani?

Era lotu vaKarisito na iVakadinadina i Jiova baleta nira yavutaka na nodra ivakavuvuli ena iVolatabu. Ia era sega ni Lotu Tawase, lotu Katolika, se Orthodox, ni so na ivakavuvuli ni lotu qori e sega ni yavutaki vakaivolatabu. Me kena ivakaraitaki, na iVolatabu e sega ni vakavuvulitaka ni na vakararawataki ira tawamudu na tamata i eli na Kalou—e vatuka ni loloma. E sega ni vakavulica ni bula tiko e dua na ka nida mate, e sega tale ga ni tukuna mera vakaitavi na lotu vaKarisito ena veika vakapolitiki.​—Isikeli 18:4; Roma 6:23.a

Kuria qo, era lotu vaKarisito na iVakadinadina i Jiova baleta era vakatotomuri Karisito ena nodra bula e veisiga. Me kena ivakaraitaki, o Karisito kei ira na lotu vaKarisito taumada era sega ni dau siova na veika vakapolitiki, ia era dau vunautaka ga na Matanitu ni Kalou. (Luke 4:43; Joni 15:19; 17:14) Era vakatotomuria gona na iVakadinadina i Jiova na nodra ivakaraitaki nira sega ni vakaitavi ena ka vakapolitiki. Ia ra dau lako ga mera lai veitalanoa kei ira na tamata, era dau vakamacala vinaka ra qai vakadinadinataka na ka era vakamacalataka me vaka ga era dau cakava na lotu vaKarisito taumada.​—Cakacaka 19:8.

Na matalotu ribatani e dua na ilawalawa era sega ni duavata se marautaka na ka e caka tiko ena isoqosoqo lotu era lewena, se ra tawase mai na dua na lotu mera lai tauyavutaka e dua na lotu vou. Era sega ni lotu ribatani na iVakadinadina i Jiova nira sega ni tawase mai na dua na lotu.

Na cava e dau caka ena nodra soqoni na iVakadinadina?

Na nodra soqoni e dola raraba vei ira na lewenivanua, e dau vulici kina na iVolatabu, ra qai vakataivi kina vakalevu na vakarorogo. E dua na nodra soqoni e dau caka e veimacawa na Koronivuli ni Vuli Vunau, era vukei kina na lewe ni ivavakoso mera maqosataka na nodra veivakavulici, na nodra wilivola kei na nodra vakekeli. E dua tale qo na ivunau vakaivolatabu era taleitaka vakalevu o ira era sega ni iVakadinadina, e dau 30 na miniti na kena dede. Ni oti ga oya, e kena ivakarau me vulici na iVolatabu ni vakayagataki na mekesini na Vale ni Vakatawa. E dau tekivu qai cava na soqoni ena sere kei na masu, e sega ni dau kerei na ilavo se veikauyaki e dua na veleti me kumuni kina.​—2 Korinica 8:12.

E vakailavotaki vakacava na nodra cakacaka na iVakadinadina i Jiova?

Na nodra cakacaka e vakailavotaki ena cau. Era sega ni lavaka mera saumi ena gauna era cakava kina na papitaiso, vakamau, veibulu se so tale na veiqaravi vakalotu. E sega tale ga ni lavaki mera solia e dua na iwase ni ilavo ena isoqosoqo era lewena. O koya e via cau, e soli vua na galala me lai biuta na nona cau ena dua na kato ena Kingdom Hall, e sega ni dua tale e raica na ka e biu. Era tabaka ga na nodra ivola vakaivolatabu, qori e vakalailaitaka na ilavo e vakayagataki. E rawarawa ga na itaratara ni nodra Kingdom Hall kei na nodra valenivolavola ni tabana ra qai dau cakava qori o ira na bole cakacaka.

Era dau ciqoma na iVakadinadina i Jiova na veiqaravi vakavuniwai?

Io, era dau qara na veiqaravi vakavuniwai vinaka duadua me baleti ira kei ira na nodra vuvale. Kuria qo, e levu tale ga vei ira na iVakadinadina era cakacaka ena vanua ni veiqaravi vakavuniwai, eso era nasi, ivukevuke ni vuniwai (paramedic), vuniwai, eso tale ga era vuniwai ni veisele. Ia era sega ga ni taura na dra na iVakadinadina i Jiova. E tukuna na iVolatabu: “Vakatabui kemuni mai na . . . dra.” (Cakacaka 15:28, 29) E kurabuitaki ni dua na iwiliwili levu ni vuniwai era raica me “veiqaravi vakavuniwai vinaka duadua” na kena e sega ni vakayagataki kina na dra, ni sega ni dau yaco kina na leqa e rawa ni vakavuna na tauri dra.